Read idege ỊJỌN 10 Bible Online

ỊJỌN 10 - idege bible

ỊJỌN 10

¹IJisọsị myịmyị byaa yẹkẹẹ, “Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ jụ bwu ọnụ nya ụgbẹyị kele ka ẹpwụ nya ẹpwang nya ịkpịlọ ka, kọ ri ká ọngọọwa á kpụ uhye bwu ẹga ọkịla kele aalẹ, oloyi, ọngọọwa a ri lẹ!

²Ma, ọngọlẹ kọọwa ayịdang á jụ bwu ọnang nya ụgbẹyị nya ube ọọwa kele ka ẹga nya ịkpịlọ lẹ aalẹ, ọngọọwa a ri ọngọgbikpịlọ ịịwa lẹlẹ.

³Aalẹ, ọngọgbikpịlọ ịịwa kem, ọngọ gbe ọnang nya ụgbẹyị ube ọọwa, a ka wụrụ ụgbẹyị ha lẹ. Aalẹ, ọngọọwa, ịkpịlọ ịlụwa a tị kaa wo omyi nyamwụ ịnyịnyị lẹ chajị, ọngọọwa kaa wụrụ ịkpịlọ nyamwụ ọnyọnyọọnyị ẹnyị lẹ, ọ kaa kpaa kpehe ba ịlọmwụ lẹlẹ.

⁴Ụka kọ gba ịkpịlọ ịịwa kpehe bwu ẹpwang nyaa kpá lẹ, ọ kaa ji ịlahị nyaa lẹ, ịkpịlọ ịịwa a kaa bọọ jẹ lẹlẹ. Chajị, ị jẹ́ omyi nyamwụ datị.

⁵Ó ri ká ọngga á kele ka ẹga nya ịkpịlọ ịịwa, ị́ kaa myị-ị ba ọngga ọọwa jẹ ka. Ọkọkọ nya ọọwa lẹ, ị kaa rụnyẹ rụ hyoo. Chajị, ị kaa jẹ́ omyi nya ọngga ọọwa datị hi ịnya ọngọ gbaa gbe.”

⁶IJisọsị kpa oja ọkpịta ọwẹ ya ẹla taa. Ma, alụwa á tị wo etu nyamwụ jaabwọ kọ ri kpangga datị ka.

⁷Ịnyị, iJisọsị a myịmyị byaa yẹkẹẹ, “Am kpakpakpa a ri ọnụ ụgbẹyị o-bwu ka ube nya ịkpịlọ nya Ohe Oluhye lẹ.

⁸Angị ịkịla ịlẹ wuu kị warị jene nyam, ri aleyi bala alagbụrụ wuu. Ma, ịkpịlọ ịịwa á wo omyi nyaa kpong-kpong ka.

⁹Am kpakpakpa a ri ọnụ ụgbẹyị o-bwu ka ube nya ịkpịlọ nya Ohe Oluhye ọọwa lẹlẹ. Lẹ, ọng myị́ ọng ọlẹ kọ ka myị-ị bwu ẹga nyam jụ kele ka ube nya ịkpịlọ ọọwa lẹ aalẹ, ọ ka chịda lẹ. Aalẹ, ọngọọwa ka la ọngịrị juwa jụ bwu ọnang nya ube ọọwa kpehe bala ọ-jụ ka ẹpwang, ka juwa tịtọ nya ang oriri jaabwọ kọ họ́ọ kaka ba myị́ ịnyịnyị lẹ.

¹⁰Oloyi kaa ka ẹpwa nya ọngịnyị ehe, chajị nyọka hu ang yoyi bwu ụwa bala ọ-nwụ ọngịnyị ịlụwa bala ọ-ka ta ang myị́ ang ịlụwa wuu ayịreji. Ma, am lẹ, m tị warị wẹ odehe ọlẹ, chajị ká angịnyị ehe ka jẹ́-ẹ bwulam la ọhịhị nya Ohe Oluhye, kị ka jẹ́-ẹ la ọhịhị ọọwa mwụ aba ba ịnyị!”

¹¹“Am kpakpakpa a ri ọngọgbikpịlọ ọnyịịla lẹ! Ọngọgbikpịlọ ọnyịịla kaa nwụlanọ nyọka gbu wọnụ nya ịkpịlọ nyamwụ ju.

¹²Ma, ọngọlẹ kị tị diro-diro kaka gbe ịkpịlọ nya okpoko, kọọwa ayịdang á la ịkpịlọ ịịwa ka lẹ, ụka kọ yẹ odọmwụu kọ juwa warị, ọ kaa rụnyẹ rụ hi ịkpịlọ ịịwa. Ọọwa lẹ, odọmwụu ọọwa, a kaa kele kaka wu ịkpịlọ ịịwa bala o-nyaa epepe wuu lẹlẹ.

¹³Ọngọlẹ kị diro-diro kaka gbe ịkpịlọ, kaa rụnyẹ rụ ịnyị, chajị, ọwa ayịdang, á kaa myị-ị me irya, juwa kpahị ju ịkpịlọ ịịwa yẹẹyẹẹ kpong-kpong ka, a du lẹ.

¹⁴Am kpakpakpa a ri ọngọgbikpịlọ ọnyịịla ọọwa lẹlẹ. Ịkpịlọ nyam jẹ́m datị hi angịkịla. Am ayịdang tị tịtị jẹ́ ịkpịlọ nyam ịịwa yẹẹyẹẹ.

¹⁵Chajị, ịnyịnyị Adịda ayịdang a jẹ́m yẹẹyẹẹ bala, am, ọ-tịtị jẹ́ Adam yẹẹyẹẹ lẹlẹ. Am ayịdang nwụlanọ kam ka gbu wọnụ nya ịkpịlọ nyam ịịwa ju lẹ.

¹⁶Ịkpịlọ nyam ịkịla ịhyẹ juwa, ịlẹ kị ri ebwo nya ịkpịlọ ịlẹ ka. M ka kpa ịkpịlọ ịịwa warị kaka jula ịkịla ịlẹ ịnyịnyị. Ịkpịlọ ịịwa tị ka wo omyi nyam ịnyịnyị. Ọọwa lẹ, ebwo nya ịkpịlọ imimiiye ịwẹ a ka yẹjula awụlẹ lẹ, ị ka ji ekpeleji nya ọngọgbikpịlọ ookpokpo ịnyịnyị lẹlẹ.”

¹⁷“Ang odudu kam há Ohe Oluhye Adịda lụmẹ ri chajị nyọlẹ kaam ayịdang myị hu ọhịhị nyam deeji ga ha igu. Chajị kam ka myịmyị-ị̀ hu ọhịhị nyam ọọwa tịrẹkpẹ bwu eji.

¹⁸Ọngọngọhẹ ọkịla á juwa ye ọhịhị nyam ọọwa bwu ẹga nyam ka. Ma, am ayịdang a wẹẹ tụụbwọ hyoo deeji la ịlọm lẹ. Chajị, m la ọngịrị nyọka tụụbwọ hi ọhịhị nyam deeji la irya nya ịlọm myị́ bala ọ-ka hwoo bwu eji myị́ ịnyịnyị. Chajị, ịnyị, Ohe Oluhye Adam, a dam ehile yẹkẹẹ, am nyị họ lẹ.”

¹⁹Ụka ọọwa lẹ, ala iJuu ịlụwa a chị ịlaa ebwo imiiye jaabwọ ká irya omeme nyaa ọlẹga nya iJisọsị gu ene hi awụlẹ, chajị nya ala ịlẹ kọ ya wẹ lẹlẹ.

²⁰Iru nya angịnyị lẹpwụ nyaa juwa yẹkẹẹ, “Olegu onyobyi a wẹẹ họ ta ọlẹng ọwẹ lẹ, ọlụla, ọ ri lẹ. Ịịyẹ a tị́ du kanụ dọmwụ juwa ke ụrụ la ẹla oyaya nyamwụ kpong-kpong?”

²¹Ma, angịkịla juwa yẹkẹẹ, “Eheehe! Anyị, ọngọlẹ ká olegu onyobyi juwa wu, a tị́ ka jẹ́-ẹ juwa ya ẹla yẹẹyẹẹ ịịwẹ myị́? Anụ ya ká olegu onyobyi ka jẹ́-ẹ họ alidu uda nya idu ọkpụkpụ nyaa myị́?”

²²Ụka ọọwa, ang oriri ọtụka-ọtụka nya ala iJuu ọhẹ juwa i-iJerusalẹm. Ụka ọọwa ri ụka nya alogo ọtụka-ọtụka ọlẹ kị wụrụ “iwinta.” Ala iJuu kaa họ ang oriri ọọwa nya ọ-kpa kpịtịya nya ụka ọlẹ kị chị ịgọgọ ju ube ịgọgọ ọtụka nya Ohe Oluhye nyaa.

²³IJisọsị juwa jẹdịyẹ tụ ọnụụkpa ọlẹ kị wụrụ ọnụụkpa nya iSolomọn ụ-ụwa u-ube ịgọgọ ọtụka nya Ohe Oluhye nya ala iJuu ọọwa da.

²⁴Ọọwa lẹ, ala iJuu ịhyẹ a kele kaka dagaga ju iJisọsị lẹ, ị juwa ya ẹla tọọ yẹkẹẹ, “A tị́ ka tụụbwọ hiihi ẹ-ẹpwụ nya ukpowu chajị nya ịlọng tata kaka ba anyị? Ya ẹla nya ịlẹhị jehi alẹ mẹ! Ahụ kpakpakpa a ri ịKịrayịsị ọọwa lẹ?”

²⁵IJisọsị wẹ byaa yẹkẹẹ, “M tị́ ya jenu ene-ene lẹ. Ma, ánụ tị myị kpa ọkịlẹtụ ookpokpo myị lam kaka. Ụkụrwọ ẹbyẹbyị ịlẹ kam wẹẹ kpa ọngịrị nya Ohe Oluhye Adam họ wuu la ịlaa, a ri ibeenu nyam lẹ!

²⁶Ma, anụ ayịdang á tị myị myị lam kpong-kpong kaka. Chajị, ánụ ri ịkpịlọ nyam ka, ịnyị a du lẹ!

²⁷Angịlẹ kị ri ịkpịlọ nyam kaa wo omyi nyam. Am ayịdang tị jẹ́ ịkpịlọ nyam yẹẹyẹẹ. Ịkpịlọ ịịwa tị kaa bam jẹ ịnyịnyị.

²⁸M ya ọhịhị ọmyịmyị-ka haa lẹ. Ịwa ayịdang á ka gbu kpá ẹnẹnẹhẹ kaka. Ọngọngọhẹ á tị jẹ́-ẹ jwaa gbile kpa rụ la agbụrụ bwu ẹpwụtụbwọ nyam myị́ kpong-kpong kaka ịnyịnyị.

²⁹Ohe Oluhye Adam ọlẹ kọ kpa angịwẹ wam a ri Agụgụ ọlẹ kọ gụ ọng myị́ ọng wuu lẹlẹ. Ọngọngọhẹ á juwa ọlẹ kọ ka jụ angịịwa gbile kpa rụ la agbụrụ bwu ẹpwụtụbwọ nya Adịda ọọwa myị́ kpong-kpong kaka.

³⁰Am bala Adịda ọọwa ayịdang tị ri ọngịnyị ọngọ ookpokpo.”

³¹Ọọwa lẹ, ala iJuu ịịwa a go ajwọ myịmyị, ịnọ, kị ka da mịla iJisọsị lẹlẹ.

³²IJisọsị wẹ byaa yẹkẹẹ, “Iru nya ụkụrwọ ịnyịịla lụmẹ-lụmẹ ịlẹ kam họ ẹ-ẹpwarịrị nyanụ bwula ọngịrị nya Adam lẹ, oyina lẹpwụ nyaa, anụ tị́ tịtọ nyọka da ajwọ nwụm chajị nyamwụ kpong-kpong?”

³³Ala iJuu ịịwa wẹ byoo yẹkẹẹ, “Áhị́ tịtọ nyọka da ajwọ nwụng, chajị nya ụkụrwọ ọnyịịla ka! Ma, chajị nya ẹla o-ya pyị ẹ-ẹga nya Ohe Oluhye kem ịnyị! Chajị, ahụ ọngọlẹ ká ri ọngịnyị ehe ọlam-ọlam, a tị mwọọgịlẹ juwa hu ịlọng lala Ohe Oluhye ayịdang.”

³⁴IJisọsị wẹ byaa yẹkẹẹ, “Ị tị́ da kpehe rụ́ angịnyị ehe ẹ-ẹpwụ nya ụpwụ nya ehile nyanụ ẹ-ẹgẹhẹ yẹkẹẹ, ‘Ọng myị́ ọng lẹpwụ nyanụ wuu ri Ohe lẹ!’

³⁵Ịnọ, angịlẹ kị juwa kpa ụrụ wo ẹla nya Ohe Oluhye kem, a wẹ ká Ohe Oluhye ayịdang wụrụ Ohe wẹ ẹ-ẹgẹwẹ lẹ! Ahị tị jẹ́ yẹkẹẹ, ẹla myị́ ẹla ọlẹ ká Ụpwụ Ịgọgọ á ya lẹ aalẹ, ẹla ọọwa ri ẹla nya ịlẹhị ọ-pyịyọọ gbe oyi myị́ oyi lẹ.

³⁶Am ayịdang lẹ, Ohe Oluhye Adịda a tị chụm, dum ẹrụ lẹẹ warị wẹ odehe ọlẹ lẹ. Ee lẹ, anyị, anụ tị́ ka jẹ́-ẹ yẹkẹẹ, am nyị juwa ya ẹla pyị Ohe Oluhye chajị nyọlẹ kam yẹkẹẹ, am kpakpakpa a ri Ọnyẹwẹ nya Ohe Oluhye lẹlẹ, tị tị mẹ?

³⁷Ó ri kam juwa họ ụma nya ụkụrwọ ọ-lala ịnya Adam Ohe Oluhye kaka lẹ aalẹ, anụ myị lam kaka.

³⁸Ma, ọ́ tị ri ụma nya ụkụrwọ ị-lala ịnya Ohe Oluhye ọọwa kam lẹẹ họ ịnyịlẹhị lẹ aalẹ, ó riri kanụ ka myị-ị myị lam wẹwẹ ka aalẹ, anụ tụmwụ-tụmwụ myị la ụkụrwọ ẹbyẹbyị ịịwa, chajị kanụ ka jẹ́-ẹ jẹ́ myịmyị kpụrụrụ yẹkẹẹ, Ohe Oluhye Adịda nyị jam ẹ-ẹpwụ nyam ịnyịlẹhị bala o-ri yẹkẹẹ, am ayịdang nyị tị tịtị juwa ẹ-ẹpwụ nyamwụ ịnyịlẹhị ịnyịnyị mẹ.”

³⁹Angịwẹ myịmyị juwa maga kị ka wu iJisọsị. Ma, iJisọsị tị gwaa be ụ-ụwa.

⁴⁰IJisọsị rụ bwu ẹgẹwẹ kpoye nya Ihu ịJọdan kele ka ẹga ọlẹ ká ịJọn hụ juwa hụ angịnyị enyi Ohe nya ọgbanyẹ-ọgbanyẹ. Ịnyị, iJisọsị a hụwa ẹ-ẹga ọọwa lẹlẹ.

⁴¹Iru nya angịnyị lụmẹ-lụmẹ ba iJisọsị kele ka ẹga ọọwa. Angịịwa juwa yẹkẹẹ, “O ri nya ịlẹhị, ịJọn ọngọ hụ enyi Ohe lẹ, ọ́ họ ụkụrwọ ẹbyẹbyị ịtụka-ịtụka ka! Ma, ẹla myị́ ẹla ọlẹ kọ tị ya wuu rụ́ ọnyị ọlẹng ọlẹ lẹ, ọ ri nya ịlẹhị.”

⁴²Ọọwa lẹ, iru nya angịnyị lụmẹ-lụmẹ a myị la iJisọsị la ọkịlẹtụ ookpokpo ẹ-ẹga ọọwa lẹlẹ.