Read idege ỊJỌN 12 Bible Online

ỊJỌN 12 - idege bible

ỊJỌN 12

¹Ụka kọ hi ụtụrụ ịrwọnyẹ ká ẹnụtụrụ nya Ang Oriri Ọchịpwụrụ juwa ka pwụ lẹ, iJisọsị a kele ka epweji nya ịBẹtanị lẹlẹ. ỊBẹtanị ọọwa a ri epweji nya ịLasarọsị ọlẹ ká iJisọsị wuleji bwula igu lẹ.

²Ị họ ang oriri ha iJisọsị ụ-ụwa. ỊMata a ri ọngọ myị ẹrụ haa ụka ọọwa lẹ. ỊLasarọsị bala iJisọsị a tị ju epwedii nya ang oriri ọọwa i-itebwuru ookpokpo lẹ.

³Ịnyị, iMeri a kpa ida ochoru kwọkwọ ọnyịịla ọlẹ kọ la ịnya lụmẹ kị wụrụ “ịnaadị” kele kaka yẹ hụ iJisọsị a-ata lẹ, ọ juwa kpa inyi nyamwụ yịlaa lẹlẹ.

⁴IJudasị Isikarọtụ ọlẹ kọ ri ọngọhẹ lẹpwụ nya angịjụgbẹyị nya iJisọsị bala o-ri ọngọlẹ kọ juwa pịrị iJisọsị ha ya ụ-ụwa yẹkẹẹ,

⁵“Ịịyẹ a tị́ du kị hu ida ochoru kwọkwọ ọlẹ ra okpoko lala akpa ịta nyọka hwoo gịla ikpehika kaka mẹ?”

⁶IJudasị á ya ẹlẹwẹ chajị nya ẹhị ọ-kpa ju ikpehika lụmẹ lẹ nyamwụ ka. Ma, ọ ya ịnyị, chajị ọwa ayịdang ri oloyi. Jaabwọ ká iJudasị ọọwa a ri ọngọ kpa akpa nya okpoko ha angịjụgbẹyị nya iJisọsị lẹ, ọ kaa gba okpoko yi oyi ha ịlọmwụ jaabwọ kọ họ́ọ.

⁷Ma, iJisọsị wẹ byi iJudasị yẹkẹẹ, “Ba hi ọnyang ọwẹ chịng mẹ! Ang ọlẹ kọ họ wẹẹ lẹ, ọ ri ọnwụla ugbinyịrọ nyam nọ gbe ẹnụtụrụ ọlẹ kị ka jum eji ụka kam gbu kpá.

⁸Ikpehika lẹ, ị ka jam tanụ pyịyọọ lẹ, anụ ka haa ọnahị ụka myị́ ụka myị́. Ma, am lẹ, ḿ tị ka jam tanụ ịnyị ụka wuu ka.”

⁹Ụka ká iru nya ala iJuu lụmẹ-lụmẹ wo oja yẹkẹẹ, iJisọsị nyị warị wẹ ịBẹtanị lẹ, ị kele ka ẹga nyamwụ lẹlẹ. Aajị nya iJisọsị ụbwọọmwụ kem a du kị kele ka. Ị kele kị ka yẹ ịLasarọsị ọlẹ ká iJisọsị wuleji bwula igu ịnyịnyị.

¹⁰Alegbeju nya angịkiliya nya Ohe Oluhye me obyi nya igu ju ịLasarọsị yẹkẹẹ, ịwa nyị ka nwọọ pyii lẹ.

¹¹Ang odudu nya ọọwa ri, ọlẹ ká iru nya angịnyị lụmẹ-lụmẹ juwa gba kpehe bwu ẹpwụ nya ogu nyaa kaka myị la iJisọsị chajị nyọlẹ kọ wule ịLasarọsị ọwẹ eji bwula igu, ịnyị a tị du lẹ.

¹²Ụka ká ahị ọọnamwụ pyẹ lẹ, iru nya angịnyị lụmẹ-lụmẹ ịlẹ kị ka iJerusalẹm chajị nya Ang Oriri Ọchịpwụrụ ọọwa a wo oja yẹkẹẹ, iJisọsị nyị juwa warị wẹ iJerusalẹm lẹlẹ.

¹³Ọọwa lẹ, iru nya angịịwa a kele kaka hụla abajị nya ịrị ịlapwụ-lapwụ, kpa kele kaka tọ iJisọsị ụ-ụgbẹyị lẹlẹ. Ịnyị, ị juwa da owiwiyi ọtụka-ọtụka ụ-ụwa yẹkẹẹ, “Osana! Ahị ọwawa ọtụka a juwa hang ahụ ọngọlẹ ká wẹẹ warị la ẹnyị nya Ọngọlahị Ohe Oluhye! Ahị ọwawa ọtụka a juwa hang ahụ Adịrahụ nya ala Isirẹlụ wuu.”

¹⁴Ịnyị, iJisọsị a yẹ ụgba nya ụnyịrẹ okpolo ọhẹ lẹ, ọ hụhụ u-uhye nyamwụ, juwa kwọọ lẹlẹ. Ọlịnyị pwoku ẹla ọlẹ ká Ụpwụ Ịgọgọ ya rwọ́ọ ene-ene yẹkẹẹ,

¹⁵“Ahụ epweji nya ịSayọn, a juhi ka! Adịrahụ nyang wẹẹ warị lẹ. Adịrahụ nyang wẹ u-uhye nya ụgba nya ụnyịrẹ okpolo, juwa warị lẹ.”

¹⁶Ụka ọọwa kpangga lẹ, angịjụgbẹyị nya iJisọsị ayịdang á wo etu nya ẹlẹwẹ myịmyị ka. Ma, ụka ọlẹ ká iJisọsị wuleji bwula igu kpá, kọ rụ ka epwoohe lẹ, ị kpịtịya nya ang ịlẹ kị da wẹ ẹ-ẹpwụ nya Ụpwụ Ịgọgọ ẹgẹwẹ chajị nyamwụ bala jaabwọ ká ịngịịwẹ wuu bwu họ jịra ẹ-ẹga nya iJisọsị ịnyịlẹhị lẹlẹ.

¹⁷Iru nya angịnyị ịlẹ kị juwa kị ri ibeenu lụka ọlẹ ká iJisọsị wule ịLasarọsị eji bwula igu, a ri angịlẹ kị kpa oja nya ẹla ọọwa kaka ya je angịkịla lẹ.

¹⁸Ịnyị a du ká iru nya angịnyị lụmẹ-lụmẹ kele kaka tọ iJisọsị ụ-ụgbẹyị, chajị nyọlẹ kị wo oja nya ụkụrwọ ẹbyẹbyị ọọwa ịnyị lẹlẹ.

¹⁹Ụka ọọwa, ala ịFarisii ịlụwa juwa byi awụlẹ yẹkẹẹ, “Ahyu! Anụ yẹ wẹẹ! Anyanyị, ahị tị́ ka họ kpá lẹ mẹ? Chajị, alodehe wuu juwa rụ ba iJisọsị ọwẹ hiihi lẹ!”

²⁰Ala iGirisi ịhyẹ juwa ẹ-ẹpwụ nya angịlẹ kị kele ka iJerusalẹm nyọka gbịgba ha Ohe Oluhye ụ-ụwa ụka ọọwa ịnyịnyị.

²¹Ịnyị, ala iGirisi ịịwa a kele ka ẹga nya iFilipu ọlẹ kọ bwu epweji nya ịBẹtịsayịda ụ-ụwa ị-ịGalili lẹ, ị byoo yẹkẹẹ, “Ayịbahị, ahị tịtọ kahị ka yẹ iJisọsị!”

²²Ọọwa lẹ, iFilipu a kele kaka ya je Andụrụ lẹ, Andụrụ bala iFilipu a bajẹ kele kaka ya je iJisọsị la awụlẹ lẹlẹ.

²³IJisọsị wẹ byaa yẹkẹẹ, “Ọlẹẹlẹẹ kpangga a ri ụka nya awa ọlẹ kị ka kpa chị ụmụmẹ ọlala nya Ọnyị nya angịnyị ehe ọlẹ ehe lẹlẹ.

²⁴Nya ịlẹhị-ịlẹhị, m byinu yẹkẹẹ, ẹjẹ nya ịrayịsị ọhẹ-lọhẹ á ka jẹ́-ẹ chị ọnyị da ịlọmwụ u-uhye myị́ kaka. Kẹnẹ-kẹnẹ, ó ri kị ya tọ ị-ịpyị kpá, kọ wọwọ ta ẹpwụ nya ịpyị, kọ bwu kpehe kpá ene lẹ, mẹ ịnyị! Ma, ụka ká ẹjẹ ọọwa á tị gbu ịnyị kpá lẹ, ọ kaa nwa kaka nwụ́, ju ajẹ lụmẹ-lụmẹ chị ba ịlọmwụ lụka ohyẹẹkpẹ myị́ lẹlẹ.

²⁵Ọng myị́ ọng ọlẹ ká ọhịhị nyamwụ olodehe ọlẹ á kọọ ẹhị aalẹ, ọhịhị nyamwụ ka gwọọ byi pyịyọọ. Ma, ọngọlẹ kọ tị hu ọhịhị nyamwụ olodehe ọlẹ ga ha igu chajị nya ẹla nyam lẹ aalẹ, ọngọọwa hu ọhịhị nyamwụ ju ịtọ gbe ọhịhị ọmyịmyị-ka lẹ.

²⁶Ọng myị́ ọng ọlẹ kọ juwa tịtọ kọ ka myị ẹrụ ham nya ịlẹhị-ịlẹhị lẹ aalẹ, ọngọọwa ka ba abwẹla ọnyịịla ọhọhọ nyam jẹ pyii lẹ. Aalẹ, ẹga ọlẹ kaam ayịdang ji, ụ-ụwa, ọnchẹ nyam ọọwa a tịtị ka ji tam ịnyịnyị lẹ. Ọng myị́ ọng ọlẹ kọ tị juwa myị ẹrụ ham yẹẹyẹẹ aalẹ, Ohe Oluhye Adịda tịtị ka chị ihi ba ọngọọwa pyii ịnyịnyị.”

²⁷Ụka ọọwa, iJisọsị ya ẹla dodehe yẹkẹẹ, “Lẹẹlẹẹ, ọkịlẹtụ nyam myị la ang ọjụjụ lụmẹ. Lẹ, anyị, m tị́ ka ya kpá lẹẹ mẹ? M tị́ ka byi Ohe Oluhye Adịda yẹkẹẹ, chuchuu, myị ká ụka nya awa nya ang ọjụjụ ọlẹ a chịpwụrụ him chẹẹ mẹ, lee? Ma, ajị nya akama ọ-ka yẹyẹ lụka nya awa ọlẹ kpangga, a tị du kam warị wẹ odehe ọlẹ lẹ.

²⁸Lẹ, Ohe Oluhye Adịda, chuchuu, chị ụmụmẹ nya ẹnyị nya ịlọng ehe bwula ọlẹ mẹ!” Ịnyị, omyi ọhẹ a ya ẹla bwu epwoohe yẹkẹẹ, “M dọmwụ chị ụmụmẹ nya ẹnyị nya ịlọm ehe ene-ene lẹ, m tị ka myịmyị-ị̀ juwa chọọ ehe kịlahị-ịlahị wẹẹ.”

²⁹Ịnyị, ụka ká aluche nya angịnyị ịlẹ kị godayị rịrị ụ-ụwa wo omyi ọọwa lẹ, ị juwa byi awụlẹ yẹkẹẹ, “Ohe a kpụ ịkata wẹ lẹ!” Angị ịkịla nyaa juwa yẹkẹẹ, “Olegu-ẹrụ nya Ohe Oluhye ọhẹ a ya ẹla tọọ wẹ lẹ!”

³⁰IJisọsị wẹ byaa yẹkẹẹ, “Aajị nyam am ayịdang kpangga, a du ká omyi ọwẹ ya ẹlẹwẹ ka! Ma, ajị nyanụ anụ a du kọ ya ẹlẹwẹ dodehe lẹ!

³¹Ọlẹẹlẹẹ a ri ụka ọlẹ kị ka ya eje wu alodehe ọlẹ lẹlẹ. Ụka ọlẹẹlẹẹ a ri ụka ọlẹ kị ka kpa ku ọngọlẹ kọ wẹẹ kpa ọngịrị nyamwụ wuu gbeji odehe ọlẹ hi iwe-ahụrụ nyamwụ ọọwa ịnyịnyị lẹlẹ.

³²Ụka kị hum am ayịdang bwu eji kaka chị agadaligbe u-uhye-ọgba kpá wuu lẹ, m ka jẹ́-ẹ gbile angịnyị ehe wuu ba ịlọm lẹlẹ.”

³³IJisọsị ya ẹlẹwẹ rụ́ ụma nya igu ọlẹ kọọwa ayịdang juwa ka gbu.

³⁴Iru nya angịnyị ịlụwa wẹ byoo yẹkẹẹ, “Ị da ụ-ụpwụ nya ehile nyahị yẹkẹẹ, ịKịrayịsị nyahị nyị ka hịhị gbe oyi myị́ oyi. Ee lẹ, ọ tị́ lanyị ká mwọọgịlẹ yẹkẹẹ, nyị juwa ka hu Ọnyị nya ọngịnyị ehe hwaa, kaka chị agadaligbe u-uhye-ọgba tị tị mẹ? Oowo, a tị́ ri Ọnyị nya ọngịnyị ehe ọọwa ene?”

³⁵IJisọsị wẹ byaa yẹkẹẹ, “Ọngọlẹ kọ ri ọngọ hu ahịgboo nya ọhịhị nya Ohe Oluhye ha, juwa ka jam tanụ myịmyị lụka o-kpii wẹẹ! Lẹ, anụ juwa jẹdịyẹ ẹ-ẹpwụ nya ahịgboo nyamwụ mẹ. Ó ri ịnyị ka aalẹ, ukpowu juwa ka wẹ chịnụ ọgụ lẹ! Chajị, ọngọlẹ kọ juwa jẹdịyẹ ẹ-ẹpwụ nya ukpowu á kaa jẹ́ ẹga ọlẹ kọ juwa jẹ ka datị ka.

³⁶Ụka ọlẹ ká ọngọ kpa ahịgboo nya ọhịhị nya Ohe Oluhye wanụ jam tanụ wẹẹ lẹ, anụ kpa ọkịlẹtụ nyanụ wuu myị lọọ mẹ. Chajị kanụ ka jẹ́-ẹ ri anyị nya ahịgboo nya Ohe Oluhye mẹ!” Ụka ká iJisọsị ya ẹlẹwẹ taa kpá lẹ, ọ rụ bwu ẹga ọọwa kaka kpụ ịlọmwụ ịbaa hyaa ẹ-ẹgẹhẹ lẹlẹ.

³⁷Ọ ri nya ịlẹhị, iJisọsị ayịdang họ ụkụrwọ ẹbyẹbyị lụmẹ-lụmẹ ị-ịlahị nya ala iJuu, ma, ị́ tị myị kpa ọkịlẹtụ nyaa ookpokpo myị lọọ kpong-kpong kaka.

³⁸Ọhọhọ nyaa ọwẹ ri ọ-họ jịra nya ẹla ọlẹ ká Ayịsaya ọlọmwụ nya Ohe Oluhye ya ene-ene yẹkẹẹ, “Ọngọlahị Ohe Oluhye ee, o-owo a tị́ myị la ibeenu oriri nyahị wẹẹ? Oowo anyị a tị́ ri angị jẹ́ ụmụmẹ nya ụbwọ ọnyọọngịrị nya Ọngọlahị Ohe Oluhye ọlẹ kọ ya chị ehe hahị datị ịnyịnyị wẹẹ?”

³⁹Chajị nya ẹla ọlẹ ká Ayịsaya myịmyị ya lẹẹ a du ká angịwẹ á myị myị la iJisọsị ka lẹ. Ọ yẹkẹẹ,

⁴⁰“Ị tụ egbahị bala ọkịlẹtụ nyaa ku. Chajị kị ka jẹ́-ẹ kpẹhị nyaa yọyị kaka. Lee, ọ-kpa irya nyaa wo ẹla myịmyị kpụ, ị ka warị wẹ ẹga nyam Am Ohe Oluhye, m ka haa uda kaka.”

⁴¹Ayịsaya ya ẹlẹwẹ ịnyị, chajị ọwa ayịdang yẹ ẹbyẹbyị nya iJisọsị lụka ọọwa, a du kọ ya dodehe lẹ.

⁴²Angịhyẹ lụmẹ-lụmẹ ẹ-ẹpwarịrị nya alegbeju nya ala iJuu myị la iJisọsị ịnyịnyị. Ma, ị́ tị myị ya ịlaa dodehe, lala angị ji oye nya iJisọsị ka, o-oluhye nya ala ịFarisii ịlẹ kị yẹkẹẹ, ịwa nyị ka ku angị ịlịnyị wuu dodehe hi ube ọ-mẹ ẹla nya Ohe Oluhye jẹ nyịwa pyii.

⁴³Chajị, oya dodehe ọnyịịla o-bwu ọnụ nya angịnyị ehe kem a háa ịwa angịịwa gụ, o-ya dodehe ọnyịịla o-bwu ẹga nya Ohe Oluhye ayịdang lẹ.

⁴⁴Ịnyị, iJisọsị a ya ẹla gboo dodehe yẹkẹẹ, “Ọng myị́ ọng ọlẹ kọ myị lam nya ịlẹhị-ịlẹhị lẹ aalẹ, ám ụbwọm kem, ọngọọwa a wẹẹ myị la ka. Ma, ọngọlẹ kọ dum ẹrụ warị, ọngọọwa a wẹẹ myị la ịnyịnyị lẹ.

⁴⁵Ọng myị́ ọng ọlẹ kọ tị yẹm am ayịdang lẹ aalẹ, ọ yẹ ọngọlẹ kọ dum ẹrụ warị ịnyịnyị lẹ.

⁴⁶Am ayịdang a ri otinika o-hu ahịgboo nya ọhịhị nya Ohe Oluhye ha alodehe lẹ. Chajị ká ọng myị́ ọng ọlẹ kọ myị lam lẹ, ká ọngọọwa á tụtụm ka myịmyị-ị̀ hi juwa ẹ-ẹpwụ nya ukpowu pyịyọọ kaka.

⁴⁷Ọng myị́ ọng ọlẹ kọ wo ẹla nyam, kọ tị myị myị la ẹla nyam ọọwa ka aalẹ, ám la ịlọm a juwa ka la ọngọọwa eje ka! Chajị, ḿ warị wẹ odehe ọlẹ nyọka la alodehe eje ka. Ma, m warị kam ka chị alodehe ọlẹ da ịnyị!

⁴⁸Ọng myị́ ọng ọlẹ kọ pwam lee ọ-myị ye ẹrụ ọnyịịla nyam ọlẹ ka aalẹ, ọngọ la angịnyị eje ọhẹ a ka la ọngọọwa eje lẹlẹ. Ẹla ọlọnụ nyam ọlẹ kam kaa ya dodehe, a ka wuleji la ọngọọwa eje la ẹnụtụrụ ohyẹẹkpẹ lẹlẹ.

⁴⁹Chajị, ọ-ọngịrị nya ịlọm, m kaa kpa ya ala ịịwa wuu dodehe ka. Ma, Ohe Oluhye Adịda ọlẹ kọ dum ẹrụ warị la ịlọmwụ, a kaa dam ehile nya ụma nya ẹla ọlẹ kam ka ya kpangga ene kam kaa ya dodehe lẹ.

⁵⁰M tị jẹ́ yẹkẹẹ, ehile nya Ohe Oluhye Adịda ọọwa, a kaa kpa ọhịhị ọmyịmyị-ka wẹ angịnyị ehe lẹ. Chajị nya ọọwa lẹ, jaabwọ ká Adịda ayịdang byim yẹkẹẹ, am nyị ya mẹ, a wẹ kam kaa ya dodehe ịnyịnyịịnyị lẹ!”