Read idege ỊJỌN 13 Bible Online

ỊJỌN 13 - idege bible

ỊJỌN 13

¹Ụka ọọwa, ọ hi lala ụtụrụ ookpokpo ká ẹnụ ụtụrụ nya Ang Oriri Ọchịpwụrụ nya ala iJuu ka pwụ eji lẹ. Ụka ọwẹ, iJisọsị ayịdang tị jẹ́ yẹkẹẹ, ụka nya awa ọlẹ kọọwa nyị ka kpa rụ bwu ẹpwụ nya odehe ọlẹ, tịrẹkpẹ ka ẹga nya Ohe Oluhye Adịdọwa nyị juwa ju chwẹẹ lụmẹ lẹ. Angịlẹ kị ri angịnyị nyamwụ ẹ-ẹpwụ nya odehe ọlẹ lẹ, ị họ́ọ lụmẹ. Ọ la ọháha ọọwa ẹ-ẹga nyaa gbee ju ka ọbaba.

²Ụka ọọwa, iJisọsị bala angịjụgbẹyị nyamwụ juwa ri ang oriri la awụlẹ. Ụka ọwẹ, Ohe Onyobyi a hu irya nyọka pịrị iJisọsị ha ju ka ẹpwụ nya iJudasị Isikarọtụ ọnyị nya ịSayịmọn lẹlẹ.

³IJisọsị jẹ́ yẹkẹẹ, ọwa ayịdang kpangga, Ohe Oluhye Adịda nyaa tụụbwọ hi ang myị́ ang nyamwụ wuu ju ụ-ụbwọ lẹlẹ. Ọ myịmyị jẹ́ yẹkẹẹ, ẹ-ẹga nya Ohe Oluhye kpangga, ọwa ayịdang nyaa bwu warị lẹ. Ẹ-ẹga nya Ohe Oluhye pyii, ọwa nyaa tị juwa ka rụ tịrẹkpẹ ka ịnyịnyị lẹ.

⁴Ọọwa lẹ, iJisọsị a wuleji bwu uhye nya itebwuru nya ang oriri nyaa lẹ, ọ pwọ awụrụ oluhye nyamwụ neeji lẹ, ọ hu apwụ ọ-kpa hyo enyi chị ọhị nyamwụ lẹlẹ.

⁵Ịnyị, ọ chị́ enyi ju ẹja ọtabwọ lẹ, ọ juwa dọmwụ nya ọ-hụ́ angịjụgbẹyị nyamwụ ata, juwa kpa apwụ o-hyo enyi ọọwa yịlaa enyi ịnyịnyị lẹlẹ.

⁶Ụka ká iJisọsị pwụ ẹga nya ịSayịmọn iPita lẹ, iPita a byoo yẹkẹẹ, “Ọngọlahị, ahụ a dachichi ka hụ́m ata lẹlẹ?”

⁷IJisọsị wẹ byi iPita yẹkẹẹ, “Á jẹ́ ang ọlẹ kam wẹẹ họ lẹẹlẹẹ lẹka! Ma, a tị ka jẹ́ etu nyamwụ ị-ịlahị wẹẹ.”

⁸IPita wẹ byoo yẹkẹẹ, “Ọngọlahị, aḿ ka myị, aa hụ́m ata kpá ẹnẹnẹhẹ kaka.” IJisọsị wẹ byoo yẹkẹẹ, “Ọ́ tịtị ri ká myị, m hụ́ng ata ka aalẹ, á ka ri ọngọjụgbẹyị nyam kaka ịnyịnyị!”

⁹ỊSayịmọn iPita wẹ byoo yẹkẹẹ, “Ọngọlahị, ọ́ tị tị ri ịnyị lẹ aalẹ, á ka hụ́ ata nyam kem kaka. Hụ́ abwọ nyam bala egbeju nyam ịnyịnyị mẹ!”

¹⁰IJisọsị wẹ byoo yẹkẹẹ, “Ọng myị́ ọng ọlẹ kọ hyo enyi lẹ aalẹ, ata ọhụ́hụ kem, a kaa baba họọ lẹlẹ. Chajị, ẹga myị́ ẹga nyamwụ wuu la cheri-cheri lẹ. Anụ angịjụgbẹyị nyam wuu la cheri-cheri lẹ. Kẹnẹ-kẹnẹ, ọngọ ookpokpo lẹpwarịrị nyanụ ụbwọọmwụ kem, a hi lẹlẹ.”

¹¹IJisọsị jẹ́ ọngọlẹ kọ juwa ka pịrọọ ha wuu ene-ene lẹ. Ịnyị a du kọ yẹkẹẹ, “Anụ wuu la cheri-cheri kaka hi ọngọ ookpokpo lẹlẹ.”

¹²Ụka ká iJisọsị hụ́ angịjụgbẹyị nyamwụ ata kpá wuu lẹ, ọ hu awụrụ oluhye nyamwụ kụrụ lẹ, ọ kele kaka hụhụ taa i-itebwuru myịmyị lẹlẹ. Ọọwa lẹ, ọ byaa yẹkẹẹ, “Anụ jẹ́ etu nya ang ọlẹ kam họ wẹẹ kpong-kpong?

¹³Anụ ayịdang kaa wụrụm Ayịbahị ịtịcha bala Ọngọlahị. Ọlẹ kanụ kaa wụrụ ịnyị lẹ, anụ jẹ́ ya, chajị ịnyị, m ri ịnyịlẹhị lẹ.

¹⁴Ee lẹ, am kam ri Ọngọlanụ bala ịtịcha nyanụ, kam mwọọgịlẹ hụụnụ ata wẹẹ, ịnyịnyị-ịnyịnyị, ọ chịla kanụ ka juwa hụ́ awụlẹ ata lẹlẹ.

¹⁵Chajị am ayịdang hu ang o-ju ẹjẹẹ nọ hanụ, chajị kanụ ka juwa kpa họ ẹ-ẹga nya awụlẹ ịnyịnyịịnyị lẹ!

¹⁶Nya ịlẹhị-ịlẹhị, m byinu yẹkẹẹ, ọnchẹ á kaa gụ ayịbaba ka. Lee, ọngọ myị ẹrụ ọ-kaa gụ ọngọ doo ẹrụ ka ịnyịnyị.

¹⁷Jaabwọ kaanụ ayịdang jẹ́ ang ịwẹ kam mẹjẹẹnụ wẹ wuu lẹlẹ, ahị ọwawa ka ri ịnyanụ, ó ri kanụ ka myị juwa kpaa họ ụkụrwọ ẹ-ẹpwụ nya ọhịhị nyanụ.”

¹⁸“Ḿ jam ya ẹla ọlẹ rụ́ụnụ anụ aluche wuu ka. Am ayịdang jẹ́ ụma nya angịlẹ kam chụchụ. Ma, jaabwọ ká Ụpwụ Ịgọgọ tị ya ene-ene lẹ, ọ ka họ jịra ịnyị pyii lẹ. Ị da ụ-ụwa yẹkẹẹ, ọngọlẹ kọ kaa ju epwedii nya ang oriri tam, a mwọọgịlẹ wẹẹ wuleji tụm pyịpyị lẹlẹ.

¹⁹M jam ya ẹla ọlẹ jenu lẹẹlẹẹ, ene ká ẹla ọọwa ka họ jịra. Chajị ụka kọ họ jịra kpá lẹ, kanụ ka jẹ́-ẹ myị yẹkẹẹ, am kpakpakpa nyaa ri ọngọọwa ịnyịlẹhị lẹlẹ.

²⁰nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ kpa ọkịlẹtụ ookpokpo ye ọngọlẹ kam du ẹrụ la okpunyi lẹ aalẹ, am ayịdang kpangga, ọngọọwa a wẹẹ ye ịnyịnyị lẹlẹ. Ọngọlẹ kọ tị yem am la ọkịlẹtụ ookpokpo lẹ aalẹ, Ohe Oluhye Adịda ọlẹ kọ dum ẹrụ warị wẹ odehe ọlẹ, ọngọọwa a tịtị wẹẹ pẹ ẹpwa ịnyịnyị lẹlẹ.”

²¹Ụka ká iJisọsị ya ẹlẹwẹ kpá bwaaa lẹ, olegu nyamwụ a myị la imahị nya ang ọjụjụ lụmẹ-lụmẹ lẹ, ọ ya ẹla dodehe yẹkẹẹ, “Nya ịlẹhị-ịlẹhị, m byinu yẹkẹẹ, ọngọhẹ lẹpwarịrị nyanụ angịjụgbẹyị nyam juwa ka pịrịm ha lẹ!”

²²Ụka ọọwa, angịjụgbẹyị nyamwụ juwa chẹhị-ẹhị yẹ awụlẹ. Chajị, ị́ jẹ́ ọngọlẹ kọ juwa ka pịrọọ ha bwu ẹpwụ nyaa datị ka.

²³Ụka ọọwa, ọngọjụgbẹyị nya iJisọsị ọhẹ ọlẹ kọ há iJisọsị lụmẹ, juwa ọlẹ kọ kaa hụhụ ba iJisọsị ba, juwa kpụ nịrọọ ịnyịnyịịnyị.

²⁴Ọọwa lẹ, ịSayịmọn iPita a kpa abwabwọ ya ẹla ta ọngọjụgbẹyị ọọwa, chajị kọ ka tọ iJisọsị wo, ọngọlẹ ká iJisọsị ya ẹla rụ́ nya o-juwa ka pịrọọ ha lẹlẹ.

²⁵Ịnyị, ọngọjụgbẹyị ọọwa a ya egbeju nyamwụ nịrọ iJisọsị ẹ-ẹchẹmẹ lẹ, ọ byi iJisọsị yẹkẹẹ, “Ọngọlahị ee, o-owo a tị́ ri ọngọọwa?”

²⁶IJisọsị wẹ byoo yẹkẹẹ, “Ọngọlẹ kam wẹẹ ka ya ịkaa hi ọhọ ene kam ka ya dọọ ukpe ịnyị!” Ọọwa lẹ, iJisọsị a ya ịkaa hi ọhọ lẹ, ọ ya ha iJudasị, ọnyị nya ịSayịmọn Isikarọtụ lẹlẹ.

²⁷Ịnyị, ụka ká iJudasị ye ịkaa ọọwa kpá lẹ, Ohe Onyobyi a jụ ka ẹpwụ nyamwụ lẹlẹ. Ọọwa lẹ, iJisọsị a byi iJudasị yẹkẹẹ, “Ang ọlẹ ká wẹẹ ka họ lẹ, kele kaka họọ ahyaahị mẹ!”

²⁸Ụka ọọwa lẹ, ọngọngọhẹ nya angịjụgbẹyị nya iJisọsị ịlẹ kị hụ i-itebwuru tọọ, á jẹ́ etu nya ẹlẹwẹ kọ ya ta iJudasị kpong-kpong ka.

²⁹Angịhyẹ nyaa me irya yẹkẹẹ, jaabwọ ká iJudasị nyaa ri ọngọ kpa akpa nya okpoko nyaa lẹ, iJisọsị nyị byoo ịnyị, chajị ká iJudasị nyị ka kele kaka ra ang-abwọ ọlẹ kịị nyị ka kpa họ Ang Oriri ọtụka nya ala iJuu ọlụka ọọwa. Lee, iJudasị o-juwa ka hu okpoko kpa kaka ga ha ikpehika.

³⁰Ụka ká iJudasị ye ịkaa ọọwa ri kpá lẹ, ọ wuleji ahyaahị gba kpehe hyaa lẹlẹ. Ụka ọọwa ri alodu lẹ.

³¹Ịnyị, ụka ká iJudasị rụ gba kpehe kpá lẹ, iJisọsị a byi angịjụgbẹyị nyamwụ ihihi yẹkẹẹ, “Ọlẹẹlẹẹ a ri ụka ọlẹ ká ẹbyẹbyị nya Ọnyị nya ọngịnyị ehe ọlẹ ka chị ehe a-ahịgboo lẹlẹ. Ọlẹẹlẹẹ a tị ri ụka ọlẹ ká ẹbyẹbyị nya Ohe Oluhye ayịdang tị ka chị ehe a-ahịgboo bwula Ọnyị nyamwụ ịnyịnyị lẹlẹ.

³²Ó ri ká ẹbyẹbyị nya Ohe Oluhye á chị ehe a-ahịgboo bwula Ọnyẹwẹ nyamwụ aalẹ, Ohe Oluhye ayịdang ka chị ẹbyẹbyị nya ịlọmwụ ehe u-uhye nya Ọnyẹwẹ nyamwụ ọọwa ịnyịnyị. Ohe Oluhye dọmwụ wẹẹ ka chị ẹbyẹbyị nyamwụ ọọwa u-uhye nya Ọnyẹwẹ nyamwụ ehe ahyaahị lẹẹlẹẹ lẹ.

³³Anụ anjwo ichiche nyam, m juwa ka hụ tanụ chẹẹ lụka o-kpii wẹẹ. Ma, ụka kam rụ hiinu kpá, anụ juwa ka tịtọ nyam. Ma, jaabwọ kaam ayịdang byi ala iJuu ene-ene lẹ, m jam byinu ịnyịnyị yẹkẹẹ, ẹga ọlẹ kam wẹẹ ka rụ ka lẹ, ánụ ka bam ka ụwa myị́ kpong-kpong ka.

³⁴Ehile onyeewe a lẹẹ kam lẹẹ danụ lẹ. Anụ la ọháha ẹ-ẹga nya awụlẹ nya ịlẹhị-ịlẹhị, jaabwọ kaam ayịdang la ọháha ẹ-ẹga nyanụ wẹ mẹ.

³⁵Ó ri kaanụ ayịdang á juwa la ọháha ẹ-ẹga nya awụlẹ nya ịlẹhị-ịlẹhị ịnyị lẹ aalẹ, angịnyị wuu a ka jẹ́ yẹkẹẹ, anụ nyị ri angịjụgbẹyị nyam ịnyịlẹhị lẹlẹ.”

³⁶ỊSayịmọn iPita tọ iJisọsị wo yẹkẹẹ, “Ọngọlahị ee, ale, a tị́ juwa jẹ ka ene?” IJisọsị wẹ byoo yẹkẹẹ, “Ẹga ọlẹ kam wẹẹ ka rụ ka lẹ, á ka bam kele ka ụwa lẹẹlẹẹ myị́ lẹka. Ma, ụka tị juwa warị ká ka bam ka ụwa kpá ị-ịlahị wẹẹ.”

³⁷IPita myịmyị wẹ byoo yẹkẹẹ, “Ọngọlahị, ịịyẹ a tị́ du kam ka bang ka ụwa lẹẹlẹẹ myị́ ka? M nwụlanọ nyọka tụụbwọ hi ọhịhị nyam ga ha igu, chajị nyang lẹ!”

³⁸IJisọsị wẹ byoo yẹkẹẹ, “IPita, a ya ká nwụlanọ nyọka tụụbwọ hi ọhịhị nyang ga ha igu chajị nyam myị́ ịnyịlẹhị lẹ? Nya ịlẹhị-ịlẹhị, m bying yẹkẹẹ, ọwọọwọọ́ ka da ịgbụ kpong-kpong ene kaahụ iPita ọwẹ ka pwam rwarụ ugbabwọ ịta lodu ọlalẹ kaka.”