Read idege ỊJỌN 15 Bible Online

ỊJỌN 15 - idege bible

ỊJỌN 15

¹IJisọsị byi angịjụgbẹyị nyamwụ yẹkẹẹ, “Am kpakpakpa a ri ịnịna nya okoji ọlẹ kị wụrụ ‘ịvayịn’ ha angịnyị ehe ẹ-ẹpwụ nya ẹla nya Ohe Oluhye lẹlẹ. Ohe Oluhye Adam a tị ri ayịdọlẹrụ Ọngọ la ọmwụ nya okoji ọọwa lẹ.

²Abwọ nya okoji ọọwa ịlẹ kị be hụrụm wuu lẹ, ọnyị myị ọnyị kọ myị nwụ́ ugbe lẹpwụ nyaa ka, Ohe Oluhye kaa hụla ụbwọ ọlịnyị daarụ him. Ma, ụbwọ nyam ọnyị myị ọnyị ọlẹ kọ tị juwa nwụ́ ugbe lẹ aalẹ, ụbwọ ọlịnyị, Ohe Oluhye a kaa hya abwọ ichiche nyamwụ hụrụ, chajị kọ ka jẹ́-ẹ nwụ́ egbe ọgwọgụ gụ olene lẹlẹ.

³Lẹẹlẹẹ, anụ ayịdang la cheri-cheri ẹ-ẹpwụ nya abwẹla ọhọhọ nyanụ bwula ẹla ọlọnụ nyam ọlẹ kam kaa ya jenu, kanụ wẹẹ kpa họ ụkụrwọ lẹ.

⁴Lẹ, anụ myị ká ọhịhị nyanụ a bwu hụrụm pyịyọọ mẹ. Aalẹ, am ayịdang juwa ka juwa hịhị ẹ-ẹpwụ nyanụ pyịyọọ ịnyịnyị lẹ. Jaabwọ ká ụbwọ nya okoji á ka jẹ́-ẹ nwụ́ ugbe la ịlọmwụ myị́ kaka, kẹnẹ-kẹnẹ, ó ri kọ bwu hụrụ ugbile nya okoji ịnamwụ lẹ mẹ ịnyị wẹẹ, ịnyịnyị-ịnyịnyị, anụ ka jẹ́-ẹ nwụ́ ugbe nya ọhịhị ọnyịịla myị́ kaka lẹlẹ. Kẹnẹ-kẹnẹ, ó ri ká ọhịhị nyanụ ọọwa á bwu hụrụm ene lẹ mẹ ịnyị!”

⁵“Am kpakpakpa a ri ịnịna nya okoji hanụ lẹ. Anụ a tị ri abwọ nyam lẹlẹ. Ọng myị́ ọng ọlẹ kọ myị bwu hụrụm, kaam ayịdang á juwa hịhị ẹ-ẹpwụ nyamwụ lẹ aalẹ, ọngọ ọlịnyị a ka nwụ́ egbe nya abwẹla ọnyịịla ju iru lẹlẹ. Chajị, anụ ayịdang á ka jụ ịngịngịhyẹ ọnyịịla họ myị́ kpong-kpong kaka. Kẹnẹ-kẹnẹ, ó ri kọ bwula ọngịrị nyam ene lẹ, mẹ ịnyị.

⁶Ọng myị́ ọng ọlẹ kọ myị nwụ́ ọhịhị nyamwụ ọwa hụrụm ka aalẹ, ị ka hụla ọngọ ọlịnyị daarụ lala ụbwọ nya okoji ọlẹ kị hụla hi ịnamwụ kọ kaa nwọnwụ. Ọọwa lẹ, ị kaa go ụma nya abwọ ịnwọnwụ ịlịnyị ju ka ẹpwụ nya ila wurum lẹ, ị kaa rụ ila hụrụ lẹlẹ.

⁷Ó ri kaanụ abwọ nyam á juwa gbile enyi nya ọhịhị nyanụ bwu ẹpwụ nyam pyịyọọ, ká ẹla nyam á juwa hịhị ẹ-ẹpwụ nyanụ ịnyịnyị lẹ aalẹ, ang myị́ ang ọlẹ kọ baanụ, kanụ bịlẹm lẹ aalẹ, ang ọọwa ka juwa hanụ pyii lẹ.

⁸Ang ọlẹ kọ ka kpa ogbo ogwogwo warị wẹ Ohe Oluhye Adịda, a ri egbe nya abwẹla ọnyịịla ọ-ka nwụ́nwụ lụmẹ nyanụ lẹlẹ. Chajị, ọọwa a ka jẹ́-ẹ mẹjẹ yẹkẹẹ, anụ ri angịjụgbẹyị nyam ịnyịlẹhị lẹlẹ.

⁹Jaabwọ kaam ayịdang há Ohe Oluhye Adịda lụmẹ wẹẹ, ịnyịnyị, anụ wuu a tịtị hám lụmẹ lẹlẹ. Lẹ, anụ́-ụ myị kanụ juwa hịhị ẹ-ẹpwụ nya ọháha ọlala nyam ọọwa kele kịlahị-ịlahị mẹ.

¹⁰Ó ri kanụ juwa kpa ehile nyam wuu họ ụkụrwọ yẹẹyẹẹ lẹ aalẹ, anụ ka juwa ẹ-ẹpwụ nya ọháha nyam ọọwa pyịyọọ, jaabwọ kaam ayịdang lẹẹ kpa ehile nya Ohe Oluhye Adam wuu họ ụkụrwọ yẹẹyẹẹ, du kam godayị lẹẹ ẹ-ẹpwụ nya ọháha ọlala nyamwụ pyịyọọ ịnyịnyị lẹlẹ.”

¹¹“M jam ya ala ịlẹ wuu jenu lẹẹlẹẹ, chajị ká ọkẹkẹnị ọchịchị ọtụka nyam ka jẹ́-ẹ hi juwa ẹ-ẹpwụ nyanụ pyịyọọ, chajị ká ọkẹkẹnị ọlẹpwụ nyanụ ka jẹ́-ẹ myịnụ pwẹẹpwẹẹ.

¹²Ehile ọlẹ kam lẹẹ ya danụ eji a lẹẹ lẹ: Anụ la ọháha nya ịlẹhị-ịlẹhị ẹ-ẹga nya awụlẹ, jaabwọ kaam ayịdang wẹẹ la ọháha ọlịnyị ẹ-ẹga nyanụ mẹ.

¹³Ọháha ọlala ọkịla ọhẹ-lọhẹ, á ji kọ ka gụ ụma nya ọháha ọlẹ ká ọngịnyị ehe jẹ́ byẹjẹ hu ọhịhị nyamwụ ga ha igu chajị nya aligu nyamwụ kaka.

¹⁴Aligu nyam, anụ a ri lẹlẹ, kọ ri kanụ ka myị-ị juwa họ ang myị́ ang ọlẹ wuu kam danụ ehile jịra tị ịnyị!

¹⁵Bwu ọlẹẹlẹẹ kele kịlahị lẹ, aḿ juwa ka wụrụụnụ anchẹ nyam kaka. Chajị ọnchẹ ọhẹ-lọhẹ, á kaa jẹ́ obyi omeme chajị nya ụma nya ang ọlẹ ká ayịbaba nyamwụ juwa ka họ kpong-kpong ka. Ma, am ayịdang wụrụụnụ aligu nyam, chajị ang myị́ ang ọlẹ wuu kam wo bwu ẹga nya Ohe Oluhye Adam lẹ, m yaa jenu wuu kpẹẹkpẹẹ lẹ.

¹⁶Anụ wo mẹ! Aanụ a ri angị chụm chụ ka! Ma, am ayịdang a chụnụ chụ ha ịlọm lẹ. M ya ọngịrị nyam hanụ chajị kanụ ka kele ka odehe kaka nwụ́ egbe nya abwẹla ọnyịịla nya Ohe Oluhye lẹ! Chajị ká egbe nya abwẹla ọnyịịla nyanụ ịịwa ka juwa pyịyọọ. Chajị ká ang myị́ ang ọlẹ kanụ ka bịlẹ Ohe Oluhye Adịda la ẹnyị nyam lẹ, ká Ohe Oluhye ka hu ang ọọwa hanụ pyii ịnyịlẹhị.

¹⁷Ang ọlẹ kam lẹẹ danụ ehile nyamwụ ri yẹkẹẹ, anụ la ọháha nya ịlẹhị-ịlẹhị ẹ-ẹga nya awụlẹ mẹ.”

¹⁸IJisọsị myịmyị byaa yẹkẹẹ, “Ó ri kaanụ ayịdang á juwa wụ alodehe ọlẹ ẹjẹ aalẹ, anụ kpịtịya mẹ. Am ayịdang a waa ẹjẹ ene hi tọnụ lẹ!

¹⁹Ó ri kaanụ ayịdang á ri ịnya odehe ọlẹ lụbwọ-lẹta lẹ, ịnọ, anụ ka há alodehe ịlẹ kị jẹ́ Ohe Oluhye kpong kpong kaka lẹ! Ma, chajị nyọlẹ kanụ ri ịnya odehe ọlẹ ka, kam chụnụ chụ wẹ, gbanụ kpehe bwu ẹpwụ nya odehe ọlẹ ha ịlọm, ịnyị a du kanụ wẹẹ wụ alodehe onyobyi ọlẹ ẹjẹ ịnyị lẹ.

²⁰Anụ kpịtịya nya ẹla ọlẹ kam ya jenu ene-ene mẹ. Ẹla ọọwa ri yẹkẹẹ, ọnchẹ á kaa gụ ayịbaba ọlẹ kọ kpọọ ẹ-ẹpwa kpong-kpong myị́ ka. Ó ri ká alodehe ọlẹ á byẹjẹ juwa tụm am ayịbaba nyanụ pyịpyị, tụbwọ aalẹ, ịwa ayịdang ka tụụnụ pyịpyị ịnyịnyị pyii lẹ! Ó ri ká alodehe ịịwa á myị kpa ẹla ọlọnụ nyam họ ụkụrwọ lẹ, ịnọ, ị tịtị ka kpa ẹla nyanụ anụ họ ụkụrwọ ịnyịnyị lẹ!

²¹Ma, ang ịlịịwẹ wuu a ri ụma nya ang ịlẹ kị ka họnụ chajị nya ẹnyị nyam lẹlẹ, chajị, ị́ jẹ́ Ọngọlẹ kọ dum ẹrụ warị wẹ odehe ọlẹ kpong-kpong ka, a du lẹ.

²²Ó ri ajị nyọlẹ kaam ayịdang warị kaka ya ẹla nya ịlẹhị jaa ka, ịnọ, eje nya ọhọbịrị ọhọhọ nyaa á ka jẹ́-ẹ waa kaka. Ma, lẹẹlẹẹ tị lẹ, í ye ẹgẹgẹhẹ ka kpụ ọhọbịrị ọhọhọ nyaa ịịwa ịbaa myị́ kaka.

²³Ọng myị́ ọng ọlẹ kam wọọ ẹjẹ lẹ aalẹ, Ohe Oluhye Adam wụ ọngọọwa ẹjẹ ịnyịnyị lẹ.

²⁴Ó ri ụma nya ụkụrwọ ẹbyẹbyị ịlẹ kaam ayịdang warị kaka họ ẹ-ẹpwarịrị nyaa ka, ịnọ, ọhọbịrị ọhọhọ nyaa á ka jẹ́-ẹ chị ehe a-ahịgboo gede-gede kaka. Ma, lẹẹlẹẹ lẹ, ị yẹ ụkụrwọ ẹbyẹbyị nyam lẹlẹ, am ayịdang waa ẹjẹ nya ịlẹhị-ịlẹhị bala Ohe Oluhye Adam lẹ.

²⁵Ma, abwẹla onyobyi nyaa ọọwa á la ẹbyẹbyị kpong-kpong ka. Chajị ọhọhọ nyaa ọọwa ri ọ-họ jịra nya ẹla ọlẹ kị da ẹ-ẹpwụ nya Ụpwụ Ịgọgọ ene-ene yẹkẹẹ, ‘Am ayịdang waa ẹjẹ ododu timajẹ.’ ”

²⁶“Ma, ụka ká ọngọ kpụ́ ẹjẹ ọọwa ọlẹ kam ka du ẹrụ warị bwu ẹga nya Ohe Oluhye Adam á pwụ eji lẹ aalẹ, ọ ka ri ibeenu ham lẹlẹ. Olegu Ịgọgọ ọlẹ kọ kaa ya ẹla nya ịlẹhị ọlẹ kọ bwu ẹga nya Ohe Oluhye Adịda a ri ọngọọwa lẹ.

²⁷Ọọwa lẹ, anụ ayịdang a ka ri alibeenu nyam ụka ọọwa lẹlẹ! Chajị anụ ayịdang jam tam bwu ọmwụ ọdada ene-ene lẹ.”