Read idege ỊJỌN 17 Bible Online

ỊJỌN 17 - idege bible

ỊJỌN 17

¹Ụka ká iJisọsị ya ala ịwẹ kpá wuu lẹ, ọ hu ẹhị nyamwụ hwaa rịrị ka epwoohe lẹ, ọ raabwọ ha Ohe Oluhye yẹkẹẹ, “Ahụ Ohe Oluhye Adịda, ụka pwụ ká ka chị ẹbyẹbyị nya Ọnyẹwẹ nyang ehe, chajị ká Ọnyẹwẹ nyang ayịdang tịtị ka jẹ́-ẹ chị ẹbyẹbyị nyang ahụ ehe ịnyịnyị lẹ.

²Chajị, Ahụ Ohe Oluhye ya ọngịrị ha Ọnyẹwẹ nyang ọọwa, chajị kọ ka ya ọhịhị ọmyịmyị-ka ha ọng myị́ ọng ọlẹ wuu ká ka be ẹkọ wụrụ wẹ ẹga nyamwụ lẹ.

³Ọlẹ a ri ọhịhị ọmyịmyị-ka ọọwa lẹlẹ, angịnyị ehe, ọ-ka jẹ́ yẹẹyẹẹ yẹkẹẹ, Ahụ kpakpakpa nyaa ri Ohe Oluhye nya ịlẹhị-ịlẹhị ọọwa lẹlẹ bala ọ-ka jẹ́ iJisọsị ịKịrayịsị ọngọlẹ ká du ẹrụ warị wẹ odehe ọlẹ yẹẹyẹẹ ịnyịnyị.

⁴M chị ẹbyẹbyị nyang ehe mẹjẹ alodehe lẹ. Ụkụrwọ ọlẹ ká ya jum ụbwọ ya, am nyị họ lẹ, m tị họọ kpá chị eju ịnyịnyị lẹ.

⁵Oo! Ohe Oluhye Adịda chuchuu, ẹbyẹbyị ọlẹ kam baba la bala Ahụ ene nya ọmwụ ọdada nya odehe ọlẹ lẹ, Aa chị ẹbyẹbyị nyam ọọwa ehe i-ijata nya ịlọng lẹẹlẹẹ mẹ.”

⁶“M chị ẹnyị nyang ehe mẹjẹ angịlẹ ká gba kpehe bwu ẹpwụ nya odehe ọlẹ ene ká ya jum ụ-ụbwọ lẹ! Ịnọ, angịnyị nyang angịịwa à ri ene ká-a gaa jum ụ-ụbwọ lẹ. Ịwa ayịdang tị ju ihi nya ẹla nyang ọlẹ kam ya jaa, juwa kpa họ ụkụrwọ jịra ịnyịnyị lẹ.

⁷Ị tị jẹ́ ịnyịnyị yẹkẹẹ, Ahụ Ohe Oluhye kpakpakpa nyaa ya ang myị́ ang nyam ọlẹ wuu kaam nyị la ham lẹẹ ịnyịlẹhị lẹ.

⁸Chajị, ẹrụ ọnyịịla ọlẹ ká ya dum ẹrụ lẹ, ụka kam ya jaa lẹ, ị ye ẹla ọọwa bajẹ. Ị myịmyị jẹ́ nya ịlẹhị-ịlẹhị yẹkẹẹ, ẹ-ẹga nyang kpangga, am nyaa bwu warị lẹ. Ị tị myị la ọkịlẹtụ ookpokpo ịnyịnyị yẹkẹẹ, Ahụ kpakpakpa nyaa dum ẹrụ warị wẹ odehe ọlẹ ịnyịlẹhị lẹ.”

⁹“Angịịwa kpangga, m jam raabwọ chajị nyaa lẹẹlẹẹ lẹ. Aalodehe ịkịla ịlẹ kị jẹ́ng Ahụ Ohe Oluhye ka, m lẹẹ raabwọ chajị nyaa ka. Ma, abwọ ọrịrị nyam ọlẹ ri chajị nya angịlẹ ká ya ham, chajị Ahụ ayịdang a laa lụbwọ lẹta ene-ene ká-a yaa ham lẹ.

¹⁰Ang myị́ ang nyam wuu ri Ịnyang. Ang myị́ ang nyang Ahụ wuu tị tịtị ri ịnyam am ịnyịnyị. Angịwẹ a ri angị ka chị ẹbyẹbyị nyam ehe mẹjẹ alodehe lẹlẹ.

¹¹Lẹẹlẹẹ lẹ, aḿ juwa ka jam ẹ-ẹpwụ nya odehe ọlẹ myịmyị kaka. Ma, ịwa ayịdang tị ka hi jam ẹ-ẹpwụ nya odehe ọlẹ pyịyọọ wẹẹ. Ma, am jam ka rụ bwu odehe ọlẹ tịrẹkpẹ warị wẹ ẹga nyang lẹ. Ahụ Ohe Oluhye Adịda Ọlịgọgọ, chuchuu, kpa ọngịrị nya ẹnyị nyang wu angịlẹ ká ya ham wẹ wuu kpa yẹẹyẹẹ, chajị kịịwa wuu ka jẹ́-ẹ yẹjula awụlẹ, kaka ri ọngọ ookpokpo jaabwọ kaam bala Ahụ ri ọngọ ookpokpo lẹẹ ịnyịnyị mẹ.

¹²Ụka kam jam ta angịlẹ ká ya ham odehe ọlẹ lẹ, m kpa ọngịrị nya ẹnyị nyang ọọwa waa kpa yẹẹyẹẹ. M kpẹhị nyam rịraa yẹẹyẹẹ, chajị ká ọngọngọhẹ nyaa á ka jẹ́-ẹ gụm byi kpong-kpong kaka. Kẹnẹ-kẹnẹ, kaka hi ọngọlẹ ká Ụpwụ Ịgọgọ ya ẹla rụ́ ene-ene yẹkẹẹ, nyị ka ta ayịreji pyii lẹ, ụbwọọmwụ mẹ ịnyị.

¹³Lẹẹlẹẹ lẹ, m juwa ka nya tịrẹkpẹ chịng Ahụ Ohe Oluhye ọgụ lẹ! Ma, m tị jam ya ala ịlẹ wuu lẹẹlẹẹ jaa lụka ọlẹ kam jam odehe ọlẹ taa wẹẹ. Chajị ká ọkẹkẹnị nyam ka jẹ́-ẹ myị ẹpwụ nya ọkịlẹtụ nyaa pwẹẹpwẹẹ bwula ọọwa.

¹⁴Ẹrụ ọnyịịla ọlẹ ká ya dum ẹrụ lẹ, m ya jaa lẹ. Ị tị wụ alodehe ọlẹ ẹjẹ lụmẹ, chajị, ịwa ayịdang á ri ịnya odehe ọlẹ lụbwọ-lẹta ka, jaabwọ kaam ayịdang á ri ịnya odehe ọlẹ ka ịnyịnyị.

¹⁵Abwọ ọrịrị nyam chajị nyaa á ri ká ka kpaa rụ hi ẹpwụ nya odehe ọlẹ ka. Ma, ká ka juwa ke angịịwa wuu yẹẹyẹẹ, chajị ká Ohe Onyobyi á ka jwaa họ ịngịngịhyẹ myị́ kpong-kpong kaka, ịnyị!

¹⁶Ịwa ayịdang á ri ịnya odehe ọlẹ lụbwọ-lẹta ka, jaabwọ kaam ayịdang á ri ịnya odehe ọlẹ ka, ịnyịnyị.

¹⁷Kpa ẹla nya ịlẹhị nyang hụ́ angịnyị nyang ịwẹ cheri-cheri mẹ. Ẹla nyang kpangga a ri ịlẹhị ọọwa lẹlẹ.

¹⁸Jaabwọ ká dum ẹrụ warị wẹ ẹpwụ nya odehe ọlẹ kpangga, m tịtị lẹẹ du angịlẹ ẹrụ kele ka ẹpwụ nya odehe ịnyịnyị lẹlẹ.

¹⁹Ajị nya angịwẹ kpangga, a du kam lẹẹ la ọhịhị ọlịgọgọ kpẹẹkpẹẹ, chajị kịịwa ayịdang tịtị ka jẹ́-ẹ ri angị la ịgọgọ nya ịlẹhị-ịlẹhị ị-ịlahị nyang ahụ Ohe Oluhye ịnyịnyị lẹlẹ.”

²⁰“Aḿ jam raabwọ chajị nya angịlẹ ụbwaa kem ka. Ma, m raabwọ wọnụ nya angịlẹ wuu kị ka myị lam nya ịlẹhị-ịlẹhị bwula ẹrụ ọnyịịla nyam ọlẹ ká angịlẹ ka kpa kaka ya pyẹ jaa ịnyịnyị.

²¹M jam bịlẹng ká ka họ kịịwa wuu ka yẹ ri ọngọ ookpokpo, jaabwọ kaahụ Ohe Oluhye Adịda jam ẹ-ẹpwụ nyam, kaam tị tịtị kụ ẹ-ẹpwụ nyang ịnyịnyị. Ká họ kịịwa wuu a ri ọngọ ookpokpo ẹ-ẹpwụ nyahị ịnyịnyị, chajị ká alodehe ịkịla wuu ka jẹ́-ẹ myị nya ịlẹhị-ịlẹhị yẹkẹẹ, Ahụ nyaa dum ẹrụ warị wẹ odehe ọlẹ ịnyịlẹhị lẹ.

²²Ẹbyẹbyị nyang ọlẹ ká ya ham lẹ, m ya chị kụrụ angịwẹ lẹ. Chajị kị ka jẹ́-ẹ ri ọngọ ookpokpo ẹ-ẹpwụ nya ẹla nya ịlẹhị, jaabwọ kaam bala Ahụ ri ọngọ ookpokpo lẹẹ ịnyịnyị mẹ.

²³Ịnyị lẹ, ụka kaam ayịdang á juwa ẹ-ẹpwụ nyaa, kaahụ Ohe Oluhye á tị jam ẹ-ẹpwụ nyam lẹ aalẹ, ọọwa a ka họ kịịwa wuu ka jẹ́-ẹ yẹ ri ọngọ ookpokpo ịnyịlẹhị-ịlẹhị lẹlẹ. Chajị ká alodehe ka jẹ́-ẹ jẹ́ yẹkẹẹ, Ahụ kpakpakpa nyaa dum ẹrụ warị wẹ odehe ọlẹ ịnyịlẹhị lẹ. Chajị ká alodehe ka myịmyị-ị̀ jẹ́ yẹkẹẹ, jaabwọ kaahụ nyị la ọháha ẹ-ẹga nyam lẹ, ịnyịnyị-ịnyịnyị, Ahụ nyaa la ọháha ẹ-ẹga nya angịwẹ wuu lẹlẹ mẹ.”

²⁴“Ohe Oluhye Adịda, angịlẹ wuu ká chụ ham lẹ, ọbịlẹ-bịlẹ nyam chajị nyaa ri yẹkẹẹ, m tịtọ ká ka myị ká angịịwa wuu ka bam warị kaka hụ ẹ-ẹga ọlẹ kam ji ịnyịnyị. Chajị kịịwa wuu ka jẹ́-ẹ juwa kpẹhị nyaa yẹ ẹbyẹbyị nyam ọlẹ ká ya ham, o-oluhye nyọlẹ kam háng lụmẹ ene-ene ká-a da itiwe nya odehe ọlẹ.

²⁵Oo! Ahụ Ohe Oluhye Adịda Ọlabwẹla Ọnyịịla ee, alodehe ọlẹ lẹ, ị́ jẹ́ng kokoo. Ma, am tị jẹ́ng yẹẹyẹẹ. Angịlẹ ká tị chụ ham lẹ, ị jẹ́ ịnyịnyị yẹkẹẹ, Ahụ kpakpakpa nyaa dum ẹrụ warị lẹ.

²⁶M warị kaka chị ọngịrị nya ẹnyị nyang ehe mẹjaa lẹ. M tị ka juwa chọọ ehe mẹjaa kịlahị-ịlahị ịnyịnyị wẹẹ. Chajị ká ọháha nyang ọlẹ ká la ẹ-ẹga nyam ka jẹ́-ẹ juwa ẹ-ẹpwụ nyaa bala am ayịdang ọ-ka jẹ́-ẹ juwa ẹ-ẹpwụ nyaa ịnyịnyị mẹ.”