Read idege ỊJỌN 18 Bible Online

ỊJỌN 18 - idege bible

ỊJỌN 18

¹Ụka ká iJisọsị raabwọ ọọwa kpá lẹ, ọwa bala angịjụgbẹyị nyamwụ a rụ bwu ụwa kpoye nya ọba ochiche ọhẹ ọlẹ kị wụrụ iKidirọn lẹlẹ. Ẹrụ ọlẹpwụ nya iku ọhẹ juwa ẹ-ẹga ọọwa. Ọọwa lẹ, iJisọsị bala angịjụgbẹyị nyamwụ, a jụ ka ẹpwụ nya ẹrụ ọọwa lẹlẹ.

²IJudasị Isikarọtụ ọlẹ kọ ri ọngọ pịrị iJisọsị ha, jẹ́ ẹrụ ọọwa ịnyịnyị. Chajị iJisọsị bala angịjụgbẹyị nyamwụ kaa bajẹ kele ka ụwa ene-ene ịnyịnyịịnyị.

³Ịnyị, iJudasị Isikarọtụ ọwẹ a kpa ịsọja ịhyẹ bala ịdanggeri nya ube ịgọgọ ọtụka nya Ohe Oluhye nya ala iJuu ba ịlọmwụ kele ka ẹpwụ ẹrụ ọọwa lẹlẹ. Alegbeju nya angịkiliya nya Ohe Oluhye bala ala ịFarisii, a du angịịwa ẹrụ kele lẹ. Angịịwa kpa ang-abwọ nya ẹga ụ-ụbwọ nyaa juwa kpa kele. Ị kpa ila nya itinika bala ila nya ukunggo nya alụwa ịnyịnyị.

⁴Ụka ọọwa, iJisọsị ayịdang jẹ́ ụma nya ang ọlẹ kị juwa ka họ u-uhye nyamwụ wuu ene-ene lẹ, ọọwa lẹ, ọ gba ịlọmwụ kpehe lẹ, ọ tọ alogu ẹdịyẹ nya iJudasị ịịwa wo yẹkẹẹ, “Oowo, anụ tị́ juwa pịlahị?”

⁵Angịịwa wẹ byoo yẹkẹẹ, “IJisọsị ọla ịNasareti ịnyị!” IJisọsị wẹ byaa yẹkẹẹ, “Am kpakpakpa a ri ọngọọwa lẹlẹ.” IJudasị ọlẹ kọ ri ọngọ pịrị iJisọsị ha godayị rịrị ẹ-ẹpwarịrị nya alogu ẹdịyẹ nyamwụ ịịwa.

⁶Ahyaahị ká iJisọsị wẹ byaa yẹkẹẹ, “Am kpakpakpa a ri ọngọọwa lẹlẹ” lẹ, angịwẹ a gu gbaagbaa kẹkpẹ lẹ, ịwa wuu a chị keji, ụ-ụwa lẹlẹ.

⁷Ọọwa lẹ, iJisọsị a myịmyị taa wo yẹkẹẹ, “Oowo, anụ tị́ juwa pịlahị ene?” Ị wẹ myịmyị byoo yẹkẹẹ, “iJisọsị ọla ịNasareti ịnyị!”

⁸IJisọsị wẹ byaa yẹkẹẹ, “M tị́ ya jene ene-ene yẹkẹẹ, am kpakpakpa a ri ọngọọwa lẹlẹ! Ó ri am kanụ juwa tịtọ ịnyịlẹhị lẹ aalẹ, anụ ba ká angịnyị nyam ịlẹ a rụ wuu ene mẹ.”

⁹IJisọsị ya ịnyị, chajị ká ẹla ọlẹ kọọwa ayịdang ya ene-ene ka họ jịra. Ọ ya ẹla ọọwa yẹkẹẹ, “Ohe Oluhye Adịda, angịlẹ wuu ká ya ham lẹ, m kpẹhị rịraa yẹẹyẹẹ, chajị ká ọngọngọhẹ nyaa á ka gụm byi kpong-kpong ka.”

¹⁰Ụka ọọwa, ịSayịmọn iPita kpa oge nyamwụ ụ-ụwa. Ọọwa lẹ, ọ gbiloo pịlala lẹ, ọ hụla ụrụ upwuriri nya ọnchẹ ọhẹ nya olegbeju ọgbahị nya angịkiliya nya Ohe Oluhye, hwaarịị dụwa ị-ịpyị lẹlẹ. Ẹnyị nya ọngọọwa a ri ịMalakọsị lẹ.

¹¹IJisọsị byi iPita yẹkẹẹ, “Tụ ụbwọ hi oge nyang ju ka ẹpwụ nya apile nyamwụ lẹẹlẹẹ mẹ. Ukoku nya akama ọyẹyẹ ọlẹ ká Ohe Oluhye Adam ya ham yẹkẹẹ, am nyị ya nwa mẹ lẹ, a me irya yẹkẹẹ, am nyị́ ka ye nwa kaka, iPita?”

¹²Ịnyị, ịsọja bala olegbeju ọgbahị nyaa bala ịdanggeri nya ala iJuu a wu iJisọsị lẹ, ị chọọ iri mẹnẹ-mẹnẹ lẹlẹ.

¹³Ọọwa lẹ, ị kpa iJisọsị kele ka ẹga nya Anasị nya ọgbanyẹ-ọgbanyẹ lẹlẹ. Anasị ọọwa a ri adịda ẹpwa nya ịKayafasị ọlẹ kọ ri olegbeju ọgbahị nya angịkiliya nya Ohe Oluhye wuu la ẹka ọọwa lẹ.

¹⁴ỊKayafasị ọwẹ a ri ọngọlẹ kọ byi ala iJuu wuu yẹkẹẹ, nyị ka ri ang ohiigu gụ haa ịwa ala iJuu wuu, nya ọngọ ookpokpo ọ-ka gbu igu wọnụ nyaa ịwa aluche wuu ju lẹ.

¹⁵Ụka ọọwa, ịSayịmọn iPita juwa ba iJisọsị anyị jẹ ẹ-ẹkpẹ-ẹkpẹ bala ọngọjụgbẹyị nya iJisọsị ọkịla ọhẹ. Ọngọjụgbẹyị nya iJisọsị ọkịla ọọwa, jẹ́ olegbeju ọgbahị nya angịkiliya nya Ohe Oluhye ọọwa yẹẹyẹẹ ene lẹ, ọ jụ kele ka ọdọdẹpwa nyamwụ ba iJisọsị anyị la ọwụlẹlẹ.

¹⁶Ụka ọọwa, iPita godayị rịrị odehe nya ogirigba o-bwu ka ẹpwa ọọwa. Ọọwa lẹ, ọngọjụgbẹyị nya iJisọsị ọkịla ọlẹ kọ jẹ́ olegbeju ọgbahị nya angịkiliya ọọwa, a tịrẹkpẹ kele kaka ya ẹla ta ọnyị onjwo ọnyang ọlẹ kọ juwa gbe ọnụ ogirigba ọọwa lẹ, ọ kpa iPita ba ịlọmwụ kele ka ọdọdẹpwa ọọwa lẹlẹ.

¹⁷Ịnyị, onjwo ọnyang o-gbe ọnụ ogirigba ọọwa a tọ iPita wo yẹkẹẹ, “Am jẹ́ ká ri ọngọhẹ lẹpwụ nya angịjụgbẹyị nya iJisọsị ọlaanyị?” IPita wẹ byoo yẹkẹẹ, “Eheehe! Aḿ ri ọngọhẹ lẹpwụ nyaa ka!”

¹⁸Ụka ọọwa, jaabwọ ká ohu juwa họ lụmẹ lẹ, anchẹ nya ayịdẹpwa ọọwa bala alịsọja igbeji ịlụwa ịhyẹ tụ ila ju ụ-ụwa, juwa wo. Ọọwa lẹ, iPita a kele kaka godayị rịrị ụ-ụwa, juwa wo ila ọọwa taa lẹlẹ.

¹⁹Ụka ọọwa, olegbeju ọgbahị nya angịkiliya nya Ohe Oluhye wuu juwa tọ iJisọsị ịtọ u-uhye nya angịjụgbẹyị nyamwụ bala ụma nya ang ọmẹjẹ nyamwụ.

²⁰IJisọsị wẹ byoo yẹkẹẹ, “Ang ọmẹjẹ nyam ri ang ọmẹjẹ ọlẹpwụ nya uche. Am kaa mẹ ang nyam jẹ angịnyị e-ebe ị-mẹ ẹla nya Ohe Oluhye jẹ nyanụ bala ube ịgọgọ ọtụka nya Ohe Oluhye nyanụ ẹ-ẹga ká ala iJuu wuu kaa jịra. Ḿ kaa ya ẹlẹlẹhẹ nyam dodehe ikwi kpong-kpong ka.

²¹Ee lẹ, ịịyẹ a tị́ du ká juwa tọm am ayịdang wo mẹ? Tọ angịlẹ kam kaa mẹ ang jẹ wo, kị ya jeng la ịlaa mẹ. Chajị, ị jẹ́ ụma nya ang ọlẹ kam kaa mẹjẹ.”

²²Ụka ká iJisọsị ya ẹlẹwẹ dodehe ịnyị lẹ, ọngọhẹ lẹpwụ nya ịdanggeri nya ala iJuu ọlẹ kọ juwa a wa iJisọsị abwọ kpuu lẹ, ọ byoo yẹkẹẹ, “Olegbeju ọgbahị nya angịkiliya nya Ohe Oluhye, a byẹjẹ wẹẹ ya ẹla ọlịịwẹ ta ịnyị lẹ?”

²³IJisọsị wẹ byoo yẹkẹẹ, “Ó ri ká ẹla ọlẹ kam ya wẹ, á ri ẹla onyobyi oyaya lẹ aalẹ, a ya dodehe je ọng myị́ ọng mẹ! Ma, ọ́ tị ri ẹla nya ịlẹhị kam ya wẹ lẹ, ịịyẹ a tị́ du ká mwọọgịlẹ wam abwọ ododu mẹ?”

²⁴Ịnyị, Anasị a tụụbwọ hi iJisọsị lẹ, ọ ya, nyị kpọọ kele ka ẹga nya ịKayafasị, olegbeju ọgbahị nya angịkiliya nya Ohe Oluhye mẹ lẹlẹ. Ụka ọọwa lẹ, ị chị iJisọsị iri, juwa wẹẹ.

²⁵Ụka ká iPita godayị rịrị ụ-ụwa, juwa kpa ila wo wẹẹ lẹ, angịlẹ kị godayị rịrị tọọ a byoo yẹkẹẹ, “Ahụ ọlẹng ọwẹ, a ya ká ri ọngọhẹ lẹpwụ nya angịjụgbẹyị nya iJisọsị ka?” iPita a wẹ byaa yẹkẹẹ, “Eheehe! Aḿ ri ọngọhẹ lẹpwụ nyaa ka!”

²⁶Ọngọhẹ lẹpwụ nya anchẹ nya olegbeju ọgbahị nya angịkiliya nya Ohe Oluhye ọlẹ kọ ri ọọnịna nya ịMalakọsị ọlẹ ká iPita hụla ụrụ nyamwụ ọhẹ, tọ iPita ịtọ yẹkẹẹ, “Aahụ, m yẹ ẹ-ẹga nya iJisọsị lẹẹ igbinọ ẹ-ẹpwụ nya ẹrụ oliku ọlaanyị ka?”

²⁷Ọọwa lẹ, iPita a myịmyị pwa rwarụ ụ-ụwa lẹlẹ. Ahyaahị kọ pwa ịnyị lẹ, ọwọọwọ a da ịgbụ lẹlẹ.

²⁸Ụka ọọwa, ị kpa iJisọsị bwu ẹpwa nya ịKayafasị kele ka ọdọdẹpwa nya ịPayịleti ịgọvụnọ. Ụka ọọwa ri alụtụrụ gbegbegbe. Alegbeju nya ala iJuu ịlẹ kị kpọọ kele, á myị jụ ka ẹpwụ nya ọdọdẹpwa nya ịgọvụnọ ka. Chajị kị ka la cheri-cheri, jaabwọ ká ehile nyaa ịwa ala iJuu ya, nyị họ ene kị ka jẹ́-ẹ ri Ang Oriri Ọchịpwụrụ ọọwa.

²⁹Ịnyị, ịPayịleti a kpehe baa kele ka odehe nya ọdọdẹpwa nyamwụ lẹ, ọ taa wo yẹkẹẹ, “Ẹla ịyẹ, ọlẹng ọlẹ a tị́ họ kanụ wụrwọọ eje wẹ ẹga nyam? Anụ gbe mẹ!”

³⁰Ị wẹ byoo yẹkẹẹ, “Ó ri ká ọlẹng ọlẹ á ri ọngọ họ uguru ẹla kaka lẹ, ịnọ, áhị́ tụtụm ka wụrwọọ eje warị wẹ ẹga nyang kaka!”

³¹ỊPayịleti wẹ byaa yẹkẹẹ, “O hiigu. Aalẹ, anụ kpọọ rụ kele, kanụ tị tị lọọ eje jaabwọ ká ehile nyanụ la mẹ!” Alegbeju nya ala iJuu ịịwa wẹ byi ịPayịleti yẹkẹẹ, “Ehile, á myị ọnụ hahị ahị nyọka ya eje nya igu wu ọngọngọhẹ ka, ịnyị a du lẹ.”

³²Oyaya nyaa ọọwa ri ọ-họ jịra nya ẹla ọlẹ ká iJisọsị ya dodehe ene-ene u-uhye nya ụma nya igu ọlẹ kọ ka nwọọ.

³³Ịnyị, ịPayịleti a rụ tịrẹkpẹ kaka hụhụ ọdọdẹpwa nyamwụ lẹ, ọ wụrụ iJisọsị kaka tọọ wo yẹkẹẹ, “Ahụ a ri Adịrahụ nya ala iJuu ịnyịlẹhị lẹ?”

³⁴IJisọsị wẹ byoo yẹkẹẹ, “Ahụ ayịdang a tị́ wẹẹ tọ ịtọ ọwẹ la ịlọng lee angịkịla a tị́ tụng tutu u-uhye nyamwụ?”

³⁵ỊPayịleti wẹ byi iJisọsị yẹkẹẹ, “Am ri ala iJuu nyanụ le? Alepwoja nyang mịlẹ-mịlẹ bala alegbeju nya angịkiliya nya Ohe Oluhye nyanụ, a wụrụng eje warị wẹ ẹga nyam lẹẹ lẹ. Ẹla ịyẹ, a tị́ họ ene?”

³⁶IJisọsị wẹ byoo yẹkẹẹ, “Ịpyị adịrahụ nyam am á ri ịnya odehe ọlẹ ka. Ó ri ká ịpyị adịrahụ nyam á ri ịnya odehe ọlẹ, ịnọ, angịjụgbẹyị nyam ka ma uya yẹm dada, chajị ká alegbeju nya ala iJuu á ka wum kpa warị kaka. Ma, ịpyị adịrahụ nyam am, á jam odehe ọlẹ ka, ịnyị a du lẹ.”

³⁷ỊPayịleti wẹ byoo yẹkẹẹ, “Ọọwa ri yẹkẹẹ, ahụ ayịdang tị tị ri adịrahụ, ịnọ lẹ?” IJisọsị wẹ byoo yẹkẹẹ, “Ịnyị, ahụ ayịdang a tị́ kpa ọnụ nya ịlọng wụrụm wẹ. Ajị nya ọọwa kpangga a du kam warị wẹ ẹpwụ nya odehe ọlẹ, kam ka ya ẹla nya ịlẹhị dodehe je angịnyị ehe lẹlẹ. Ọng myị́ ọng ọlẹ kọ ji oye nya ẹla nya ịlẹhị ka ke ụrụ la ẹla nyam pyii lẹ.”

³⁸ỊPayịleti wẹ byi iJisọsị yẹkẹẹ, “Ịịyẹ a tị́ ri ẹla nya ịlẹhị ọọwa ene?” Ahyaahị ká ịPayịleti tọ iJisọsị ịtọ ọọwa lẹ, ọ rụ kpehe kele ka ẹga nya alegbeju nya ala iJuu kaka byaa yẹkẹẹ, “Aḿ yẹ ịngịngịhyẹ ọlẹ ká ọlẹng ọlẹ họ kpoye nya ehile, m ka jẹ́-ẹ ya eje woo hanụ kaka.

³⁹Ma, jaabwọ kọ ri ọhọhọ nyanụ yẹkẹẹ, ẹka myị́ ẹka wuu lụka nya Ang Oriri Ọchịpwụrụ ọlịịlẹ, m kaa chị ọngọ kpa eje e-egbeju ọhẹ da hanụ lẹ, anụ tịtọ kam ka chị ọlẹng ọlẹ kị wụrụ Adịrahụ nya ala iJuu da hanụ ihwẹnyị lẹ?”

⁴⁰Ụka ọọwa, ịwa wuu ya ẹla la omyi o-gboo myịmyị yẹkẹẹ, “Ehe! Ọ-ọlẹng ọlẹ, ahị tịtọ ka! ỊBarabasị, a ka chịda hahị ihwẹnyị lẹ!” ỊBarabasị ọọwa ri oloyi ọngọ họ angịnyị agbụrụ.