Read idege ỊJỌN 20 Bible Online

ỊJỌN 20 - idege bible

ỊJỌN 20

¹Lụtụrụ gbegbegbe, ẹnụ nya ịchọọchị, lụka ká owu chị wẹẹ, iMeri ọla ịMagịdala kele ka iworu nya iJisọsị. Ọọwa, ọ yẹ kị rị ẹjwọ ọlẹ kị ya tụ ọnụ o-bwu ka ẹpwụ nya iworu ọọwa ku hi iworu lẹlẹ.

²Ịnyị, ọ rụnyẹ kele kaka ya je ịSayịmọn iPita bala ọngọjụgbẹyị nya iJisọsị ọlẹ kọ há iJisọsị lụmẹ yẹkẹẹ, “Angịhyẹ hu ogu nya Ọngọlahị kpa rụ bwu ẹpwụ nya iworu lẹ! Áhị́ tị jẹ́ ẹga ọlẹ kị hwoo kpa kaka nọ datị kaka.”

³Ọọwa, iPita bala ọngọjụgbẹyị nya iJisọsị ọkịla ọọwa a yegiri, juwa rụ kele ka iworu nya iJisọsị lẹlẹ.

⁴Ịwa angị imiiye juwa rụnyẹ kele. Ma, ọngọjụgbẹyị nya iJisọsị ọkịla ọọwa tị rụnyẹ gụ iPita kaka pwụ iworu jene nyamwụ.

⁵Ọọwa lẹ, ụka kọ pwụ ụwa lẹ, ọ hiri kpẹẹ, chẹhị kele ka ẹpwụ nya iworu ọọwa kaka yẹ ịpwụ ịlẹ kị ya rị ogu, kị gu ụwa ẹ-ẹpwụ nya iworu lẹlẹ. Ma, ọwa ayịdang á tị jụ ka ẹpwụ nya iworu ọọwa ka.

⁶Ịnyị, iPita a kele bwu ẹkpẹ nyamwụ lẹ, ọ kpụrụrụ kele ka ẹpwụ nya iworu ọọwa ayịdang lẹlẹ. Ọ yẹ ịpwụ ịlẹ kị ya rị ogu nya iJisọsị, kị chị ụwa ẹ-ẹpwụ nya iworu.

⁷IPita yẹ apwụ ọlẹ kị ya rị ogu nya iJisọsị e-egbeju dụwa ẹ-ẹpwụ nya iworu ọọwa ịnyịnyị. Ma, apwụ ọ-rị egbejwọọwa tị wa aba nụwa datị hi apwụ ịkịla.

⁸Ọọwa lẹ, ọngọjụgbẹyị nya iJisọsị ọkịla ọlẹ kọ pwụ iworu jene nya iPita, a jụ ka ẹpwụ nya iworu ọọwa ịnyịnyị lẹ, ọ yẹ ang ịlụwa ịwẹ ịnyịnyị lẹ, ọ myị la owuleji bwula igu nya Ọngọlahị lẹlẹ.

⁹Chajị ụka ọọwa lẹ, ịwa ayịdang á jẹ́ etu nya ẹla ọlẹ ká Ụpwụ Ịgọgọ ya, nyị ka họ u-uhye nya owuleji bwula igu nya iJisọsị kpong-kpong lẹka.

¹⁰Ọọwa lẹ, angịjụgbẹyị nya iJisọsị ịwẹ a rụ tịrẹkpẹ ka ẹpwa nyaa lẹlẹ.

¹¹Ma, iMeri ọla ịMagịdala hi godayị rịrị ụ-ụwa i-iworu, juwa jida. Lụka kọ juwa kpa ida je wẹẹ lẹ, ọ hiri kpẹẹ juwa chẹhị ka ẹpwụ nya iworu nya iJisọsị lẹlẹ.

¹²Ọọwa lẹ, ọ chẹhị kaka yẹ alegu-ẹrụ imiiye ịhyẹ kị hụhụ ụ-ụwa lẹlẹ. Ọngọhẹ hụhụ koye nya okigbeju. Ọngọkịla hụhụ koye nya okwata nya ẹga ọlẹ kị ya ogu nya iJisọsị nọ ene-ene.

¹³Ọọwa lẹ, alegu-ẹrụ ịịwa a tọ iMeri wo yẹkẹẹ, “Ọnyang, ịịyẹ a tị́ du ká juwa jida?” IMeri wẹ byaa yẹkẹẹ, “Angịhyẹ tị́ hu ogu nya Ọngọlam kpa rụ ka ẹgẹhẹ lẹ. Ḿ tị jẹ́ ẹga ọlẹ kị yọọ nọ datị kaka!”

¹⁴Ịnyị, ụka ká iMeri jahị nyamwụ kpata lẹ, ọ chẹhị kaka yẹ iJisọsị godayị rịrị ụ-ụwa lẹlẹ. Ma, ọ́ tị jẹ́ yẹkẹẹ, iJisọsị ayịdang nyaa wẹ lẹ, datị kaka.

¹⁵IJisọsị tọọ wo yẹkẹẹ, “Ọnyang, ịịyẹ a tị́ du ká juwa jida? Oowo a tị́ juwa pịlahị?” Ụka ọọwa, iMeri me irya yẹkẹẹ, ayịdọlẹrụ ọlụwa nyaa wẹẹ ya ẹla tọwa lẹ. Ọọwa lẹ, ọ wẹ byi iJisọsị yẹkẹẹ, “Ayịbahị! Ó ri ahụ ká hu ogu nya Ọngọlam la lẹ aalẹ, a ya ẹga ọlẹ ká yọọ nọ jem, kam kele kaka hwoo kpa rụ mẹ!”

¹⁶IJisọsị wẹ byoo yẹkẹẹ, “IMeri!” Ịnyị, iMeri a jahị nyamwụ kpata da ka ẹga nya Ọngọlahị lẹ. Ọ ya dodehe la oja nya ala iHiburu yẹkẹẹ, “ỊRabọnị!” Etu nya ịRabọnị ri, Ayịbahị ịtịcha.

¹⁷IJisọsị wẹ byi iMeri yẹkẹẹ, “A yụbwọ gum ka. Chajị am ayịdang á rụ kele ka uhye-ọgba ka ẹga nya Adam lẹka. Ma, kele kaka ya je anyadam angịjụgbẹyị nyam yẹkẹẹ, am nyị jam ka rụ kele ka uhye-ọgba ka ẹga nya Adam olepwoohe bala Adang olepwoohe ọlẹ kọ ri Ohe Oluhye nyam bala Ohe Oluhye nyang lẹ mẹ.”

¹⁸Ịnyị, iMeri ọla ịMagịdala a rụ kele kaka ya je angịjụgbẹyị nya iJisọsị yẹkẹẹ, ọwa nyị yẹ iJisọsị lẹ, ọ ya jaa ịnyịnyị jaabwọ ká iJisọsị bwu ya ẹla tọọ lẹlẹ.

¹⁹Ịnyị, lụka nya ẹwụ obyi la ẹnụ nya ịchọọchị ọọwa, ká angịjụgbẹyị nya iJisọsị juwa u-ube ọhẹ tụ ụgbẹyị ku ịlaa, chajị nya uhi nya ala iJuu lẹ, iJisọsị a hu gẹgịlẹ ẹ-ẹpwarịrị nyaa lẹ, ọ byaa yẹkẹẹ, “Okpunyi a juwa hanụ.”

²⁰Ụka kọ ya ịnyị kpá lẹ, iJisọsị a mẹ ekpuru nya iloo ịlabwọ nyamwụ bala ekpuru nya ụwangga olekilo nyamwụ jaa lẹlẹ. Ọọwa lẹ, angịjụgbẹyị nyamwụ a juwa chị ọkẹkẹnị nya ịlẹhị-ịlẹhị, chajị nyọlẹ kị yẹ Ọngọlahị-lahị-lahị lẹlẹ.

²¹Ịnyị, iJisọsị a myịmyị byaa yẹkẹẹ, “Okpunyi a juwa hanụ. Jaabwọ ká Ohe Oluhye Adam dum ẹrụ warị wẹ odehe ọlẹ, ịnyịnyị, m wẹẹ dunu ẹrụ kpehe ka odehe tịtị lẹlẹ.”

²²Ụka ká iJisọsị byi angịjụgbẹyị nyamwụ ịnyị kpá lẹ, ọ da ọhụ jwaa lẹ. Ọ byaa yẹkẹẹ, “Anụ ye ọngịrị nya Olegu Ịgọgọ nya Ohe Oluhye mẹ oo!

²³Ọng myị́ ọng ọlẹ kanụ hịnyọhi ịhọbịrị nyamwụ họọ lẹ aalẹ, Ohe Oluhye tịtị ka hịnyọhi ịhọbịrị nya ọngọọwa họọ ịnyịlẹhị lẹ. Ọng myị́ ọng ọlẹ kanụ tị hịnyọhi ịhọbịrị nyamwụ họọ kaka lẹ aalẹ, ị́ ka hịnyọhi ịhọbịrị nya ọngọọwa họọ kaka ịnyịnyị.”

²⁴Ụka ọlẹ ká iJisọsị chị ịlọmwụ ehe mẹjẹ angịjụgbẹyị nyamwụ lẹ, ịTọmasị ọlẹ kị wụrụ iDidimọsị, ká etu nyamwụ ri anyewa, á juwa ta angịjụgbẹyị nya iJisọsị ịkịla lụka ọọwa ka.

²⁵Ọọwa lẹ, ụka ká ịTọmasị kele lẹ, angịjụgbẹyị nya iJisọsị ịkịla ịwẹ a ya joo yẹkẹẹ, “Ahị yẹ Ọngọlahị lẹ!” ịTọmasị wẹ byaa yẹkẹẹ, “Ó ri kam kpẹhị nya ịlọm yẹ ukpuru nya iloo ịlụtụbwọ nyamwụ bala ọ-ya ụkụchụ nyam gu ekpuru nya iloo ịịwa kpá ka bala ọ-ya ụbwọ nyam gu ukpuru nya ụwangga ọlaka nyamwụ kpá ka aalẹ, aḿ ka myị ka!”

²⁶Ịnyị, ụka ká ụtụrụ ọhaneku warị lẹ, angịjụgbẹyị nya iJisọsị a juwa u-ube, tụ ụgbẹyị ku ịlaa myịmyị lẹlẹ. Ụka ọọwa lẹ, ịTọmasị tị juwa ugbẹnyị lẹ. Ọọwa lẹ, iJisọsị a hu gẹgịlẹ, godayị rịrị ẹ-ẹpwarịrị nyaa lẹ, ọ byaa yẹkẹẹ, “Okpunyi a juwa hanụ.”

²⁷Ịnyị, iJisọsị a byi ịTọmasị yẹkẹẹ, “Kẹwẹ, ká ya ụkụchụ nyang gu ukpuru nya iloo ọlụbwọ nyam bala ukpuru nya ụwangga ọlaka nyam mẹ. Ká ịwẹẹ ọdada nyang ọwẹ a myị́ hing, ká jẹ́ la ọmyịmyị alẹ mẹ.”

²⁸ỊTọmasị wẹ byi iJisọsị yẹkẹẹ, “Ọngọlam bala Ohe Oluhye nyam.”

²⁹IJisọsị wẹ byoo yẹkẹẹ, “ỊTọmasị, aajị nyọlẹ ká yẹm, a du ká myị wẹ lẹka, lee? Ahị ọwawa juwa ha angịlẹ kị kaa yẹm ẹ-ẹhị ene kị kaa myị lam ka.”

³⁰IJisọsị họ iru nya ụkụrwọ ẹbyẹbyị ịkịla lụmẹ-lụmẹ i-ijata nya angịjụgbẹyị nyamwụ, ịlẹ kị da kpehe ẹ-ẹpwụ nya ụpwụ ọlẹ kpong-kpong ka.

³¹Ma, ụkụrwọ ẹbyẹbyị ịlẹ kị da kpehe ẹ-ẹpwụ nya ụpwụ ọlẹ lẹ, ị daa kpehe, chajị kaahụ ọngọ wa ụpwụ ọlẹ ka jẹ́-ẹ myị yẹkẹẹ, “IJisọsị kpakpakpa nyaa ri ịKịrayịsị Ọnyẹwẹ nya Ohe Oluhye ọọwa ịnyịlẹhị lẹlẹ.” Chajị ká ọmyịmyị ọlala nyang ọọwa ka họ ká ka la ọhịhị ọmyịmyị-ka bwula ẹnyị nya iJisọsị.