Read idege ỊJỌN 4 Bible Online

ỊJỌN 4 - idege bible

ỊJỌN 4

¹Ụka ọọwa, angịhyẹ ya je ala ịFarisii yẹkẹẹ, iJisọsị nyị juwa hụ angịnyị enyi Ohe bala o-juwa la angịjụgbẹyị ju iru gụ ịJọn ọngọ hụ enyi Ohe lẹ.

²Ma, iJisọsị ayịdang á tị kpa ụbwọ nya ịlọmwụ hụ ọngọngọhẹ enyi Ohe ka. Kẹnẹ-kẹnẹ, angịjụgbẹyị nyamwụ kem ụbwaa, a juwa hụ angịnyị enyi Ohe ọọwa lẹ.

³Ụka ká iJisọsị wo ẹla ọọwa lẹ, ọ yegiri bwu ọpyị nya iJudiya juwa rụ tịrẹkpẹ kele ka ịGalili lẹlẹ.

⁴Ụka ọọwa, iJisọsị chị eje nyọka jẹ bwu ụgbẹyị ọlẹ kọ chịpwụrụ bwu ọpyị nya ala ịSameriya pyii.

⁵Ịnyị, iJisọsị a jẹ gbee kọ pwụ epweji ọhẹ ọlẹ kị wụrụ ịSayịkaa ụ-ụwa ọ-ọpyị nya ịSameriya lẹlẹ. ỊSayịkaa ọọwa ju ọpyị ọlẹ ká iJekọbụ ya ga ha iJosẹfụ ọnyị nyamwụ chwẹẹ.

⁶Ịwẹẹlụ nya enyi ọhẹ ọlẹ ká iJekọbụ wu juwa ẹ-ẹga ọọwa. Ịnyị, lụka ká ịnyịrọ nya ẹdịyẹ juwa chị́ iJisọsị pyẹpyẹ lụmẹ lẹ, ọ kele kaka hụhụ ọ-ọnụ nya ịwẹẹlụ nya enyi ọọwa, juwa mwụ ịnyọ lẹlẹ. Ụka ọọwa ri ụka nya oje iwo kụrụ imiiye nya ẹnụ.

⁷Ịnyị lẹ, ọnyang nya ala ịSameriya ọhẹ a ka ogo ka ịwẹẹlụ ọọwa nyọka chị́ enyi kpa rụ lẹlẹ. Ọọwa lẹ, iJisọsị a byoo yẹkẹẹ, “Ẹnwa ọnyang, chuchuu, chị́ enyi ham nwa chẹẹ mẹ!”

⁸Ụka ọọwa lẹ, angịjụgbẹyị nya iJisọsị rụ kele ka epweji ọlụwa nyọka ra ang oriri.

⁹Ịnyị, ọnyang ọọwa a wẹ byi iJisọsị yẹkẹẹ, “Ọ tị́ lanyị kaahụ ọla iJuu mịlẹ-mịlẹ, juwa bịlẹm am ọla ịSameriya enyi ọnwanwa ịnyị alẹ?” Ọnyang ọwẹ ya ịnyị, chajị ala iJuu ọhẹ-lọhẹ á kaa myị-ị ye ịngịngịhyẹ ọlẹ kị ya ju ẹ-ẹpwụ nya ẹja nya ala ịSameriya ri kpong-kpong ka.

¹⁰IJisọsị wẹ byoo yẹkẹẹ, “Ẹnwa ọnyang, ó ri kaahụ ayịdang á jẹ́ ang ọlẹ ká ọgahị ọnahị nya Ohe Oluhye ri bala ọ-jẹ́ ụma nya ọngọlẹ kọ bying wẹ yẹkẹẹ, chị́ enyi ham nwa mẹ, ká myị bịlọọ enyi nya ọhịhị, ịnọ, ọ ka chị́ enyi nya ọhịhị ọọwa hang nwa ịnyịlẹhị lẹ.”

¹¹Ọnyang ọwẹ wẹ byi iJisọsị yẹkẹẹ, “Ayịbahị, ya jem wẹẹ! Á kpa ochiri ọ-chị́ enyi bwu ịwẹẹlụ juwa ka. Ịwẹẹlụ ọlẹ tị la kpori-kpori lụmẹ. Ee lẹ, ale, a tị́ tị tị ka ye enyi nya ọhịhị ọọwa chị́ bwu?

¹²A ya kaahụ ayịdang a lụmẹ gụ IJekọbụ adahị ogogo? IJekọbụ ọwẹ ayịdang kọ ya ịwẹẹlụ nya enyi ọlẹ hahị ha lẹ, ọ nwa enyi ọlụwa bala anyị nyamwụ bala iyo ịlẹpwa nyamwụ, ịnọ, ịnyịnyị tị!”

¹³IJisọsị wẹ byoo yẹkẹẹ, “Ẹnwa ọnyang, wo mẹ! Ọng myị́ ọng ọlẹ kọ nwa enyi ọlịwẹẹlụ ọlẹ, imyi-enyi ka nwọọ myịmyị myị́ wẹẹ!

¹⁴Ma, ọng myị́ ọng ọlẹ kọ tị ye enyi nya ọhịhị ọọwa nwa bwu ụbwọ ene lẹ aalẹ, enyi ọọwa ka ka ẹpwụ nyamwụ kaka yẹ la ẹmwụ-enyi ọtụka nya ọhịhị ayịdang ọlẹ kọ ka juwa jugu jugu pyịyọọ pwụ ọhịhị ọmyịmyị-ka lẹ.”

¹⁵Ọnyang ọwẹ wẹ byi iJisọsị yẹkẹẹ, “Ọ hiigu, Ayịbahị! Ó ri ịnyị lẹ aalẹ, a chị́ enyi ọọwa ham nwa, chajị ká imyi-enyi á ka nwụm myịmyị kaka mẹ. Lee, ọ ka baba ham nyọka wẹ ogo wẹ ịwẹẹlụ ọlẹ kaka chị́ enyi myịmyị kaka ịnyịnyị mẹ.”

¹⁶IJisọsị wẹ byoo yẹkẹẹ, “Ọ hiigu. Ó ri ịnyị lẹ aalẹ, a kele kaka wụrụ ọrụ nyang, ká kpọọ warị ene mẹ.”

¹⁷Ọnyang ọwẹ wẹ byoo yẹkẹẹ, “Ayịbahị, aḿ rwọ ọrụ ọhẹ juwa ka!” IJisọsị wẹ byoo yẹkẹẹ, “Ọlẹ ká yẹkẹẹ, ọwa nyị́ rwọ ọrụ ọhẹ juwa ka lẹ, ẹla nya ịlẹhị, a ya lẹ.

¹⁸Chajị, a rwọ ọrụ lala ịrụ ẹ-ẹpwụ nya ọhịhị nyang lẹ. Ọlẹng ọlẹ ká tị hụ ta lẹẹlẹẹ wẹ lẹ, ọ-ọrụ nyang ọlam-ọlam, ọ ri ka! Lẹ, ẹla nya ịlẹhị a wẹ ká ya ịnyịlẹhị lẹ.”

¹⁹Ọnyang ọọwa wẹ byi iJisọsị yẹkẹẹ, “Ayịbahị, ọwẹ ri yẹkẹẹ, ọlọmwụ nya Ohe Oluhye, a mịla ri lẹẹ lẹ!

²⁰Ahị ala ịSameriya lẹ, u-uhye nya ọgbọdọ ọtụka ọlẹ, adahị igogo anyị a kaa kaka raabwọ gbịgba ha Ohe Oluhye lẹ. Ma, anụ ala iJuu tị yẹkẹẹ, epweji nya iJerusalẹm ụbwọọmwụ kem nyaa ri ẹga ọraabwọ gbịgba ha Ohe Oluhye lẹ.”

²¹IJisọsị wẹ byoo yẹkẹẹ, “Ẹnwa ọnyang, wo ẹla nya ịlẹhị alẹ mẹ! Ụka juwa warị ká uhye nya ọgbọdọ ọlẹ lee i-iJerusalẹm a dọmwụ ka ri ẹga ọlẹ ká angịnyị ehe ka hụ raabwọ gbịgba ha Ohe Oluhye Adịda kpong-kpong kaka.

²²Anụ ala ịSameriya á dọmwụ jẹ́ Ohe Oluhye ayịdang ọlẹ kanụ juwa gbịgba ha yẹẹyẹẹ ka. Ma, ahị ala iJuu tị jọ́ọ hiigu-hiigu, chajị ẹ-ẹpwụtụbwọ nyahị kpangga, ọchịda nya Ohe Oluhye ọọwa, a ka bwu kpehe lẹ!

²³Ma, ụka juwa warị, ọlẹẹlẹẹ a dọmwụ ri ụka ọọwa lẹlẹ! Ká angị ka juwa raabwọ gbịgba ha Ohe Oluhye Adịda nya ịnyịlẹhị ka juwa gbịgba họọ bwula ọngịrị nya Olegu nya Ohe Oluhye ẹ-ẹpwụ nya ẹla nya ịlẹhị. Chajị ụma nya angịnyị ịlịnyị kpangga, Ohe Oluhye Adịda a juwa teleko nyaa kị ka gbịgba họọ lẹ.

²⁴Jaabwọ ká Ohe Oluhye ayịdang ri olegu lẹ, angịlẹ wuu kị juwa tịtọ kị ka gbịgba ha Ohe Oluhye, ka gbịgba ọọwa họọ bwula ọngịrị nya Olegu nya Ohe Oluhye ẹ-ẹpwụ nya ẹla nya ịlẹhị pyii lẹ.”

²⁵Ọnyang ọwẹ wẹ byi iJisọsị yẹkẹẹ, “M jẹ́ yẹkẹẹ, ụka ọlẹ ká iMesaya ọlẹ kị wụrụ ịKịrayịsị ayịdang á warị wẹwẹ lẹ aalẹ, ọ ka bwuru etu nya ang ịlịịwẹ wuu ya jehi kpá lẹ.”

²⁶IJisọsị wẹ byoo yẹkẹẹ, “Am ọngọlẹ kam wẹẹ ya ẹla ya tang kpangga, a ri ịKịrayịsị ọọwa ayịdang lẹlẹ.”

²⁷Ụka ká iJisọsị juwa kpa ẹla ọọwa ọ-ọnụ ya wẹẹ lẹ, angịjụgbẹyị nyamwụ a nya bwu epweji lẹlẹ. Ụka kị yọọ bala ọnyang ọwẹ kị juwa ya ẹla lẹ, ọ laa ahịbwuu lụmẹ kaka kpoye. Ma, ọngọngọhẹ nya angịjụgbẹyị nya iJisọsị á tị tọ ọnyang ọwẹ ịtọ yẹkẹẹ, “Ịịyẹ a tị́-ị họ ẹgẹlẹ, ẹnwa ọnyang?” ka. Lee, o-byi iJisọsị yẹkẹẹ, “Ịịyẹ a tị́ du ká juwa ya ẹla tọ ọnyang ọwẹ?” myị́ kpong-kpong ka.

²⁸Ọọwa lẹ, ọnyang ọwẹ a tụụbwọ hi ọta ọ-chị́ enyi nyamwụ ị-ịwẹẹlụ ọọwa lẹ, ọ rụ tịrẹkpẹ kele ka epweji nyaa kaka byi alụwa yẹkẹẹ,

²⁹“Anụ kẹwẹ kaka yẹ ọlọmwụ nya Ohe Oluhye lalẹẹ kọ bwuru ang myị́ ang ọlẹ kam họ wuu lẹ, ya jem lẹẹ mẹ! Anụ ya kọọwa ayịdang a ka ri ịKịrayịsị ọọwa ọlẹ kahị lẹẹ ya ẹhị rịrị gbe ka?”

³⁰Ịnyị, iru nya angịnyị lụmẹ-lụmẹ a juwa bwu epweji ọọwa kele ka ẹga nya iJisọsị lẹlẹ.

³¹Ụka ọọwa, angịjụgbẹyị nya iJisọsị juwa raabwọ họọ yẹkẹẹ, “Ayịbahị, chuchuu, kẹwẹ kaka ri ang oriri chẹẹ mẹ!”

³²IJisọsị wẹ byaa yẹkẹẹ, “Anụ wo mẹ! Am ayịdang la ụma nya ang oriri ọhẹ jam ọlẹ kanụ jẹ́ ịngịngịhyẹ chajị nyamwụ kpong-kpong ka.”

³³Ịnyị, angịjụgbẹyị nyamwụ a juwa tọ awụlẹ ịtọ wo yẹkẹẹ, “Lee, ọngọhẹ tị́ kpa ang oriri bwu ẹgẹhẹ warị wẹ Ọngọlahị ẹ-ẹkpẹ nyahị ri lẹ mẹ?”

³⁴IJisọsị wẹ byaa yẹkẹẹ, “Anụ wo mẹ! Am ayịdang, ọ-ka họ irya nya Ohe Oluhye jịra bala ọ-ka họ ụkụrwọ ọlẹ ká Ohe Oluhye dum ẹrụ warị nyọka họhọ wuu jịra gbanggbang, a ri ang oriri nyam ọọwa lẹ!

³⁵Ẹ-ẹpwụ nya ẹrụ olodehe ọlẹ lẹ, ụka ká ayịdọlẹrụ á ya ajẹ nya ịrayịsị nyamwụ hụ wuu, anụ kaa yẹkẹẹ, ‘Ọ hi ọya ine lẹpwụ-lẹpwụ ene kị ka chị ịrayịsị kpa nya kaka gu o-ogu wẹẹ.’ Ma, ẹla nya Ohe Oluhye á tị lịnyị ka. Chajị, anụ hu ẹhị nyanụ hwaa kanụ chẹhị kele kaka yẹ iru nya egbudu ikpukpuru ịlẹ kị nwụlanọ lala egbe nya ekeji ịlẹ kị gaga kpụ, ọ-ka tụguru lẹ, kị lalẹẹ warị mẹ!

³⁶Ọngọlẹ kọ ka kele kaka tụ egbe ịịwa guru ka la uri nya ụkụrwọ ọọwa. Ọngọọwa ka juwa tụ egbe nya ugbodu okpukpuru guru gbe ọhịhị ọmyịmyị-ka. Ịnyị lẹ, ọngọlẹ kọ ya egbe tọ bala ọngọ tụ egbe ịịwa guru, a ka juwa chị ọkẹkẹnị la awụlẹ lẹlẹ.

³⁷Ẹla ọlẹ kị yẹkẹẹ, ‘Ọngọhẹ ri ọngọ tọ egbe tọ. Ọngọkịla ri ọngọ tụ egbe ịịwa guru lẹ,’ ẹla nya ịlẹhị a wẹ kị ya lẹ!

³⁸Lẹ, m juwa duunu ẹrụ kaka tụ egbe guru ẹ-ẹrụ nya Ohe Oluhye, ẹ-ẹga ọlẹ kaanụ ayịdang á ya egbe tọtọ ene ka lẹ! Chajị, angịkịla a ya egbe ịịwa tọ lẹ, ọọwa lẹ, anụ ayịdang a wẹẹ ri apyobwuna nya egbe ịịwa bwula ọ-hyaa hya tụguru kem lẹlẹ.”

³⁹Iru nya ala ịSameriya lụmẹ-lụmẹ myị la iJisọsị ịKịrayịsị, chajị nya ẹlẹwẹ ká ọnyang ọwẹ kele ka ya jaa yẹkẹẹ, “Ọlẹng ọlẹ bwuru ang ịlẹ kam họ wuu ene-ene kpẹẹkpẹẹ dodehe jem lẹ.”

⁴⁰Ịnyị, ala ịSameriya ịịwa a kele kaka bịlẹ iJisọsị yẹkẹẹ, nyị chuchuu, kịị nyị hụ ta ịwa e-epweji nyịwa chẹẹ mẹ, lẹlẹ. Ịnyị, iJisọsị a hụ ụ-ụwa taa lala ẹnụtụrụ imiiye lẹpwụ-lẹpwụ lẹlẹ.

⁴¹Iru nya angịnyị lụmẹ-lụmẹ ịlụwa myị la iJisọsị chajị nya ẹla nya Ohe Oluhye oyaya jwaa nyamwụ ọọwa ayịdang ọlẹ kị kpa ụrụ nya ịlaa wo.

⁴²Ọọwa lẹ, angịwẹ a byi ọnyang ọọwa yẹkẹẹ, “Ọ ri ịnyịlẹhị, ahị myị la ịKịrayịsị lẹẹlẹẹ lẹ! Ma, aajị nya ẹla ọlẹ ká ya jehi a tị du ka! Chajị ahị ayịdang kpa ụrụ nya ịlọhị wo ẹla nya Ohe Oluhye oyaya nyamwụ lẹ, ahị jẹ́ ịnyịlẹhị yẹkẹẹ, ọlẹng ọlẹ kpangga a ri Ọngọchịda nyahị ahị alodehe ọlẹ ká Ohe Oluhye du warị lẹlẹ.”

⁴³Ụka ká ẹnụtụrụ imiiye ọọwa chịpwụrụ lẹ, iJisọsị a rụ bwu ẹgẹwẹ kele ka ịGalili lẹlẹ.

⁴⁴Chajị, iJisọsị ayịdang ya dodehe yẹkẹẹ, “Ọlọmwụ á kaa la ihi e-epweji nya ịlọmwụ kpong-kpong ka.”

⁴⁵Ụka ká iJisọsị pwụ ịGalili lẹ, alụwa wuu dọọ ọwụraba la ọkẹkẹnị. Chajị ịwa ayịdang kpẹhị nya ịlaa yẹ iru nya ụkụrwọ ẹbyẹbyị ịlẹ ká iJisọsị họ i-iJerusalẹm lụka nya Ang Oriri Ọchịpwụrụ.

⁴⁶Ọọwa lẹ, iJisọsị a kele ka epweji nya iKena ị-ịGalili, ẹ-ẹga ọlẹ kọ họ ká enyi yẹ ri ere lẹlẹ. Ụka ọọwa, ọlẹng ọhẹ ọlẹ kọ ri olegbeju ọtụka nya ịgọmenti juwa ọlẹ ká ọnyị nyamwụ ọhẹ jụ ẹdụrụ nụwa e-epweji nya ịKapẹnawụm nyaa.

⁴⁷Ụka ká olegbejwọọwa wo yẹkẹẹ, iJisọsị nyị warị bwu iJudiya, kele ka ịGalili lẹ, ọ kele ka ẹga nya iJisọsị kaka bịlọọ kọ ka kele ka ịKapẹnawụm kaka họ ọnyị ọlẹng nyamwụ ọọwa uda họọ lẹlẹ. Chajị ọnyị ọọwa nụwa ọ-ọbẹ nya igu.

⁴⁸IJisọsị wẹ byoo yẹkẹẹ, “Ọngọngọhẹ nyanụ á ka la ọmyịmyị kpong-kpong kaka. Kẹnẹ-kẹnẹ, ó ri kaanụ ayịdang á yẹ ang o-ju ẹjẹẹ nya ụkụrwọ ẹbyẹbyị ịtụka-ịtụka kpá ene lẹ, mẹ ịnyị!”

⁴⁹Ọlẹng ọwẹ wẹ byi iJisọsị yẹkẹẹ, “Ayịbahị, chuchuu, chagaga kahị rụ kele ka ẹga nya ọnyị nyam mẹ! Ọ́ ri ịnyị ka, tụbwọ aalẹ, ọ ka gbu lẹ!”

⁵⁰IJisọsị wẹ byoo yẹkẹẹ, “Ẹnwa ọlẹng, rụ ka ẹpwa mẹ. Chajị, ọhịhị nya ọnyị nyang ọọwa juwa họọ lẹ.” Ọọwa lẹ, olegbejwọọwa, a myị la ẹla nya iJisọsị ọlẹ kọ ya lẹ, ọ rụ ka ẹpwa lẹlẹ.

⁵¹Ụka kọ juwa jẹ rụ ka ẹpwa lẹ, anchẹ nyamwụ ịhyẹ a kpa oja ọnyịịla bwu ẹpwa kaka tọọ ụ-ụgbẹyị lẹ, ị byoo yẹkẹẹ, “Ayịbahị, ọnyị nyang kiji hị lẹ!”

⁵²Olegbejwọọwa taa wo yẹkẹẹ, “Ụka oyina kpangga, ọ tị́ la gogo?” Anchẹ ịịwa wẹ byoo yẹkẹẹ, “Ang lala ụka nya oje ookpokpo nya ẹnụ ịnịyẹ, ẹdụrụ nyamwụ a myị́ hyoo lẹ.”

⁵³Ụka ọọwa, adịda ọ-ma ọnyị ọwẹ kpịtịya yẹkẹẹ, ụka nya awa nya oje ookpokpo ọọwa ịnịyẹ kpangga, iJisọsị nyaa kpa byoo yẹkẹẹ, “Ọhịhị nya ọnyị nyang ọọwa juwa họọ lẹ.” Ọọwa lẹ, ọlẹng ọwẹ bala alẹpwa nyamwụ wuu a myị la iJisọsị lẹlẹ.

⁵⁴Ụkụrwọ ẹbyẹbyị ọwẹ a ri ụkụrwọ ẹbyẹbyị oheeye ọlẹ ká iJisọsị họ ụka ọlẹ kọ bwu iJudiya kele ka ịGalili kpá lẹlẹ.