Read idege ỊJỌN 5 Bible Online

ỊJỌN 5 - idege bible

ỊJỌN 5

¹Ụka kọ nọ chẹẹ, ká ụka nya ọjịra-jịra nya ang oriri nya ẹla nya Ohe Oluhye nya ala iJuu ọhẹ juwa i-iJerusalẹm lẹ, iJisọsị a kele ka ụwa ịnyịnyị lẹlẹ.

²Ụ-ụwa i-iJerusalẹm, ẹmwụ-enyi ọhẹ juwa ọlẹ kọ ju ihi nya ịmwụ ọ-kpa ra ọhẹ chwẹẹ. Ị nwụ́ ẹga ọmwịịnyọ ịrụ ịhyẹ lala ọnụụkpa nya ube dagaga ju ẹmwụ-enyi ọọwa ká angịnyị ka hụ. Ị wụrụ ẹnyị nya ẹmwụ-enyi ọọwa ịBẹtịsida la oja nya ala iHiburu.

³Iru nya alẹdụrụ la datị-datị kaa kele kaka hụhụ ẹ-ẹpwụ nya ọnụụkpa ịlẹga nya ẹmwụ-enyi ọọwa. Alidu juwa, ikuku bala angịlẹ ká une nya ịnyịrọ nyaa gbu ba juwa ịnyịnyị, [juwa godayị gbe ụka ọlẹ kị ka yi enyi nya ẹmwụ-enyi ọọwa yi.

⁴Chajị olegu-ẹrụ nya Ohe Oluhye ọhẹ kaa kele ka ẹpwụ nya ẹmwụ-enyi ọọwa kaka yoo yi ịnyịnyịịnyị. Ụka kọ yi enyi ọọwa yi kpá bwaaa lẹ, ọlẹdụrụ nya ọgbanyẹ-ọgbanyẹ ọlẹ kọ ka gba ju ka ẹpwụ enyi ọọwa, a kaa la gogo bwu ẹpwụ nya ẹdụrụ ọnyị myị ọnyị ọlẹ kọ jwọọ lẹlẹ.]

⁵Ọlẹng ọhẹ juwa ụ-ụwa, kọ jụ ẹdụrụ lala ẹka ohu kụrụ iwo, iwo kụrụ ineku gbẹgbịlẹ lẹ.

⁶Ịnyị, ụka ká iJisọsị yọọ nọnọ ụ-ụwa, ọ jẹ́ yẹkẹẹ, ẹdụrụ nyị jụ ọlẹng ọwẹ lụka ọtata lụmẹ lẹ. Ọọwa lẹ, ọ byi ọlẹng ọwẹ yẹkẹẹ, “Ẹnwa ọlẹng, a juwa tịtọ nya uda ọhọhọ nya ẹdụrụ nyang?”

⁷Ọlẹdụrụ ọwẹ wẹ byi iJisọsị yẹkẹẹ, “Ee, ayịbahị, m tịtọ kam ka la gogo! Ma, ḿ tị ye ọngọngọhẹ ka hum ju ka ẹpwụ nya ẹmwụ-enyi ọwẹ kaka. Ụka kị yi enyi yi wuu, ịnọ, m kaa maga nyọka gba ju ka ẹpwụ nya enyi. Ma, ene kam ka pwụ ụwa kpá, angịkịla kaa gba ju kele jene nyam.”

⁸IJisọsị wẹ byoo yẹkẹẹ, “Ẹnwa ọlẹng, wuleji, ká hu ang ọ-da nọnọ nyang ká jẹdịyẹ lẹẹlẹẹ mẹ!”

⁹Ọọwa lẹ, ọlẹng ọwẹ a la gogo iijata-ijata lẹ, ọ wuleji, hu ang ọ-da nọnọ nyamwụ juwa jẹdịyẹ ịnyịlẹhị lẹlẹ. Ẹnụtụrụ ọlẹ ká iJisọsị họ ọngọwẹ uda ịnyị, ri Ẹnụtụrụ Ọhịnyọ Lụkụrwọ nya ala iJuu.

¹⁰Ụka ká alegbeju nya ala iJuu chẹhị kaka yẹ ọngọlẹ ká iJisọsị họ uda wẹ, kọ juwa kpa ang ọ-da nọnọ nyamwụ kam lẹ, ị byoo yẹkẹẹ, “Ẹnwa ọlẹng, alẹ ri Ẹnụtụrụ Ọhịnyọ Lụkụrwọ nyahị lẹ, ọ́ chịla ká ka kpa olo nya ang ọ-da nọnọ nyang ịnyị alẹ ka!”

¹¹Ọlẹng ọwẹ wẹ byaa yẹkẹẹ, “Ang odudu kam jam kpa ang ọ-da nọnọ nyam ịnyị ri yẹkẹẹ, ọngọ họm uda byim yẹkẹẹ, ‘Hu ang ọ-da nọnọ nyang ká jẹdịyẹ mẹ.’ ”

¹²Alegbeju ịịwa wẹ byoo yẹkẹẹ, “Ọlẹng oyina, a tị́ bying yẹkẹẹ, ahụ nyị hu ang ọ-da nọnọ nyang kaahụ nyị jẹdịyẹ ịnyị mẹ ene?”

¹³Ma, ọlẹng ọwẹ, á tị jẹ́ ọngọlẹ ká iJisọsị ri datị ene ka, chajị, iJisọsị ayịdang rụ bwu ẹga ọọwa koye ọkịla, ọ-ọlajị nya iru nya angịnyị ịlẹ kị lụmẹ ụ-ụwa lẹ.

¹⁴Ụka kọ nọ chẹẹ, iJisọsị yẹ ọlẹng ọlẹ kọ họ uda ọọwa, o-oye ọkịla nya ube ịgọgọ ọtụka nya Ohe Oluhye nya ala iJuu lẹ, ọ byoo yẹkẹẹ, “Ẹnwa ọlẹng, wo mẹ! A la gogo wẹ lẹlẹ! Aa cheji ba ọhọbịrị ọhọhọ mẹ! Ó ri ịnyị ka, tụbwọ aalẹ, ang ọtịpyọ ọ-gụ ọwẹ gụ a ka warị chịng ọgụ lẹlẹ.”

¹⁵Ịnyị, ọlẹng ọwẹ a yegiri bwu ẹga nya iJisọsị kaka ya je alegbeju nya ala iJuu ịịwa yẹkẹẹ, iJisọsị nyaa ri ọngọ họ ọwa uda lẹlẹ.

¹⁶Ịnyị lẹ, alegbeju nya ala iJuu ịịwa a juwa dọmwụ nya ọ-tụ iJisọsị pyịpyị o-oluhye nyọlẹ kọ họ ọlẹng ọwẹ uda la Ẹnụtụrụ Ọhịnyọ Lụkụrwọ nyaa ịwa ala iJuu lẹlẹ.

¹⁷IJisọsị wẹ byaa yẹkẹẹ, “Ohe Oluhye Adam jam họ ụkụrwọ nyamwụ ịnyịnyịịnyị! Lẹ, am ayịdang tịtị ka họ ụkụrwọ lala Ọwa-Ọwa ịnyịnyị pyii lẹ.”

¹⁸Ẹla oyaya nya iJisọsị ọọwa a ri ang o-du agbama ju alegbeju nya ala iJuu ịịwa gụ olene-ene gụ wẹẹ, ọọwa lẹ, ị chị eje yẹkẹẹ, ịwa nyị ka nwụ iJisọsị pyii lẹlẹ. Ang odudu nya eje ọchịchị ọọwa ri yẹkẹẹ, ọ́ ba o-ri yẹkẹẹ, iJisọsị kpoye nya ehile nya Ẹnụtụrụ Ọhịnyọ Lụkụrwọ nyaa kem kaka. Ma, ọ myịmyị ya dodehe yẹkẹẹ, Ohe Oluhye nyaa ri Adịdọwa lẹ, ọlẹ kọ mẹjẹ yẹkẹẹ, iJisọsị bala Ohe Oluhye ayịdang nyị́ gụ awụlẹ tị tị kaka.

¹⁹Ịnyị, iJisọsị a wẹ byaa yẹkẹẹ, “Nya ịlẹhị ịlẹhị, m byinu yẹkẹẹ, Ọnyẹwẹ nya Ohe Oluhye ọlẹ á kaa be ịngịngịhyẹ họ la ịlọmwụ kpong-kpong ka! Kẹnẹ kẹnẹ, ụma nya ang ọlẹ kọ yẹ ká Ohe Oluhye Adịda ayịdang á juwa họ ene lẹ, mẹ ịnyị. Chajị jaabwọ ká Ohe Oluhye Adịda kaa bwu họ ụkụrwọ nyamwụ kpangga, Ọnyị nyamwụ a tịtị jam họ ịnyịnyị lẹ!

²⁰Chajị, Ọnyẹwẹ nya Ohe Oluhye Adịda họ́ọ lụmẹ. Ịnyị a du kọ kaa mẹ ang myị́ ang ọlẹ kọọwa ayịdang juwa họ jẹ Ọnyẹwẹ ọọwa ịnyịnyị lẹ. Ohe Oluhye dọmwụ juwa ka mẹ iru nya ụkụrwọ ẹbyẹbyị ị-gụ ọlẹ gụ jẹ Ọnyị nyamwụ ọọwa ịlẹ kị ka lanụ anụ ayịdang ahịbwuu lụmẹ kaka kpoye lụka kọ ka haa ẹ-ẹpwarịrị nyanụ.

²¹Chajị jaabwọ ká Ohe Oluhye Adịda ayịdang kaa wule angị gbugbu eji bwula igu, kọ kaa ya ọhịhị haa myịmyị wẹẹ, ịnyịnyị-ịnyịnyị, Ọnyẹwẹ nyamwụ a ka hu ọhịhị ha ọng myị́ ọng ọlẹ kọ họ́ọ lẹlẹ.

²²Ohe Oluhye Adịda ayịdang á tịtọ nyọka la ọngọngọhẹ eje la ịlọmwụ ka. Ma, ọ tụụbwọ hi eje ọlala ọnyị myị ọnyị wuu ju Ọnyẹwẹ nyamwụ ụ-ụbwọ lẹ.

²³Ohe Adịda họ ịnyị, chajị ká ọng myị́ ọng ka jẹ́-ẹ ju Ọnyẹwẹ nyamwụ ihi pyii, jaabwọ kị kaa jwoo, Ọwa Adịda ayịdang ihi ịnyịnyị. Chajị, ọng myị́ ọng ọlẹ kọ myị ju Ọnyẹwẹ ọọwa ihi kaka lẹ aalẹ, Ohe Oluhye Adịda ọlẹ kọ du Ọnyẹwẹ nyamwụ ẹrụ warị, a wẹ ká ọngọọwa á myị ju ihi kaka, ịnyịnyị lẹlẹ.”

²⁴“Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ wo ẹla nyam, kọ myị la ọngọlẹ kọ dum ẹrụ warị la ọkịlẹtụ ookpokpo lẹ aalẹ, ọngọọwa la ọhịhị ọmyịmyị-ka ẹ-ẹpwụ nyamwụ lẹ. Aalẹ, ọngọọwa ayịdang á ka ju ka ẹpwụ nya eje owuwu nya Ohe Oluhye kaka. Ma, ọ gba kpehe bwu ẹpwụ ọnụ nya igu, jụ ka ẹpwụ nya ọhịhị ọ-pyịyọọ lẹ.

²⁵Nya ịlẹhị-ịlẹhị, m byinu yẹkẹẹ, ụka juwa warị, ọlẹẹlẹẹ a dọmwụ ri ụka ọọwa lẹlẹ! Ká angịlẹ wuu kị gbugbu kpá wuu lẹ, ka wo omyi nya Ọnyẹwẹ nya Ohe Oluhye. Angịịwa ịlẹ kị ka wo omyi nyamwụ ọọwa ka la ọhịhị ọmyịmyị-ka.

²⁶Chajị jaabwọ ká Ohe Oluhye Adịda ayịdang a ri ẹmwụ-enyi nya ọhịhị wẹẹ, ịnyịnyị-ịnyịnyị, Adịda ọọwa a tịtị họ ká Ọnyẹwẹ nyamwụ ri ẹmwụ-enyi nya ọhịhị ha angịnyị ehe lẹlẹ.

²⁷Ohe Oluhye Adịda ya ọngịrị ha Ọnyẹwẹ nyamwụ, kọọwa a ka ri Agaba oleje họọ lẹ. Chajị, Ọnyẹwẹ nyamwụ ọọwa ayịdang a warị wẹ odehe ọlẹ lala Ọnyị nya ọngịnyị ehe lẹ.

²⁸Chajị nya ọọwa lẹ, ọ lanụ ahịbwuu o-oluhye nya ọwẹ kpong-kpong ka! Ụka juwa warị ká angịlẹ kị gbugbu juwa i-iworu nyaa wuu ka wo omyi nya Ọnyẹwẹ nya Ohe Oluhye!

²⁹Ụka ọọwa, egu ịịwa wuu ka gba kpehe bwu ẹpwụ nya iworu nyaa. Angịlẹ kị họ abwẹla ọnyịịla nya Ohe Oluhye, ka wuleji bwula igu kaka la ọhịhị ọmyịmyị-ka. Angịlẹ kị tị họ abwẹla onyobyi, ka wuleji bwula igu ka ju ka ẹpwụ nya eje owuwu nya Ohe Oluhye pyịyọọ.”

³⁰IJisọsị myịmyị yẹkẹẹ, “Aḿ kaa họ ịngịngịhyẹ la ịlọm-ịlọm kpong-kpong ka. Jaabwọ ká Ohe Oluhye á mẹjẹm kem, m ka la angịnyị ehe eje lẹ. Chajị nya ọọwa lẹ, eje ọlala nyam ri eje ọ-la kpakpa. Chajị, a-ang ọlẹ kọ hám am ayịdang, m lẹẹ họ kpong-kpong ka. Ma, ang ọlẹ kọ há Ohe Oluhye Ọngọ dum ẹrụ warị kem, a lẹẹ kam lẹẹ họ lẹ!”

³¹“Ó ri am ayịdang kem kam jam kpa ịlọm ru ohi, ịnọ, ibeenu oriri nyam ọọwa chajị nya ịlọm ka ri ọnọọkịla omeme.

³²Ma, ọngọkịla ọhẹ juwa ọlẹ kọ juwa kpa ọnụ nya ịlọmwụ yam dodehe ịnyịnyị. M tị jẹ́ yẹkẹẹ, o-yam ya dodehe nyamwụ ọọwa ri ẹla nya ịlẹhị.

³³Chajị, ụka ọlẹ kanụ du angịhyẹ nyanụ ẹrụ kaka tọ ịJọn ọngọ hụ enyi Ohe ịtọ chajị nyam lẹ, ịJọn ya ẹla nya ịlẹhị jenu u-uhye nyam.

³⁴Aajị nyori yẹkẹẹ, am ayịdang juwa tịtọ nya o-ya dodehe ọnyịịla o-bwu ọnụ nya ọngịnyị ehe pyiipyii tị ka. Ma, m jam ya ẹla ọọwa dodehe jenu, chajị kanụ ka jẹ́ ẹla nya ịlẹhị ọlẹ kọ ka kpanụ kaka wu ọchịda nya Ohe Oluhye ọyị kem ịnyị!

³⁵Chajị ịJọn ọngọ hụ enyi Ohe ọwẹ lala otinika ọlẹ kọ juwa wuru, juwa hu ahịgboo hanụ. Anụ ayịdang tị myị ju ụgbẹyị nya ahịgboo nyamwụ ọọwa lụka o-kpii kem.

³⁶Anụ wo mẹ! M myịmyị la o-ya dodehe chajị nyam ọlẹ kọ dọmwụ lụmẹ gụ o-ya dodehe nya ịJọn ọọwa oluhye nyam wẹẹ. O-ya dodehe ọọwa a ri ụkụrwọ ọlẹ ká Ohe Oluhye Adam ya jum ụ-ụbwọ, ya, am nyị họ mẹ lẹ. Ụkụrwọ ẹbyẹbyị ịịwa ịlẹ kam lẹẹ họ ẹ-ẹpwarịrị nyanụ a ri ibeenu yẹkẹẹ, Ohe Oluhye Adịda nyaa dum ẹrụ warị ịnyịlẹhị lẹlẹ.

³⁷Ohe Oluhye Adịda ọlẹ kọ dum ẹrụ warị dọmwụ yam dodehe la ịlọmwụ ịnyịnyị. Anụ ayịdang á wo omyi nya Ohe Oluhye ayịdang ẹnẹnẹhẹ lẹka. Lee, ọ-kpẹhị nya ịlọnụ yọọ ẹ-ẹhị kpong-kpong lẹka.

³⁸Ma, jaabwọ kaanụ ayịdang á tị myị la Ọnyẹwẹ nya Ohe Oluhye ọlẹ ká Ohe Oluhye du warị kaka yoo dodehe jenu kaka lẹlẹ, ịnyị a du ká ẹla nya Ohe Oluhye á juwa ẹ-ẹpwụ nya ọkịlẹtụ nyanụ kpong-kpong kaka lẹlẹ.

³⁹Anụ ayịdang kaa wa Ụpwụ Ịgọgọ, kaa yọọ da kpẹtẹ kpẹtẹ wuu, chajị anụ me irya yẹkẹẹ, ọ-họ ịnyị kem, nyaa ka họ kịịwa nyị ka la ọhịhị ọmyịmyị-ka lẹlẹ. Ma, Ụpwụ Ịgọgọ ọọwa pyii tị ya ala lụmẹ-lụmẹ me ụchụ warị wẹ ẹga nyam am ịnyịnyị.

⁴⁰Ma, anụ ayịdang á tị nwụlanọ kanụ ka warị wẹ ẹga nyam kaka ye ọhịhị ọmyịmyị-ka ọọwa kpong-kpong kaka.”

⁴¹“Anụ wo mẹ! Ó-ya dodehe ọnyịịla nya angịnyị ehe rụ́m kem, m wẹẹ tịtọ kpong-kpong ka.

⁴²Ma, am ayịdang jẹẹnụ yẹẹyẹẹ yẹkẹẹ, ánụ la ọháha nya ịlẹhị-ịlẹhị ẹ-ẹga nya Ohe Oluhye ẹ-ẹpwụ ọkịlẹtụ nyanụ kpong-kpong ka.

⁴³Am ayịdang kpa ọngịrị nya Ohe Oluhye Adam warị wẹ ẹpwarịrị nyanụ lẹ. Ma, ánụ tị myị yem la ọkịlẹtụ ookpokpo kpong-kpong kaka. Ọ́ tị ri ká ọngọkịla ọhẹ-lọhẹ á warị la ọngịrị nya ụbwọ ịlọmwụ wẹẹ, anụ tị ka ye ọngọọwa la abwiye-abwiye!

⁴⁴Anyanyị, anụ tị́ ka jẹ́-ẹ myị lam tụtụm wẹẹ? Ká o-ya dodehe ọnyịịla o-bwu ọnụ nya angịnyị ehe kem rụ́ụnụ a ri ang ọlẹ kọ háanụ gụ o-ya dodehe o-bwu ẹga nya Ohe Oluhye ayịdang lẹ.

⁴⁵Anụ me irya yẹkẹẹ, am ayịdang nyaa juwa ka kpa ọnụ nya ịlọm wụrụụnụ eje ka ijata nya Ohe Oluhye Adam lẹ, koo! Ọngọkịla a juwa ka wụrụụnụ eje kele ka ẹga nya Ohe Oluhye lẹ. Ọngọọwa a ri iMosisi ọlẹ kaanụ ayịdang da ọkịlẹtụ hile lẹ!

⁴⁶Ma, ọ́ tị ri kaanụ ayịdang á kpa ọkịlẹtụ ookpokpo myị ju ẹla nya iMosisi ọọwa lẹ, ịnọ, anụ tị ka myị lam am ịnyịnyị lẹ! Chajị iMosisi ayịdang da ụ-ụpwụ nyamwụ ya ẹla me ụchụ warị wẹ ẹga nyam ịnyịnyị.

⁴⁷Ee lẹ, kaanụ ayịdang á tị myị kpa ọkịlẹtụ ookpokpo myị ju ẹla ọlẹ ká iMosisi da kpehe kaka lẹlẹ, anyanyị, anụ tị́ ka jẹ́-ẹ myị lam am tụtụm myịmyị wẹẹ?”