Read idege ỊJỌN 7 Bible Online

ỊJỌN 7 - idege bible

ỊJỌN 7

¹Ụka kọ nọ chẹẹ lẹ, iJisọsị a rụ kele ka ịGalili lẹlẹ. Ọ́ tịtọ nyọka juwa jẹ tụ ọpyị nya iJudiya da ịnyịnyịịnyị kaka. Chajị, alegbeju nya ala iJuu ịlụwa juwa tịtọ kị ka nwọọ.

²Ụka ọọwa lẹ, ụka nya ang oriri ọtụka nya ala iJuu wuu ọhẹ juwa ju chwẹẹ lẹ. Ị wụrụ ẹnyị nya ang oriri ọọwa “Ang Oriri nya Ọdụ Ọ-da Kụrụ Eji.”

³Ịnyị, anyadịda nya iJisọsị a byoo yẹkẹẹ, “Rụ bwu ẹgẹlẹ kele ka ọpyị nya iJudiya, chajị ká angịjụgbẹyị nyang ka jẹ́-ẹ yẹ ụkụrwọ ẹbyẹbyị ịlẹ ká wẹẹ họ wuu mẹ!

⁴Chajị, ọngọngọhẹ á juwa ọlẹ kọ juwa tịtọ ká aluche, á ka jọọ lẹ, kọ ka myịmyị-ị̀ juwa họ ụkụrwọ nyamwụ la okwiikwii kpong-kpong kaka. Lẹ, jaabwọ kaahụ ayịdang wẹẹ họ ụkụrwọ ẹbyẹbyị lẹlẹ, maga ká juwa haa la ụgbẹyị ọlẹ ká alodehe wuu ka jẹ́ng mẹ!”

⁵Ị byoo ịnyị, chajị anyadamwụ anyị mịlẹ-mịlẹ ịwẹ, á myị kpa ọkịlẹtụ nyaa ookpokpo myị lọọ ka, ịnyịnyị.

⁶IJisọsị wẹ byaa yẹkẹẹ, “Ụka nyam á pwụ lẹka. Ma, ụka myị́ ụka wuu tị ri ụka ọchịla-chịla hanụ anụ.

⁷Anụ lẹ, ánụ ka jẹ́-ẹ wụ alodehe ọlẹ ẹjẹ kaka. Ma, am tị jam waa ẹjẹ, chajị nyọlẹ kam kaa bwuru ang onyobyi ọhọhọ nyaa apwụ dodehe wuu ya jaa.

⁸Anụ rụ kele ka ọjịra-jịra nya ang oriri ọwẹ mẹ. Aḿ juwa ka baanụ kele ka. Chajị ụka nyam á họ jịra kpong-kpong lẹka.”

⁹Ụka ká iJisọsị ya ịnyị kpá lẹ, ọ hi hụwa i-ịGalili lẹlẹ.

¹⁰Ịnyị, ụka ká anyị nya adịda nya iJisọsị anyị ịịwa rụ kele ka ọjịra-jịra ọọwa kpá lẹ, iJisọsị ayịdang a kele ka ụwa ịnyịnyị lẹlẹ. Ma, ọ́ tị myị họ aluche jẹ́ yẹkẹẹ, ọwa nyị juwa ụ-ụwa ka, chajị ọ kele la okwiikwii.

¹¹Alegbeju nya ala iJuu juwa pịlahị nya iJisọsị ẹ-ẹpwụ nya ọjịra-jịra ọọwa, juwa tọ awụlẹ wo yẹkẹẹ, “Ale, iJisọsị a tị́ ji mẹ?”

¹²Ụ-ụwa ẹ-ẹpwụ nya ọjịra-jịra ọọwa, iru nya angịnyị juwa kpa ẹla nya iJisọsị chayị ya ta awụlẹ ịnyịnyịịnyị. Angịhyẹ nyaa juwa yẹkẹẹ, “Ọlẹng ọlẹ ri ọngọ ọnyịịla lụmẹ.” Angị ịkịla juwa yẹkẹẹ, “Ehe! Kọ wẹẹ hụ angịnyị ahị lụmẹ wẹẹ?”

¹³Ma, ọngọngọhẹ nyaa á tị byẹjẹ ya ẹla rụ́ iJisọsị ẹ-ẹpwụ nya ụda nya angịnyị myị́ kpong-kpong ka, chajị, ị juwa juhi nya alegbeju nya ala iJuu ịlụwa lụmẹ.

¹⁴Ịnyị, ụka kọ pwụ ẹpwarịrị nya ọjịra-jịra nya ang oriri ọọwa lẹ, iJisọsị a rụ kele ka ube ịgọgọ ọtụka nya Ohe Oluhye nya ala iJuu, juwa mẹ ang jẹ angịnyị ụ-ụwa lẹlẹ.

¹⁵Ịnyị, ụka ká ang ọmẹjẹ nyamwụ ọọwa la alegbeju nya ala iJuu ịịwa ahịbwuu lụmẹ lẹ, ị juwa yẹkẹẹ, “Ale, ọlẹng ọlẹ a tị́ jẹ́ ang ọtụka nyamwụ ọwẹ bwu ịnyị, kọ tị ka ube nya ụpwụ ọhẹ-lọhẹ ẹnẹnẹhẹ lẹka?”

¹⁶IJisọsị wẹ byaa yẹkẹẹ, “Ẹla ọlẹ kam lẹẹ mẹjẹẹnụ lẹ, ó ri ang ọmẹjẹ nya ụbwọ nya ịlọm kpong-kpong ka. Ma, ang ọmẹjẹ o-bwu ẹga nya Ohe Oluhye Ọngọ dum ẹrụ warị ịnyị!

¹⁷Ọng myị́ ọng ọlẹ kọ chị eje ọ-ọkịlẹtụ nyamwụ nya ịlẹhị-ịlẹhị nyọka họ irya nya Ohe Oluhye lẹ aalẹ, ọ ka jẹ́ datị, ó ri ká ang ọmẹjẹ nyam ọlẹ á ri ịnya Ohe Oluhye ịnyịlẹhị lee ó ri ọngịrị nya ụbwọ nya ịlọm kem, kam lẹẹ kpa ya ala ịlẹ wuu dodehe.

¹⁸Ọngọ myị ẹrụ ọnyị myị ọnyị ọlẹ kọ kaa juwa kpa ọngịrị nya ịlọmwụ kem ya ẹla aalẹ, ụmụmẹ nya ịlọmwụ kem, ọngọọwa a wẹẹ kpa dịnya lẹ. Ọngọ myị ẹrụ ọlẹ kọ tị juwa tịtọ nya ụmụmẹ nya Ọngọ doo ẹrụ kem tụbwọ aalẹ, ọngịnyị nya ẹla nya ịlẹhị ọngọọwa a ri lẹ. Aalẹ, ịngịngịhyẹ nya ọnọọkịla omeme á juwa ẹ-ẹpwụ nya ọngọọwa kpong-kpong ka.

¹⁹IMosisi ya ehile nyamwụ hanụ. Ma, ọngọngọhẹ nyanụ á tị nwụlanọ nyọka ba ehile ọọwa jẹ kpong-kpong kaka. Ee lẹ, ịịyẹ a tị́ du kanụ jam tịtọ nyọka nwụm nwụ mẹ?”

²⁰Angịịwa wẹ byi iJisọsị yẹkẹẹ, “Oowo a tị́ juwa tịtọ nyọka nwụng nwụ ene? Olegu onyobyi a wẹẹ họ tang lẹ!”

²¹IJisọsị wẹ byaa yẹkẹẹ, “Ẹchẹ nya ụkụrwọ ẹbyẹbyị ookpokpo ọlam-ọlam, m họ wẹ lẹ! Ma, ọ tị lanụ anụ wuu ahịbwuu lụmẹ.

²²IMosisi ya ehile nya ụwụwụ ọdada hanụ. Ọ ri nya ịlẹhị, ụ-ụka nya iMosisi, ẹla nya ụwụwụ ọdada ọọwa a dọmwụ bwu kaka. Ma, lụka nya adanụ igogo anyị ịnyị! Anụ kaa da anyị alẹng nyanụ ụwụwụ ọlịnyị la ẹnụ ụtụrụ ọmwịịnyọ nyanụ.

²³Ọ tị́ lanyị kanụ kaa da anyị alẹng nyanụ ụwụwụ la Ẹnụtụrụ Ọhịnyọ Lụkụrwọ nyanụ, chajị nyọka bịrị ehile nya iMosisi ka, kanụ tị mwọọgịlẹ jam wụ ẹjẹ tam am chajị nyọlẹ kam họ ọngịnyị ehe uda, la ọngọọwa la gogo la Ẹnụtụrụ Ọhịnyọ Lụkụrwọ nyanụ mẹ?

²⁴Anụ kpa ẹla ẹkpẹ ookpokpo chị eje nya ẹla kpong-kpong jaabwọ kanụ juwa yẹ lẹhị kem ka. Ma, anụ dịrẹ ẹla ọọwa yẹẹyẹẹ ene kanụ ka kpa abwẹla ọnyịịla chị eje ọchịla-chịla u-uhye nyamwụ mẹ!”

²⁵Angịhyẹ lẹpwụ nya ala iJerusalẹm ya ụ-ụwa yẹkẹẹ, “Ọ-ọlẹng ọlẹ a ri ọngọlẹ ká alegbeju ịwẹ lẹẹ tịtọ nyọka nwụnwụ ka?

²⁶Anụ yẹ wẹẹ! Ọ godayị rịrị wẹẹ ya ẹla dodehe ẹ-ẹpwụ nya aluche nya angịnyị. Ma, ọngọngọhẹ á tị byoo abwọhẹ kpong-kpong kaka. Lee, alegbeju ịwẹ ayịdang tị́ jẹ́ ọlẹng ọlẹ lala ịKịrayịsị ọọwa ịnyịlẹhị ịnyịnyị lẹ?

²⁷Ma, ụka ká ịKịrayịsị ọọwa tị ka warị lẹ, ọngọngọhẹ á tị ka jẹ́-ẹ jẹ́ ẹga ọlẹ kọ ka bwu warị datị kpong-kpong, jaabwọ kahị jẹ́ ẹga ọlẹ ká ọlẹng ọlẹ bwu kpehe lẹẹ ka.”

²⁸Ịnyị, ụka ká iJisọsị juwa mẹ ang jẹ u-ube ịgọgọ ọtụka nya Ohe Oluhye nya ala iJuu lẹ, ọ ya ẹla dodehe yẹkẹẹ, “Anụ wuu jẹ́m bala ọ-jẹ́ ẹga ọlẹ kam bwu warị kpong-kpong? Ma, ḿ warị wẹ odehe ọlẹ la ọngịrị nya ịlọm ka. Ohe Oluhye Ọngọ dum ẹrụ warị lẹ, Ọngịnyị nya ẹla nya ịlẹhị, ọwa ayịdang a ri lẹ. Ma, ánụ tị jọ́ọ datị kpong-kpong ka.

²⁹Am ayịdang lẹ, m jẹ́ ọngọlẹ ká Ohe Oluhye ri. Chajị, ẹga nyamwụ, m bwu warị lẹ. Ọwa tị dum ẹrụ warị lẹẹ ịnyịnyị lẹ.”

³⁰Ịnyị, alegbeju nya ala iJuu ịịwa a juwa tịtọ nyọka wu iJisọsị ụ-ụwa lẹlẹ. Ma, ọngọngọhẹ á tị yụbwọ gwọọ ka. Chajị, ụka nya owuwu nya iJisọsị á pwụ lẹka.

³¹Ma, iru nya angịhyẹ ịlụwa kpa ọkịlẹtụ ookpokpo myị la iJisọsị ụ-ụwa lẹ, ị juwa yẹkẹẹ, “Ụka ká ịKịrayịsị ọọwa á ka warị, anụ ya kọ ka họ ụma nya ụkụrwọ ẹbyẹbyị ịhyẹ myịmyị gụ ọlẹ ká ọlẹng ọlẹ lẹẹ họ wẹẹ?”

³²Ịnyị, ụka ká ala ịFarisii ịlụwa wo jaabwọ ká iru nya angịnyị ịịwa juwa kpa ohi oruru nya iJisọsị chayị lẹ, ịwa bala alegbeju nya angịkiliya nya Ohe Oluhye a du alịdanggeri nyaa ịhyẹ ẹrụ kele nyọka wu iJisọsị lẹlẹ.

³³Ụka kị pwụ ẹga nya iJisọsị, ọ byaa yẹkẹẹ, “M jam ka hụ tanụ lụka o-kpii wẹẹ! Ọọwa lẹ, m ka rụ tịrẹkpẹ kele ka ẹga nya Ohe Oluhye Ọngọlẹ kọ dum ẹrụ warị lẹlẹ.

³⁴Anụ ka pịlahị nyam lụka ọọwa, ma, ánụ tị ka yẹm kaka. Chajị ẹga ọlẹ kam juwa ka rụ ka lẹ, ánụ ka jẹ́-ẹ bam wẹ ụwa myị́ kpong-kpong ka.”

³⁵Ọọwa lẹ, alegbeju nya ala iJuu ịịwa a juwa ya ẹla dodehe ta awụlẹ yẹkẹẹ, “Ale, ọlẹng ọlẹ a tị́ juwa ka rụ ka du kahị ka jẹ́-ẹ bọọ ka ẹga ọọwa myị́ kaka mẹ? Lee, ọ tị́ juwa tịtọ kọ ka rụ kele ka epweji nya ala iGirisi la datị-datị, ịlẹ ká ala iJuu nyahị nyi epepe rụ kaka kụ, kọ ka juwa mẹ ang jẹ ala iGirisi ịlụwa kpịlọ lẹ mẹ?

³⁶Anụ wo jaabwọ kọ wẹẹ yẹkẹẹ, ‘Anụ ka pịlahị nyam. Ma, ánụ tị ka yẹm kaka. Chajị, ẹga ọlẹ kam juwa ka rụ ka lẹ, ánụ ka jẹ́-ẹ bam wẹ ụwa myị́ kpong-kpong ka.’ Ịịyẹ a tị́ ri etu nya ẹla ọlịnyị ká ọlẹng ọlẹ wẹẹ ya kpong-kpong mẹ?”

³⁷Ịnyị, ẹnụtụrụ ohyẹẹkpẹ-ẹkpẹ nya ọjịra-jịra nya ang oriri ọọwa ọlẹ kọ baba gụ ẹnụtụrụ ịkịla wuu a warị lẹlẹ. Ịnyị, iJisọsị a wuleji godayị kọkọ ẹnụtụrụ ọọwa lẹ, ọ juwa ya ẹla gboo dodehe yẹkẹẹ, “Anụ angịnyị wuu, anụ wo mẹ! Ọng myị́ ọng ọlẹ ká imyi-enyi á juwa nwọọ lẹ aalẹ, ọngọọwa a warị wẹ ẹga nyam kaka ye enyi nya ọhịhị nwa mẹ.

³⁸Chajị ọng myị́ ọng ọlẹ kọ myị lam lẹ aalẹ, ihu nya enyi nya ọhịhị ka mwụ bwu ẹpwụ nya ọkịlẹtụ nya ọngọọwa kpehe, jaabwọ ká Ụpwụ Ịgọgọ ya ene-ene.”

³⁹IJisọsị ya ẹlẹwẹ dodehe ịnyị, chajị nya Olegu Ịgọgọ ọlẹ ká ọng myị́ ọng ọlẹ kọ myị lọọ lẹ, juwa ka ye. Chajị, ụka kọ ya ẹlẹwẹ dodehe lẹ, ị́ ya Olegu Ịgọgọ ha angị myị lọọ lẹka. Chajị iJisọsị ayịdang á gbu kpụ, ọ wuleji bwula igu, rụ ka epwoohe lahị-lahị lụka ọọwa lẹka.

⁴⁰Ịnyị, ụka ká iru nya angịnyị ịlụwa wo ẹla oyaya nya iJisọsị ọọwa lẹ, ị juwa yẹkẹẹ, “Ọlẹng ọlẹ a ri ọlọmwụ nya Ohe Oluhye ọọwa ọlẹ ká Ohe Oluhye du warị ịnyịlẹhị lẹ!”

⁴¹Ọọwa lẹ, angịkịla nyaa a juwa yẹkẹẹ, “Ọlẹng ọlẹ kpakpakpa a ri ịKịrayịsị ọọwa lẹlẹ.” Ma, angị ịwụlẹ nyaa myịmyị juwa yẹkẹẹ, “Eheehe! Chajị, ịKịrayịsị ọọwa á ka jẹ́-ẹ bwu ịGalili kpehe kpong-kpong kaka!

⁴²Chajị, Ụpwụ Ịgọgọ tị́ ya dodehe yẹkẹẹ, Ụtẹ nya iDevidi pyii, ịKịrayịsị ọọwa nyaa ka bwu kpehe lẹ! Ọ tị́ myịmyị yẹkẹẹ, ị-ịBẹtịlẹhẹm ọlẹ kọ ri epweji ọlẹ ká iDevidi kụ ẹnẹhẹ lẹ mịlẹ-mịlẹ nyaa ka ma ịKịrayịsị ọọwa ịnyịnyị lẹ!”

⁴³Ọọwa lẹ, iru nya angịnyị ịlụwa a gu ene, chị ebwo imiiye o-oluhye nya iJisọsị lẹlẹ.

⁴⁴Ịnọ, angịhyẹ nyaa juwa tịtọ kị ka wu iJisọsị. Ma, ọngọngọhẹ nyaa á tị yụbwọ nyamwụ gwoo kpong-kpong kaka.

⁴⁵Ịnyị, ịdanggeri nya ala ịFarisii bala alegbeju nya angịkiliya nya Ohe Oluhye ịịwa a tịrẹkpẹ kele ka ẹga nyaa lẹlẹ. Ọọwa lẹ, alegbeju ịịwa a taa wo yẹkẹẹ, “Ọ tị́ lanyị kanụ wu iJisọsị ọọwa kpa warị kaka mẹ?”

⁴⁶Ịdanggeri nyaa ịịwa wẹ byaa yẹkẹẹ, “Áhị́ wo ká ọngọngọhẹ ya ẹla ọkpịpyọ ọ-lala ịnya ọlẹng ọwẹ ẹnẹnẹhẹ lẹka!”

⁴⁷Ala ịFarisii ịịwa wẹ byaa yẹkẹẹ, “Ọọwa ri yẹkẹẹ, ọlẹng ọwẹ hụnụ ahị myị́ kpịlọ lẹ?

⁴⁸Anụ ya jehi wẹẹ! Ọngọngọhẹ lẹpwụ nya alegbeju nya ala iJuu wuu lee ala ịFarisii ọhẹ-lọhẹ myị la ọlẹng ọwẹ kpịlọ ịnyịnyị lẹ?

⁴⁹Iru nya angịnyị ịwẹ kị jẹ́ ehile nya iMosisi kpong kpong ka lẹ, ị juwa ẹ-ẹpwụ nya ọlọ owuwu nya Ohe Oluhye lẹ!”

⁵⁰INikodimọsị ọlẹ kọ ka ẹga nya iJisọsị ụka ọhẹ ene lẹ, kọ ri ọngọhẹ lẹpwụ nya ala ịFarisii ịịwa ịnyịnyị, byaa yẹkẹẹ,

⁵¹“Ehile nyahị myị ọnụ hahị nyọka jẹ́-ẹ ya eje wu ọngịnyị ehe ọhẹ-lọhẹ lụka ọlẹ kahị dịrẹ ẹla ọọwa bala o-wo ẹla ọlọnụ nyamwụ kpá ene kaka lẹ?”

⁵²Ala ịFarisii ịkịla ihihi wẹ byi iNikodimọsị yẹkẹẹ, “Ang ayịdang lẹ, a ri ala ịGalili kpịlọ ká ka chị oku nya ẹla ọọwa lẹ? Kele kaka wa Ụpwụ Ịgọgọ kpori-kpori mẹ! Aalẹ, a ka jẹ́ yẹkẹẹ, ọlọmwụ nya Ohe Oluhye ọhẹ-lọhẹ nyị́ gba kpehe bwu ịGalili ẹnẹnẹhẹ lẹka ịnyịlẹhị lẹ.” [

⁵³Ịnyị, ọng myị́ ọng nyaa a rụ ka ẹpwa nyamwụ lẹlẹ.]