Read idege ỊJỌN 9 Bible Online

ỊJỌN 9 - idege bible

ỊJỌN 9

¹Ụka ká iJisọsị juwa chịpwụrụ kam, ọ yẹ ọlẹng ọhẹ ọlẹ kọ kpụ idu bwu ẹpwụ-ẹpwụ nya ịnamwụ.

²Ụka ọọwa, angịjụgbẹyị nyamwụ tọọ wo yẹkẹẹ, “Ọngọlahị ee, ọhọbịrị nya owo a tị́ du ká ọlẹng ọwẹ kpụ idu bwu ẹpwụ-ẹpwụ nya ịnamwụ ịnyị? Ọhọbịrị nya adamwụ bala ịnamwụ tị́ lee ọhọbịrị nyamwụ ọwa ayịdang tị́?”

³IJisọsị wẹ byaa yẹkẹẹ, “Eheehe! Ọ-ọhọbịrị nyamwụ ọwa ayịdang lee ọhọbịrị nya adamwụ bala ịnamwụ a du ka. Ma, ọ kpụ idu ịnyị, chajị ká ụkụrwọ ẹbyẹbyị nya Ohe Oluhye ka jẹ́-ẹ chị ehe u-uhye nyamwụ kem, ịnyị!

⁴Ahị ka juwa họ ụkụrwọ nya ọngọlẹ kọ dum ẹrụ warị lụka ọlẹ ká ahịgboo nya ahị ọpyẹpyẹ ji hahị wẹẹ. Chajị ụka ká odu á hi ene lẹ aalẹ, ọngọngọhẹ á ka jẹ́-ẹ họ ụkụrwọ ẹ-ẹpwụ nya ukpowu ọọwa myị́ kaka.

⁵Chajị ọlẹ kaam ayịdang jam odehe ọlẹ wẹẹ lẹ, am kpakpakpa a ri otinika o-hu ahịgboo nya ọhịhị nya Ohe Oluhye ha alodehe lẹlẹ.”

⁶Ụka ká iJisọsị ya ẹlẹwẹ kpá lẹ, ọ chị́ ide da ịpyị lẹ, ọ kpa ụbwọ nyamwụ wọọ kẹtẹ-kẹtẹ lẹ, ọ bwoo tudu ọlẹng ọ-kpụ idu ọwẹ egbahị nyamwụ lẹlẹ.

⁷Ọọwa lẹ, iJisọsị a byoo yẹkẹẹ, “Ẹnwa ọlẹng, kele ka ụjẹ-ẹmwụ nya enyi ọlẹ kị wụrụ iSilowam kaka hụ́ ahị nyang ụ-ụwa mẹ.” Etu nya iSilowam ọọwa ri “Ọngọlẹ kị du ẹrụ.” Ụka ká olidu ọọwa kele ka ụwa kaka hụ́ ahị nyamwụ lẹ, ọ ka nya tịrẹkpẹ bwu ụwa kpá lẹ, ọ jẹ́ yọyị cheri-cheri lẹlẹ.

⁸Ọọwa lẹ, alogu nyamwụ bala iru nya angịkịla ịlẹ kị kaa yọọ hụhụ, juwa bịlẹ ang ene-ene, a juwa tọ awụlẹ wo yẹkẹẹ, “Ọ-ọlẹng ọlẹ kọ kaa hụhụ juwa bịlẹ ang a lalẹ ka?”

⁹Angịhyẹ nyaa wẹ yẹkẹẹ, “Ee, ọwa ịnyị!” Angị ịkịla nyaa juwa yẹkẹẹ, “Ehe! Ọ-ọwa ka! Ọ moo me, ọngọ ọlaanyị a moo odu lẹ.” Ịnyị, ọlẹng ọọwa ayịdang a wẹ byaa yẹkẹẹ, “Am, ọngọọwa a lẹẹ lẹ.”

¹⁰Ọọwa lẹ, angịịwa a tọọ wo yẹkẹẹ, “Anyị, ị tị́ bwu họng uda nya idu ọkpụkpụ nyang kpong-kpong?”

¹¹Ọ wẹ byaa yẹkẹẹ, “Ọlẹng ọhẹ ọlẹ kị wụrụ iJisọsị a chị́ ide wọ ịpyị kẹtẹ kẹtẹ tudum egbahị lẹ, ọ byim yẹkẹẹ, am nyị kele kaka hụ́ ahị nyam ụ-ụjẹ-ẹmwụ nya enyi ọlẹ kị wụrụ iSilowam mẹ, lẹlẹ. Ọọwa lẹ, ụka kam kele kaka hụ́ ahị ụ-ụwa lẹ, m jẹ́ yọyị lẹlẹ!”

¹²Angịwẹ wẹ byoo yẹkẹẹ, “Ale, ọlẹng ọọwa a tị́ ji ene?” Ọngọọwa wẹ byaa yẹkẹẹ, “Aḿ jẹ́ ẹga kọ ji ka!”

¹³Ịnyị, angịịwa a kpa ọngọ kpụ idu ene-ene ọwẹ kele ka ẹga nya ala ịFarisii lẹlẹ.

¹⁴Ẹnụtụrụ Ọhịnyọ Lụkụrwọ nya ala iJuu, iJisọsị a kpa chị́ ide wọ ịpyị kẹtẹ kẹtẹ tudu ọlẹng ọwẹ egbahị ene ká iJisọsị họọ uda nya idu ọkpụkpụ nyamwụ ọọwa lẹ.

¹⁵Ịnyị, ala ịFarisii ịịwa a tọ ọlẹng ọọwa wo yẹkẹẹ, “Anyị, ị tị́ bwu họng uda nya idu ọkpụkpụ nyang kpong-kpong?” Ọ wẹ byaa yẹkẹẹ, “Ọlẹng ọọwa chị́ ide wọ ịpyị kẹtẹ kẹtẹ tudum egbahị lẹ, m kele kaka hụ́ ahị lẹ, m jẹ́ yọyị lẹlẹ.”

¹⁶Ala ịFarisii ịịwa wẹ byoo yẹkẹẹ, “Wo mẹ! Ọlẹng ọọwa ọlẹ kọ họng uda ọọwa, á bwu ẹga nya Ohe Oluhye kpong-kpong ka! Chajị, ọngọọwa á myị kpa ehile nya ẹnụ ụtụrụ ọmwịịnyọ nyahị ahị ala iJuu kpong-kpong ka.” Ma, angịkịla ịlụwa juwa yẹkẹẹ, “Anyanyị, ọngọlẹ kọ ri ọngọhọbịrị a tị́ ka jẹ́-ẹ họ ụkụrwọ ẹbyẹbyị ọlịịwẹ myị́?” Ọọwa lẹ, ebwo ọchịchị a juwa ẹ-ẹpwarịrị nyaa bwula ọlẹ ká irya omeme nyaa oluhye nya iJisọsị datị hi awụlẹ lẹlẹ.

¹⁷Ala ịFarisii ịwẹ myịmyị tọ ọlẹng ọwẹ wo yẹkẹẹ, “A tị́ yẹkẹẹ, ọlẹng ọọwa nyaa họ ọwa uda wẹ lẹlẹ. Ee lẹ, ịịyẹ a tị́ ri irya nyang u-uhye nya ọlẹng ọọwa mẹ?” Ọngọọwa wẹ byaa yẹkẹẹ, “Am myị yẹkẹẹ, ọlọmwụ nya Ohe Oluhye, ọ ri lẹ.”

¹⁸Ma, alegbeju nya ala iJuu ịịwa ayịdang á tị tịtọ kị ka myị yẹkẹẹ, ọlẹng ọwẹ nyị kpụ idu ịnyịlẹhị ene ká iJisọsị nyị-ị họọ uda kpong-kpong ka, gbee kị be ẹkọ wụrụ adịda bala ịnịna ị-ma ọlẹng ọọwa kele ka ẹga nyaa.

¹⁹Ọọwa lẹ, ị taa wo yẹkẹẹ, “Ọnyị nyanụ a lẹẹ lẹ? Ahị wo oja yẹkẹẹ, nyị kpụ idu bwu ẹpwụ-ẹpwụ nya ịnamwụ. Ó ri ịnyị lẹ, anyị, ọ tị́ la kọ du kọ jẹ́ lẹẹ yọyị tịtị mẹ?”

²⁰Adịda bala ịnịna nya ọlẹng olidu ọọwa wẹ byaa yẹkẹẹ, “Ee, ọnyị nyahị a wẹ ịnyịlẹhị lẹ. Ahị tị mọọ la idu ọkpụkpụ bwu ẹpwụ-ẹpwụ ịnyịlẹhị.

²¹Ma, jaabwọ kọ tị họ kọ du kọ jẹ́ wẹẹ yọyị lẹ, áhị́ jẹ́ koo lee ọ-jẹ́ ọngọlẹ kọ họọ uda nya idu ọkpụkpụ nyamwụ ọọwa ka ịnyịnyị! Ọwa ayịdang tị́ wẹ lẹ. Anụ tọọ wo mẹ! Ọ nwa kpụ ọ-ka jẹ́-ẹ ya ẹla la ịlọmwụ myị́ lẹ.”

²²Adamwụ anyị wẹ ịnyị, chajị ịwa ayịdang juwa juhi nya alegbeju nya ala iJuu wuu. Chajị ala iJuu ịwẹ me obyi gu awụlẹ ene-ene yẹkẹẹ, ọng myị́ ọng ọlẹ kịị nyị́ ka byị ẹjẹ-ẹ ya dodehe ụ-ụda yẹkẹẹ, ọlẹng ọwẹ nyaa ri ịKịrayịsị ọọwa aalẹ, ịwa nyị ka gba ọngọọwa kpehe dodehe hi ẹpwụ nya ube ọ-mẹ ẹla nya Ohe Oluhye jẹ nyịwa pyii lẹ.

²³Ịnyị a du ká adamwụ anyị wẹ yẹkẹẹ, “Ọwa ayịdang tị́ nwa ọngịnyị lẹlẹ, anụ tọọ wo mẹ” lẹ.

²⁴Ala ịFarisii ịwẹ myịmyị be ẹkọ wụrụ ọlẹng ọ-kpụ idu bwu ẹpwụ-ẹpwụ ọọwa ka ẹga nyaa lẹ, ị byoo yẹkẹẹ, “Ohe Oluhye ayịdang, a ka gwogbo ha kem lẹ. Chajị, ahị jẹ́ yẹkẹẹ, ọlẹng ọwẹ ri ọngọhọbịrị.”

²⁵Ọlẹng ọwẹ wẹ byaa yẹkẹẹ, “O hiigu. Ó-riri kọ ri ọngọhọbịrị lee o-ri ọngọhọbịrị ka, tụbwọ aalẹ, am lẹ, ḿ jẹ́ ọọwa koo. Ang ookpokpo ọlẹ kam jẹ́ ri yẹkẹẹ, gbalẹ-gbalẹ lẹ, m ri olidu. Ma, ọlẹẹlẹẹ lẹ, m jẹ́ yọyị lẹ.”

²⁶Alegbeju nya ala iJuu ịwẹ myịmyị tọọ wo yẹkẹẹ, “Ịịyẹ ọ tị́ họ ẹ-ẹga nyang? Anyị, ọ tị́ bwu họng uda kọ du ká jẹ́ yọyị?”

²⁷Ọlẹng ọwẹ wẹ byaa yẹkẹẹ, “M tị́ tịrọnụ ya jenu ugwọhẹ lẹ, ánụ tị tịtọ kanụ ka myị lam kaka. Ịịyẹ a tị́ du kanụ myịmyị juwa mam towo chẹrị chẹrị ịnyị wẹẹ? Lee, anụ tị́ juwa tịtọ kanụ ka ri angịjụgbẹyị nyamwụ kpịlọ lẹ?”

²⁸Ọọwa lẹ, angịịwa a juwa doo ido, juwa byoo yẹkẹẹ, “Ahụ ayịdang a ri ọngọjụgbẹyị nya ọngọwẹ lẹ! Ahị lẹẹ, angịjụgbẹyị nya iMosisi, ahị ri lẹ!

²⁹Ahị ayịdang jẹ́ yẹkẹẹ, Ohe Oluhye ya ẹla ta iMosisi. Ma, ọngọwẹ lẹ, ahị dọmwụ jẹ́ ẹga ọlẹ kọ bwubwu warị datị kpong-kpong ka lichi-lichi.”

³⁰Ọlẹng ọwẹ wẹ byaa yẹkẹẹ, “Ẹla ọlẹ tị tị la ẹbyẹbyị lụmẹ lẹ! Anụ ayịdang á jẹ́ ẹga ọlẹ kọ bwu warị datị kaka. Ma, ọwa tị họm uda nya idu ọkpụkpụ nyam lẹẹ lẹlẹ.

³¹Ahị jẹ́ ká Ohe Oluhye á kaa wo omyi nya alọhọbịrị ka. Ma, ọ́ tị ri ká ọngịnyị á ri ọngọ juwa gbịgba ha Ohe Oluhye yẹẹyẹẹ bala o-juwa jwoo ihi, kẹnẹ-kẹnẹ lẹ, Ohe Oluhye a kaa wo omyi nya ọngọọwa lẹlẹ!

³²Bwu ọmwụ ọdada nya odehe ọlẹ pyịyọọ daalẹ lẹ, aḿ wo oja yẹkẹẹ, ọngọngọhẹ nyị wụrụ egbahị nya olidu ọlẹ kịị nyị ma bwu ẹpwụ-ẹpwụ nya ịnamwụ ẹnẹnẹhẹ jaabwọ ká ọlẹng ọlẹ họ lẹẹ lẹka.

³³Chajị nya ọọwa lẹ, ó ri ká ọlẹng ọlẹ, á bwu ẹga nya Ohe Oluhye hireji ka, ịnọ, ọ́ ka jụ ịngịngịhyẹ ọlịnyị họ myị́ kpong-kpong ka!”

³⁴Alegbeju nya ala iJuu ịịwa wẹ byi ọlẹng ọwẹ yẹkẹẹ, “Oowo a tị́ lẹẹ ri? Ahụ ọngọlẹ kị ma ẹ-ẹpwụ nya ọhọbịrị, ká da ịhọbịrị rị mẹnẹ-mẹnẹ, a dachichi mwọọgịlẹ jam ka mẹ ang jẹẹhị alẹ lẹlẹ?” Ọọwa lẹ, ị kwoo rụ kpehe hi ube ọ-mẹ ẹla nya Ohe Oluhye jẹ nyaa ọlụwa lẹlẹ.

³⁵Ịnyị, iJisọsị a wo oja yẹkẹẹ, alegbeju ịịwa nyị gba ọlẹng ọwẹ kpehe hi ube ọ-mẹ ẹla nya Ohe Oluhye jẹ nyaa lẹlẹ. Ọọwa lẹ, iJisọsị a yẹ ọlẹng ọọwa lẹ, ọ byoo yẹkẹẹ, “A kpa ọkịlẹtụ nyang wuu myị la Ọnyị nya ọngịnyị ehe lẹ?”

³⁶Ọlẹng ọwẹ wẹ byi iJisọsị yẹkẹẹ, “Mẹ ọngọọwa jẹm, chajị kam ka myị lọọ mẹ, Ayịbahị!”

³⁷IJisọsị wẹ byoo yẹkẹẹ, “Ahụ ayịdang wẹẹ kpẹhị nya ịlọng yẹ ọngọọwa lẹ. Chajị, ọwa ayịdang a ri ọngọlẹ kọ wẹẹ ya ẹla tang lẹẹlẹẹ lẹ.”

³⁸Ọọwa lẹ, ọlẹng ọwẹ a wẹ byi iJisọsị yẹkẹẹ, “Ee, m myị lẹ, Ọngọlahị!” Ọọwa lẹ, ọ hirikpẹẹ, juwa gbịgba ha iJisọsị ụ-ụwa lẹlẹ.

³⁹IJisọsị ya ẹla dodehe ụ-ụwa yẹkẹẹ, “Am ayịdang warị wẹ odehe ọlẹ nyọka ri ang nya eje ọlala ha angịnyị ehe. Chajị ká angịlẹ kị jẹ́ ịlaa nya alidu nya ọkịlẹtụ ka jẹ́-ẹ yọyị. Ká angịlẹ kị tị wa ịlaa nya angị jẹ́ juwa yọyị lẹ, ka juwa ẹ-ẹpwụ nya idu ọkpụkpụ nya olegu ịnyị!”

⁴⁰Ala ịFarịsii ịlụwa ịlẹ kị wo ẹlẹwẹ ká iJisọsị ya, wẹ byoo yẹkẹẹ, “Á tị́ juwa wụrụụhị ahị ayịdang alidu kpịlọ ịnyịnyị pyii ka?”

⁴¹IJisọsị wẹ byaa yẹkẹẹ, “Ịnọ, ó ri kaanụ ayịdang á jẹ́ ịlọnụ nya angị kpụ idu nya olegu wẹẹ lẹ, ịnọ, ánụ ka la abyị kpong-kpong kaka! Ma, ọlẹ kaanụ ayịdang wẹẹ wa ịlọnụ lala angị jẹ́ juwa yọyị kpá ene-ene lẹ, a du ká abyị ọlala nyanụ á ka jẹ́-ẹ myị́ hiinu kaka lẹlẹ!”