Read idege ỤKỤRWỌ nya ALẸRỤ 1 Bible Online

ỤKỤRWỌ nya ALẸRỤ 1 - idege bible

ỤKỤRWỌ nya ALẸRỤ 1

¹Ẹnwa iTiyofilọsị, Ẹ-ẹpwụ nya ụpwụ nya ọgbanyẹ ọlẹ kam da du wang lẹ, m ya ẹla jeng ụ-ụwa, chajị nya ụma nya ụkụrwọ ịlẹ wuu ká iJisọsị dọmwụ nya o-juwa họhọ bala ang ọmẹjẹ nyamwụ bwu ọmwụ ọdada,

²gbee pwụ ụka ọlẹ ká iJisọsị rụ kele ka epwoohe lahị-lahị. Ene kọ ka rụ kele lẹ, ọ kpa ọngịrị nya Olegu Ịgọgọ da alẹrụ nyamwụ ịịwa ehile u-uhye nya ang ọlẹ kị ka họ.

³Ụka ọlẹ ká iJisọsị gbu kị jwoo eji, kọ wuleji bwula igu kpá lẹ, alẹrụ ọnyịịla nyamwụ ịịwa, ọ mẹ ịlọmwụ jẹ gede-gede la ọgụ ọlẹ kọ ka ju ịwẹẹ ọdada kpong-kpong kaka lẹlẹ. Ụka ká iJisọsị wuleji bwula igu kpá, ọ hụ odehe ọlẹ lala ụtụrụ ohu-iye lẹpwụ-lẹpwụ, juwa mẹ ịlọmwụ jẹ angịjụgbẹyị nyamwụ ịịwa bala o-juwa ya ẹla rụ́ ịpyị Adịrahụ nya Ohe Oluhye jaa ịnyịnyịịnyị.

⁴Ịnyị, ụka ká iJisọsị bala alẹrụ ọnyịịla nyamwụ ịịwa jịra ẹ-ẹga ookpokpo lẹ, ọ daa ịwa wuu ehile yẹkẹẹ, “Anụ rụ bwu epweji nya iJerusalẹm ọlẹ kpong-kpong koo! Ma, anụ́-ụ juwa godayị ụ-ụwa gbee kanụ ka ye ọhaha nya Olegu Ịgọgọ ọlẹ ká Ohe Oluhye Adịda myị ọnụ hanụ, jaabwọ kaam ayịdang ya jenu ene-ene mẹ.

⁵Chajị, ị-ịJọn ọngọ hụ enyi Ohe lẹ, enyi ọlam-ọlam, ọwa a kaa kpa hụ angịnyị enyi Ohe nyamwụ lẹ. Ma, ẹ-ẹpwụ nya ẹnụtụrụ ịmanyị-ịmanyị kele kịlahị tị lẹ, Ohe Oluhye juwa ka kpa Olegu Ịgọgọ hụnụ anụ enyi Ohe lẹ!”

⁶Ịnyị, ụka ká iJisọsị bala alẹrụ ọnyịịla nyamwụ jịra ẹ-ẹgẹhẹ lẹ, ị tọọ ịtọ ọhẹ yẹkẹẹ, “Ayịbahị ee! Ụka ọlẹẹlẹẹ, a ka kpa ku aluji rụ, ká ka ye ịpyị Adịrahụ nya ala Isirẹlụ myịmyị tịrẹkpẹ haa lẹlẹ?”

⁷IJisọsị wẹ byaa yẹkẹẹ, “Anụ wo mẹ! Ụka nya ọ-họ jịra nya ang myị́ ang wuu ịlẹ ká Ohe Oluhye Adịda ayịdang kpa ọngịrị nya ịlọmwụ hunọ wuu lẹ, ó ji ẹpwụtụbwọ nyanụ anụ, kanụ ka jẹ́ ụka ọlịnyị datị kpong-kpong ka.

⁸Ma, anụ ka ye ọngịrị nya Ohe Oluhye ụka ká Olegu Ịgọgọ á chị kụrụụnụ kpá. Ọọwa lẹ, anụ ka ri alibeenu nyam ụ-ụwa e-epweji nya iJerusalẹm bala ụ-ụwa ị-ịpyị nya iJudiya wuu bala ị-ịpyị nya ala ịSameriya wuu lalala ju kele ka ọbaba nya odehe ọlẹ wuu lẹlẹ.”

⁹Ịnyị, ụka ká iJisọsị ya ala ịwẹ je alẹrụ ọnyịịla nyamwụ ịịwa kpá wuu lẹ, ọ juwa rụ kele ka epwoohe lahị-lahị, lụka kịịwa wuu juwa hu ẹhị nyaa dọọ teee kele ka epwoohe, gbee ká iJisọsị gwaa byi ẹ-ẹpwụ nya egbamwụ tịrẹm lẹlẹ.

¹⁰Ụka kịịwa wuu juwa yọyị kele ka epwoohe wẹẹ lẹ, ị chẹhị kaka yẹ alegu-ẹrụ angị imiiye ịhyẹ kị kụrụ ịwụrụ inyiiwuru igbileji, kị godayị rịrị u-uhye nya egbamwụ ụ-ụwa lẹlẹ.

¹¹Ịnyị, alegu-ẹrụ ịịwa a byi Iru nya angịnyị ịịwa yẹkẹẹ, “Anụ alẹng nya ịGalili ee, ịịyẹ a tị́ du kanụ godayị rịrị, jam yọyị kele ka epwoohe ịnyị? Anụ wo mẹ! Jaabwọ kanụ kpẹhị nya ịlọnụ yẹ jaabwọ ká Ohe Oluhye hu iJisọsị kpa rụ lahị-lahị kele ka epwoohe gede-gede bwu ẹpwarịrị nyanụ alẹ wẹẹ, ịnyịnyị, iJisọsị ọọwa a tịtị ka tịrẹkpẹ bwu epwoohe warị wẹ odehe ọlẹ gede-gede la angịnyị ehe tịtị ka jẹ́-ẹ kpẹhị nya ịlaa yọọ ẹ-ẹhị lụka ọọwa ị-ịlahị lẹlẹ.”

¹²Ịnyị lẹ, alẹrụ ọnyịịla ịịwa a rụ bwu ọgbọdọ ọlẹ kị wụrụ Ọgbọdọ Olivu tịrẹkpẹ kele ka epweji nya iJerusalẹm lẹlẹ. Ọ bwu ọgbọdọ ọọwa kele ka iJerusalẹm lala ẹhya nya ịmaalị ookpokpo.

¹³Ịnyị, ụka ká alẹrụ ọnyịịla nya iJisọsị ịịwa pwụ epweji nya iJerusalẹm lẹ, ị rụ kele ka ube-oluhye ọhẹ ụ-ụwa ẹ-ẹga ọlẹ kị hụ lụka ọọwa lẹlẹ. Ẹnyị nya alẹrụ ọnyịịla nya iJisọsị ịịwa a lẹẹ lẹ: iPita, ịJọn, iJemsi, Andụrụ, iFilipu, ịTọmasị, ịBatọlomyu, ịMatiyu, iJemsi ọnyị nya Alufiyọsị, ịSayịmọn ọlẹ kọ kaa yẹrwa nya alẹpwụma nyamwụ lụmẹ bala iJudasị ọnyị nya iJemsi.

¹⁴Ịwa angịwẹ wuu kaa yẹ ju lawụlẹ la ọkịlẹtụ ookpokpo, juwa raabwọ ha Ohe Oluhye lawụlẹ ụ-ụwa ịnyịnyịịnyị bala iMeri ịnịna nya iJisọsị bala anyadịda nya iJisọsị alẹng anyị bala iru nya anyang ịkịla wuu ịnyịnyị.

¹⁵Ịnyị, la ẹnụtụrụ ọhẹ lẹ, iPita a wuleji godayị kọkọ ẹ-ẹpwarịrị nya ọjịra-jịra nyaa ịwa angịnyị nya Ohe Oluhye ịịwa lẹ, ọ juwa ya ẹla taa lẹlẹ. Iru ojuju nya angịịwa la angịnyị angị ohu ịrwọnyẹ chiriri. Ịnyị, iPita a byaa yẹkẹẹ,

¹⁶“Anụ anyadam ẹ-ẹpwụ nya ịKịrayịsị, anụ wo mẹ! Ẹla ọlẹ ká Olegu Ịgọgọ ya bwu ọnụ nya iDevidi onyogo ẹ-ẹpwụ nya Ụpwụ Ịgọgọ rụ́ iJudasị Isikarọtụ ọngọ kpa angịlẹ kị kaka wu iJisọsị ụgbẹyị lẹẹ ene-ene lẹ, ọ chịla ká ẹla ọọwa ka họ jịra pyii lẹ.

¹⁷Chajị, ịnọ, iJudasị ọọwa ayịdang ri ọngọhẹ lẹpwarịrị nyahị ahị angịlẹ ká iJisọsị chụchụ ha ịlọmwụ lẹ, iJudasị tịtị la ebwo ọhẹ ẹ-ẹpwụ nya ụkụrwọ nya ẹrụ ọnyịịla ọ-kpa ya pyẹ ọlẹ tahị ịnyịnyị.”

¹⁸Ma lẹẹlẹẹ tị lẹ, okpoko ọlẹ kị nwụ nya uri nya ụkụrwọ onyobyi nya iJudasị ọlẹ kọ họ bwula ọpịrị Ọngọlahị ha lẹ, ị ya okpoko ọọwa ra ọpyị o-ju ogu eji ọhẹ lẹ. Ịnyị lẹ, bwula ang onyobyi nyamwụ ọọwa lẹ, iJudasị a yẹ urwo nya igu lẹ, ọ kpa ẹpwụ nyamwụ kaka bene lẹ, ebwu nyamwụ a yẹ gu e-eji bwọọọ ẹ-ẹpwarịrị nya aluche wuu lẹlẹ.

¹⁹Ịnyị lẹ, alepweji nya iJerusalẹm wuu a wo oja nya ẹla onyobyi ọhọhọ nya iJudasị ọọwa bala igu nyamwụ lẹlẹ. Ọọwa a dọmwụ du kị wụrụ ẹnyị nya ọpyị o-ju ogu eji ọọwa ọlẹ kị ra yẹkẹẹ, Akeludama la oja nya alụwa lẹ. Etu nya Akeludama ri “ọpyị nya ịwọ”.

²⁰IPita myịmyị yẹkẹẹ, “Chajị, ị da kpehe ẹ-ẹpwụ nya ụpwụ nya Eje Ọnyịịla yẹkẹẹ, ‘Ká ẹpwa nya ọngọọwa a dụwa luhwo luhwo, ká ọngọngọhẹ a kụ ụwa kpong-kpong kaka mẹ.’ Ị myịmyị da kpehe ẹ-ẹga ọkịla yẹkẹẹ, ‘Ọngịnyị ọngọkịla, ị ka hu ku ọmwakpa nya ọngọọwa ẹ-ẹpwụ nya iwe-ahụrụ nya ụkụrwọ nya ẹrụ ọnyịịla lẹlẹ.’

²¹Chajị nya ọọwa lẹ, anụ kẹwẹ kahị chụ ọngọhẹ bwu ẹpwụ nya iru nya angịnyị ịlẹ kị lẹẹ baahị jẹ ịnyịnyịịnyị, juwa ri ibeenu nya ụka ọlẹ ká Ọngọlahị iJisọsị juwa kaa kele, warị ịnyịnyịịnyị ẹ-ẹpwarịrị nyahị, ká ọngọọwa a ku ọmwakpa nya iJudasị Isikarọtụ mẹ.

²²Ọngọọwa ka ri ọngọlẹ kọ juwa tahị bwu ọmwụ ọdada, bwu ụka nya enyi Ohe ọhụhụ nya ịJọn ọngọ hụ enyi Ohe pyịyọọ gbee ju ka ụka ọlẹ ká Ọngọlahị wuleji bwula igu, ene kọọ rụ kele ka epwoohe lahị-lahị bwu ẹpwarịrị nyahị. Chajị ká ọngọọwa tịtị ka jẹ́-ẹ ri olibeenu nya owuleji bwula igu nya ịKịrayịsị ọlẹ tahị ịnyịnyị mẹ.”

²³Ịnyị lẹ, ị me alẹng angị imiiye ịhyẹ ụchụ bwu ẹpwarịrị nyaa lẹlẹ. Ẹnyị nya angịịwa a lẹẹ lẹ: iJosẹfụ ọlẹ ká ẹnyị ọkịla nyamwụ ọhẹ ri ịBasabasị, ká ọkịla ri ịJọsịtọsị. Ọlẹng ọkịla ri ịMatayasị.

²⁴Ọọwa lẹ, ị raabwọ ha Ohe Oluhye ụ-ụwa yẹkẹẹ, “Ahụ Ọngọlahị Ohe Oluhye Ọngọlẹ ká kaa jẹ́ ọkịlẹtụ nya angịnyị ehe wuu, chuchuu, mẹ ọngọlẹ ká chụ bwu ẹpwụ nya angị imiiye ịlẹ ha ịlọng jẹẹhị lẹẹlẹẹ mẹ.

²⁵Chajị ká ọngọọwa ka ri ọngọ ka ku ọmwakpa nya iJudasị Isikarọtụ ẹ-ẹpwụ nya iwe-ahụrụ nya ẹrụ ọnyịịla o-ya pyẹ ọlẹ, juwa myị ẹrụ hang Ahụ Ohe Oluhye mẹ. Chajị, iJudasị lẹ, ọ juwa i-iwe ahụrụ onyobyi ọlẹ kọ pwokwoo chajị nya ụhwahị nyamwụ lẹ.”

²⁶Ịnyị, ụka kị diwo, chajị nyọka jẹ́ ọngọlẹ ká Ohe Oluhye chụ haa lẹ, iwo ọọwa a wu ịMatayasị lẹlẹ. Ịnyị lẹ, ị wa ịMatayasị ọọwa jula ịnọmba nya alẹrụ ọnyịịla angị iwo kụrụ ookpokpo ihihi ịkịla lẹlẹ.