Read idege ỤKỤRWỌ nya ALẸRỤ 10 Bible Online

ỤKỤRWỌ nya ALẸRỤ 10 - idege bible

ỤKỤRWỌ nya ALẸRỤ 10

¹Ọlẹng ọhẹ juwa e-epweji nya iSisarịya ká ẹnyị nyamwụ ri ịKọnịlọsị. ỊKọnịlọsị ọọwa ri olegbeju ọhẹ nya ịsọja nya ala iRom. Ọ kaa kpẹhị rịrị alebwo nya ịsọja angị ohu ịrụ ọlẹ kị wụrụ ẹnyị nyaa yẹkẹẹ, “Ụbwẹwụ nya ala Ịtali.”

²ỊKọnịlọsị ọọwa ri ọngịnyị nya Ohe Oluhye lụmẹ bala alọdọdẹpwa nyamwụ wuu. Ị kaa juhi nya Ohe Oluhye lụmẹ ịnyịnyị. ỊKọnịlọsị ri ọngọ kaa hu ang ga ha ikpehika lụmẹ. Ọ kaa raabwọ ha Ohe Oluhye ịnyịnyịịnyị ụka wuu.

³Ịnyị, ụka ká oje ịta nya obyi họ la ẹnụtụrụ ọhẹ lẹ, ịKọnịlọsị ọọwa a yẹ olegu-ẹrụ nya Ohe Oluhye ọhẹ a-arụrụ gede gede ká Ohe Oluhye doo ẹrụ kele ka ẹga nya ịKọnịlọsị lẹlẹ. Olegu-ẹrụ ọọwa yẹkẹẹ, “ịKọnịlọsị ee!”

⁴Ụka ọọwa, ịKọnịlọsị juwa mwụụrụ yẹ olegu-ẹrụ ọọwa ẹ-ẹpwụ nya uhi ojuju, juwa hụ́ kpákpakpa lẹ, ọ byi olegu-ẹrụ ọọwa yẹkẹẹ, “Ẹẹla ịyẹ tị́, Ọngọlahị?” Olegu-ẹrụ ọọwa wẹ byi ịKọnịlọsị yẹkẹẹ, “Wo mẹ! Abwọ ọrịrị nyang bala ọnahị ọhọhọ nyang wu Ohe Oluhye ọyị nya ang ọ-kpa kpịtịya lẹ!

⁵Lẹ, ịKọnịlọsị, du angịhyẹ ẹrụ kele ka epweji nya ịJọpa kaka wụrụ ọlẹng ọhẹ ọlẹ kị wụrụ ịSayịmọn, ká ẹnyị nyamwụ ọkịla ri iPita, warị wẹ ẹpwa nyang mẹ.

⁶ỊSayịmọn iPita ọọwa ju ụga ẹ-ẹpwa nya ịSayịmọn ọkịla ọhẹ ọlẹ kọ kaa họ ụkụrwọ nya egba nya iyo odudu. Ọlẹng ọọwa kụ ẹpwa nyamwụ ọ-ọnụụka nya ihu ọtụka-ọtụka.”

⁷Ụka ká olegu-ẹrụ ọlẹ kọ ya ẹla ta ịKọnịlọsị rụ kpá lẹ, ịKọnịlọsị a be ẹkọ wụrụ anchẹ nyamwụ angị imiiye ịhyẹ bala ịsọja ọhẹ bwu ẹpwụ nya ịsọja ịlẹ kị kaa myị ẹrụ họọ lẹlẹ. Ịsọja ọọwa ri ọngịnyị nya Ohe Oluhye nya ịlẹhị-ịlẹhị.

⁸Ụka ká ịKọnịlọsị tịrọnụ nya ẹla ọlẹ ká olegu-ẹrụ ọọwa ya wẹ je angịwẹ kpá lẹ, ọ daa ẹrụ kele ka epweji nya ịJọpa ka ẹga nya iPita lẹlẹ.

⁹Ịnyị, ụka ká ahị ọọnamwụ pyẹ lẹ, alẹrụ nya ịKọnịlọsị ịịwa a jẹ ịnyịnyịịnyị, kaka ju epweji nya ịJọpa ọọwa chwẹẹ lẹlẹ. Ụka ọọwa, iPita ayịdang kpụ uhye nya ịnawụ ọlẹ kọ la lala isiling nya ube, juwa raabwọ ha Ohe Oluhye ụ-ụwa, lụka nya oje iwo kụrụ imiiye nya ẹnụ.

¹⁰Ụka ọọwa lẹ, imyi juwa nwụ iPita lụmẹ. Ịnyị, ụka kị juwa kpa ang oriri nyamwụ họ lẹ, une nya ọyị ọyẹyẹ a-arụrụ a juwa chụ iPita lẹlẹ.

¹¹Ịnyị, iPita a chẹhị kaka yẹ ká epwoohe wụrụ hwoo lẹ, iPita a yẹ ká ịngịhyẹ juwa chabwọ bwu ụwa hireji lala apwụ ọtụka-ọtụka ọhẹ ọlẹ kị ya iri bwọ ịkịka ine nyamwụ, juwa kpọọ nya weji lẹlẹ.

¹²IPita chẹhị kaka yẹ ụma nya iyo ehe la datị-datị bala iyo ị-kpa apwụ gbileji la datị-datị bala ịchịnụ ịhụhụ la datị-datị, kị juwa ẹ-ẹpwụ nya apwụ ọọwa.

¹³Ịnyị, omyi ọhẹ a juwa ya ẹla byi iPita yẹkẹẹ, “IPita, wuleji ká nwụ iyo ịwẹ ká ri mẹ.”

¹⁴IPita wẹ byoo yẹkẹẹ, “Ịgọgọ ẹnẹnẹhẹ, Ọngọlahị! Chajị, aḿ ri ụma nya iyo ịlịịwẹ ẹnẹnẹhẹ lẹka. Chajị, ị rigọgọ nyahị ahị ala iJuu bala ọ-chị ịrị ẹ-ẹga kahị ji. Lẹ, m pwa.”

¹⁵Ịnyị, omyi ọọwa a myịmyị ya ẹla byi iPita yẹkẹẹ, “Ang myị́ ang ọlẹ ká Ohe Oluhye-é wụrụ ang ocheri-cheri lẹ aalẹ, á tụtụm myịmyị wụrụ ang ọọwa ang ọ-chị ịrị kaka!”

¹⁶Ẹlẹwẹ họ jịra ugbabwọ ịta a-arụrụ ẹ-ẹga nya iPita, ene ká apwụ ọọwa rụ tịrẹkpẹ kele ka epwoohe.

¹⁷Ịnyị, ụka ká iPita juwa kụ irya chịng ẹ-ẹpwụ nya ahịbwuu, juwa tọ ịlọmwụ ịtọ nya ang ọlẹ ká etu nya ọyị ọlẹ kọ yẹ wẹ a-arụrụ ka ri lẹ, alẹng ịlẹ ká ịKọnịlọsị du ẹrụ, a juwa tọ angịnyị wo ịnyịnyịịnyị gbee kị jẹ́ ẹpwa nya ịSayịmọn ẹga ọlẹ ká iPita ju ụga lẹlẹ. Ọọwa lẹ, ị kele kaka godayị rịrị ọ-ọnụ ụgbẹyị nya ogirigba nya ẹpwa ọọwa lẹlẹ.

¹⁸Ịnyị, ị be ẹkọ tịtọ wo kele ka ẹpwa ọọwa, ó ri ká ọlẹng ọlẹ kị wụrụ ịSayịmọn iPita á ju ụga ụ-ụwa ịnyịlẹhị lẹlẹ.

¹⁹Ụka ọlẹ ká iPita juwa kpa irya me chajị nya ọyị ọlẹ kọ yẹ a-arụrụ wẹẹ lẹ, Olegu Ịgọgọ a ya ẹla ta iPita yẹkẹẹ, “Yẹ mẹ. Alẹng angị ịta ịhyẹ lalẹẹ tịtọ nyang odehe.

²⁰Lẹ, iPita, wuleji ká hireji kele, ká báa rụ ahyaahị la ọ-bịrị ụka kaka mẹ. Chajị, Am a daa ẹrụ tọng lẹ.”

²¹Ọọwa lẹ, iPita a hireji kele ka ẹga nya alẹng ịịwa lẹ, ọ byaa yẹkẹẹ, “Am a ri iPita, ọlẹ kanụ wẹẹ tịtọ lẹ. Ịịyẹ a tị́ du kanụ juwa tịtọ nyam ene?”

²²Ọọwa lẹ, angịịwa a wẹ byi iPita yẹkẹẹ, “Ọlẹng ọhẹ kị wụrụ ịKọnịlọsị ị-ịnyahị kọ ri olegbeju ọkpẹhị rịrị ịsọja ohu ịrụ, a duuhi ẹrụ lẹẹ warị wẹ ẹga nyang lẹ. ỊKọnịlọsị ọọwa ri ọlabwẹla ọnyịịla bala ọngọ kaa juhi nya Ohe Oluhye lụmẹ. Ọ myịmyị ri ọngọlẹ ká alẹpwụma nya ala iJuu wuu kaa ya ẹla ọnyịịla nyamwụ lụmẹ. Ọọwa lẹ, Ohe Oluhye a du olegu-ẹrụ ịgọgọ nyamwụ ọhẹ, ẹrụ kaka byi ịKọnịlọsị yẹkẹẹ, nyị du angịhyẹ ẹrụ warị wẹ ẹga nyang kaka wụrụng ahụ iPita wẹ ẹpwa nyamwụ, chajị kịị nyị ka jẹ́-ẹ wo ẹla ọlẹ kaahụ nyị ka ya joo mẹ, lẹlẹ.”

²³Ịnyị, iPita a daa ọwụraba lẹ, ọ kpaa rụ kele ka ẹga ọlẹ kọ ju ụga kaka hyehe tọọ ụ-ụwa ẹnụ ọọwa lẹlẹ. Ịnyị, ụka ká ahị ọọnamwụ pyẹ lẹ, iPita a wuleji bala anyadamwụ ẹ-ẹpwụ nya ịKịrayịsị ịhyẹ ịlẹ kị juwa ị-ịJọpa lẹ, ị hu ang ẹdịyẹ ba alẹrụ nya ịKọnịlọsị, juwa rụ kele ka epweji nya iSisarịya lẹlẹ.

²⁴Ịnyị, ahị ọpyẹpyẹ oheeye nya ẹdịyẹ nyaa lẹ, iPita bala alogu ẹdịyẹ nyamwụ a pwụ iSisarịya lẹlẹ. Ụka ọọwa, ịKọnịlọsị ayịdang juwa ya ẹhị rịrị gbaa, ọọwa lẹ, ịKọnịlọsị a wụrụ aanamwụ bala aligu nyamwụ wuu kaka tụguru bala alọdọdẹpwa nyamwụ gbe iPita lẹlẹ.

²⁵Ụka ká iPita jụ kele ka ẹpwa nya ịKọnịlọsị lẹ, ịKọnịlọsị a kele kaka tọọ ụ-ụgbẹyị, juwa hị nọnọ ị-ịpyị a-ata nya iPita, juwa gbịgba họọ ụ-ụwa lẹlẹ.

²⁶Ịnyị, iPita a kele kaka yụbwọ chọọ lẹ, ọ wuloo eji godayị kọkọ lẹ, ọ byoo yẹkẹẹ, “ỊKọnịlọsị, wuleji godayị kọkọ mẹ. A gbịgba ham ka. Chajị, ọngịnyị ehe ọ-lala ahụ, m ri ịnyịnyị lẹ.”

²⁷Ịnyị, ụka ká iPita bala ịKọnịlọsị juwa kpa ẹla ya lawụlẹ gbe kị jụ ka ẹpwang lẹ, iPita a yẹ iru nya angịnyị ịlẹ kị jịra ụ-ụwa lẹlẹ.

²⁸Ịnyị, iPita a juwa dọmwụ nya ẹla oyaya jaa ịwa wuu lẹ, ọ byaa yẹkẹẹ, “Anụ ayịdang tị́ jẹ́ jaabwọ kọ ri ang ọ-tụ ehile nyahị ahị ala iJuu pyịpyị, nya ahị ọ-ka jẹ́-ẹ yẹ ju lanụ anụ ala iJentayịlị lee ọdọmwụ juwa tụ aha wẹ ẹpwarịrị nyanụ ịnyịnyị lẹ. Ma, Ohe Oluhye ayịdang tị mẹjẹm yẹkẹẹ, nyị́ chịla kaam nyị ka hu ọngịnyị ehe ọhẹ-lọhẹ pwụchẹẹ lee o-juwa chị ịgọ nya ọngọngọhẹ kpong-kpong ka.

²⁹Ịnyị a du kam wo ẹrụ ọlẹ ká du tọm lẹ, ịKọnịlọsị, kam warị lẹẹ la ọpwapwa ọhẹ-lọhẹ kaka lẹlẹ. Lẹ, ịtọ nyam ri yẹkẹẹ, ịịyẹ a tị́ du ká du ẹrụ tọm ene?”

³⁰Ịnyị, ịKọnịlọsị a wẹ byi iPita yẹkẹẹ, “Yẹ mẹ! M juwa raabwọ ha Ohe Oluhye lụka nya oje ịta ọlẹ kị kaa kpa raabwọ amachanyị ịịlẹ, lala ẹnụtụrụ ine kẹkpẹ lẹ. Ọọwa lẹ, m chẹhị kaka yẹ ọlẹng ọhẹ kọ kaka godayị rịrị ị-ịlahị nyam kọ kụrụ awụrụ ọhẹ ọlẹ kọ juwa hụ́ myịrị-myịrị lẹlẹ.

³¹Ịnyị, ọlẹng ọọwa a be ẹkọ wụrụm yẹkẹẹ, ‘ỊKọnịlọsị ee, Ohe Oluhye wo abwọ ọrịrị nyang bala ọ-kpịtịya nya ụkụrwọ ọnahị ọlẹ ká kaa họ ha angịnyị ịnyịnyịịnyị lẹ!

³²Chajị nya ọọwa lẹ, ịKọnịlọsị, du angịhyẹ ẹrụ kele ka ịJọpa kaka tịtọ wo chajị nya ọlẹng ọhẹ ọlẹ kị wụrụ ịSayịmọn ká ẹnyị ọkịla nyamwụ ri iPita mẹ. IPita ju ụga lalẹ ẹ-ẹpwa nya ọlẹng ọkịla ọhẹ ọlẹ kị wụrụ ịSayịmọn kọ kaa họ ụkụrwọ nya egba nya iyo odudu. Ẹpwa nyamwụ juwa ọ-ọnụụka nya ihu ọtụka-ọtụka.’

³³Lẹ, iPita, ịnyị a du kam du ẹrụ tọng ahyaahị lẹlẹ. Ịnyị, a tị kiji warị lẹẹ ịlẹhị bwula ọnahị nyang lẹlẹ. Chajị nya ọọwa lẹ, ahị angịlẹ wuu jam ke ụrụ gbeng ị-ịlahị nya Ohe Oluhye, ká ka ya ẹla myị́ ẹla ọlẹ ká Ọngọlahị Ohe Oluhye dang ehile yẹkẹẹ, ahụ nyị ya jehi mẹ lẹlẹ.”

³⁴Ịnyị, iPita a pyẹ ọnụ nyamwụ maa lẹ, ọ byaa yẹkẹẹ, “Nya ẹla nya ịlẹhị ịnyị. Ang ọlẹ kam jẹ́ chajị nya Ohe Oluhye ri yẹkẹẹ, ọwa ayịdang á ri ọngọ kaa ji oye nya ọngọngọhẹ datị kpong-kpong ka.

³⁵Ma, ọng myị́ ọng olepwoja ọnyị myị ọnyị nya odehe ọlẹ wuu, kọ juwa juhi nya Ohe Oluhye bala o-juwa họ abwẹla ọnyịịla ị-ịlahị nya Ohe Oluhye lẹ aalẹ, Ohe Oluhye tịtị ka ye ọngọọwa lala ọngịnyị nyamwụ pyii ịnyịnyị lẹ.

³⁶Anụ tị́ jẹ́ jaabwọ ká Ohe Oluhye ayịdang du ẹrụ kaka ya ẹla nya Ohe Oluhye je ala Isirẹlụ wuu lẹ. Ẹla ọọwa a ri ẹrụ ọnyịịla nya okpunyi ọlẹ kị juwa ya bwula iJisọsị ịKịrayịsị ọngọlẹ kọ ri Ayịbaba nya alodehe ọlẹ wuu lẹ.

³⁷Anụ myịmyị jẹ́ ịnyịnyị, jaabwọ kị juwa kpa ẹrụ ọnyịịla nya ịKịrayịsị ọọwa ya pyẹ lalaala ju ka ọpyị nya iJudiya wuu, dọmwụ bwu ọpyị nya ịGalili lụka ọlẹ ká ẹla Ohe oyaya nya ịJọn ọngọ hụ enyi Ohe chịpwụrụ kpá.

³⁸Anụ ayịdang jẹ́ ịnyịnyị, jaabwọ ká Ohe Oluhye la ịlọmwụ bwu ya Olegu Ịgọgọ nyamwụ bala ọngịrị nyamwụ ha iJisọsị ọla ịNasareti. Ịnyị lẹ, iJisọsị a juwa ga ka ẹga myị́ ẹga, juwa họ ụkụrwọ ọnyịịla bala o-juwa họ angịlẹ wuu ká alegu inyibyi juwa wu uda ịnyịnyị lẹlẹ. Chajị, Ohe Oluhye ayịdang kaa juwa tọọ ụka wuu.

³⁹Ahị angịlẹ ayịdang kpakpakpa a dọmwụ ri alibeenu nya ụkụrwọ ịịwa ịlẹ wuu ká iJisọsị juwa họ ọ-ọpyị nya ala iJuu bala epweji nya iJerusalẹm lẹlẹ. Ịnyị lẹ, ị wu iJisọsị ọọwa kpa kaka nwụ bwula o-gwoo iloo ba okoji lẹlẹ.

⁴⁰Ma, Ohe Oluhye tị wule iJisọsị ọọwa eji bwula igu lahị-lahị la ẹnụtụrụ ọhata. Ọọwa lẹ, Ohe Oluhye a chị iJisọsị ehe mẹjẹẹhị lahị-lahị ụka kọ wuleji bwu ka igu kpá lẹlẹ.

⁴¹Aangịnyị wuu, Ohe Oluhye a chị iJisọsị ehe ha lahị-lahị ụka kọ wuleji bwula igu kpá ka. Ma, ahị angịlẹ ká Ohe Oluhye chụchụ kahị ka ri alibeenu nya ẹla ọọwa kem, ọ chị iJisọsị ehe mẹjẹ lẹ. Ahị ayịdang, dọmwụ ri ang oriri bala ọ-nwa ang ọnwanwa ta ịKịrayịsị ọọwa lụka ọlẹ kọ wuleji bwula igu kpá, jẹ́ lẹ.

⁴²Ịnyị, iJisọsị ọọwa ayịdang a dahị ehile yẹkẹẹ, ahị nyị kpa ẹrụ ọnyịịla ọlẹ kaka ya pyẹ je angịnyị ehe wuu mẹ. Kaahị nyị myịmyị juwa ri ibeenu ya je alodehe wuu yẹkẹẹ, iJisọsị ọọwa kpakpakpa a ri ọngọlẹ ká Ohe Oluhye chụ, kọ ka ri ọngọ la angịnyị ịhịhị bala angị gbugbu wuu eje lẹlẹ.

⁴³IJisọsị ọọwa a ri ọngọlẹ ká alọmwụ inyogo nya Ohe Oluhye wuu ri ibeenu chajị nyamwụ lẹẹ yẹkẹẹ, ọng myị́ ọng ọlẹ wuu kịị nyị́ myị kpa ọkịlẹtụ nyamwụ wuu myị lọọ lẹ aalẹ, Ohe Oluhye nyị tịtị ka hịnyọhi ịhọbịrị nya ọngọọwa wuu họọ bwula ọngịrị nya ẹnyị nya iJisọsị ọọwa lẹ.”

⁴⁴Ụka ọlẹ ká iPita juwa kpa ẹla nya Ohe Oluhye ọọwa ọ-ọnụ ya jaa wẹẹ lẹ, Olegu Ịgọgọ nya Ohe Oluhye a kele kaka chị kụrụ angịlẹ wuu kị juwa wo ẹla ọọwa lẹlẹ.

⁴⁵Ụka ọọwa, ahịbwuu myị ẹpwụ ọkịlẹtụ nya ala iJuu ịlẹ kị ri angịnyị nya Ohe Oluhye ịlẹ kị ba iPita bwu ịJọpa kele ka ụwa lụmẹ. Chajị nyọlẹ ká Ohe Oluhye hu ọgahị ọnahị nyamwụ ọlẹ kọ ri Olegu Ịgọgọ yẹ myị ọkịlẹtụ nya ala iJentayịlị ịnyịnyị, jaabwọ kọ họ ẹ-ẹga nya ala iJuu lẹlẹ.

⁴⁶Chajị, ala iJuu ịịwa wuu, juwa wo jaabwọ ká ala iJentayịlị ịịwa juwa ya ẹla dodehe la ija ịkịla la datị-datị bala jaabwọ kị juwa kpa ogbo ogwogwo ha Ohe Oluhye hu ẹnyị nyamwụ hwaa kele ka uhye ụ-ụwa ịnyịnyị. Ọọwa lẹ, iPita a ya ẹla dodehe ụ-ụwa yẹkẹẹ,

⁴⁷“Anụ ya ká ọngọngọhẹ tụtụm ka jẹ́-ẹ ku ala iJentayịlị ịlẹ iwe la enyi Ohe ọhụhụ lẹẹ wẹẹ? Chajị, ịwa ayịdang ye Olegu Ịgọgọ nya Ohe Oluhye lala ahị-ahị ala iJuu ịnyịnyị lẹ.”

⁴⁸Ịnyị lẹ, iPita a da ehile yẹkẹẹ, nyị chịla kịị nyị ka hụ ala iJentayịlị ịịwa enyi Ohe la ẹnyị nya iJisọsị pyii lẹlẹ. Ọọwa lẹ, alụwa a bịlẹ iPita kọ ka hụ taa ụ-ụwa ụtụrụ ịmanyị-ịmanyị lẹlẹ.