Read idege ỤKỤRWỌ nya ALẸRỤ 11 Bible Online

ỤKỤRWỌ nya ALẸRỤ 11 - idege bible

ỤKỤRWỌ nya ALẸRỤ 11

¹Ịnyị lẹ, alẹrụ ọnyịịla nya ịKịrayịsị bala anyadaa ịkịla ẹ-ẹpwụ nya ịKịrayịsị ịlọpyị nya iJudiya a wo oja yẹkẹẹ, ala iJentayịlị nyị ye ẹrụ ọnyịịla nya Ohe Oluhye hiigu-hiigu ịnyịnyị lẹlẹ.

²Ọọwa lẹ, ụka ọlẹ ká iPita rụ tịrẹkpẹ kele ka iJerusalẹm lẹ, angịhyẹ ịlụwa ịlẹ kị ji oye nya alogu nya angịlẹ kị kaa yẹkẹẹ, ala iJentayịlị nyị ka da ụwụwụ pyii ene kịị nyị ka jẹ́-ẹ ri angịnyị nya Ohe Oluhye, a juwa mwọ ala ya ba iPita lẹlẹ.

³Angịịwa yẹkẹẹ, “IPita, ịịyẹ a tị́ du ká kele ka ẹpwa nya ala iJentayịlị angị da ụwụwụ-ka ịlaanyị, juwa ri ang oriri taa ụ-ụwa kpong-kpong?”

⁴Ọọwa lẹ, iPita a dọmwụ nya o-juwa da ẹla ọọwa wụlẹ ya jaa kpẹẹkpẹẹ yẹkẹẹ,

⁵“Ụka ọhẹ juwa kam juwa kpa abwọ rị ha Ohe Oluhye e-epweji nya ịJọpa. Ịnyị lẹ, ụka ká une juwa chụm lẹ, m juwa yọyị a-arụrụ lẹlẹ. M chẹhị kaka yẹ ịngịhyẹ lala apwụ ọtụka-ọtụka ọhẹ, kị ya ori bwọ ịkịka ine nyamwụ, juwa hireji kpẹẹ bwu epwoohe weji gbee kọ pwụ ẹga nyam.

⁶Ọọwa lẹ, ụka kam juwa kpẹhị pịlẹ kele ka ẹpwụ nya apwụ ọọwa lẹ, m chẹhị kaka yẹ ụma nya iyo la datị-datị tụ iyo ịnyịịngịrị wuu bala iyo ị-kpa apwụ gbileji bala ịchịnụ iluhye-ọgba ụ-ụwa ịnyịnyị lẹlẹ.

⁷Ịnyị lẹ, m chị ụrụ kaka wo ká omyi ọhẹ juwa byim yẹkẹẹ, ‘IPita, wuleji ká nwụ iyo ịwẹ ká ri mẹ.’

⁸Ọọwa lẹ, m wẹ byi omyi ọọwa yẹkẹẹ, ‘Ọngọlahị la ee, ụma nya iyo ị-chị ịrị ịlịịwẹ ịlẹ kị tụ ehile nyahị ahị ala iJuu pyịpyị wuu lẹ, ḿ kpa ka ọnụ nyam ọlẹ ẹnẹnẹhẹ lẹka. Lẹ, m pwa!’

⁹Ma, omyi ọọwa myịmyị ya ẹla bwu epwoohe kaka byim yẹkẹẹ, ‘IPita, ang myị́ ang ọlẹ ká Ohe Oluhye á họ cheri-cheri lẹ aalẹ, a tụtụm myịmyị juwa chị ịgọ nya ang ọọwa kaka!’

¹⁰Ẹlẹwẹ họ chị ahị jum ịnyị, bawụlẹ-bawụlẹ ụka ịta, ene ká apwụ ọọwa myịmyị-ị̀ rụ tịrẹkpẹ kele ka epwoohe.

¹¹Ụka ọọwa kpangga, alẹng angị ịta ịhyẹ ịlẹ kị du ẹrụ bwu epweji nya iSisarịya tọm, a pwụ eji warị wẹ ẹpwa ọlẹ kam ju ụga, juwa tịtọ nyam lẹlẹ.

¹²Ụka ọọwa, Olegu Ịgọgọ nya Ohe Oluhye byim yẹkẹẹ, am nyị ba alẹng ịịwa rụ kele ka iSisarịya mẹ. Am nyị da ịwẹẹ nyori yẹkẹẹ, nyị ri ala iJentayịlị kaka. Ọọwa lẹ, anyadam ẹ-ẹpwụ nya ịKịrayịsị angị ịrwọnyẹ ịhyẹ a wuleji bám lẹ, ahị ba angịịwa rụ kele ka ẹpwa nya ịKọnịlọsị i-iSisarịya lẹlẹ.

¹³Ịnyị, ịKọnịlọsị a ya jehi ụ-ụwa, jaabwọ ká olegu-ẹrụ nya Ohe Oluhye ọhẹ kele ka ẹpwa nyamwụ kaka godayị rịrị ụ-ụwa lụka ọhẹ, juwa byoo yẹkẹẹ, ‘ỊKọnịlọsị, du angịhyẹ ẹrụ kele ka epweji nya ịJọpa kaka wụrụ ọlẹng ọlẹ ká ẹnyị nyamwụ ri ịSayịmọn ọlẹ kị myịmyị wụrụ iPita, kọ warị wẹ ẹpwa nyang mẹ.

¹⁴ỊSayịmọn iPita ọọwa, a ka warị kaka ya ẹla nya Ohe Oluhye jenu lẹ, ọọwa lẹ, ahụ ịKọnịlọsị bala alẹpwa nyang wuu, a ka la ọchịda nya Ohe Oluhye bwula ẹla ọọwa lẹlẹ.’ ”

¹⁵Ịnyị lẹ, iPita a yẹkẹẹ, “Ụka kam pwụ ẹpwa nya ịKọnịlọsị, kam juwa kpa ẹla nya Ohe Oluhye ọ-ọnụ ya jaa wẹẹ lẹ, Olegu Ịgọgọ a kele kaka chị kụrwaa ịwa wuu, jaabwọ kọ la, ẹ-ẹga nyahị ahị ẹnụ ọlẹ kaahị ayịdang la Olegu Ịgọgọ nya ọgbanyẹ-ọgbanyẹ ịnyịnyị lẹlẹ.

¹⁶Ọọwa lẹ, m kpịtịya nya ẹla ọlọnụ nya Ọngọlahị la ọlẹ kọ ya lẹlẹ. Ọ yẹkẹẹ, ‘ỊJọn ọngọ hụ enyi Ohe lẹ, enyi ọlam-ọlam, ọ kaa kpa hụ angịnyị enyi Ohe lẹ! Ma, Olegu Ịgọgọ, m tị ka kpa hụnụ anụ enyi Ohe lẹ!’

¹⁷Ee lẹ, jaabwọ ká Ohe Oluhye ayịdang kpangga, a ri Ọngọlẹ kọ hu ọgahị nya Olegu Ịgọgọ nyamwụ ha ala iJentayịlị ịnyị, jaabwọ ká Ohe Oluhye ya hahị lụka ọlẹ kaahị ayịdang myị la Ọngọlahị iJisọsị ịKịrayịsị wẹ lẹlẹ, o-owo, anụ tị́ me irya kam ri, nyọka juwa godayị tụ Ohe Oluhye pyịpyị myị́?”

¹⁸Ịnyị, ụka ká angịịwa wo ẹla oyaya nya iPita kpá lẹ, ịwa wuu a tụ ọnụ nyaa pịrị kem lẹlẹ. Ọọwa lẹ, ị juwa gwogbo ha Ohe Oluhye, juwa yẹkẹẹ, “Ọọwa ri yẹkẹẹ, Ohe Oluhye ya iwe nya irya ọyẹda da ha ala iJentayịlị ịwẹ ịnyịnyị, chajị kị ka jẹ́-ẹ bwula ọọwa la ọhịhị nya Ohe Oluhye ịnyịnyị lẹ!”

¹⁹Ụka ọọwa, angịnyị nya Ohe Oluhye nyi epepe, rụ hi awụlẹ ka ẹga la datị-datị, o-oluhye nya ọ-tụ pyịpyị ọtụka ọlẹ kị kpa nwụ iSitivin. Angịhyẹ nyaa jẹ gbee kị pwụ epweji nya iFonichiya bala ịSayịpịrọsị bala Antiyọkọ, juwa ya ẹrụ ọnyịịla nya Ohe Oluhye je angịlẹ kị ri ala iJuu ụbwaa kem.

²⁰Ma, alẹng ịhyẹ ịlẹpwụ nyaa ịlẹ kị bwu ịSayịpịrọsị bala ịSayịrin lẹ, ị kele ka epweji nya Antiyọkọ, juwa ya ẹrụ ọnyịịla nya Ọngọlahị iJisọsị pyẹ je ala iJentayịlị ịlụwa ịnyịnyị.

²¹Ụka ọọwa, ụbwọ ọnyọọngịrị nya Ọngọlahị la juwa ta angịịwa lụmẹ. Ọọwa lẹ, iru nya angịnyị lụmẹ-lụmẹ ịlẹ kị myị la ẹla Ohe oyaya nyaa ọọwa, a yẹ irya da ha Ọngọlahị iJisọsị ụ-ụwa lẹlẹ.

²²Ịnyị, ụka ká ala ịchọọchị ịla iJerusalẹm wo oja yẹkẹẹ, ala iJentayịlị ịla Antiyọkọ nyị myị la Ohe Oluhye lẹ, ị du ịBanabasị ẹrụ bwu iJerusalẹm kele ka Antiyọkọ chajị nya ọọwa lẹlẹ.

²³Ịnyị, ụka ká ịBanabasị pwụ epweji nya Antiyọkọ, kọ yẹ jaabwọ ká Ohe Oluhye juwa chị ọngịrị nyamwụ ehe ẹ-ẹpwarịrị nyaa lẹ, ịBanabasị a juwa chị ọkẹkẹnị nya ịlẹhị-ịlẹhị lẹlẹ. Ọọwa lẹ, ọ juwa jwaa ọhụ nya ịlẹhị-ịlẹhị yẹkẹẹ, anụ nyị juwa kpa ọkịlẹtụ ookpokpo godayị kpakpakpa ẹ-ẹpwụ nya ọchịla o-hu ọkịlẹtụ ha, ị-ịlahị nya Ọngọlahị la ụka wuu mẹ.

²⁴Chajị, ịBanabasị ayịdang ri ọngịnyị ọnyịịla lụmẹ. Ọ myị la ọngịrị nya Olegu Ịgọgọ bala ọ-la ọmyịmyị lụmẹ ịnyịnyị. Ịnyị lẹ, iru nya angị inyeewe lụmẹ-lụmẹ a yẹ irya da ụ-ụwa da angịnyị nya Ọngọlahị la uhye lẹlẹ.

²⁵Ọọwa lẹ, ịBanabasị a rụ bwu ụwa kele ka epweji nya ịTaasọsị, juwa pịlahị nya ịSọlụ ụ-ụwa lẹlẹ.

²⁶Ụka ká ịBanabasị yẹ ịSọlụ lẹ, ọ kpọọ rụ ba ịlọmwụ tịrẹkpẹ kele ka Antiyọkọ lẹlẹ. ỊBanabasị bala ịSọlụ hụ ta ala ịchọọchị ịla Antiyọkọ ẹ-ẹpwụ nya ẹka ookpokpo, juwa mẹ ẹla nya Ohe Oluhye jẹ iru nya angịnyị ụ-ụwa ịnyịnyịịnyị. E-epweji nya Antiyọkọ ọwẹ kpangga, angịhyẹ a wụrụ angịjụgbẹyị nya Ọngọlahị la yẹkẹẹ, Angịnyị nya ịKịrayịsị nya ọgbanyẹ-ọgbanyẹ.

²⁷Ụka ọọwa, angịhyẹ ịlẹ kị ri alọmwụ nya Ohe Oluhye bwu epweji nya iJerusalẹm kele ka epweji nya Antiyọkọ ọọwa.

²⁸Ịnyị, ọngọhẹ lẹpwarịrị nya alọmwụ ịịwa ọlẹ kị wụrụ Agabọsị, a wuleji lẹ, ọ juwa yẹ ọmwụ dodehe bwula ọngịrị nya Olegu Ịgọgọ yẹkẹẹ, imyi ọtụka-ọtụka nyị ka ji odehe ọlẹ wuu lẹlẹ. Ẹla nya Agabọsị ọọwa họ jịra ịnyịlẹhị lụka ọlẹ ká iKilodiyọsị ri adịrahụ ọgbahị ọgụgụ wuu nya ala iRom.

²⁹Ọọwa lẹ, angịjụgbẹyị nya iJisọsị ịlụwa wuu, a chị eje yẹkẹẹ, ọng myị́ ọng nyịwa nyị ka da ang ju lawụlẹ, jaabwọ kịịwa nyị ye kaka ba myị́, chajị kịịwa nyị ka ya du kele kaka da anyadịdịwa ẹ-ẹpwụ nya ịKịrayịsị ịla iJudiya ụbwọ, chajị nya imyi ọnwụnwụ ọtụka ọọwa lẹlẹ.

³⁰Ụka kị da ang ọọwa ju lawụlẹ kpá lẹ, ị hu okpoko ọọwa du ịBanabasị bala ịSọlụ ẹrụ, kpa kịla alegbeju ịgbahị ịkpẹhị rịrị ịchọọchị nya ala iJudiya lẹlẹ.