Read idege ỤKỤRWỌ nya ALẸRỤ 12 Bible Online

ỤKỤRWỌ nya ALẸRỤ 12 - idege bible

ỤKỤRWỌ nya ALẸRỤ 12

¹Ụka ọlẹ a ri ụka ká adịrahụ iHerọdụ juwa kpa ụbwọ ọnyọọngịrị tụ iru nya angịhyẹ ịlẹ kị ri ala ịchọọchị pyịpyị lụmẹ lẹlẹ.

²Ụka ọọwa, iHerọdụ wu iJemsi ọnyịnịna nya ịJọn, kpọọ kaka nwụ la ẹma.

³Ụka ká adịrahụ iHerọdụ yẹ jaabwọ ká ọhọhọ nyamwụ u-uhye nya igu nya iJemsi ọọwa, kpụ ala iJuu ịpyọ lụmẹ lẹ, ọ myịmyị du ẹrụ kaka wu iPita ịnyịnyị lẹlẹ. Ụka ọọwa a ri ụka nya ang oriri ọtụka nya ala iJuu ọhẹ, ọlẹ kị wụrụ Ang Oriri nya Ịkaa Ọmịrịị-m Mịrị-ka lẹ.

⁴Ụka kị wu iPita kpa pwụ ẹga nya iHerọdụ lẹ, iHerọdụ a hu iPita du kele kaka ju agba lẹlẹ. Ọọwa lẹ, ọ ya, nyị chụ ịsọja angị ininiine ebwo ine, kịị nyị ri angị ka juwa gbe iPita hi ụbwọ ha awụlẹ mẹ lẹlẹ. Obyi omeme nya iHerọdụ lụka ọọwa ri yẹkẹẹ, ụka ká ụka nya Ang Oriri Ọchịpwụrụ nya ala iJuu á kam kpá lẹ, ọ ka gba iPita kpehe ha ala iJuu kị ka lọọ eje lẹlẹ.

⁵Ịnyị, iPita a juwa u-ube nya agba ụka ọọwa lẹlẹ. Ma, ala ịchọọchị wuu tị juwa raabwọ bịlẹ Ohe Oluhye la ọngịrị chajị nya iPita nya ịlẹhị-ịlẹhị.

⁶Ụka ọọwa, ọ hi odu ookpokpo ká iHerọdụ juwa ka gba iPita kpehe la ahị ọpyẹpyẹ nyamwụ ha ala iJuu lẹ. Ịnyị, iPita a juwa kpa une nọ la odu ọọwa ẹ-ẹpwarịrị nya ịsọja igbeji imiiye ịhyẹ lẹlẹ. Ị ya agba imiiye ịhyẹ da ju iPita a-abwọ nyamwụ kịrọng ụ-ụwa. Alịsọja ịkịla ịlẹ kị kaa gbe ọnụ ogirigba nya ube nya agba ọọwa, godayị rịrị ẹ-ẹga ogbeji nyaa giri-giri lụka ọọwa ịnyịnyị.

⁷Ịnyị, lụka ọ-mwaa lẹ, olegu-ẹrụ nya Ọngọlahị la ọhẹ, a kele kaka godayị rịrị u-ube nya agba ọọwa ẹ-ẹga nya iPita lẹlẹ. Ụka ọọwa, owuru-wuru nya ahịgboo ọtụka-ọtụka ọhẹ juwa chị ụ-ụwa. Ọọwa lẹ, olegu-ẹrụ ọọwa a juwa yụbwọ hụ́ iPita jigi-jigi ịkịka nyamwụ, juwa chọọ ahi-une lẹ, ọ byoo yẹkẹẹ, “IPita, wuleji ahyaahị lẹẹlẹẹ mẹ.” Ịnyị lẹ, agba ịlẹ kị ya ju iPita a-abwọ nyamwụ a pwọ hi iPita pịla pịla wuu lẹlẹ.

⁸Olegu-ẹrụ ọọwa byoo yẹkẹẹ, “IPita, nwụ ugba ọ-chị ọhị nyang họ yẹẹyẹẹ, ká wu ori nya ugbẹtẹ nyang ku ịnyịnyị mẹ.” Ọọwa lẹ, iPita a họ ịnyị lẹlẹ. Olegu-ẹrụ ọwẹ myịmyị byi iPita yẹkẹẹ, “Hu awụrụ ọtụka nyang dakụrụ ká bám jẹ mẹ.”

⁹Ụka ká iPita họ ịnyị kpá lẹ, ọ juwa ba olegu-ẹrụ ọọwa rụ ịnyịlẹhị lẹlẹ. Ma, ụka ọọwa lẹ, iPita ayịdang á tị jẹ́ yẹkẹẹ, ang ọlẹ ká olegu-ẹrụ ọọwa nyị wẹẹ họ ẹ-ẹga nya ọọwa nyị juwa họ a-ahị chịng kpong-kpong ka. Chajị, ọ la iPita lala ọwa nyaa juwa yọyị yẹ a-arụrụ kem.

¹⁰Ụka ká olegu-ẹrụ ọọwa kpa iPita kpoye nya ịsọja igbeji ebwo ọhọhẹ bala ebwo oheeye kpá lẹ, ị jẹ gbee kị pwụ ẹga nya ogirigba ọlẹ kị kaa bwu kpoye ka epweji ọlụwa lẹlẹ. Ị kpa ukpileku nya oje-oje ọtụka-ọtụka tụ ọnụ nya ogirigba ọọwa ku. Ịnyị, ukpileku nya ọnụ ụgbẹyị nya ogirigba ọọwa a wụrụ da, la ịlọmwụ ha iPita anyị lẹ, ị kpoye rụ bwu ụwa lẹlẹ. Ụka kị jẹ gbee kị kpoye nya ụgbẹyị nya opeje ookpokpo lẹ, olegu-ẹrụ ọọwa a rụ hi iPita ụ-ụwa lụka ọ-mwaa lẹlẹ.

¹¹Ịnyị, ahị a ju iPita chịng lẹ, ọ juwa yẹkẹẹ, “M jẹ́ myịmyị yẹkẹẹ, Ọngọlahị la a du olegu-ẹrụ nyamwụ ọhẹ ẹrụ warị kaka gbam kpehe, bwu ẹpwụtụbwọ nya iHerọdụ bala ẹhị ọrịrịị-rịrị onyobyi nya ala iJuu wuu jahị dam lẹẹ lẹlẹ.”

¹²Ịnyị, ụka ká iPita kụ ẹhị yẹ ẹla ọọwa chịng lẹ, ọ rụ kele ka ẹpwa nya iMeri ọlẹ kọ ri ịnịna nya ịJọn, ká ẹnyị ọkịla nyamwụ ri ịMakị, ẹ-ẹga ọlẹ ká iru nya angịnyị nya Ohe Oluhye lụmẹ-lụmẹ kaka jịra, juwa raabwọ ha Ohe Oluhye ụka ọọwa lẹlẹ.

¹³Ịnyị, ụka ká iPita godayị rịrị, juwa yụbwọ kpụ ukpileku nya ọnụ ogirigba ọ-jụ ka ọdọdẹpwa ọọwa lẹ, ọnchẹ ọnyang ọhẹ ọlụwa ọlẹ kị wụrụ iRoda, a kele nyọka myị ẹkọ nya iPita lẹlẹ.

¹⁴Ụka ká iRoda ọọwa jẹ́ omyi nya iPita datị lẹ, ọ juwa chị ọkẹkẹnị ọtụka-ọtụka lẹlẹ. Ma, ọ́ tị wụrụ ukpileku nya ogirigba ọọwa ha iPita kpong-kpong ka. Ọkọkọ nya ọọwa lẹ, ọ rụnyẹ kele ka ẹpwụ nya ọdọdẹpwa kaka ya je alụwa yẹkẹẹ, iPita nyị godayị rịrị lalẹ odehe nya ogirigba, juwa yụbwọ kpụ ụgbẹyị lẹ!

¹⁵Angịịwa wẹ byoo yẹkẹẹ, “IRoda, a juwa hya ụla hya?” Ma, iRoda myịmyị juwa byaa nya ịlẹhị-ịlẹhị yẹkẹẹ, iPita nyị godayị rịrị ụ-ụwa ịnyịlẹhị. Ọọwa lẹ, angịịwa a myịmyị wẹ byi iRoda yẹkẹẹ, “Aalẹ, olegu-ẹrụ nya iPita a tị tị yẹ wẹ lẹlẹ.”

¹⁶Ma, iPita ayịdang tị juwa kpa ụbwọ kpụ ụgbẹyị nya ogirigba ọọwa ịnyịnyịịnyị. Ọọwa lẹ, ụka kị kele kaka wụrụ ụgbẹyị ọọwa, kị yẹ iPita lẹ, ọ laa ịwa wuu ahịbwuu nya ịlẹhị-ịlẹhị lẹlẹ.

¹⁷Ịnyị, ụka ká iPita yụbwọ nyaa ịwa wuu bebebe, kị ka ba la ọmọnyọ lẹ, ọ juwa tịrọnụ ya je alụwa wuu jaabwọ ká Ọngọlahị la bwu du ẹrụ kaka gbọọ kpehe hi ube nya agba ọọwa lẹlẹ. IPita myịmyị byaa yẹkẹẹ, “Anụ́-ụ tịrọnụ nya ẹlẹwẹ ya je iJemsi bala anyadahị ịkịla ẹ-ẹpwụ nya ịKịrayịsị ham mẹ.” Ụka ká iPita ya ịnyị kpá lẹ, ọ rụ hyaa kele ka ẹga ọkịla lẹlẹ.

¹⁸Ịnyị, ụka ká ahị pyẹ lẹ, ojigi-jigi ọtụka-ọtụka a kpeji ẹ-ẹpwarịrị nya ịsọja igbeji nya ube nya agba ọọwa, chajị nyọlẹ kị yẹ iPita kpong-kpong kaka lẹlẹ.

¹⁹Ịnyị, ụka ká iHerọdụ juwa tịtọ nya iPita nya ịlẹhị-ịlẹhị, kọ yọọ kaka lẹ, ọ juwa tọ ịsọja igbeji u-ube nya agba ọọwa ịtọ kwẹẹ lẹ, iHerọdụ a da ehile yẹkẹẹ, nyị nwụ ịsọja ịịwa chajị nyọlẹ kịị nyị yẹ iPita kaka lẹlẹ. Ụka ká ọọwa chịpwụrụ kpá lẹ, iHerọdụ a rụ bwu iJudiya kele ka iSisarịya kaka hụ ụ-ụwa chẹẹ lẹlẹ.

²⁰Ụka ọhẹ juwa ká ẹla nya ala ịTaya bala ala ịSayịdọn wụ iHerọdụ ẹjẹ lụmẹ kaka kpoye. Ọọwa lẹ, ala ịTaya bala ala ịSayịdọn ịịwa a bajẹ lawụlẹ kele ka ẹga nya iHerọdụ, chajị kị ka họ okpunyi ẹ-ẹga nyamwụ lẹlẹ. Ala ịTaya bala Ala ịSayịdọn anyị ịịwa kele kaka me obyi nya ẹla ọọwa gu awụlẹ ẹ-ẹga nya ịBịlasịtọsị ọngọlẹ kọ ri olegbeju ọgbahị nya alọdọdẹpwa nya iHerọdụ wuu ene kị pwụ ẹga nya iHerọdụ ayịdang. Ala ịTaya bala ala ịSayịdọn anyị ịwẹ jẹdịyẹ nya okpunyi ọọwa ịnyị, chajị nyọlẹ ká alẹpwụma nyaa wuu kaa da kụ, ang oriri ọlẹ kị kaa ra bwu ẹga nya alọpyị nya angịlẹ kị ji ekpeleji nya iHerọdụ wuu.

²¹Ịnyị, ụka ká ẹnụtụrụ ọlẹ kị hunọ, nyọka ya ẹla ọọwa pwụ lẹ, iHerọdụ a go ịwụrụ nya ẹnyị nya adịrahụ oriri nyamwụ kụrụ lẹ, ọ kele kaka hụhụ u-uhye nya ẹchị adịrahụ nyamwụ lẹ, ọ juwa kpa omyi ẹla ị-ịlahị nyaa ịwa wuu lẹlẹ.

²²Ịnyị, ụka ká iHerọdụ juwa kpa ẹla ọọwa ọ-ọnụ ya wẹẹ lẹ, angịnyị nyamwụ wuu a juwa ya dodehe gboo yẹkẹẹ, “O-omyi ẹla nya ọngịnyị ehe a wẹ kaka. Ma, omyi nya ohe ọhẹ a wẹẹ ya ẹla lẹlẹ.”

²³Ịnyị lẹ, olegu-ẹrụ nya Ọngọlahị Ohe Oluhye ọhẹ a kele kaka wa iHerọdụ abwọ ju keji, chajị nyọlẹ ká iHerọdụ á myị juwa gwogbo ha Ohe Oluhye kaka lẹlẹ. Ọọwa lẹ, ekpunjuju ịhyẹ a kele kaka ri iHerọdụ ụ-ụwa lẹ, ọ gbu lẹlẹ.

²⁴Ma, ẹla nya Ohe Oluhye tị juwa nwa bala o-juwa pyebile kele kịlahị-ịlahị ịnyịnyịịnyị.

²⁵Ụka ká ịBanabasị bala ỊSọlụ họ ebwo nya ụkụrwọ nya ẹrụ ọnyịịla ọlẹ kị kpa ka iJerusalẹm kpá lẹ, ị kpa ịJọn ọlẹ ká ẹnyị ọkịla nyamwụ ri ịMakị, rụ ba ịlaa bwu ụwa lẹlẹ.