Read idege ỤKỤRWỌ nya ALẸRỤ 13 Bible Online

ỤKỤRWỌ nya ALẸRỤ 13 - idege bible

ỤKỤRWỌ nya ALẸRỤ 13

¹Ụka ọọwa, ala ịchọọchị nya Antiyọkọ la angịhyẹ ịlẹ kị ri alọmwụ nya Ohe Oluhye bala angịmẹjẹ nya ẹla nya Ohe Oluhye ụ-ụwa. Ẹnyị nya angịịwa ri ịBanabasị bala iSimyọn ọlẹ kị wụrụ ịNayịja ká etu nyamwụ ri onyobiri bala iLusiyọsị ọlẹ kọ bwu ọpyị nya ịSayịrin bala ịSọlụ bala ịManẹn ọngọlẹ kị kpa bwu enjwo-enjwo ọdọdẹpwa nya adịrahụ iHerọdụ.

²Ụka kị juwa gbịgba ha Ọngọlahị la, juwa nọ limyi ha Ohe Oluhye lẹ, Olegu Ịgọgọ nya Ohe Oluhye a ya ẹla taa ụ-ụwa yẹkẹẹ, “Anụ kpa ẹnyị nya Ohe Oluhye wahị ịgọgọ kụrụ ịBanabasị bala ịSọlụ, chajị nya ụkụrwọ ọlẹ kam be ẹkọ wụrwaa o-oluhye nyamwụ mẹ.”

³Ịnyị, ụka kị nọ limyi ha Ohe Oluhye bala ọ-yụbwọ nyaa nịrọ ịBanabasị bala ịSọlụ kị raabwọ jwaa kpá lẹ, ị du ịBanabasị bala ịSọlụ kpehe jaabwọ ká Olegu Ịgọgọ byaa lẹlẹ.

⁴Ịnyị, ụka ká Olegu Ịgọgọ nya Ohe Oluhye du ịBanabasị bala ịSọlụ ẹrụ ịnyị lẹ, ị rụ kele ka iSelusiya lẹ, ị ju ụgbọ nya enyi bwu ụwa rụ kele ka ọpyị nya ala ịSayịpịrọsị lẹlẹ.

⁵Ụka kị jẹ pwụ epweji nya ịSalamisi, ị kele ka ebe ị-mẹ ẹla nya Ohe Oluhye jẹ nya ala iJuu ịlụwa, juwa mẹ ẹla nya Ohe Oluhye jẹ angịnyị ụ-ụwa. Ị wụrụ ịJọn ịMakị kele kaka da ịlaa ụbwọ ẹ-ẹpwụ nya ụkụrwọ ọlụwa ịnyịnyị.

⁶Ịnyị, ụka kị jẹ tụ ẹga myị́ ẹga nya ọpyị ọla ịSayịpịrọsị ọlẹ ká enyi dagaga ju wuu lẹ, ị pwụ epweji nya ịPafosi lẹlẹ. Ị yẹ ọlẹng nya ala iJuu ọhẹ ụ-ụwa, ká ẹnyị nyamwụ ri ịBaa-Jisọsị. ỊBaa-Jisọsị ọọwa ri ọngọlẹ kọ kaa mwụ ịnwa. Ọ ri ọlọmwụ ọnọọkịla ịnyịnyị.

⁷ỊBaa-Jisọsị ọọwa ri oligu nya ịSẹẹjọsị ịPọlọsị ọlẹ kọ ri adịrahụ ọtụka nya ọpyị ọọwa wuu. Adịrahụ ọọwa ri ọngọ jẹ́ ẹla lụmẹ. Ọ wụrụ ịBanabasị bala ịSọlụ kele ka ẹga nyamwụ, chajị kọ ka wo ẹla nya Ohe Oluhye bwu ọnụ nyaa.

⁸Ma, Baa-Jisọsị ọlẹ kọ ri ọngọ mwụ ịnwa ká ẹnyị ọkịla nyamwụ ri Elimasị la oja nya iGiriki, juwa tụ ịBanabasị bala ịSọlụ anyị pyịpyị. Ọọwa lẹ, ọ juwa maga kọ ka gu adịrahụ ọọwa ahịgboo hi ẹla nya Ohe Oluhye oyaya nya ịBanabasị bala ịSọlụ, chajị kọ ka myị la Ohe Oluhye bwula ẹla nyaa ọọwa kaka lẹlẹ.

⁹Ịnyị lẹ, ịSọlụ ọlẹ ká ẹnyị ọkịla nyamwụ ri ịPọlụ a myị la ọngịrị nya Olegu Ịgọgọ nya Ohe Oluhye lẹ, ọ juwa mwụụrụ yẹ ọngọ mwụ ịnwa ọọwa chịng lẹlẹ.

¹⁰Ọọwa lẹ, ịPọlụ a byoo yẹkẹẹ, “Elimasị, a ri ọnyị nya Ohe Onyobyi. Oluji nya abwẹla ọnyịịla wuu, a ri lẹ. A tị myị la ijẹẹhị onyobyi la datị-datị. Ọ tị́ ka tata ka ba anyị, ene ká ka hu abwọ la o-juwa kpa ọnọọkịla omeme nyang pyị ụgbẹyị nya ẹla nya ịlẹhị nya Ọngọlahị la anyoko kpong-kpong?

¹¹Elimasị, wo mẹ! Ụbwọ ọnyọọngịrị nya Ọngọlahị la ka wẹ uhye nyang lẹ, du ká ka jẹ́-ẹ kpẹhị nyang yẹ ahịgboo nya ẹnụ ọchịchị ọwẹ kaka pyii lala ụka o-kpii lẹ.” Ịnyị lẹ, ịngịhyẹ lala ahịịchẹ bala ukpowu a kele kaka kụrụ Elimasị egbahị nyamwụ lẹ, ọ kpụ idu chwiichwii i-ijata-ijata, juwa ma kpokpokpo, tịtọ nya ọngọlẹ kọ ka juwa kpọọ ụgbẹyị lẹlẹ.

¹²Ọọwa lẹ, adịrahụ ọtụka ọọwa a myị la Ohe Oluhye lụka kọ yẹ ang ọlẹ kọ họ ẹ-ẹga nya Elimasị lẹlẹ. Chajị, ang ọmẹjẹ nya Ọngọlahị la ọlẹ ká adịrahụ ọọwa wo bwu ọnụ nya ịPọlụ lẹ, ọ lọọ ahịbwuu lụmẹ kaka kpoye.

¹³Ịnyị, ịPọlụ bala alogu ẹdịyẹ nyamwụ a ju ụmwụ nya enyi o-bwu ịPafosi kele ka epweji ọlẹ kị wụrụ ịPẹẹga ị-ịpyị nya ala ịPamfiliya lẹlẹ. Ma, ịJọn ịMakị tị rụ hi ịPọlụ anyị e-epweji nya ịPẹẹga, rụ tịrẹkpẹ ka iJerusalẹm.

¹⁴ỊPọlụ anyị rụ bwu epweji nya ịPẹẹga kele ka epweji ọkịla ọlẹ kị wụrụ Antiyọkọ ị-ịpyị nya iPisidiya. Ụka ká Ẹnụtụrụ Ọhịnyọ Lụkụrwọ nya ala iJuu pwụ lẹ, ị kele kaka hụhụ u-ube ọ-mẹ ẹla nya Ohe Oluhye jẹ nya ala iJuu ọla iPisidiya ta angịkịla lẹlẹ.

¹⁵Ụka ká alegbeju nya ọjịra-jịra nya ala iJuu ịlụwa wa ẹla nya Ohe Oluhye bwu ụpwụ nya iMosisi bala ụpwụ alọmwụ inyogo dodehe kpá lẹ, ị du angịhyẹ kele kaka wụrụ ịPọlụ bala alogu ẹdịyẹ nyamwụ kaka byaa yẹkẹẹ, “Anụ anyadahị anyị, ó ri kanụ la ẹlẹlẹhẹ ka ya nya o-juhi ọhụ lẹ aalẹ, ụka hi da hanụ lẹẹlẹẹ lẹ!”

¹⁶Ịnyị, ụka ká ịPọlụ wuleji godayị kọkọ, kọ juwa kpụ ụbwọ nyaa ịwa wuu bebebe lẹ, ọ byaa yẹkẹẹ, “Anụ ala Isirẹlụ nyahị wuu bala anụ angịlẹ kanụ kaa juhi nya Ohe Oluhye, anụ chuchuu kanụ ke ụrụ lam wẹẹ!

¹⁷Ohe Oluhye nya ala Isirẹlụ nyahị a ri Ọngọlẹ kọ chụ adahị ịgọgọ anyị ha ịlọmwụ lẹ. Ọwa-à ri Ọngọlẹ kọ họ ká adahị igogo anyị ịịwa ri alẹpwụma ọtụka-ọtụka lụka ọlẹ kị juwa ọ-ọpyị nya Ijipiti lala angga ugbeene lẹ. Ịnyị lẹ, Ohe Oluhye a kpa ụbwọ ọnyọọngịrị nyamwụ gbaa kpehe hi ọpyị nya Ijipiti lẹlẹ.

¹⁸Ohe Oluhye ọọwa a ri Ọngọlẹ kọ kpa ugbodu ojuju onyudiyo nyamwụ kpa adahị igogo anyị ịịwa ụgbẹyị lala ẹka ohu-iye gbẹgbịlẹ u-ugbileji lụka ọọwa ịnyịnyị lẹ.

¹⁹Ịnyị, ụka ká Ohe Oluhye ta alepwoja la datị-datị ebwo irwiye ayịreji hi ọpyị nya iKenan lẹ, ọ hu ọpyị ọọwa ha adahị igogo anyị la, nya ang ugu nyaa lẹ, ị hụ ụ-ụwa lala ẹka ụnọ da ẹka ohu-iye kụrụ iwo chiriri lẹlẹ.”

²⁰“Ụka ká ẹka ịịwa chịpwụrụ kpá lẹ, Ohe Oluhye a chụ alẹga ịhyẹ bwu ẹpwarịrị nya adahị igogo anyị lẹ, angịịwa a juwa gbe ịpyị nya alịnyahị hi ụbwọ ha awụlẹ ịnyịnyịịnyị gbee pwụ ụka nya ịSamwẹlụ ọlọmwụ nya Ohe Oluhye lẹlẹ.

²¹Ịnyị, ụka ká adahị igogo anyị tịtọ nya adịrahụ lẹ, Ohe Oluhye a chụ ịSọlụ ọnyị nya iKisi ọlẹ kọ bwu imwawụ nya iBenjamịn haa lẹlẹ. ỊSọlụ ri adịrahụ lala ẹka ohu-iye gbẹgbịlẹ.

²²Ụka ká Ohe Oluhye tụ ịSọlụ kịnyaa hi iwe-ahụrụ nya adịrahụ oriri nyamwụ kpá, Ọ chụ iDevidi ọnyị nya iJesi adịrahụ ha adahị igogo anyị ku ọmwakpa nya ịSọlụ. Ohe Oluhye ya ẹla dodehe rụ́ iDevidi ọọwa yẹkẹẹ, ‘Ang ọlẹ kaam Ohe Oluhye yẹ ẹ-ẹga nya iDevidi ọnyị nya iJesi ri yẹkẹẹ, iDevidi ri ọngọlẹ kọ kaa họ ẹla wum Am Ohe Oluhye ẹpwụ hiigu lụmẹ. Lẹ, ọwa a ri ọngọlẹ kọ ka họ ẹla opwoku irya nyam Am Ohe Oluhye wuu jịra lẹlẹ.’

²³Bwula ụtẹ nya iDevidi ọọwa pyii, Ohe Oluhye a tị bwu, hu iJisọsị ọlẹ kọ ri Ọngọchịda ha ala Isirẹlụ, jaabwọ ká ọnụ ọmyịmyị nya Ohe Oluhye la ene-ene lẹ.

²⁴Ene ká iJisọsị ọọwa ayịdang ka pwụ eji lẹ, Ohe Oluhye du ịJọn ọngọ hụ enyi Ohe ẹrụ kaka ya ẹla nya Ohe Oluhye ụ-uhye nya irya ọyẹda je ala Isirẹlụ wuu bala o-juwa hwaa enyi Ohe nya ang o-ju ẹjẹẹ nya irya ọyẹda ọọwa ịnyịnyị.

²⁵Ụka ká ịJọn ọngọ hụ enyi Ohe ọọwa juwa ka tụ ẹla nya Ohe Oluhye o-ya pyẹ nyamwụ ọwa ku lẹ, ọ byi aluche wuu yẹkẹẹ, ‘Oowo, anụ tị́ me irya ya, am nyị ri? Anụ me kaam a ri ọngọọwa ọlẹ ká Ohe Oluhye ya, ọwa nyị ka du warị? Anụ wo mẹ! Ám a ri ọngọọwa ka! Ma, ọngọọwa juwa ka warị kum ẹkpẹ. Am ayịdang á tị dọmwụ chịla kpụ, m ka hiri kpẹẹ kaka yi ori nya ugbẹtẹ nyamwụ myị́ kpong-kpong ka.’ ”

²⁶ỊPọlụ myịmyị byaa yẹkẹẹ, “Anụ ala Isirẹlụ, anyadam ịlẹ kanụ ri anyị ịtụma nya Ebiraham wuu bala ọng myị́ ọng ọkịla ọlẹ kọ jam ẹ-ẹgẹlẹ, kọ ri ọngọ kaa juhi nya Ohe Oluhye, anụ wo mẹ! Ahị wuu lawụlẹ, ẹla nya ẹrụ ọnyịịla nya ọchịda nya Ohe Oluhye ọọwa a juwa ha lẹ.

²⁷Ẹ-ẹga nya angịlẹ kị kụ iJerusalẹm bala alegbeju nya ẹla nya Ohe Oluhye ịlụwa wuu lẹ, ị́ jẹ́ yẹkẹẹ, iJisọsị kpakpakpa nyaa ri Ọngọchịda ọọwa lẹlẹ ka. Ị́ tị myịmyị jẹ́ etu nya ẹla nya Ohe Oluhye ịlẹ kị kaa wa bwu ẹpwụ nya apwụ nya alọmwụ inyogo nya Ohe Oluhye la Ẹnụtụrụ Ọhịnyọ Lụkụrwọ ọnyị myị ọnyị wuu yẹẹyẹẹ kpong-kpong ka, ịnyịnyị. Ma, ụka ọlẹ kị tị ya eje nya igu wu iJisọsị ọọwa lẹ, ọhọhọ nyaa ọọwa tị ri ọ-họ jịra nya ala ịlẹ ká alọmwụ inyogo nya Ohe Oluhye ya, u-uhye nya iJisọsị ọọwa ene-ene.

²⁸Chajị, ọ ri nya ịlẹhị, ịnọ, í yé ịngịngịhyẹ onyobyi ọlẹ ká iJisọsị họ kpụ ọ-ka ya eje nya igu woo ka. Ma, ị tị byi ịPayịleti yẹkẹẹ, nyị nwụ iJisọsị pyii mẹ.

²⁹Ịnyị, ụka kị họ ang myị́ ang ọlẹ ká Ụpwụ Ịgọgọ ya nọ e-eji rụ́ igu ogbugbu nya iJisọsị ọọwa jịra kpá wuu lẹ, ị hu ogu nyamwụ hireji bwu uhye nya okoji kpa kele kaka ju eji lẹlẹ.

³⁰Ma, Ohe Oluhye tị wule iJisọsị ọọwa eji bwula igu, juwa hịhị myịmyị lẹ.

³¹Ụka ọọwa, iJisọsị juwa chị ịlọmwụ ehe lahị-lahị mẹjẹ angịnyị nyamwụ ịlẹ kị bọ́ọ bwu ịGalili kele ka epweji nya iJerusalẹm lala iru nya ụtụrụ lụmẹ-lụmẹ lụka ọlẹ kọ wuleji bwula igu kpá. Angịnyị nyamwụ ịịwa a dọmwụ ri alibeenu nya owuleji bwula igu nyamwụ ọọwa du kị lalẹẹ kpa ya pyẹ je angịnyị lẹlẹ.

³²Ẹrụ ọnyịịla ọlẹ kahị lẹẹ kpa warị kaka ya jenu ri yẹkẹẹ, ọnụ ọlẹ ká Ohe Oluhye myị ha adahị igogo anyị lẹ,

³³ọnụ ọmyịmyị ọọwa, Ohe Oluhye a họ jịra lẹẹ, lụka nyahị ahị anyị ịtụma nya adahị igogo anyị ịịwa, bwula ọlẹ ká Ohe Oluhye wule iJisọsị eji bwula igu lẹlẹ. Ọ họ ịnyị jaabwọ kị da kpehe ẹ-ẹpwụ nya ụpwụ nya Eje Ọnyịịla, egbeju oheeye, yẹkẹẹ, ‘Ahụ a ri Ọnyẹwẹ nyam Am Ohe Oluhye lẹ. Alẹ oleeri ọlẹ, m mang lẹ.’

³⁴Ị myịmyị ya ẹla rụ́ eji owule bwula igu nya iJisọsị bala jaabwọ kọ ka jẹ́-ẹ ji ẹpwụ nya iwe-ahụrụ nyọka jẹ́-ẹ la ugbinyịrọ ọlẹ kọ ka mama ju eji i-iworu myị́ kpá ẹnẹnẹhẹ kaka ịnyịnyị yẹkẹẹ, ‘Am Ohe Oluhye ka hu ahị ọwawa nyam ịlẹ kị la ịgọgọ bala ahị ọwawa o-ri nya ịlẹhị-ịlẹhị hanụ anụ ala Isirẹlụ, jaabwọ kam myị ọnụ ha iDevidi ene-ene.’

³⁵Ị myịmyị ya ẹla ọkịla rụ́ iJisọsị ẹ-ẹpwụ nya ụpwụ nya Eje Ọnyịịla, yẹkẹẹ, ‘Ahụ Ohe Oluhye á ka myị ká ọnchẹ ọlịgọgọ nyang ka mama ju eji pyịyọọ i-iworu kpong-kpong ka.’

³⁶Chajị, ụka ọlẹ ká iDevidi myị ẹrụ ha angịnyị iloyi nyamwụ pwoku jaabwọ ká irya nya Ohe Oluhye la kpá lẹ, iDevidi ayịdang gbu. Ụka kị tị hu ogu nya iDevidi kpa kaka ju eji i-iworu lala adanụ igogo anyị kpá lẹ, ugbinyịrọ nya iDevidi mama ju eji i-iworu ọọwa pyịyọọ!

³⁷Ma, iJisọsị ọlẹ ká Ohe Oluhye wuleji bwula igu lẹ, ugbinyịrọ nya iJisọsị ọọwa á tị mama ju eji i-iworu kpong-kpong ka.”

³⁸ỊPọlụ myịmyị byaa yẹkẹẹ, “Chajị nya ọọwa lẹ, anụ anyadahị ẹ-ẹpwụ nya ịKịrayịsị, ọlẹ ri ọ-họ kanụ ka jẹ́ yẹkẹẹ, ẹ-ẹpwụ nya ẹrụ ọnyịịla ọlẹ kahị lẹẹ ya dodehe bwula iJisọsị ọọwa, kẹnẹ-kẹnẹ, ọhịnyọhi ịhọbịrị ịhọhọ wuu a ji ị-ịlahị nya Ohe Oluhye lẹlẹ.

³⁹Ọng myị́ ọng ọlẹ kọ tị myị la Ohe Oluhye bwula iJisọsị ọọwa lẹ aalẹ, ọngọọwa ka la ịlọmwụ bwu ẹpwụ nya ang myị́ ang ịlẹ wuu ká ehile nya iMosisi á ka jẹ́-ẹ gbọọ kpehe bwu ẹpwụ nyaa myị́ kpong-kpong kaka, ịnyịnyị.

⁴⁰Chajị nya ọọwa lẹ, anụ kpahị ju ịlọnụ ọgwọgụ mẹ. Chajị ká ụma nya ẹla ọlẹ ká alọmwụ nya Ohe Oluhye inyogo ya lẹẹ, ka họ jịra ẹ-ẹga nyanụ kaka mẹ. Alọmwụ ịịwa yẹkẹẹ,

⁴¹‘Anụ angị kpa angịnyị họ ịwẹ, anụ ka juwa kpẹhị nya ịlọnụ yọyị. Ang ọọwa ka lanụ ahịbwuu lụmẹ. Anụ tị ka gbu, ta ayịreji ẹ-ẹpwụ nya ọhọbịrị nyanụ. Chajị, Am Ohe Oluhye juwa ka họ ụkụrwọ ẹbyẹbyị lụka nyanụ. Ụkụrwọ ẹbyẹbyị ọọwa lẹ, ó-riri ká ọngọngọhẹ á warị wẹwẹ ka dọọ da wụlẹ ya jenu, ánụ tị ka myị-ị myị lọọ kpá ẹnẹnẹhẹ kaka.’ ”

⁴²Ụka ká ịPọlụ bala ịBanabasị juwa kpehe rụ bwu ube ọ-mẹ ẹla nya Ohe Oluhye jẹ nya ala iJuu ọlụwa lẹ, alọjịra-jịra ịịwa a kele kaka bịlẹ ịPọlụ anyị kị ka myịmyị-ị̀ tịrẹkpẹ kele kaka ya ẹla nya Ohe Oluhye jaa la Ẹnụtụrụ Ọhịnyọ Lụkụrwọ ọkịla myịmyị lẹlẹ.

⁴³Ịnyị, ụka kị tụ ọjịra-jịra nyaa ọọwa ku kpá lẹ, iru nya ala iJuu ịhyẹ lụmẹ-lụmẹ bala ala iJentayịlị ịlẹ kị yẹ irya da, juwa gbịgba ha Ohe Oluhye lala ala iJuu anyị, a juwa dịrẹ ịPọlụ bala ịBanabasị lẹlẹ. Ịnyị lẹ, ịPọlụ anyị a juwa kpa ẹla nya Ohe Oluhye jwaa ọhụ kị ka cheri, juwa yụbwọ chị ẹrụ ọnyịịla nya ọnahị nya Ohe Oluhye ọlẹ kị wo kpa ụ-ụwa gogo lẹlẹ.

⁴⁴Ụka ká Ẹnụtụrụ Ọhịnyọ Lụkụrwọ nya ala iJuu ọkịla pwụ, ọ hi pyịnyẹng, ịnọ, ká alepweji ọọwa wuu lẹpwụ-lẹpwụ ka kpehe kaka jịra, juwa wo ẹla nya Ohe Oluhye oyaya nya ịPọlụ anyị lẹ.

⁴⁵Ma, ụka ká ala iJuu ịlụwa chẹhị kaka yẹ jaabwọ ká iru nya angịnyị lụmẹ-lụmẹ kele kaka jịra ịnyị lẹ, ọ laa ijiiji lụmẹ kaka kpoye. Ọọwa lẹ, ị juwa kpa ẹla tịtọ nya ịPọlụ bala o-juwa ya ala inyibyi lido lido tọọ ụ-ụwa ịnyịnyị lẹlẹ.

⁴⁶Ụka ọọwa, ịPọlụ bala ịBanabasị juwa ya ẹla dodehe la ọngịrị ọngịrị yẹkẹẹ, “Ọ ri ang ọbaba nya ịlẹhị-ịlẹhị kahị ka kpa ẹrụ ọnyịịla ọlẹ warị kaka ya jenu anụ ala iJuu họhẹ họhẹ. Ma, lẹẹlẹẹ, jaabwọ kaanụ la ịlọnụ a pwa ẹla ọọwa, gu ahịgboo hyoo bala ọ-wa ịlọnụ lala angị chịla-chịla nyọka la ọhịhị ọmyịmyị-ka nya Ohe Oluhye kaka ịnyịnyị lẹlẹ, anụ wo mẹ, ahị jam kpa ẹrụ ọnyịịla ọọwa rụ kele kaka ya je ala iJentayịlị lẹ!

⁴⁷Chajị, ịnyị, Ọngọlahị la a dahị ehile ene-ene lẹ. Ọ yẹkẹẹ, ‘Am huunu kanụ ka ri ahịgboo ha ala iJentayịlị wuu lẹ. Chajị kanụ ka jẹ́-ẹ ri angị ka kpa ọchịda nyam kịla alodehe ọlẹ wuu gu ọka, gu ọka, ka ẹga kọ ba lẹ.’ ”

⁴⁸Ụka ká ala iJentayịlị wo ẹla ọọwa, ị juwa chị ọkẹkẹnị ọtụka-ọtụka, juwa gwogbo ha Ohe Oluhye chajị nya ẹrụ ọnyịịla nyamwụ ọọwa. Ịnyị lẹ, jaabwọ myị́ abwọ ká iru ojuju nya angịlẹ ká Ohe Oluhye nwụlanọ nyọka ya ọhịhị ọmyịmyị-ka nyamwụ ha bwu ẹpwụ nya ala iJentayịlị ịlụwa wuu, a myị la Ohe Oluhye ụ-ụwa lẹlẹ.

⁴⁹Ọọwa lẹ, ẹla nya Ọngọlahị la a juwa pyebile kele kịlahị-ịlahị o-oye nya ọpyị oloye ọọwa wuu lẹlẹ.

⁵⁰Ụka ọọwa, ala iJuu ịlụwa kele kaka tụ anyang ịlẹ kị kaa juhi nya Ohe Oluhye nya ịlẹhị-ịlẹhị ụ-ụwa kị tị ri angị la ihi-ihi lụmẹ e-epweji ọọwa bala alẹng ịlẹ kị ri alegbeju nya epweji ọọwa wuu guru lẹ, ị daa ju kị ka tụ ịPọlụ anyị pyịpyị lẹlẹ. Ọọwa lẹ, ala iJuu ịịwa a ju ọmwụ nya ọ-tụ pyịpyị jahị da ịPọlụ bala ịBanabasị anyị ụ-ụwa nya ịlẹhị-ịlẹhị gbee, ká angịịwa ku ịPọlụ anyị rụ hi oye nya ọpyị nyaa gbanggbang lẹlẹ.

⁵¹Ịnyị, ịPọlụ anyị a wụ ọrụ nya ọpyị ọlẹpẹtẹ nyaa hụrụ cheeji nya ang ibeenu ọ-tụ angịịwa pyịpyị chajị nya ọ-pwa ẹla nya Ohe Oluhye pwa lẹ, ị rụ kele ka ọpyị nya Ayịkoniyọm lẹlẹ.

⁵²Ụka ọọwa, angịjụgbẹyị nya iJisọsị ilepweji nya Antiyọkọ wuu juwa myị la ọkẹkẹnị ọchịchị ọtụka-ọtụka bala ọngịrị nya Olegu Ịgọgọ nya Ohe Oluhye lụmẹ.