Read idege ỤKỤRWỌ nya ALẸRỤ 16 Bible Online

ỤKỤRWỌ nya ALẸRỤ 16 - idege bible

ỤKỤRWỌ nya ALẸRỤ 16

¹Ịnyị, ịPọlụ anyị a jẹ gbee kị pwụ ọpyị nya ịDẹẹbi bala iLisitịra lẹlẹ. Ụka kị pwụ ụwa, ịPọlụ yẹ ọngọjụgbẹyị nya Ọngọlahị ọhẹ ọlẹ kị wụrụ ẹnyị nyamwụ iTimoti. Ịnịna nya iTimoti ọọwa ri ala iJuu ọlẹ kọ myị la Ohe Oluhye. Ma, adịda nya iTimoti tị ri ala iGiriki.

²Angịlẹ kị ri anyadịda ẹ-ẹpwụ nya ịKịrayịsị wuu ịlọpyị nya iLisitịra bala Ayịkoniyọm kaa ya ẹla ọnyịịla nya iTimoti lụmẹ ụka wuu.

³Ịnyị, jaabwọ ká ịPọlụ juwa tịtọ kọ ka kpa iTimoti ba ịlọmwụ lẹ, ọ da iTimoti ụwụwụ, chajị nya ala iJuu ịlẹ kị juwa ẹ-ẹga ọọwa lẹlẹ. Chajị, ala iJuu ịịwa wuu jẹ́ yẹkẹẹ, adịda nya iTimoti nyị ri ala iJentayịlị ịlẹ kị kaa da ụwụwụ ka.

⁴Ịnyị, ụka ká ịPọlụ anyị juwa jẹ tụ epweji-epweji da ịnyịnyịịnyị, ị juwa kpa obyi omeme nya ụma nya ang ịlẹ ká alẹrụ ọnyịịla nya ịKịrayịsị bala alegbeju ịgbahị nya ịchọọchị ịla iJerusalẹm chị eje u-uhye nyaa ẹ-ẹpwụ nya ọjịra-jịra nyaa, ya je angịnyị nya Ohe Oluhye ụ-ụwa ịnyịnyị. Ọọwa ri ajị ká ala iJentayịlị ịịwa wuu ka ju ihi nya ehile ịịwa.

⁵Ịnyị lẹ, angịnyị nya Ohe Oluhye ịlịchọọchị ịlụwa wuu, a juwa la ọngịrị gụ olene-ene ẹ-ẹpwụ nya ọmyịmyị ọlala nyaa lẹlẹ. Angịnyị nya Ohe Oluhye ịla ịchọọchị ịlụwa juwa chị anyị da ịlaa ẹ-ẹpwụ nya iru ojuju kịlahị-ịlahị ẹnẹnẹẹnụ ịnyịnyịịnyị.

⁶Ụka ọọwa, ịPọlụ anyị juwa jẹ chịpwụrụ bwu ịkịka nya ọpyị nya iFurijiya bala ịGaletiya anyị wuu. Ịnyị, Olegu Ịgọgọ a myị haa yẹkẹẹ, nyị pwụ ọpyị nya Echiya kaka ya ẹla nya Ohe Oluhye pyẹ je alụwa kaka lẹlẹ.

⁷Ụka kị jẹ pwụ oba-oyi nya ịpyị nya ala iMisiya, ị juwa maga kị ka kpoye kele ka ịpyị nya ala iBitiniya. Ma, Olegu Ịgọgọ nya iJisọsị, á tị myị haa kpong-kpong ka.

⁸Ịnyị, ị chịpwụrụ bwu iMisiya kele ka epweji nya ịTịrowasị lẹlẹ.

⁹Ịnyị, ụka ká ịPọlụ nọnọ nụwa la odu ọọwa lẹ, ọ chẹhị kaka yẹ ọlẹng ọhẹ a-arụrụ kọ bwu ọpyị nya ịMẹsịdoniya kaka godayị rịrị ẹ-ẹga nyamwụ, juwa bịlọọ yẹkẹẹ, “ỊPọlụ ee, chuchuu kpoye warị wẹ ọpyị nya ịMẹsịdoniya kaka dahị ụbwọ chẹẹ mẹ!”

¹⁰Ịnyị, ụka ká ịPọlụ yọyị a-arụrụ ọwẹ kpá lẹ, ahị nwụlanọ ahyaahị nyọka rụ kele ka ọpyị nya ala ịMẹsịdoniya lẹlẹ. Chajị, ahị myị yẹkẹẹ, Ohe Oluhye a wẹẹ be ẹkọ wụrụụhị, kahị ka kele kaka ya ẹrụ ọnyịịla je alụwa lẹlẹ.

¹¹Ọọwa lẹ, ahị ju ụgbọ nya enyi bwu epweji nya ịTịrowasị kpụrụrụ kele ka epweji nya ịSamotiresi lẹ, ahị myịmyị jẹ kele ka epweji nya iNiyapolisi lahị ọpyẹpyẹ nyamwụ lẹlẹ.

¹²Ahị myịmyị jẹ kele kịlahị gbee kahị pwụ epweji nya iFilipayị. IFilipayị ọọwa a ri epweji ọlẹ kọ ri ẹpwa ụtụrụ nya une nya ọpyị nya ala ịMẹsịdoniya wuu lẹ. IFilipayị ọọwa a myịmyị ri epweji ọlẹ ká alegbeju nya ala iRom ịlẹ kị juwa kpẹhị rịrị une nya ọpyị nya ịMẹsịdoniya wuu, nọ ẹpwa nya ịlaa ịwa ịnyịnyị lụka ọọwa lẹ. Ahị ju ụga e-epweji nya iFilipayị ọọwa lala ụtụrụ ịmanyị-ịmanyị.

¹³Ụka ká Ẹnụtụrụ Ọhịnyọ Lụkụrwọ nya ala iJuu pwụ eji lẹ, ahị gba kpehe bwu ẹpwụ nya epweji ọọwa kele ka ọnụụka nya ihu ọtụka ọlụwa, juwa tịtọ nya ẹga ọraabwọ ha Ohe Oluhye nya ala iJuu ọlụwa lẹlẹ. Ụka kahị pwụ ụwa kahị hụhụ lẹ, ahị juwa ya ẹla nya Ohe Oluhye je anyang ịhyẹ ịlẹ kị kele kaka jịra ụ-ụwa lẹlẹ.

¹⁴Ẹnyị nya ọnyang ọhẹ ẹ-ẹpwụ nya anyang ịịwa ịlẹ kị wo ẹla nya Ohe Oluhye nyahị ọọwa ri iLidiya. ILidiya ọọwa bwu epweji nya ịTayatịra. Ọ ri ọngọ kaa dọhị nya ịpwụ ịnyịmịla. Ọ kaa gbịgba ha Ohe Oluhye lụmẹ. Ịnyị Ọngọlahị la ịlọmwụ, a wụrụ ọkịlẹtụ nya iLidiya ọọwa lẹ, ọ juwa ke ụrụ la ẹla nya Ohe Oluhye oyaya nya ịPọlụ yẹẹyẹẹ lẹlẹ.

¹⁵Ịnyị, ụka kị hụ iLidiya ọọwa enyi Ohe bala alẹpwa nyamwụ wuu lẹ, ọ juwa bịlẹhị nya ịlẹhị-ịlẹhị yẹkẹẹ, “Ó ri kanụ hum lala ọngọ myị la Ọngọlahị la nya ịlẹhị-ịlẹhị lẹ aalẹ, anụ tị tị kẹwẹ kaka ju ụga ẹ-ẹpwa nyam chẹẹ mẹ!” Ụka kọ ya ịnyị gbee lẹ, ahị ka ẹpwa nyamwụ ịnyịlẹhị lẹlẹ.

¹⁶Ịnyị, ụka ọhẹ kahị juwa jẹ kele ka ẹga ọraabwọ ha Ohe Oluhye nya ala iJuu ọla iFilipayị lẹ, ahị tọ ọnyị onjwo ọnyang ọhẹ ọlẹ kọ ri ọnyọhị ụ-ụgbẹyị lẹlẹ. Olegu onyobyi juwa họ ta ọnyị ọnyang ọọwa. Bwula ọọwa lẹ, olegu onyobyi ọọwa kaa kpọọ yẹ ọmwụ bwula ugono ọyẹyẹ ju angịnyị. Ịnyị, ọnyọhị ọọwa a juwa tụ okpoko ọtụka-ọtụka ha angị lọọ la bwula egino ọyẹyẹ nyamwụ ọọwa lẹlẹ.

¹⁷Ọọwa lẹ, ọnyị ọnyang ọ-yẹ ugono ọọwa, a juwa dịrẹ ịPọlụ bala ahị ịnyịnyịịnyị, juwa ya ẹla dodehe gboo yẹkẹẹ, “Alẹng ịwẹ ri anchẹ nya Ohe Oluhye nya Ụbwẹwụ Ọtụka ọlẹ kọ la uhye gụ ihye ịkịla wuu. Ẹla chajị nya ụgbẹyị nya ọchịda nya Ohe Oluhye ọọwa, ị tị wẹẹ ya pyẹ jenu lẹ.”

¹⁸Ọnyị ọnyang ọọwa juwa kaa ya ẹlẹwẹ dodehe je angịnyị chajị nyahị ẹnẹnẹẹnụ. Ịnyị, ụka ká ẹla ọọwa chị ịPọlụ aga lẹ, ọ jahị nyamwụ kpata da ọnyị ọnyang ọọwa la ẹnụtụrụ ookpokpo lẹ, ọ byi olegu onyobyi ọọwa yẹkẹẹ, “Ahụ olegu onyobyi ọwẹ, m jam kpa ẹnyị nya Ọngọlahị iJisọsị ịKịrayịsị dang ehile, gba kpehe hi ọnyị ọnyang ọwẹ lẹẹlẹẹ mẹ!” Ọọwa lẹ, olegu onyobyi ọọwa, a gba kpehe hi ọnyị ọnyang ọọwa iijata-ijata lẹlẹ.

¹⁹Ma, ụka ọlẹ ká angịlẹ kị la ọnyị ọnyang ọọwa yẹ jaabwọ ká ụgbẹyị nya okpoko ọ-ka yeye bwula egino ọyẹyẹ nya ọnyị ọnyang ọọwa tuku gbanggbang lẹ, ọ waa ẹjẹ jahị da ịPọlụ anyị nya ịlẹhị-ịlẹhị lẹlẹ. Ọọwa lẹ, ị kele kaka wu ịPọlụ bala ịSayịlasị anyị, juwa gbịlaa lagbụrụ kpa kịla alegbeju nya ọpyị nyaa ịlẹ kị juwa ojiya nya ihi nyaa lẹlẹ.

²⁰Ụka kị kpa ịPọlụ bala ịSayịlasị pwụ ẹga nya ala iRom ịlẹ kị ri alegbeju nya ọpyị nyaa lẹ, ị byi alegbeju ịịwa yẹkẹẹ, “Alẹng ịlẹ ri ala iJuu ịlẹ kị warị wẹ ọpyị nyahị jam yi epweji nyahị ọlẹ yi bwuru-bwuru. Ịnyị a du kahị kpaa warị wẹ ẹga nyanụ lẹ.

²¹Angịlẹ jam mẹ abwẹla ọhọhọ ịlẹ kị tụ ehile nyahị ahị ala iRom pyịpyị jẹ angịnyị. Lẹ, abwẹla ịịwa á pwoku kaahị ala iRom ka ye ju ụbwọ lee ọ-ka juwa kpa họ ụkụrwọ kpong-kpong ka.”

²²Ọọwa lẹ, iru nya angịnyị ịlụwa a yẹ ju lawụlẹ wuu, juwa bába ju ịPọlụ bala ịSayịlasị lẹlẹ. Alegbeju nya ala iRom ịịwa gu ịwụrụ nyaa ene hi ịlaa lẹ, ị da iru nya angịịwa ehile yẹkẹẹ, anụ nyị kpa ugboji nya oje-oje nyi ịPọlụ anyị enyiri mẹ, lẹlẹ.

²³Ụka ká angịịwa nyaa enyiri kpá nya ịlẹhị-ịlẹhị lẹ, ị wu ịPọlụ bala ịSayịlasị kpa kaka ju agba lẹ, ị byi olegbeju ọkpẹhị rịrị ube nya agba ọọwa yẹkẹẹ, nyị da ịgbọgọlọ ju ube nya agba ọọwa kpọng-kpọng yáa dada mẹ lẹlẹ.

²⁴Ụka ká olegbeju nya ube nya agba ọọwa wo ehile ọlẹ kị dọọ kpá lẹ, ọ kpa ịPọlụ bala ịSayịlasị kele kaka ju odo ẹ-ẹga ọtụpịrịhyoo nya ẹpwụ nya ube opyiipyii ọlẹpwụ nya ube nya agba ọọwa lẹlẹ.

²⁵Ma, ụka ọlẹ kọ lala alẹpwụ odu jijiji lẹ, ịPọlụ bala ịSayịlasị a juwa raabwọ ha Ohe Oluhye bala o-juwa mwu eje gwogbo ha Ohe Oluhye ụ-ụwa u-ube nya agba lẹ, alagba ịkịla wuu a juwa wo eje omwumwu nyaa ọọwa lẹlẹ.

²⁶Ịnyị, lụka ọkpahị ju kaka lẹ, ịpyị ọ-hụ́ kpákpakpa a kpeji ụ-ụwa lẹlẹ. Itiwe nya ebe nya agba ịịwa wuu juwa hụ́ jigi-jigi. Ekpileku nya ebe ịịwa wuu wụrụ da dodo wuu ahyaahị. Ọọwa lẹ, agba ịlẹ kị ya ju alagba odo wuu a yi hyaa pịla-pịla ịnyịnyị lẹlẹ.

²⁷Ịnyị, ụka ká olegbeju ọkpẹhị rịrị ube nya agba ọọwa chị ahi-une kọ jẹ́ jaabwọ ká ekpileku nya ebe ịịwa wụrụ da dodo wuu lẹ, ọ gbile oge nyamwụ kọ ka nwụ ịlọmwụ lẹlẹ. Chajị, ọ me irya yẹkẹẹ, alagba wuu nyị gụ ọwa be rụ lẹ.

²⁸Ma, ịPọlụ ya ẹla lomyi o-gboo byoo yẹkẹẹ, “A họ ịlọng ịngịngịhyẹ kpong-kpong ka, ẹnwa! Chajị, ahị wuu jam ẹ-ẹgẹlẹ.”

²⁹Ịnyị, ụka ká olegbeju nya ube nya agba ọọwa be ẹkọ yẹkẹẹ, nyị kpa ila warị mẹ lẹ, ọ kele ka ube lagaga, kaka hịda keji i-ijata nya ịPọlụ bala ịSayịlasị, juwa hụ́ kpákpakpa ẹ-ẹpwụ nya uhi ojuju lẹlẹ.

³⁰Ịnyị, olegbeju nya ube nya agba ọọwa a gba ịPọlụ bala ịSayịlasị kpehe lẹ, ọ byaa yẹkẹẹ, “Ẹnwa alẹng anyị, anyị, m tị́ ka họ pyii, kam ka jẹ́-ẹ la ọchịda nya Ohe Oluhye lẹẹ mẹ?”

³¹ỊPọlụ anyị wẹ byoo yẹkẹẹ, “Myị la Ọngọlahị iJisọsị mẹ. Aalẹ, a ka chịda bala alọdọdẹpwa nyang wuu lẹ.”

³²Ịnyị lẹ, ịPọlụ anyị a ya ẹla nya Ohe Oluhye ju olegbeju nya ube nya agba ọọwa bala angịlẹ kị juwa ẹ-ẹpwa nyamwụ lẹlẹ.

³³Ịnyị, la odu-odu ọọwa lẹ, olegbeju nya ube nya agba ọọwa a kele kaka hụ́ ịPọlụ anyị abẹ ịlẹ kị chaa lẹlẹ. Ịnyị, ịPọlụ anyị a kpọọ kele kaka hụ enyi Ohe bala alọdọdẹpwa nyamwụ wuu la odu ọọwa lẹlẹ.

³⁴Ụka ọọwa, ọlẹng ọọwa kpa ịPọlụ bala ịSayịlasị rụ kele ka ẹpwa nyamwụ lẹ, ọ hu ang oriri haa ri ụ-ụwa lẹlẹ. Ụka ọọwa, ọwa ayịdang bala alọdọdẹpwa nyamwụ wuu juwa chị ọkẹkẹnị ọtụka-ọtụka chajị nyọlẹ kị ri angị myị la Ohe Oluhye lẹ.

³⁵Ụka ká ahị ọọnamwụ pyẹ lẹ, alegbeju nya ọpyị ọọwa ịlẹ kị ri ala iRom, a du ịdanggeri nyaa ịhyẹ ẹrụ kele kaka byi olegbeju nya agba ọọwa yẹkẹẹ, ahụ nyị tụụbwọ hi alẹng ịwẹ kịị nyị rụ mẹ.

³⁶Ịnyị, olegbeju nya agba ọọwa a ya je ịPọlụ anyị yẹkẹẹ, “Alegbeju nya ọpyị nyahị du ẹrụ warị kaka yẹkẹẹ, am nyị tụụbwọ hiinu kaanụ nyị rụ mẹ. Chajị nya ọọwa lẹ, anụ wuleji kanụ rụ la okpunyi mẹ.”

³⁷Ma, ịPọlụ wẹ byi angịịwa yẹkẹẹ, “Ehe! Ahị ka rụ ka! Chajị, ịnọ, áhị́ họ ẹlẹlẹhẹ onyobyi kpong-kpong ka. Ma, ị tị mwọọgịlẹ du ẹrụ warị kaka wuhi, juwa nyiihi enyiri kpuukpuu ododu ẹ-ẹpwarịrị nya aluche nya angịnyị. Ịnọ, anyị ịlọpyị nya ala iRom kpangga, ahị tị ri lẹ. Ọọwa lẹ, ị wuhi kpa rụ kaka ju agba lẹlẹ. Ọọwa lẹ, ị mwọọgịlẹ juwa tịtọ kị ka gbahị kpehe la okwiikwii lẹlẹ? Ehe! Anụ kele kaka byaa kị warị kaka gbahị kpehe la ịlaa mẹ!”

³⁸Ịnyị, alịdanggeri ịịwa a rụ tịrẹkpẹ kele kaka ya ja alegbeju nya ọpyị ịịwa lẹ, ịwa wuu a juwa juhi nya ịlẹhị-ịlẹhị, chajị nyọlẹ kị wo yẹkẹẹ, ịPọlụ anyị nyị ri anyị ịlọpyị nya ala iRom lẹlẹ.

³⁹Ọọwa lẹ, alegbeju nya ọpyị ịịwa a kele kaka họ ogbokẹkẹ ha ịPọlụ anyị kpá lẹ, ị gbaa kpehe hi ube nya agba ọọwa lẹ, ị byi ịPọlụ anyị yẹkẹẹ, anụ nyị rụ hi epweji nyịwa mẹ lẹlẹ.

⁴⁰Ọọwa lẹ, ịPọlụ bala ịSayịlasị, a gba kpehe bwu ube nya agba ọọwa lẹ, ị kele ka ẹpwa nya iLidiya lẹlẹ. Ụka ká ịPọlụ anyị ju anyadaa anyị ẹ-ẹpwụ nya ịKịrayịsị ọhụ la ẹla nya Ohe Oluhye oyaya kpá wuu lẹ, ị rụ bwu epweji nya iFilipayị lẹlẹ.