Read idege ỤKỤRWỌ nya ALẸRỤ 17 Bible Online

ỤKỤRWỌ nya ALẸRỤ 17 - idege bible

ỤKỤRWỌ nya ALẸRỤ 17

¹Ụka ká ịPọlụ bala ịSayịlasị jẹ chịpwụrụ bwu epweji nya Amfipolisi bala Apoloniya lẹ, ị kele ka epweji nya ịTẹsalonayịka lẹlẹ. Ube ọ-mẹ ẹla nya Ohe Oluhye jẹ nya ala iJuu ọhẹ juwa e-epweji nya ịTẹsalonayịka ọọwa.

²ỊPọlụ jụ kele ka ube ọ-mẹ ẹla nya Ohe Oluhye jẹ nyaa ọọwa jaabwọ ká ọlịnyị a ri abwẹla ọhọhọ nyamwụ ene-ene. Ịnyị, ọ juwa kpa ẹla nya Ohe Oluhye bwu Ụpwụ Ịgọgọ da ẹla wụlẹ ya je ala iJuu ịlẹ kị juwa da ịwẹẹ tọọ ụ-ụwa lala ẹpwụ nya epwihi ịta gbẹgbịlẹgbẹ lẹlẹ.

³Ịnyị, ịPọlụ a juwa kpa ẹla nya Ụpwụ Ịgọgọ ọọwa da ẹla oyaya nyamwụ wụlẹ gede gede ya jaa, jaabwọ kọ ri ang ọbaba lụmẹ ká ịKịrayịsị ka yẹ akama ene, kọ ka wuleji bwula igu ịnyịlẹhị lẹlẹ. Ọ byaa yẹkẹẹ, “IJisọsị ọlẹ kahị lẹẹ ya ẹrụ ọnyịịla jenu chajị nyamwụ kpakpakpa a ri ịKịrayịsị ọọwa lẹlẹ.”

⁴Ịnyị, ụka ká ẹla ọọwa wu angịhyẹ nyaa ẹpwụ yẹẹyẹẹ lẹ, ị ji oye nya ịPọlụ bala ịSayịlasị lẹlẹ. Iru nya ala iJentayịlị ịhyẹ lụmẹ-lụmẹ bala iru nya anyang ịhyẹ ịlẹ kị ri anyang ilihi-ihi e-epweji ọọwa myị la ẹla ọọwa ịnyịnyị.

⁵Ma, ala iJuu ịhyẹ ịlẹ kị myị la Ohe Oluhye ka, juwa la olegu nya ijiiji tụ ịPọlụ anyị pyịpyị. Ịnyị lẹ, ị kpa alachị ilepweji ọọwa ịhyẹ ịlẹ kị wo ẹla kpong-kpong ka, ba ịlaa kele ka ẹga nya iru nya angịnyị ịịwa, juwa yi epweji ọọwa wuu yi bwuru-bwuru lẹlẹ. Angịịwa kele ka ẹpwa nya ọlẹng ọhẹ ọlẹ kị wụrụ ịJẹsịn, juwa tịtọ nya ịPọlụ bala ịSayịlasị anyị, kị ka waa kpa kele kịla iru nya angịnyị ịịwa.

⁶Ụka ká angịịwa á yẹ ịPọlụ anyị ụ-ụwa kaka lẹ, ị wu ịJẹsịn ọọwa bala angịhyẹ ịlụwa ịlẹ kị ri anyadịda nya awụlẹ ẹ-ẹpwụ nya ịKịrayịsị, juwa gbilaa kpa kele kịla alegbeju ịkpẹhị rịrị epweji ọọwa lẹ, ị byaa la omyi o-gboo yẹkẹẹ, “Alẹng ịlẹ kị lẹẹ yẹ odehe ọlẹ ahị kụrụ eji birikiti, warị jam bịrị epweji nyahị ọlẹ chịkẹ-chịkẹ ịnyịnyị lẹ!

⁷Ọọwa lẹ, ịJẹsịn ọlẹ a ye angịịwa kpa kaka ju ụga ẹ-ẹpwa nyamwụ lẹlẹ. Ọhọhọ nya angịịwa wuu juwa tụ iSisa adịrahụ ọgbahị nya ala iRom wuu pyịpyị. Ị myịmyị yẹkẹẹ, ọngọkịla ọhẹ ọlẹ kịị nyị wụrụ iJisọsị nyaa ri adịrahụ lẹlẹ.”

⁸Ụka ká alegbeju ịkpẹhị rịrị epweji ọọwa bala iru nya angịnyị ịịwa wo ẹla oyaya nya angịịwa kpá lẹ, ojigi-jigi ọtụka-ọtụka a kpeji e-epweji ọọwa lẹlẹ.

⁹Ụka ká angịịwa chị ịJẹsịn bala angịkịla nyamwụ ijwo kị nwụ okpoko ọọwa haa kpá lẹ, ị tụụbwọ hi ịJẹsịn anyị rụ lẹlẹ.

¹⁰Ụka ká odu hi lẹ, anyadịda nya ịPọlụ anyị ẹ-ẹpwụ nya ịKịrayịsị ilepweji nya ịTẹsalonayịka, a du ịPọlụ bala ịSayịlasị rụ ahyaahị kele ka epweji nya iBeriya lẹlẹ. Ụka kị pwụ iBeriya, ịPọlụ anyị kele ka ube ọ-mẹ ẹla nya Ohe Oluhye jẹ nya ala iJuu ọlụwa.

¹¹Ala iJuu ilepweji nya iBeriya ọwẹ pyẹ ọkịlẹtụ nyaa maa ha ẹla nya Ohe Oluhye gụ ala ịTẹsalonayịka. Chajị, ị juwa kaa kpa ọ-hụ́ jojo nya ọkịlẹtụ ye ẹla nya Ohe Oluhye bala o-juwa kaa kụ ẹhị yẹ Ụpwụ Ịgọgọ la ịlaa chẹrị-chẹrị ẹnẹnẹẹnụ, chajị kị ka jẹ́, ọ́ ri ká ẹla ọlẹ ká ịPọlụ anyị ya jaa, á ri nya ịlẹhị datị.

¹²Ịnyị, iru nya ala iJuu ịlụwa lụmẹ-lụmẹ a myị la Ohe Oluhye ụ-ụwa bala ala iJentayịlị ịhyẹ ịlẹ kị ri anyang ilihi-ihi tụ alẹng nyaa ịhyẹ ịnyịnyị lẹlẹ.

¹³Ma, ụka ká ala iJuu ịla ịTẹsalonayịka wo oja yẹkẹẹ, ịPọlụ nyị juwa ya ẹla nya Ohe Oluhye ju ala iBeriya ịnyịnyị lẹ, ị kele ka epweji nya iBeriya, juwa daa ju bala ọ-taa tutu jahị da ịPọlụ anyị lẹlẹ.

¹⁴Ụka ọọwa, anyadịda nya ịPọlụ ẹ-ẹpwụ nya ịKịrayịsị ịla iBeriya kpa ịPọlụ chị rụ kele ka ọnụụka nya ihu ọtụka-ọtụka ọlụwa ahyaahị. Ma, ịSayịlasị bala iTimoti tị lẹ, ịwa hi hụwa e-epweji nya iBeriya.

¹⁵Angịlẹ kị kpa ịPọlụ chị, jẹ gbee kị pwụ epweji ọlẹ kị wụrụ Atẹnsị. Ịnyị, ụka ká ịPọlụ daa ẹrụ la ọngịrị-ọngịrị ta ịSayịlasị bala iTimoti yẹkẹẹ, nyị maga kịị nyị chagaga warị kaka tọ ọwa Atẹnsị ahyaahị mẹ lẹ, angịịwa a rụ tịrẹkpẹ lẹlẹ.

¹⁶Ụka ọlẹ ká ịPọlụ juwa godayị gbe ịSayịlasị bala iTimoti e-epweji nya Atẹnsị, kọ chẹhị kaka yẹ jaabwọ ká ihye ijiga lụmẹ ụ-ụwa lẹ, olegu nya ịPọlụ a juwa doo kuukuu lụmẹ kaka kpoye chajị nya ọọwa lẹlẹ.

¹⁷Ịnyị, ịPọlụ a kele ka ube ọ-mẹ ẹla nya Ohe Oluhye jẹ nya ala iJuu ọlụwa, juwa kpa ẹla nya Ohe Oluhye ya ẹla ta ala iJuu ịlẹ kị juwa da ịwẹẹ ụ-ụwa tọọ bala ala iJentayịlị ịlẹ kị ri angịnyị nya Ohe Oluhye ụ-ụwa ịnyịnyị lẹlẹ. ỊPọlụ kaa kele ka ojiya nya ihi nya alụwa ẹnẹnẹẹnụ, juwa kpa ẹla nya Ohe Oluhye da ịwẹẹ ta angịlẹ wuu ịlẹ kọ yẹ ụ-ụwa.

¹⁸Ụka ọọwa, angịmẹjẹ ịhyẹ ịlẹ kị juwa kaa kpa irya nya akpachuu ọdada chajị nya ọhịhị olodehe ọlẹ, mẹ ang jẹ angịnyị juwa ụ-ụwa. Ị ri alebwo nya ang ọmẹjẹ ọlịnyị ebwo imiiye ịlẹ kị wụrụ Epikura bala ịSịtọyịkị. Ụka ká angịmẹjẹ ịịwa yẹ ịPọlụ, ị juwa kpọọ họ yẹkẹẹ, “Ẹẹla ịyẹ, ọngọ jẹ́ ịngịngịhyẹ ka bala ọ-jẹ́ ya ẹla ka ọwẹ, a tị́ ka ye ya kpong-kpong?” Angị ịkịla nyaa juwa yẹkẹẹ, “Ọ lala ọngọọwa nyaa juwa ya ẹla dodehe rụ́ ihye nya alija ịkịla ịhyẹ!” angịịwa ya ịnyị chajị nyọlẹ ká ịPọlụ juwa ya ẹla nya Ohe Oluhye rụ́ iJisọsị bala owuleji bwula igu nyamwụ.

¹⁹Ịnyị, angịịwa a kpa ịPọlụ kele ka ẹpwụ nya ọjịra-jịra ọtụka ọgụgụ nyaa wuu ọlẹ kị wụrụ Arọpẹgọsị lẹ, ị byi ịPọlụ yẹkẹẹ, “Ahị tịtọ ká ka ya jehi ang chajị nya ọmẹjẹ onyeewe nyang ọlẹ ká kpa warị.

²⁰Chajị, ang ọmẹjẹ nyang ọwẹ rihi onyeewe ụ-ụrụ lẹ, ahị tịtọ kahị ka jẹ́ ang ọlẹ ká etu nya ala ịịwa ri yẹẹyẹẹ bwu ẹga nyang.”

²¹Angịwẹ byi ịPọlụ ịnyị, chajị ala Atẹnsị ịịwa wuu bala angga ịlẹ kị kụ ụwa wuu lẹ, oja ojaja bala oja owowo kem chajị nya ang inyeewe-inyeewe ụbwọọmwụ a ri ụkụrwọ nyaa ụka wuu lẹlẹ.

²²Ịnyị, ụka ká ịPọlụ wuleji godayị kọkọ ẹ-ẹpwarịrị nya ọjịra-jịra nya Arọpẹgọsị ọọwa lẹ, ọ yẹkẹẹ, “Anụ ala Atẹnsị wuu, ang ọlẹ kam jẹ́ chajị nyanụ ụ-ụgbẹyị ọnyị myị ọnyị wuu ri yẹkẹẹ, ẹla nya ịgba ọgbagba ha ohe chakpa háanụ lụmẹ.

²³Chajị, ụka ọlẹ kam juwa chịpwụrụ bwu agbayị ilopeje nyanụ lẹ, m kpẹhị yẹ ụma nya ihye ịlẹ kanụ kaa gbịgba ha ịnyịnyịịnyị gbee kam kaka yẹ ada nya ohe ọhẹ ọlẹ kanụ da ụpwụ ba yẹkẹẹ, ‘Ada ọlẹ ri ịnya ohe ọlẹ kahị jẹ́jẹ́ ka.’ Lẹ, Ohe ọọwa ọlẹ kanụ wẹẹ gbịgba ha kanụ tị jẹ́ ọngọlẹ kọ ri datị kaka wẹẹ, Ohe ọọwa kpangga, m lẹẹ ya dodehe jenu lẹlẹ.

²⁴Ọwa-à ri Ohe Oluhye Ọngọlẹ kọ họ odehe ọlẹ wuu bala ang myị́ ang ọlẹpwụ nyamwụ lẹ. Ọwa tị ri Ọngọlahị Ohe Oluhye Ọngọ họ epwoohe bala odehe lẹ. Ohe Oluhye ọọwa á tị kaa kụ ẹpwang ọlẹ ká angịnyị ehe nyinyi la ụbwọ nya ịlaa kpong-kpong ka.

²⁵Ụkụrwọ nya ụbwọ ọhọhọ nyahị, Ohe Oluhye a tị tịtọ kahị ka kpa gbịgba họọ kpong-kpong ka. Chajị, Ohe Oluhye á tịtọ nya ịngịngịhyẹ wẹ ẹpwụtụbwọ nyahị ahị angịnyị ehe kpong-kpong ka. Chajị, Ohe Oluhye a hu ọhịhị hahị ahị bala ang myị́ ang ịlẹ wuu kahị la lẹ.

²⁶Ịwọ ookpokpo, Ohe Oluhye a tị kpa họ ọng myị́ ọng olepwoja myị́ epwoja nya odehe ọlẹ wuu lẹ. Ohe Oluhye ayịdang a tị ri Ọngọlẹ kọ chị ụka nya ehe oriri nya ọng myị́ ọng wuu nọ bwu ọmwụ ọdada bala ọ-chụ ẹga ọlẹ ká ọng myị́ ọng nya angịnyị ehe ka nọ ẹpwa kaka ba haa ịnyịnyị lẹ.

²⁷Ohe Oluhye la ịlọmwụ họ ịnyị, chajị, ọ la ẹhị ọ-da hile yẹkẹẹ, ọhẹka, bwula ọlẹ ká angịnyị ehe ka juwa tịtọ nyamwụ ịnyịnyịịnyị, ká ọọwa ka họ kị ka jẹ́-ẹ wu Ohe Oluhye ọyị myị́. Ịnọ, Ohe Oluhye ayịdang wẹ lẹ, ọ́ dọmwụ lụrụ la, hiihi ahị angịnyị ehe kpong-kpong ka!

²⁸Chajị, ị ya ẹgẹhẹ yẹkẹẹ, ‘Ọhịhị nyahị wuu bala ọngịrị ọ-kpa họ ụkụrwọ nyahị wuu bala irya nya ọngịnyị ehe ọlẹ kahị la wuu lẹ, ẹ-ẹpwụtụbwọ nya Ohe Oluhye, ọ bwu lẹ.’ Jaabwọ ká angịhyẹ nya ala arworwo nya ala Atẹnsị nyanụ tị ya lẹ, ịnyị, ọ dọmwụ la lẹ. Chajị, ị yẹkẹẹ, ‘Ahị angịnyị ehe lẹ, anyị nya Ohe Oluhye, ahị ri wuu ịnyịnyị lẹ.’

²⁹Chajị nyọlẹ kahị ri anyị nya Ohe Oluhye ịnyị lẹlẹ, anụ aligu nyam, ọ́ chịla kahị tụtụm ka juwa me irya ju Ohe Oluhye ọọwa lala ukpeku nya okpoko ịgọm lee ịnya okpoko onyoowuru lee ukpeku nya ẹjwọ ịlẹ kị ri ụkụrwọ nya ụna ọhọhọ la ụbwọ nya angịnyị ehe ọlẹ kị kaa kpa irya omeme nya imahị nya ọngịnyị ehe kem họ kaka.

³⁰Anụ wo mẹ! Ụka ọlẹ ká angịnyị ehe ji ẹpwụ nya ájẹ́jẹ-ka ẹ-ẹga ká Ohe Oluhye ji wẹẹ lẹ, Ohe Oluhye kaa gu ahị nyamwụ gboo hi ịhọbịrị ịhọhọ nyaa wuu lụka ọọwa! Ma, ọlẹẹlẹẹ tị lẹ, Ohe Oluhye jam da angịnyị ehe wuu ehile ju ka ẹga myị́ ẹga wuu yẹkẹẹ, ọng myị́ ọng wuu nyị yẹ irya da bwu ẹpwụ nya ịhọbịrị ịhọhọ wuu ha Ọwa Ohe Oluhye mẹ.

³¹Chajị, Ohe Oluhye hu ụtụrụ ookpokpo ọhẹ nọ ị-ịlahị ọlẹ kọ ka kpa abwẹla ọnyịịla nyamwụ la angịnyị ehe ilodehe ọlẹ wuu eje pyii lẹ. Ohe Oluhye chụ iJisọsị Ọnyẹwẹ nyamwụ kọọwa a ka ri ọngọ ka kpa ọnụ la angịnyị ehe eje la ẹnụtụrụ ọọwa lẹ. Ịnyị, Ohe Oluhye a wule iJisọsị ọọwa eji bwula igu nya ang o-ju ẹjẹẹ ha alodehe yẹkẹẹ, Ohe Oluhye nyaa chụ iJisọsị ịnyịlẹhị lẹlẹ.”

³²Ụka ká alọjịra-jịra nya Arọpẹgọsị ịịwa wo jaabwọ ká ịPọlụ ya ẹla rụ́ owuleji bwula igu lẹ, angịhyẹ nyaa a juwa kpọọ họ lẹlẹ. Ma, angịkịla nyaa juwa yẹkẹẹ, “Ụka ọkịla, ahị myịmyị ka wo ẹla nyang ọwẹ lẹlẹ, ẹnwa ọlẹng!”

³³Ịnyị, ịPọlụ a rụ bwu ẹpwụ nya ọjịra-jịra nyaa ọọwa lẹlẹ.

³⁴Ma, alẹng ịhyẹ ịlẹ kị myị ju ẹla nya ịPọlụ, yẹ ju lọọ ụ-ụwa ụka ọọwa. Ọlẹng ọhẹ ọlẹ ká ẹnyị nyamwụ ri ịDayọnisọsị juwa ẹ-ẹpwụ ogu nya angị myịmyị ịịwa. ỊDayọnisọsị ọọwa ri ọngọhẹ lẹpwụ nya alegbeju nya ọjịra-jịra nya Arọpẹgọsị ọọwa. Ẹnyị nya ọnyang ọhẹ lẹpwụ nya angị myịmyị ịịwa ri ịDamarisi. Angị ịkịla lụmẹ-lụmẹ juwa ịlẹ kị myị la ẹla nya ịPọlụ ọọwa ịnyịnyị.