Read idege ỤKỤRWỌ nya ALẸRỤ 18 Bible Online

ỤKỤRWỌ nya ALẸRỤ 18 - idege bible

ỤKỤRWỌ nya ALẸRỤ 18

¹Ụka ká ọwẹ chịpwụrụ kpá lẹ, ịPọlụ a rụ bwu epweji nya Atẹnsị kele ka epweji nya ala ịKọrịntị lẹlẹ.

²ỊPọlụ yẹ ola iJuu ọhẹ ọlẹ kị wụrụ Akwila bala iPirisila ahụ nyamwụ ụ-ụwa. Ị ma Akwila ọọwa e-epweji nya ịPọntọsị. Akwila bala iPirisila rụnyẹ rụ bwu ọpyị nya Itili chajị nyọlẹ ká iKilodiyọsị ọlẹ kọ ri adịrahụ ọgbahị nya ala iRom wuu da ehile yẹkẹẹ, ala iJuu ịlọpyị nya iRom wuu nyị rụ pyii mẹ. Ịnyị, ịPọlụ a kele kaka yẹ Akwila anyị lẹlẹ.

³Ịnyị, ịPọlụ a hụ ta Akwila anyị e-epweji nya ịKọrịntị, chajị nyọlẹ ká ịPọlụ jẹ́ họ ụkụrwọ nya ọdụ ọnụnụ ịnyịnyị lala ịwa-ịwa lẹlẹ.

⁴Ẹnụ myị́ ẹnụ nya Ẹnụtụrụ Ọhịnyọ Lụkụrwọ nya ala iJuu wuu, ịPọlụ kaa kele ka ube ọ-mẹ ẹla nya Ohe Oluhye jẹ nya alụwa, juwa kpa Ụpwụ Ịgọgọ da ẹla wụlẹ ya je ala iJuu bala ala iJentayịlị ịlẹ kị juwa da ịwẹẹ tọọ ụ-ụwa ịnyịnyịịnyị.

⁵Ụka ọlẹ ká ịSayịlasị bala iTimoti bwu epweji nya ịMẹsịdoniya pwụ ẹga nya ịPọlụ ị-ịKọrịntị lẹ, ịPọlụ juwa kpa ẹla nya Ohe Oluhye ya pyẹ je angịnyị bala o-juwa ri ibeenu ya je ala iJuu ịlụwa yẹkẹẹ, iJisọsị kpakpakpa nyaa ri ịKịrayịsị ọọwa ọlẹ ká Ohe Oluhye nyị du warị lẹlẹ.

⁶Ịnyị, ụka ká ala iJuu ịlụwa pwa ẹla oyaya nya ịPọlụ, kị juwa ya ala inyibyi ba ịPọlụ ịnyịnyị lẹ, ịPọlụ a wụ ọrụ nya ọpyị oluhye nya awụrụ nyamwụ cheeji ẹ-ẹpwụ nya agbama ojuju lẹ, ọ byaa yẹkẹẹ, “Anụ wo mẹ! Ịwọ nyanụ ka ji uhye egbeju nya ịlọnụ o-oluhye nya ọhọbịrị nyanụ lẹ! Am lẹ, eje nya ayịreji ọtata nyanụ á ji ẹpwụtụbwọ nyam kaka. Chajị nya ọọwa lẹ, bwu alẹ ọlẹ kele kịlahị, m jam ka rụ kele kaka ya ẹrụ ọnyịịla ọlẹ pyẹ je ala iJentayịlị lẹ!”

⁷Ịnyị, ịPọlụ a rụ hi ala iJuu ịịwa kele kaka ju ụga ẹ-ẹpwa nya ọla iJentayịlị ọhẹ ọlẹ kị wụrụ ịTayịtịyọsi ịJọsịtọsi lẹlẹ. ỊJọsịtọsi ọọwa ri ọngọlẹ kọ kaa gbịgba ha Ohe Oluhye. Ẹpwa nyamwụ ju ube ọ-mẹ ẹla nya Ohe Oluhye jẹ nya ala iJuu ọlụwa chwẹẹ lụmẹ.

⁸Ọlẹng ọhẹ ọlẹ kị wụrụ iKirisipọsị, kọọwa a ri olegbeju ọkpẹhị rịrị ube ọ-mẹ ẹla nya Ohe Oluhye jẹ nya ala iJuu ọlụwa myị la Ọngọlahị la bala alọdọdẹpwa nyamwụ wuu. Iru nya ala ịKọrịntị lụmẹ-lụmẹ ịlẹ kị wo ẹla nya Ohe Oluhye oyaya nya ịPọlụ lẹ, ị myị la Ohe Oluhye ịnyịnyị. Ịnyị lẹ, ị hwaa ịwa wuu enyi Ohe lẹlẹ.

⁹Ịnyị, Ọngọlahị iJisọsị a ya ẹla ta ịPọlụ a-arụrụ lodu ọhẹ yẹkẹẹ, “ỊPọlụ, a juhi kpong-kpong ka. Cheri ká juwa ya ẹla nya Ohe Oluhye la ọngịrị-ọngịrị kịlahị-ịlahị mẹ. A tụ ọnụ nyang pịrị kem kaka.

¹⁰Chajị, am Ọngọlang la, m ka juwa tang ẹ-ẹga myị́ ẹga wuu. Ọngọngọhẹ á juwa ka họng abwaabwọhẹ myị́ kpong-kpong ka. M la iru nya angịnyị lụmẹ jam e-epweji ọlẹ, ká ka kpa wam.”

¹¹Ịnyị lẹ, ịPọlụ a hụ e-epweji nya ịKọrịntị lala ẹka ookpokpo da ịya ịrwọnyẹ, juwa mẹ ẹla nya Ohe Oluhye jẹ angịnyị ụ-ụwa ịnyịnyịịnyị lẹlẹ.

¹²Ma, ụka ọlẹ kị hu ọlẹng nya ala iRom ọhẹ ọlẹ kị wụrụ iGaliyo Adịrahụ nya ọpyị nya Akaya wuu lẹ, ala iJuu ịlụwa, a kele kaka me obyi onyobyi ju ịPọlụ wuu lẹ, ị wu ịPọlụ kpa kele kịlahị nya eje ọla ịkọtụ ọtụka nyaa lẹlẹ.

¹³I byi alegbeju ịlịkọtụ ọọwa yẹkẹẹ, “Ahị kpa ọlẹng ọlẹ warị wẹ ẹga nyanụ, chajị, ọ jam mẹjẹ angịnyị yẹkẹẹ, nyị gbịgba ha Ohe Oluhye la ọgụ ọlẹ kọ tụ ehile nya alịnyahị pyịpyị.”

¹⁴Ma, ụka ọlẹ ká ịPọlụ juwa tịtọ kọ ka pyẹ ọnụ nyamwụ maa ya ẹla lẹ, adịrahụ iGaliyo ọọwa a jene ya ẹla ta ala iJuu ịịwa yẹkẹẹ, “Oo, anụ ala iJuu, anụ wo mẹ! Ó ri ká ẹla ọlẹ á ri ẹla chajị nya ehile ọbịrịị-bịrị lee o-ri abwẹla onyobyi ọhọhọ ọkịla ọhẹ, ịnọ, am ayịdang ka ke ụrụ la ẹla oyaya nyanụ ọọwa myị́!

¹⁵Ma, jaabwọ ká ẹla ọọwa ri ẹla chajị nya o-wo lawụlẹ-ka nyanụ anụ-anụ, u-uhye nya ụma nya ẹnyị nya Ohe nyanụ bala ẹla nya ehile nyanụ kem lẹ, anụ ayịdang a kụ ẹhị yẹ ẹla ọọwa la ịlọnụ mẹ. Aḿ tịtọ kam ka ri ọngọ la eje nya ụma nya ala ịlịnyị ka lẹ, m pwa!”

¹⁶Ịnyị, adịrahụ iGaliyo ọọwa a ku ala iJuu ịịwa rụ kpehe hi ịkọtụ oleje nyamwụ ọọwa lẹlẹ.

¹⁷Ịnyị lẹ, ala iJuu ịịwa a kele kaka wu ọlẹng ọhẹ ọlẹ kị wụrụ iSositenesi, kọ ri olegbeju nya ube ọ-mẹ ẹla nya Ohe Oluhye jẹ nya ala iJuu ọlụwa lẹ, ị mịlọọ nyi kpá nya ịlẹhị-ịlẹhị ị-ịlahị nya ịkọtụ oleje ọọwa lẹlẹ. Ma, ọhọhọ nyaa ọọwa ẹ-ẹga nya iSositenesi á tị ri iGaliyo ẹlẹlẹhẹ kpong-kpong ka.

¹⁸Ụka ká ọwẹ chịpwụrụ kpá, ká ịPọlụ hụ e-epweji nya ịKọrịntị myịmyị ta anyadamwụ ẹ-ẹpwụ nya ịKịrayịsị ịlụwa la ẹnụtụrụ lụmẹ-lụmẹ lẹ, ọ daa ọkpahị lẹ, ọ ju ụgbọ nya enyi rụ, juwa kele ka ọpyị nya ala iSiriya lẹlẹ. IPirisila bala Akwila ba ịPọlụ rụ ịnyịnyị. Ụka kị pwụ epweji nya ịSẹnchiriya lẹ, ịPọlụ pwọ inyi nyamwụ hi ẹtẹtẹ ụ-ụwa, chajị nya ọnụ ọmyịmyị nya iro ọnwanwa ọhẹ ọlẹ kọ myị ha Ohe Oluhye ene-ene.

¹⁹Ụka kị pwụ epweji nya Efesọsị, ịPọlụ tụụbwọ hi Akwila bala iPirisila ụ-ụwa. Ịnyị, ịPọlụ ayịdang a rụ kele ka ube ọ-mẹ ẹla nya Ohe Oluhye jẹ nya ala iJuu ọlụwa, juwa kpa Ụpwụ Ịgọgọ da ẹla wụlẹ ya je ala iJuu ịlẹ kị juwa da ịwẹẹ tọọ ụ-ụwa lẹlẹ.

²⁰Ụka ká alụwa bịlẹ ịPọlụ ya, nyị hụ ta ịwa lụka oludiyo chẹẹ mẹ lẹ, ịPọlụ á myị ọnụ nya ọọwa jwaa ka.

²¹Ma, ụka ká ịPọlụ daa ọkpahị kpá lẹ, ọ byaa yẹkẹẹ, “Ó ri kọ ri irya nya Ohe Oluhye aalẹ, m juwa ka tịrẹkpẹ warị kaka wụlaanụ yẹ myịmyị wẹẹ!” Ịnyị, ịPọlụ a yegiri, ju ụgbọ nya enyi rụ bwu epweji nya Efesọsị lẹlẹ.

²²Ụka ká ịPọlụ jẹ pwụ epweji nya iSisarịya, kọ da pwụrụ pwụ epweji nya iJerusalẹm kaka yẹ ala ịchọọchị ịlụwa kpá lẹ, ọ rụ kele ka epweji nya Antiyọkọ myịmyị lẹlẹ.

²³Ụka ká ịPọlụ hụ e-epweji nya Antiyọkọ chẹẹ lẹ, ọ juwa ga tụ epweji-epweji da ụ-ụwa ịkịka nya ịpyị nya ala ịGaletiya bala iFurijiya, juwa ju angịjụgbẹyị nya Ọngọlahị la ọhụ ịnyịnyịịnyị lẹlẹ.

²⁴Ọlẹng nya ala iJuu ọhẹ juwa ọlẹ kị wụrụ ẹnyị nyamwụ Apolosi, kọ bwu epweji nya Alẹkịsandịrịya, kele ka epweji nya Efesọsị. Apolosi ọọwa ri ọngọlẹ kọ kaa jụ ala ya myị́ lala adikobya. Ọ myịmyị jẹ́ Ụpwụ Ịgọgọ nya Ohe Oluhye yẹẹyẹẹ lụmẹ ịnyịnyị.

²⁵Apolosi ọọwa ri ọngọlẹ kị mẹ ang jẹ yẹẹyẹẹ chajị nya ụgbẹyị nya ọhịhị nya Ọngọlahị la. Ọ ri ọngọlẹ kọ la ila ọchịchị ẹ-ẹpwụ nya olegu lụmẹ. Ọ kaa juwa mẹ ang jẹ angịnyị yẹẹyẹẹ chajị nya iJisọsị. Ma, ang chajị nya enyi Ohe ọhụhụ nya ịJọn ọngọ hụ enyi Ohe kem, Apolosi a tị jẹ́ lẹ.

²⁶Apolosi ọọwa juwa ya ẹla nya Ohe Oluhye la uhi ojuju-ka je angịnyị u-ube ọ-mẹ ẹla nya Ohe Oluhye jẹ nya ala iJuu ọlụwa. Ma, ụka ká iPirisila bala Akwila wo ẹla oyaya nyamwụ lẹ, ị wụrụ Apolosi kele kaka mẹ ụgbẹyị nya ẹla nya Ohe Oluhye jọọ yẹẹyẹẹ gụ olene-ene lẹlẹ.

²⁷Ịnyị, ụka ká Apolosi juwa tịtọ kọ ka kpa ẹla nya Ohe Oluhye kpoye kele ka ọpyị nya Akaya lẹ, anyadamwụ ẹ-ẹpwụ nya ịKịrayịsị ịla Efesọsị a jwoo ọhụ ẹ-ẹpwụ nya ọọwa lẹ, ị da ileta du kele kịla angịjụgbẹyị nya ịKịrayịsị ịlụwa kị ka ye Apolosi yẹẹyẹẹ lẹlẹ. Ụka ká Apolosi pwụ ụwa lẹ, ọ juwa da angịnyị nya Ohe Oluhye ịlẹ wuu kị myị la Ọngọlahị iJisọsị ịKịrayịsị bwula ọnahị nya Ohe Oluhye ụ-ụwa ụbwọ nya ịlẹhị-ịlẹhị lẹlẹ.

²⁸Chajị, Apolosi ọọwa juwa kpa Ụpwụ Ịgọgọ da ẹla nya Ohe Oluhye wụlẹ ya je ala iJuu ịlẹ kị juwa da ịwẹẹ tọọ ụ-ụda yẹkẹẹ, iJisọsị kpakpakpa nyaa ri ịKịrayịsị ọọwa ịnyịlẹhị lẹlẹ.