Read idege ỤKỤRWỌ nya ALẸRỤ 23 Bible Online

ỤKỤRWỌ nya ALẸRỤ 23 - idege bible

ỤKỤRWỌ nya ALẸRỤ 23

¹Ịnyị, ụka ká ịPọlụ juwa mwụụrụ yẹ alegbeju ileje nya ịkọtụ ọgbahị ọọwa wuu lẹ, ọ byaa yẹkẹẹ, “Anụ anyadam, anụ wo mẹ! Ọhịhị ọlẹ kam la ị-ịlahị nya Ohe Oluhye lẹ, m lọọ ẹ-ẹpwụ nya ọkịlẹtụ ọgbagbịlagba la irya nyam ọ-ya eje wum wu kpong-kpong ka pyịyọọ daalẹ ọlẹ.”

²Ụka ọọwa, Ananịyasị ọlẹ kọ ri olegbeju ọgbahị nya angịkiliya nya Ohe Oluhye wuu, da angịhyẹ ịlẹ kị godayị rịrị ju ịPọlụ chwẹẹ ehile yẹkẹẹ, “Anụ wa ịPọlụ ọwẹ abwọ ọ-ọnụ nyamwụ ọwẹ ham pyii!”

³Ịnyị, ịPọlụ a wẹ byi Ananịyasị yẹkẹẹ, “Ohe Oluhye tịtị ka wang ahụ ọngọwẹ abwọ ịnyịnyị, ahụ ọngọ há ụhị nya ọhọ olida kem ọwẹ. Ọ tị́ lanyị ká hụhụ, juwa kpa ehile nya Ohe Oluhye lam eje, ká tị mwọọgịlẹ juwa bịrị ehile ọọwa bwula o-byi angịkịla yẹkẹẹ, nyị wam abwọ mẹ?”

⁴Ọọwa lẹ, angịlẹ kị godayị rịrị ju ịPọlụ chwẹẹ a byoo yẹkẹẹ, “Ọọhọ! Ọ tị́ lanyị ká juwa yalibyi la olegbeju ọgbahị nya angịkiliya nya Ohe Oluhye ya ịnyị?”

⁵ỊPọlụ wẹ byaa yẹkẹẹ, “Anụ anyadam, anụ yẹ mẹ! Aḿ jéjé wẹẹ yẹkẹẹ, ọlẹng ọlẹ a ri olegbeju ọgbahị nya angịkiliya nya Ohe Oluhye lẹ, kpong-kpong ka! Chajị, ị da kpehe ụ-Ụpwụ Ịgọgọ yẹkẹẹ, ‘A ya ẹla onyobyi rụ́ olegbeju ọkpẹhị rịrị angịnyị nyanụ kpong-kpong ka.’ ”

⁶Ụka ọlẹ ká ịPọlụ jẹ́ yẹkẹẹ, angịhyẹ lẹpwarịrị nya alọjịra-jịra nya ịkọtụ ọgbahị ọọwa nyị ri alogu nya ịSadusii bala alebwo ọkịla nyaa o-ri ala ịFarisii lẹ, ọ ya ẹla dodehe gboo ẹ-ẹpwụ nya ọjịra-jịra ọọwa yẹkẹẹ, “Anụ anyadam, anụ wo mẹ! Am lẹ, ala ịFarisii, m ri lẹ. Chajị, ọnyị nya ala ịFarisii, m ri lẹ. Ang odudu kị kpa wụrụm eje ọlẹ warị wẹ ata nyanụ ri yẹkẹẹ, m la ẹhị ọrịrịị-rịrị u-uhye nya owuleji bwula igu nya angị gbugbu.”

⁷Ahyaahị ká ịPọlụ ya ẹla ọọwa ịnyị kpá lẹ, ebwo ọchịchị a juwa ẹ-ẹpwarịrị nya ala ịFarisii bala ala ịSadusii ịlọjịra-jịra ọọwa lẹ, ị gu ene ebwo imiiye lẹlẹ.

⁸Chajị, ala ịSadusii lẹ, ị́ myị yẹkẹẹ, ịngịngịhyẹ nyị ri eji owuleji bwula igu nya angị gbugbu kpong-kpong ka lee alegu-ẹrụ o-juwa ji lee Olegu nya Ohe Oluhye o-juwa ji ẹ-ẹgẹgẹhẹ ka ịnyịnyị. Ma, ala ịFarisii tị lẹ, ị myị ju ẹchẹ nya ang ịlịta ịwẹ wuu.

⁹Ịnyị lẹ, ọmọnyọ nya arụ ọrụrụ ọtụka-ọtụka a kpụ eji ụ-ụwa lẹlẹ. Ọọwa lẹ, angịhyẹ ịlẹ kị ri angị jẹ́ ehile nya iMosisi lụmẹ-lụmẹ bwu ẹpwarịrị nya ala ịFarisii a wuleji godayị kọkọ lẹ, ị juwa ya dodehe la ọngịrị-ọngịrị yẹkẹẹ, “Áhị́ yẹ ịngịngịhyẹ ọtịpyọ ẹ-ẹga nya ọlẹng ọlẹ kpong-kpong ka. Ma, ó ri kọ ri Olegu nya Ohe Oluhye, lee olegu-ẹrụ, kọ ya ẹla ta ọlẹng ọlẹ ịnyị, ịnyịlẹhị tụbwọ aalẹ, ó ri kahị jẹ́ họ kaka lẹ aalẹ, Ohe Oluhye ayịdang a wẹẹ kahị wẹẹ ka tụ pyịpyị lẹlẹ!”

¹⁰Ịnyị, ụka ká o-wo lawụlẹ-ka ọọwa juwa chị ila nya ịlẹhị-ịlẹhị lẹ, olegbeju ọgbahị nya ịsọja ọọwa wuu a juwa juhi yẹkẹẹ, ọhẹka, iru nya angịnyị ịịwa nyị ka wọ ịPọlụ pẹtẹ pẹtẹ daarụ bwula agbama ojuju nyaa myị́. Ọọwa lẹ, ọ du ịsọja ilekpeleji nyamwụ ịhyẹ ẹrụ kele kaka kpa ịPọlụ rụ bwu ẹpwarịrị nya iru nya angịnyị ịịwa lagbụrụ kele ka ọbarike nyaa ịwa ịsọja lẹlẹ.

¹¹Ụka ká odu hi ẹnụ ọọwa lẹ, Ọngọlahị la a kele kaka godayị rịrị ẹ-ẹga nya ịPọlụ a-arụrụ lẹ, ọ byoo yẹkẹẹ, “ỊPọlụ, la ẹjẹ ọkpụ́kpụ mẹ. Chajị, jaabwọ kaahụ ayịdang ri ibeenu nyam i-iJerusalẹm wẹẹ, ịnyịnyị, a ka kele kaka ri ibeenu nyam ụ-ụwa e-epweji nya iRom pyii lẹlẹ.”

¹²Ịnyị, ụka ká ahị ọọnamwụ pyẹ lẹ, ala iJuu ịhyẹ a kele kaka me obyi nya igu, gu awụlẹ kpọng-kpọng la iro ọnwanwa yẹkẹẹ, ịwa nyị́ ka kpa ang oriri lee enyi ọnwanwa ọhẹ-lọhẹ ka ọnụ nyịwa kpong-kpong kaka, gbee pwụ ụka ọlẹ kịịwa nyị ka nwụ ịPọlụ kpá ene pyii lẹlẹ.

¹³Ala iJuu ịịwa ịlẹ kị me obyi nya igu ọọwa ju ịPọlụ la iro ọnwanwa lẹ, iru ojuju nyaa gụ angịnyị angị ohu-iye myị́.

¹⁴Ọọwa lẹ, angịịwa a kele ka ẹga nya alegbeju ịgbahị nya angịkiliya nya Ohe Oluhye wuu bala ịgabwọ nya ala iJuu lẹ, ị byaa yẹkẹẹ, “Ahị nwa iro nya ịlẹhị-ịlẹhị yẹkẹẹ, áhị́ ka kpa ang oriri ọhẹ-lọhẹ ka ọnụ nyahị kpong-kpong kaka, gbee pwụ ụka ọlẹ kahị ka nwụ ịPọlụ kpá ene pyii lẹ!

¹⁵Chajị nya ọọwa lẹ, anụ chuchuu, kaanụ bala alegbeju ileje nya ịkọtụ ọgbahị nyanụ ọlẹ a du ẹrụ kele kaka byi olegbeju ọgbahị nya ịsọja ọlaanyị kọ tụụbwọ hi ịPọlụ du wanụ chajị kanụ ka myịmyị-ị̀ dịrẹ ẹla nyamwụ yẹẹyẹẹ mẹ. Ụka kị ka kpa ịPọlụ warị lẹ, ahị ka kele kaka kụ ịnya gbe ịPọlụ kahị ka nwọọ ene kị ka kpọọ pwụ ẹ-ẹga nyanụ lẹlẹ.”

¹⁶Ma, ụka ọọwa, ọnyị ọlẹng nya ọnyịnịna ọnyang nya ịPọlụ wo ang chajị nya obyi omeme nyọka kụ ịnya gbe ịPọlụ ọọwa. Ịnyị lẹ, ọ ba ịPọlụ kele ka ọbarike nya ịsọja ọọwa kaka ya joo lẹlẹ.

¹⁷Ọọwa lẹ, ịPọlụ a be ẹkọ wụrụ olegbeju ọkpẹhị rịrị ịsọja ohu ịrụ ọhẹ lẹ, ọ byoo yẹkẹẹ, “Kpa ọnyị ọlẹng ọlẹ kele ka ẹga nya olegbeju ọgbahị ọgụgụ nyanụ wuu wẹẹ. Chajị, ọ la ẹlẹhẹ ka ye ya joo.”

¹⁸Ịnyị, olegbeju ọkpẹhị rịrị ịsọja ohu ịrụ ọọwa, a kpa ọnyị ọlẹng ọọwa kele ka ẹga nya olegbeju ọgbahị ọgụgụ nyaa ịwa ịsọja wuu lẹ, ọ byoo yẹkẹẹ, “ỊPọlụ ọlẹng olube nya agba ọlaanyị, a byim yẹkẹẹ, am nyị kpa onjwo ọlẹng ọlẹ warị wẹ ẹga nyang mẹ lẹ. Chajị, ịPọlụ ya, ọngọlẹ nyị la ẹlẹhẹ ka ya jeng.”

¹⁹Ịnyị, olegbeju ọgbahị nya ịsọja ọọwa a yụbwọ chị ọnyị ọlẹng ọọwa kpa kele kaka godayị rịrị ẹ-ẹgẹhẹ ụbwaa-ụbwaa lẹ, ọ tọọ wo yẹkẹẹ, “Ẹla ịyẹ, a tị́ tịtọ ká ka ya jem?”

²⁰Ọlẹng okolobya ọọwa wẹ byoo yẹkẹẹ, “Ala iJuu wuu me obyi gu awụlẹ kpọng-kpọng yẹkẹẹ, ịwa nyị juwa ka warị kaka bying kaahụ nyị ka kpa ịPọlụ warị wẹ ẹpwụ nya ọjịra-jịra nya ịkọtụ ọgbahị nyịwa ijuju, lala o-ri yẹkẹẹ, ị juwa tịtọ kị ka myịmyị dịrẹ ẹla nya ịPọlụ ọwẹ myịmyị yẹẹyẹẹ.

²¹Ma, ọbịlẹ bịlẹ nyam ri yẹkẹẹ, a myị jwaa kpong-kpong ka. Ang odudu kam ya ịnyị ri yẹkẹẹ, iru nya angịnyị lẹpwarịrị nyaa, gụ angịnyị angị ohu-iye juwa ka kụ ịnya ụ-ụgbẹyị gbe ịPọlụ kị ka nwọọ. Chajị, angịịwa nwa iro yẹkẹẹ, ịwa nyị́ ka kpa ang oriri ọhẹ-lọhẹ lee enyi ọnwanwa ka ọnụ nyịwa kpong-kpong kaka, gbee pwụ ụka ọlẹ kịịwa nyị ka nwụ ịPọlụ kpá ene. Lẹ, ang ọlẹ kị laa godayị gbe ụbwọọmwụ, a ri ọnụ ọmyịmyị o-bwu ẹga nyang lẹlẹ.”

²²Ịnyị lẹ, olegbeju ọgbahị nya ịsọja ọọwa, a byi ọlẹng okolobya ọwẹ yẹkẹẹ, ahụ nyị rụ mẹ lẹ, ọ byoo yẹkẹẹ, “A ya je ọngọngọhẹ yẹkẹẹ, ahụ nyaa kpa ẹla ọlẹ warị kaka ya jem lẹ, kpong-kpong kokoo!”

²³Ọọwa lẹ, olegbeju ọgbahị nya ịsọja ọọwa a be ẹkọ wụrụ alegbeju imiiye ịkpẹhị rịrị ịsọja ohu ịrụ ilekpeleji nyamwụ lẹ, ọ byaa yẹkẹẹ, “Anụ kele kaka chụ ịsọja ịlam-ịlam angị ohu iwo chiriri ba ịlọnụ bala ịsọja ị-kụ anyịrẹ angị ohu ịta kụrụ iwo bala ịsọja ị-kpa oje ọkpachị dẹwụ angịnyị angị ohu iwo chiriri ịnyịnyị mẹ. Ụka ká oje ihikichu nya odu á họ bwaaa lẹ, kanụ ka kpa ịPọlụ chị gbee pwụ ọpyị nya iSisarịya mẹ.

²⁴Anụ́-ụ kpa anyịrẹ ịhyẹ ịlẹ ká ịPọlụ ka kụ ịnyịnyị, kanụ kpọọ kele la okpunyi kịla ịFẹlikisi Adịrahụ nya ọpyị ọlụwa mẹ.”

²⁵Olegbeju ọgbahị nya ịsọja ọọwa da ileta u-uhye nya ẹla ọọwa daa ẹrụ kele. Ọ ya ẹ-ẹpwụ nya ileta ọọwa yẹkẹẹ:

²⁶“Ileta ọlẹ jam bwu ẹga nyam am iKilodiyọsị ịLayịsịyọsị warị wẹ ẹga nyang ahụ ịFẹlikisi olihi ọtụka, Adịrahụ nya ọpyị. Ye ọnụ ọdachị nyam mẹ.

²⁷Adịrahụ wo mẹ! Ọlẹng ọlẹ kị wụrụ ịPọlụ lẹ, ala iJuu kele kaka woo lẹ, ị juwa tịtọ kị nwọọ lẹlẹ. Ịnyị lẹ, m kpa ịsọja ịhyẹ ba ịlọm kele kaka chị ịPọlụ da bwu ẹpwụtụbwọ nyaa lẹlẹ. Chajị, m wo oja yẹkẹẹ, ịPọlụ ọlẹ ri ọnyị oleji nya ala iRom.

²⁸Ịnyị, ụka kam juwa tịtọ kam ka wo ọnụ-ẹla nya alịlẹ kị juwa chị bọọ lẹ, m kpa ịPọlụ kele ka ẹpwụ nya ọjịra-jịra nya ịkọtụ ọgbahị ọgụgụ nyaa wuu lẹlẹ.

²⁹Ụka kam pwụ ụwa lẹ, ang ọlẹ kam wo bwu ẹga nyaa ri ala ọ-chị ba ịPọlụ u-uhye nya ang chajị nya ehile nyaa ịwa ala iJuu. Ma, ị́ tị yé ịngịngịhyẹ ya ọlẹ kọ ka kpụ igu lee ọ-kpụ agba ojuju ha ịPọlụ kpong-kpong ka.

³⁰Ịnyị, ụka ọlẹ kam wo oja yẹkẹẹ, angịhyẹ lẹpwarịrị nyaa nyị me obyi nya igu ju ịPọlụ lẹ, ịnyị a du kam lẹẹ doo warị wẹ ẹga nyang ahyaahị-ahyaahị lẹlẹ. M jam ka byi alẹla nya ịPọlụ kịịwa ayịdang ka warị kaka tịrọnụ nya ala ịlẹ kị la ka chị ba ịPọlụ ị-ịlahị nyang ịnyịnyị lẹ.”

³¹Ịnyị, ịsọja ịịwa a kpa ịPọlụ hu ang ẹdịyẹ ịnyịlẹhị jaabwọ ká olegbeju ọgbahị nyaa byaa lẹ, ị kpa ịPọlụ jẹ lodu ọọwa gbee kị pwụ epweji nya Antipatirisi lẹlẹ.

³²Ịnyị, ụka ká ahị ọọnamwụ pyẹ lẹ, ịsọja ịlẹ kị kpa ẹta, a tịrẹkpẹ bwu epweji nya Antipatirisi lẹ, ị nya kele ka ọbarike nyaa ịwa ịsọja lẹlẹ. Ọọwa lẹ, ịsọja ihihi ịlẹ kị ri angị kụ anyịrẹ, a kpa ịPọlụ chị kele ka iSisarịya lẹlẹ.

³³Ụka kị jẹ pwụ iSisarịya lẹ, ịsọja ịịwa a kpa ileta kele kịla ịFẹlikisi Adịrahụ nya ọpyị lẹ, ị kpa ịPọlụ kaka godayị rịrị ị-ịlahị nyamwụ ịnyịnyị lẹlẹ.

³⁴Ụka ká ịFẹlikisi wa ileta ọọwa kpá lẹ, ọ tịtọ wo yẹkẹẹ, oye nya ịkịka nya ọpyị oyina kpangga, ịPọlụ nyaa tị́ bwu ene? Ụka kị ya joo yẹkẹẹ, ịPọlụ nyị bwu ọpyị nya iSilisiya lẹ,

³⁵ịFẹlikisi a yẹkẹẹ, “ỊPọlụ, ụka ká alẹla nyang anyị, á pwụ eji kpá lẹ, m ka wo ọnụ-ẹla nyang lẹlẹ.” Ọọwa lẹ, adịrahụ ịFẹlikisi a da angịnyị nyamwụ ehile yẹkẹẹ, nyị juwa gbe ịPọlụ ụ-ụwa ọdọdẹpwa nya adịrahụ iHerọdụ mẹ lẹlẹ.