Read idege ỤKỤRWỌ nya ALẸRỤ 25 Bible Online

ỤKỤRWỌ nya ALẸRỤ 25 - idege bible

ỤKỤRWỌ nya ALẸRỤ 25

¹Ịnyị, ụka ọlẹ ká adịrahụ ịFẹsịtọsị hụ ọ-ọpyị nya iSisarịya lala ụtụrụ ịta lẹ, ọ hu ang bwu ụwa kele ka iJerusalẹm lẹlẹ.

²Ọọwa lẹ, alegbeju ịgbahị nya angịkiliya nya Ohe Oluhye wuu bala angị ịtụka nya ala iJuu wuu anyị a kpa eje onyobyi ọ-tụ ịPọlụ pyịpyị kele ka ẹga nya ịFẹsịtọsị, juwa tọ́ọ tutu nya ịlẹhị-ịlẹhị lẹlẹ.

³I juwa bịlẹ ịFẹsịtọsị kọ ka haa ọnahị bwula ọ-ka kpa ịPọlụ báa kele ka iJerusalẹm. Ịwa ayịdang tị me obyi nyọka kele kaka kụ ịnya gbe ịPọlụ, chajị kị ka jẹ́-ẹ nwọọ ụ-ụgbẹyị.

⁴Ịnyị, iFesịtọsị a wẹ byaa yẹkẹẹ, ọlẹẹlẹẹ lẹ, nyị kpa ịPọlụ ụ-ụwa u-ube nya agba e-epweji nya iSisarịya lẹ. Ọwa ayịdang nyị tị juwa tịtọ kọọwa nyị ka kele ka epweji nya iSisarịya ọọwa lụka o-kpii.

⁵Ịnyị, iFesịtọsị a byaa yẹkẹẹ, “Lẹ, anụ chụ angịhyẹ bwu ẹpwarịrị nya alegbeju nyanụ, kị bám kele ka ụwa ịnyịnyị, chajị kọ ri ká ịngịngịhyẹ onyobyi á juwa ẹ-ẹga nya ọlẹng ọọwa lẹ, ká angịịwa ka gbe ẹla ọọwa jwoo ụ-ụwa tịtị mẹ.”

⁶Ịnyị, ụka ká adịrahụ ịFẹsịtọsị hụ e-epweji nya iJerusalẹm lala ụtụrụ ineku lee ụtụrụ iwo chiriri lẹ, ọ tịrẹkpẹ rụ kele ka ọpyị nya iSisarịya lẹlẹ. Ụka ká ahị ọọnamwụ pyẹ lẹ, ịFẹsịtọsị a du ẹrụ kele kaka kpa ịPọlụ ka ube oleje nyaa lẹlẹ.

⁷Ụka ká ịPọlụ pwụ ụwa lẹ, ala iJuu ịlẹ kị bwu iJerusalẹm a kele kaka godayị rịrị ẹ-ẹga nya ịPọlụ ịnyịnyị, juwa chị ala ịtụka-ịtụka ba ịPọlụ ụ-ụwa lẹlẹ. Ma, ị́ tị yé ịngịngịhyẹ ka ya nyọka mẹjẹ yẹkẹẹ, ala ịịwa nyị ri ịnyịlẹhị kpong-kpong ka.

⁸Ịnyị, ịPọlụ ayịdang a juwa tịrị ọnụ-ẹla nya ịlọmwụ yẹkẹẹ, “Am ịPọlụ ọlẹ lẹ, ḿ họ ịngịngịhyẹ ọtịpyọ ẹ-ẹga nya ehile nya ala iJuu kpong-kpong ka. Lee, ọ-họ ịngịngịhyẹ pyị, ẹ-ẹga nya ube ịgọgọ ọtụka nya Ohe Oluhye nya ala iJuu ka lee ọ-họ ịngịngịhyẹ onyobyi tụ iSisa adịrahụ ọgbahị ọgụgụ wuu nya ala iRom pyịpyị kpong-kpong ka ịnyịnyị!”

⁹Ma, ụka ká adịrahụ ịFẹsịtọsị juwa tịtọ kọ ka họ ang ọlẹ kọ ka kpụ ala iJuu ịpyọ lẹ, ọ byi ịPọlụ yẹkẹẹ, “A ka myị-ị bám rụ kele ka epweji nya iJerusalẹm kam ka la eje nya ala ịwẹ kị chị báng ụ-ụwa myị́?”

¹⁰Ma, ịPọlụ wẹ byoo yẹkẹẹ, “M tị́ godayị rịrị lẹẹ, ị-ịlahị nya ịkọtụ oleje ọtụka nya iSisa adịrahụ ọgbahị, ẹ-ẹga ọlẹ kọ chịla kị ka chị eje nya ẹla nyam lẹ. Aḿ họ ala iJuu ịwẹ ịngịngịhyẹ onyobyi kpong-kpong ka, jaabwọ kaahụ ayịdang jéjé yẹẹyẹẹ wẹ ene-ene lẹ.

¹¹Ó ri kaam ayịdang á ri ọngọ họ ẹla onyobyi ọhẹ lee ọ-họ ang ọtịpyọ ọlẹ kọ ka du ká eje nya igu ogbugbu ka wum lẹ aalẹ, ḿ juwa ka tịtọ nya o-ju ịlọm ju kam ka gba kpehe hi igu ogbugbu ọọwa kpong-kpong ka. Ma, jaabwọ ká ịngịngịhyẹ á ri ẹla nya ịlẹhị ẹ-ẹpwụ nya ala ịwẹ kị chị bám wẹ kpong-kpong ka lẹ, ọngọngọhẹ á tị tị juwa ka tụụbwọ him jwaa ụ-ụbwọ ododu kpong-kpong ka ịnyịnyị. Lẹ, m jam họ apile nya eje nyam kele ka ẹga nya iSisa adịrahụ ọgbahị ọgụgụ nya ala iRom wuu tị tị lẹ.”

¹²Ịnyị, ụka ká adịrahụ ịFẹsịtọsị kele kaka hu ẹkpẹ ta alukido ileje nya ịkọtụ ọọwa kpá wuu lẹ, ọ wẹ byi ịPọlụ yẹkẹẹ, “O hiigu! ịPọlụ, a tị họ apile nya eje nyang ka ẹga nya iSisa lẹlẹ, ẹ-ẹga nya iSisa ọọwa pyii, a ka ka ịnyịlẹhị lẹlẹ.”

¹³Ụka ká ẹnụtụrụ ịmanyị-ịmanyị chịpwụrụ kam lẹ, adịrahụ Agiripa bala iBeenisi a pwụ eji kele ka iSisarịya nya ọkaka da ịFẹsịtọsị adịrahụ ọtụka nya ọpyị ọwụraba lẹlẹ.

¹⁴Ụka ká Agiripa anyị hụ ta ịFẹsịtọsị la iru nya ụtụrụ lụmẹ-lụmẹ lẹ, ịFẹsịtọsị a juwa ja Adịrahụ Agiripa oja byoo yẹkẹẹ, “Ọlẹng ọhẹ jam ọlẹ ká adịrahụ ịFẹlikisi tụụbwọ hi juwa u-ube nya agba bwu ụka nyamwụ.

¹⁵Ụka ọlẹ kam juwa i-iJerusalẹm lẹ, alegbeju ikịla iya nya Ohe Oluhye bala ịgabwọ nya ala iJuu wuu warị kaka ya ẹla chajị nya ịPọlụ jem. Ị bịlẹ chajị kam ka ya eje nya igu wu ịPọlụ ọọwa haa.

¹⁶Ịnyị, m wẹ byaa yẹkẹẹ, ‘Ehile nyahị ahị ala iRom yẹkẹẹ, ahị́ ka jẹ́-ẹ ya eje wu ọngọngọhẹ ọlẹ kị wụrụ eje wẹ ẹga nyahị, lụka ọlẹ kahị wo ọnụ-ẹla nya ọngọọwa i-ijata nya angị chị ẹla bọ́ọ kpá wuu ene ka lẹ ka.’

¹⁷Ụka ọlẹ kịịwa wuu warị kaka jịra ẹ-ẹgẹlẹ lẹ, am ayịdang á bịrị ụka kpong-kpong ka. Ma, ụka ká ahị ọọnamwụ pyẹ, kam kele kaka hụhụ u-ube nya eje lẹ, m du ẹrụ kele kaka gba ọlẹng ọọwa kpehe bwu ube nya agba warị wẹ ụda lẹlẹ.

¹⁸Ma, ụka ọlẹ ká alẹla nyamwụ wuleji kị juwa chị ala ba ịPọlụ lẹ, í yé ịngịngịhyẹ onyobyi ya dodehe ba ịPọlụ jaabwọ kam dahịhile kpong-kpong ka.

¹⁹Ma, ụma nya ala ịlẹ kị ya dodehe kẹnẹ-kẹnẹ ri, ang chajị nya ịwẹẹ ọhẹ ọlẹ kịịwa bala ịPọlụ juwa da u-uhye nya ẹla chajị nya ịgba ọgbagba ha Ohe Oluhye nyaa bala u-uhye nya ẹla chajị nya ọlẹng ọhẹ ọlẹ kị wụrụ iJisọsị, kị yẹkẹẹ, nyị gbu lẹ, ká ịPọlụ nyị tị yẹkẹẹ, iJisọsị ọọwa nyị juwa hịhị myịmyị wẹẹ.

²⁰Ịnyị, ụka ọlẹ kaam ayịdang á jẹ́ gu ẹla ọọwa gaa myị́ kpong-kpong kaka lẹ, m tọ ịPọlụ ayịdang wo, ó ri kọ ka myị-ị kele ka epweji nya iJerusalẹm, chajị kị ka lọọ eje u-uhye nya ala ịịwa, ụ-ụwa myị́ lẹlẹ.

²¹Ma, ụka ká ịPọlụ ayịdang pwa lẹ, ọ yẹkẹẹ, ọwa nyị họ apile nya eje nya ọọwa kele ka ata nya iSisa Agọsịtọsị adịrahụ ọgbahị ọgụgụ nya ala iRom wuu lẹlẹ, nyị tụụbwọ hi ọwa juwa i-ijalo mẹ. Ịnyị, m da angịnyị nyam ehile yẹkẹẹ, ị juwa kpẹhị rịrị ịPọlụ gbe pwụ ụka ọlẹ kam ka yọọ du kịla adịrahụ iSisa mẹ, lẹlẹ.”

²²Ịnyị, Agiripa a byi ịFẹsịtọsị yẹkẹẹ, “Ọ hám kam ka wo ẹla nyamwụ la ịlọm ịnyịnyị!” ỊFẹsịtọsị wẹ byi Agiripa yẹkẹẹ, “O hiigu. Ọ́ lịnyị lẹ aalẹ, ijuju lẹ, m ka du ẹrụ kaka gba ịPọlụ kpehe warị ká ka wo ẹla nyamwụ lẹlẹ.”

²³Ịnyị, ụka ká ahị ọọnamwụ pyẹ lẹ, Agiripa bala iBeenisi a juwa jẹdịyẹ nya aleju-aleju kele ka ẹpwụ nya ọjịra-jịra ẹ-ẹga ọlẹ ká alegbeju ịtụka-ịtụka ịgbahị nya ịsọja ịlụwa wuu kele kaka jịra bala angị ịtụka-ịtụka nya epweji ọọwa wuu lẹlẹ. Ọọwa lẹ, ịFẹsịtọsị a da angịnyị nyamwụ ehile yẹkẹẹ, nyị kele kaka gba ịPọlụ kpehe warị wẹ ẹga nyịwa mẹ lẹlẹ.

²⁴Ụka kị kpa ịPọlụ pwụ eji, ịFẹsịtọsị ya ẹla dodehe yẹkẹẹ, “Adịrahụ Agiripa bala anụ angịlẹ wuu kanụ jam i-ijata, anụ yẹ mẹ! Ọlẹng ọlẹ a ri ọngọlẹ ká alụma nya ala iJuu wuu kpa eje nya ẹla nyamwụ wẹ ẹga nyam lẹ. I juwa bịlẹm u-uhye nyamwụ i-iJerusalẹm bala ẹ-ẹgẹlẹ ịnyịnyị, juwa ya ẹla lomyi o-gboo yẹkẹẹ, nyị́ chịla ká ọlẹng ọlẹ nyị ka jam la ọhịhị kpong-kpong kaka.

²⁵Ma, aḿ yẹ ịngịngịhyẹ ọlẹ kọ tị họ kpụ eje nya igu ogbugbu ka woo kpong-kpong ka. Ịnyị, jaabwọ kọọwa ayịdang tị họ apile nya eje nyamwụ kele ka ata nya adịrahụ iSisa ene lẹlẹ, ọọwa, m chị eje nyọka yọọ du kele ka ụwa ịnyịlẹhị lẹlẹ.

²⁶Ma, aḿ tị yé ẹla ọlẹ kam ka da ju ẹ-ẹpwụ nya ileta du kịla adịrahụ iSisa chajị nyamwụ kpangga kpong-kpong lẹka. Chajị nya ọọwa, a du kam kpọọ warị lẹẹ wẹ ijata nyanụ lẹlẹ. Ọgụgụ wuu ri ị-ịlahị nyang ahụ adịrahụ Agiripa. Chajị, ká ụka ká tọọ ịtọ ẹla kpá wuu lẹ, kam ka jẹ́-ẹ yé ẹla ọlẹ kam ka ya ju ẹ-ẹpwụ nya ileta ọọwa mẹ.

²⁷Chajị, ọ ka ri ang nya uchi, kọ ri kam ka ya, olube nya agba du ẹrụ ịnyị, lụka kam tị yé ẹlẹlẹhẹ ọlẹ kị chị bọ́ọ, kọ kpụ ọmwụ nya ẹla ọọwa ya, kpong-kpong ka lẹ ka.”