Read idege ỤKỤRWỌ nya ALẸRỤ 27 Bible Online

ỤKỤRWỌ nya ALẸRỤ 27 - idege bible

ỤKỤRWỌ nya ALẸRỤ 27

¹Ịnyị, ụka kị chị eje yẹkẹẹ, ahị nyị ju ụgbọ nya enyi hu ang rụ kele ka ọpyị nya Itili mẹ lẹ, ị tụụbwọ hi ịPọlụ bala alagba ịkịla ịhyẹ ju olegbeju ọkpẹhị rịrị ịsọja ohu ịrụ ọlẹ kọ ji ebwo nya alẹwụ ọlẹ kị wụrụ Ụbwẹwụ nya Agọsịtọsị adịrahụ ọgbahị lẹlẹ. Ẹnyị nya olegbeju nya ịsọja ọọwa ri iJulọsị.

²Ịnyị lẹ, ahị ju ụgbọ nya enyi ọhẹ ọlẹ kọ bwu epweji nya Adịramitiyọm, kọ juwa tịtọ kọ ka jẹ kele ka epweji ịlịpyị nya ala Echiya ịlẹ kị kụ ọnụụka nya ihu ọtụka, ẹ-ẹga ọlẹ ká ụgbọ nya enyi kaa wu godayị rịrị ịnyịnyịịnyị lẹlẹ. Ịnyị lẹ, ahị hu ang ẹdịyẹ, juwa rụ kele lẹlẹ. Arisitakọsị ọla ịMẹsịdoniya kọ bwu ọpyị nya ala ịTẹsalonayịka ju ogu ẹdịyẹ tahị ịnyịnyị.

³Ụka ká ahị ọọnamwụ pyẹ kahị pwụ epweji nya ala ịSayịdọn, iJulọsị olegbeju ọgbahị nya ịsọja ọọwa la olegu ọnahị ẹ-ẹga nya ịPọlụ lụmẹ. Ọ ya ẹga da ha ịPọlụ ká ịPọlụ ka kele kaka yẹ aligu nyamwụ, chajị kị ka jẹ́-ẹ kpẹhị rịrị ịPọlụ ụ-ụwa.

⁴Ọọwa lẹ, ahị yegiri bwu ẹga ọọwa, juwa ju ụgbọ nya enyi nyahị bịlẹ-bịlẹ bwu ịkịka ọlẹ ká igbachịwụ ọtụka ọhẹ ọlẹ kọ juwa da ka pwụ myị́ ka, nya ọpyị ọkịlẹlẹ nya ala ịSayịpịrọsị ọlẹ ká ihu ọtụka dagaga ju wuu kilolo lẹlẹ.

⁵Ịnyị, ụka kahị ju ụgbọ nya enyi kpoye nya ihu ọtụka ọọwa kele koye ọlaanyị lẹ, ahị jẹ pwụ ịkịka nya ọpyị nya ala iSilisiya bala ịPamfiliya lẹlẹ. Ịnyị lẹ, ahị jẹ gbee kahị pwụ epweji nya iMira ụ-ụwa ọ-ọpyị nya ịLayịsiya lẹlẹ.

⁶E-epweji nya iMira ọọwa, iJulọsị olegbeju ọgbahị nya ịsọja ohu ịrụ ọọwa a yẹ ụgbọ nya enyi ọlẹ kọ juwa jẹ bwu epweji nya Alẹkịsandịrịya kele ka ọpyị nya ala Itili lẹ, ọ goohi ju ka ẹpwụ nya ụgbọ nya enyi ọọwa lẹlẹ.

⁷Ụka ọọwa, ụgbọ nya enyi nyahị juwa jẹ dụmwọ-dụmwọ la iru nya ahị ọpyẹpyẹ lụmẹ-lụmẹ ene kọọ kpahị jẹ pwụ ọnụ nya epweji nya iSinidọsị. Jaabwọ ká igbachịwụ ọtụka ọọwa, á myị hahị, ahị jẹ kele kịlahị myị́ kaka lẹ, ahị ju ụgbọ nya enyi nyahị ọọwa bịlẹ-bịlẹ kaka bwu ịkịka ọlẹ ká igbachịwụ ọtụka ọọwa á da pwụ myị́ ka, nya uku nya ọpyị ọkịlẹlẹ nya ala iKiriti ọlẹ ká enyi nya ihu ọtụka ọọwa dagaga ju wuu lẹlẹ. Ẹnyị nya uku nya ọpyị ọọwa a ri ịSalimone lẹ.

⁸Ịnyị lẹ, ụgbọ nya enyi nyahị ọọwa a juwa họ akama dụmwọ-dụmwọ, juwa tụ ọnụụka-ọnụụka nya ihu ọtụka ọọwa da gbee kahị pwụ ẹga ọlẹ kị wụrụ “Ẹga o-wu ụgbọ nya enyi godayị rịrị ọnyịịla” lẹlẹ. Ẹga ọọwa ju epweji nya ịLasịya chwẹẹ.

⁹Jaabwọ kahị bịrị ụka tata lụmẹ kaka kpoye ẹ-ẹgẹwẹ lẹ, ụka nya igbachịwụ onyobyi ọ-da tụ ụgbọ nya enyi pyịpyị ọlẹ kọ la uhi-uhi lụmẹ a pwụ eji lẹlẹ. Chajị, ụka nya ọ-hụ limyi nya ala iJuu ọlẹ kịị la Ẹnụ Ọbịlẹ Ọhịnyọhi chịpwụrụ kam kpá wuu lẹ. Ịnyị, ịPọlụ a kpa irya ọhẹ kpehe ha alegbeju nya ụgbọ nya enyi ịlụwa yẹkẹẹ,

¹⁰“Anụ ayịbahị anyị, anụ yẹ mẹ! Ang ọlẹ kam jẹ́ ẹ-ẹpwụ nya ẹdịyẹ nya ụgbọ nya enyi nyahị ọlẹ ri yẹkẹẹ, ahị ka juwa ẹ-ẹpwụ nya iwe-ahụrụ oluhi-uhi lẹ! Ọ́ ba o-ri yẹkẹẹ, olo nyahị bala ụgbọ nya enyi ọlẹ ayịdang ọ-ka ta ayịreji kem ka. Ma, ọhịhị nyahị ahị ayịdang ka juwa ẹ-ẹga oluhi-uhi ịnyịnyị.”

¹¹Ma, olegbeju ọgbahị ọkpẹhị rịrị ịsọja ohu ịrụ lẹ, ẹla oyaya nya olegbeju nya ụgbọ nya enyi bala ọngọ la ụgbọ nya enyi ọọwa kem, ọ wo lẹ. Ọ yẹhị da ẹlẹwẹ ká ịPọlụ ya bwee.

¹²Ịnyị, chajị nyọlẹ ká ẹga o-wu ụgbọ nya enyi godayị rịrị ọlụwa á hiigu pwoku ọ-ka godayị mwụ ịnyọ ụ-ụwa lụka nya ogo ọtụka-ọtụka ọlẹ kị wụrụ “iwinta” kaka lẹ, aluche nya angịnyị a yẹkẹẹ, ịwa nyị rụ kpoye nya ụwa mẹ lẹlẹ. Chajị, ó ri kịị nyị chịkpẹẹ ha ịwa, kịị nyị́ pwụ iFonikisi lẹ, kịịwa nyị hireji ẹ-ẹga ọlẹ ká ụgbọ nya enyi nyị kaa kụ eji ọ-ọpyị nya iKiriti ọlẹ kọ ji ka ụpụpịla ẹ-ẹpwarịrị nya oye nya ẹtẹ bala oye nya edii, kịịwa nyị hụ ụ-ụwa lụka nya alogo ọtụka ọlẹ kị wụrụ iwinta mẹ.

¹³Ịnyị, ụka ọlẹ ká igbachịwụ ọnyịịla ọhẹ juwa da bilelele bwu oye nya edii lẹ, alegbeju ị-kpa ụgbọ nya enyi nyahị ọọwa rụnyẹ, a me irya yẹkẹẹ, nyị ka chịkpẹẹ ha ịwa myị́ jaabwọ kịịwa nyị me obyi nya ẹdịyẹ ene-ene lẹlẹ. Ịnyị, ị kele kaka gba ang nya oje-oje ọlẹ kọ kaa wu ụgbọ nya enyi godayị rịrị chịng, kpehe bwu ẹpwụ nya enyi lẹ, ụgbọ nya enyi nyahị a yegiri, juwa jẹ ju ọnụụka chwẹẹ nya ịlẹhị-ịlẹhị tụ ọpyị-ọpyị nya ala iKiriti da ịnyịnyịịnyị lẹlẹ.

¹⁴Ma, ahyaahị lẹ, igbachịwụ ọnyọọngịrị ọtụka ọhẹ ọlẹ kị wụrụ “Igbachịwụ ọlapewa nya ọmwẹnụ-ụtụrụ bala oye nya ẹtẹ,” a juwa da jahị dahị nya ịlẹhị-ịlẹhị bwu ọpyị ọlẹ kọ dagaga juhi, warị wẹ ẹpwụ nya Ihu ọtụka ọọwa lẹlẹ.

¹⁵Ịnyị, ụka kọ chịkpẹẹ ha ụgbọ nya enyi nyahị ọ-ka juwa jahị da igbachịwụ ọnyọọngịrị ọtụka ọọwa myị́ kaka lẹ, ahị tụụbwọ hi ụgbọ nya enyi nyahị ọọwa ha igbachịwụ lẹ, igbachịwụ a juwa kpọọ rụ u-uhye nya ihu ọtụka ọọwa lẹlẹ.

¹⁶Ịnyị, ụka ọlẹ kahị jẹ kele kaka bwu ọpyị ọkịlẹlẹ ọlẹ ká enyi dagaga ju wuu, kị wụrụ ịKawụda ẹ-ẹga ọlẹ ká igbachịwụ ọtụka ọnyọọngịrị ọọwa á pwụ myị́ kaka lẹ, ahị maga nya ịlẹhị-ịlẹhị, ene kọ chịkpẹẹ hahị lẹ, ahị nwụ ụmwụ nya enyi ochiche ọhẹ ọlẹ ká ụgbọ nya enyi nyahị kpa ụ-ụwa rịrị yẹẹyẹẹ myị́ lẹlẹ.

¹⁷Ịnyị, angị ju ụgbọ nya enyi nyahị ọọwa a gbile ochiri nya ụmwụ nya enyi ochiche ọọwa gbee kị kpọọ kaka bwọ ụgbọ nya enyi ọọwa, woo kpa yẹẹyẹẹ lẹlẹ. Ụka ọọwa, alegbeju ị-kpa ụgbọ nya enyi nyahị ọọwa rụnyẹ, juwa juhi yẹkẹẹ, ọhẹka, igbachịwụ ọtụka ọọwa nyị ka kpa ụgbọ nya enyi nyahị kele kaka wụ hịla u-ugburuja ọlọnụ nya ịpyị nya ala iLibya lẹ. Ịnyị, ị kele kaka pwọ apwụ ọlẹ kọ du ká igbachịwụ jẹ́ kaa kpa ụgbọ nya enyi rụnyẹ myị́ kpuru, chajị ká igbachịwụ ọtụka ọọwa ka jẹ́-ẹ juwa kpa ụgbọ nya enyi nyahị ọọwa rụ ba ịlọmwụ u-uhye nya ihu ọtụka ọọwa lẹlẹ.

¹⁸Ịnyị, jaabwọ ká igbachịwụ ọnyọọngịrị ọọwa juwa kpa ụgbọ nya enyi nyahị da ololo lụmẹ-lụmẹ lẹ, alụkụrwọ nya ụgbọ nya enyi nyahị ọọwa, a juwa chụ olo ọlẹpwụ nya ụgbọ nya enyi ọọwa hi chị ka ẹpwụ nya ihu ọtụka lẹlẹ.

¹⁹Ịnyị, la ẹnụtụrụ ọhata nya ẹdịyẹ nyahị lẹ, alụkụrwọ nya ụgbọ nya enyi ọọwa ayịdang a kpa ụbwọ nya ịlaa go ang-abwọ nya ụgbọ nya enyi nyahị ju ka ẹpwụ nya ihu ịnyịnyị lẹlẹ.

²⁰Ụka ọọwa lẹ, ẹnụ oluhye-ọgba ọwẹ lee ịdịchụ á hi ehe kpụ, ahị jẹ́ yaa ẹ-ẹhị kaka la iru nya ẹnụtụrụ lụmẹ-lụmẹ lẹ. Igbachịwụ ọnyọọngịrị ọtụka ọlẹpwụ nya ihu ọtụka ọọwa tị juwa yẹhị ụhị lụmẹ ịnyịnyị. Ọọwa lẹ, ahị gwahị daarụ hi ọ-la ẹhị ọrịrịị-rịrị gbe, ọhịhị nyahị ọ-ka chịda myị́ gbanggbang lẹlẹ.

²¹Ịnyị, jaabwọ ká ọngọngọhẹ lẹpwarịrị nyahị, á ri ang oriri kaka lụka ọtata lẹ, ịPọlụ a wuleji kaka godayị ị-ịlahị nyaa ịwa wuu lẹ, ọ yẹkẹẹ, “Anụ aligu nyam alẹng anyị, anụ wo mẹ! Ó ri kanụ myị ke ụrụ la ẹla oyaya nyam ọlẹ kam ya ọ-ọpyị nya ala iKiriti lẹ, ịnọ, áhị́ ka yegiri bwu ụwa lụka ọọwa kpong-kpong kaka. Ịnọ, ahị́ tị ka ju ka ẹpwụ nya ang ọjụjụ ọlẹ kaka lee ang nyahị ịlẹ wuu ọ-ka byibyi kaka ịnyịnyị.

²²Ma, lẹẹlẹẹ lẹ, ọbịlẹ-bịlẹ nyam ri yẹkẹẹ, ọng myị́ ọng lẹpwarịrị nyanụ a cheri kọ la ugbodu ojuju mẹ. Chajị, ọhịhị nya ọngọngọhẹ lẹpwarịrị nyanụ á juwa ka byi ka. Ma, ọkẹnẹ-kẹnẹ ri yẹkẹẹ, ụgbọ nya enyi nyahị ọlẹ ka ta ayịreji.

²³Chajị, olegu-ẹrụ ọhẹ nya Ohe Oluhye ọlẹ kam ri ịnyamwụ bala ọ-kaa gbịgba ha, warị kaka godayị rịrịm lodu ọ-ọnịyẹ.

²⁴Ọọwa lẹ, olegu-ẹrụ ọọwa a byim yẹkẹẹ, ‘ỊPọlụ, wo mẹ! A juhi kpong-kpong ka. Chajị, a juwa ka pwụ ọpyị nya ala iRom kaka godayị rịrị ị-ịlahị nya iSisa adịrahụ ọgbahị ọlụwa pyii lẹ. Tị yẹ mẹ! Ohe Oluhye myịmyị hu ọhịhị nya alogu ẹdịyẹ nyang ịwẹ wuu jung ụ-ụbwọ lẹ!’ ”

²⁵Ịnyị, ịPọlụ a myịmyị byaa yẹkẹẹ, “Chajị nya ọọwa lẹ, anụ aligu nyam alẹng, anụ la ugbodu ojuju mẹ. Chajị, m la ọmyịmyị u-uhye nya Ohe Oluhye yẹkẹẹ, jaabwọ kọ ya wẹ kpangga lẹ, ịnyịnyị, ang myị́ ang ịịwa wuu a ka họ jịra lẹlẹ.

²⁶Ma, ọkẹnẹ-kẹnẹ ri yẹkẹẹ, igbachịwụ ọtụka ọwẹ á ka dayi la ọ-kpahị kele kaka chị ụ-ụwa ọ-ọpyị ọkịlẹlẹ ọhẹ ọlẹ ká enyi dagaga ju wuu pyii kaka.”

²⁷Ịnyị, ụka ká odu nya ahị ọpyẹpyẹ ọkụrụ ohene u-uhye nya iwo pwụ eji lẹ, igbachịwụ ọnyọọngịrị ọtụka ọọwa a juwa kpahị jẹ kele ịnyịnyịịnyị ẹ-ẹpwụ nya Ihu ọtụka nya iMeditareniya ọlẹ ká ẹnyị ọkịla nyamwụ ri Ediriya, ọlẹ kahị juwa jẹdịyẹ ẹ-ẹpwụ nyamwụ lẹlẹ. Ịnyị, lụka nya epwodu jijiji lẹ, angị ju ụgbọ nya enyi nyahị ọọwa a me irya yẹkẹẹ, nyị la ịwa lala ụgbọ nya enyi nyahị nyaa juwa jẹ ju ọnụụka nya ịpyị ọhẹ chwẹẹ lẹlẹ.

²⁸Ọọwa lẹ, ụka kị hu ang nya oje-oje ọlẹ kị ya iri bwọ kị kaa kpa me enyi ẹpwụ, da ju ka ẹpwụ nya ihu ọọwa lẹ, ị jẹ́ kọ la apatẹ ohu ịrwọnyẹ ẹ-ẹga ọọwa lẹlẹ. Ụka kahị jẹ chẹẹ, ị myịmyị me enyi ẹpwụ, ọọwa lẹ, ọ la apatẹ ohu ine kụrụ iwo kem ẹ-ẹga ọọwa lẹlẹ.

²⁹Ịnyị, angị ju ụgbọ nya enyi nyahị ọọwa a juwa juhi yẹkẹẹ, ọhẹka, ụgbọ nya enyi nyahị nyị ka kaka mịla ajwọ ịtụka-ịtụka ịhyẹ lẹlẹ. Ọọwa lẹ, ị go ang ililo ịlẹ kị kaa kpa wu ụgbọ nya enyi godayị rịrị chịng chị ka ẹpwụ nya enyi kọ ka godayị chịng ụ-ụwa lẹlẹ. Ịnyị, ị juwa raabwọ bịlẹ Ohe Oluhye kọ ka gbehi la okpunyi gbee da ka ahị ọpyẹpyẹ lẹlẹ.

³⁰Ịnyị, ụka ọlẹ ká alegbeju ị-kpa ụgbọ nya enyi nyahị ọọwa rụnyẹ juwa tịtọ kị ka rụ bwu ẹpwụ nya ụgbọ nya enyi ọọwa lẹ, ị kele kaka hu ụmwụ nya enyi ochiche ju ka ẹpwụ nya ihu, juwa họ lala o-ri yẹkẹẹ, nyị juwa ka kele kaka hu ang o-wu ụgbọ nya enyi godayị rịrị chịng bwu ịlahị nyamwụ lẹlẹ.

³¹Ịnyị, ịPọlụ a byi olegbeju ọkpẹhị rịrị ịsọja ohu ịrụ bala ịsọja ihihi yẹkẹẹ, “Ó ri ká alegbeju ị-kpa ụgbọ nya enyi ọlẹ rụnyẹ á hi jam ẹ-ẹpwụ nya ụgbọ nya enyi tahị ka aalẹ, ọhịhị nyanụ á ka chịda myị́ kpong-kpong kaka.”

³²Ọọwa lẹ, ịsọja ịịwa a kele kaka hya ori ọlẹ kọ wu ụmwụ nya enyi ochiche ọọwa kpa lẹ, enyi a juwa mwụ ụmwụ nya enyi ọọwa kpa rụ lẹlẹ.

³³Ịnyị, ụka ká ahị juwa pyẹ lẹ, ịPọlụ a bịlẹ alẹpwụ nya ụgbọ nya enyi ọọwa wuu yẹkẹẹ, anụ nyị ri ang oriri chẹẹ mẹ lẹlẹ. Chajị, ọ byaa yẹkẹẹ, “Alẹ a ju ụtụrụ iwo kụrụ ine lẹẹ, kanụ jam godayị ẹ-ẹpwụ nya ọ-hụ limyi la o-ri ịngịngịhyẹ kpong-kpong kaka lẹlẹ.

³⁴Chajị nya ọọwa lẹ, ọbịlẹ-bịlẹ nyam ri yẹkẹẹ, anụ chuchuu, kanụ ri ang oriri, chajị ká ang oriri ọọwa ka hu ịnyịrọ ogogo hanụ mẹ. Chajị, uke nya inyi nya ọngọngọhẹ lẹpwụ nyanụ á juwa ka byi kpong-kpong ka.”

³⁵Ịnyị, ụka ká ịPọlụ ya ẹlẹwẹ kpá lẹ, ọ hu ịkaa lẹ, ọ ji Ohe Oluhye obe u-uhye nya ịkaa ọọwa i-ijata nya alẹpwụ nya ụgbọ nya enyi ọọwa wuu lẹ, ọ gu ịkaa ọọwa ene, juwa ri lẹlẹ.

³⁶Ịnyị, ịwa wuu a la ẹjẹ ọkpụ́kpụ lẹ, ị ri ang oriri ịnyịnyị kpịlọ la ịlaa lẹlẹ.

³⁷Iru ojuju nyahị ahị alẹpwụ nya ụgbọ nya enyi ọọwa wuu la angịnyị angị ohu iwo da angịnyị angị ohu ịta kụrụ iwo, da angịnyị angị ịrwọnyẹ.

³⁸Ịnyị, ụka ká ọng myị́ ọng lẹpwarịrị nyahị ri ang oriri wu ẹpwụ kpá lẹ, angị ju ụgbọ nya enyi nyahị ọọwa a juwa chụ ilo ọlala nya ụgbọ nya enyi nyahị hi bwula o-juwa go ụma nya ịrayịsị nya alubekee ịlẹ kị wụrụ “iwiiti” chị ka ẹpwụ nya ihu ọtụka ọọwa lẹlẹ.

³⁹Ụka ọlẹ ká ahị pyẹ kpá lẹ, angị ju ụgbọ nya enyi nyahị ọọwa, á jẹ́ yẹ ịpyị ọlọnụụka nya ihu ọtụka ọọwa datị kpong-kpong ka. Ma, ị tị jẹ́ chẹhị kaka yẹ ẹga ọlẹ ká Ihu ọtụka ọọwa gu uku nya ịlẹhị-ịlẹhị kele ka ẹga ọlẹ ká ọnụụka nyamwụ la pẹẹpẹẹ. Ịnyị lẹ, ị nwụlanọ kọ ri kọ chịkpẹẹ haa, kị ka kpa ụgbọ nya enyi nyahị ọọwa kele kaka wu godayị rịrị ọ-ọnụụka ọọwa lẹlẹ.

⁴⁰Ịnyị lẹ, angị ju ụgbọ nya enyi nyahị ọọwa a kele kaka hya ichiri ịlẹ kị ya bwọ ang nya ije-ije ịlẹ kị kaa kpa wu ụgbọ nya enyi godayị rịrị chịng lẹ, ị tụụbwọ hyaa ju ka ẹpwụ nya ihu ọtụka ọọwa lẹlẹ. Ọọwa lẹ, ị myịmyị kele kaka yi iri ịlẹ kị ya bwọ ang ọ-kpa ju ụgbọ nya enyi ọọwa lẹ, ị kele kaka hu apwụ ọlẹ kọ ji uhye nya ụgbọ nya enyi hwaa kele ka uhye ị-ịlahị nyamwụ, chajị ká igbachịwụ ọtụka ọọwa ka jẹ́-ẹ juwa kpa ụgbọ nya enyi ọọwa rụnyẹ kele kịlahị-ịlahị gbee kị ka pwụ ọnụụka nya ihu ọtụka ọọwa ẹ-ẹga ọlẹ kị juwa jẹ ka myị́ lẹlẹ.

⁴¹Ma, ụgbọ nya enyi nyahị ọọwa kele kaka wụ hịla ụ-ụwa u-ugburuja ọlẹ ká ọhụụ nya enyi nya ihu ọtụka ọọwa tụ tuu kaka guru ẹ-ẹga ọọwa. Ọọwa lẹ, ịlahị nya ụgbọ nya enyi nyahị a kele kaka ju ka ẹpwụ nya ugburuja ọọwa pịrịm lẹ, ọ jẹ́ tụ kịnyaa hi ụwa myị́ kpong-kpong kaka lẹlẹ. Ụka ọọwa, igbachịwụ ọnyọọngịrị ọtụka ọọwa a juwa hụla ẹkpẹ nya ụgbọ nya enyi nyahị ọọwa hwẹẹhwẹẹ hi awụlẹ ịnyịnyịịnyị lẹlẹ.

⁴²Ụka ọọwa lẹ, obyi omeme nya ịsọja ịịwa wuu ri yẹkẹẹ, ị tịtọ kị ka nwụ alagba ịlẹ kị kpa ụ-ụwa wuu. Chajị ká ọngọngọhẹ nyaa á ka jẹ́-ẹ dawa rụ, kpụ, ọ-ka be hyaa myị́ kaka.

⁴³Ma, jaabwọ ká olegbeju ọgbahị nya ịsọja ịịwa ayịdang tị juwa tịtọ kọ ka chị ọhịhị nya ịPọlụ da lẹ, ọ byi ịsọja ịịwa yẹkẹẹ, anụ nyị nwụ ọngọngọhẹ nya alagba ịịwa kpong-kpong koo. Ịnyị lẹ, olegbeju nya ịsọja ọọwa a byaa yẹkẹẹ, anụ angịlẹ wuu kaanụ nyị ka jẹ́-ẹ dawa myị́ lẹ, anụ nyị gba ju ka ẹpwụ nya ihu ọtụka kaanụ nyị dawa kele ka ọnụụka mẹ.

⁴⁴Kaanụ angịkịla ịlẹ kaanụ nyị́ ka jẹ́-ẹ dawa ka, nyị yụbwọ nyanụ chị eku nya eloko bala ene nya ụgbọ nya enyi ịlẹ ká igbachịwụ nyị hụla hwẹẹhwẹẹ wẹ, kaanụ nyị jẹ gbee kaanụ nyị ka pwụ ọnụụka ọọwa myị́ ịnyịnyị mẹ. Ịnyị, bwula ụgbẹyị ọlịịwẹ lẹ, ọng myị́ ọng lẹpwarịrị nyahị ahị alẹpwụ nya ụgbọ nya enyi ọọwa wuu a be la ọhịhị pwụ ọnụụka ọọwa lẹlẹ.