Read idege ỤKỤRWỌ nya ALẸRỤ 28 Bible Online

ỤKỤRWỌ nya ALẸRỤ 28 - idege bible

ỤKỤRWỌ nya ALẸRỤ 28

¹Ịnyị, ụka ọlẹ kaahị wuu be pwụ ọpyị ọkịlọlọ ọlẹ ká enyi dagaga ju wuu lẹ, ị ya jehi yẹkẹẹ, nyị wụrụ ẹnyị nya ọpyị ọọwa ịMọlụta lẹlẹ.

²Alọpyị ọọwa la olegu nya ọnahị ẹ-ẹga nyahị lụmẹ kaka kpoye. Chajị, ị dahị ọwụraba hiigu-hiigu. Ọọwa lẹ, ị kele kaka tụ ila ju hahị wo lẹlẹ. Chajị, ụka ọọwa lẹ, ohe juwa dọmwụ nya enyi ododo. Ohu tị juwa họ lụmẹ ịnyịnyị.

³Ịnyị, ịPọlụ a kele kaka mwụ ẹbwọ nya ịwụ kpa kaka ju ila ọọwa lẹlẹ. Ụka ká ila juwa chị ịwụ ịịwa lẹ, ọgbịjị ọhẹ a gba kpehe bwu ẹpwụ nyaa kaka chị ịPọlụ, do pịlọọ ụ-ụbwọ nyamwụ nụwa dooo lẹlẹ.

⁴Ụka ká alepweji ọọwa chẹhị kaka yẹ ọgbịjị ọọwa kọ pịlẹ ịPọlụ ụ-ụbwọ dooo ịnyị lẹ, ị juwa byi awụlẹ yẹkẹẹ, “Ọlẹng ọwẹ ri ọngọ nwụ ọngịnyị pyii, ịnyị a du kọ be bwu ẹpwụ nya igbachịwụ ọtụka ọnyọọngịrị ọlẹpwụ nya ihu lẹ, ká ọgbịjị chọọ wẹ, chajị kọ tịtị ka gbu kwiwa ịnyịnyị pyii lẹlẹ.”

⁵Ma, ụka ọọwa, ịPọlụ chị ọgbịjị ọọwa abwọ pilo ju ka ẹpwụ nya ila ọọwa. Ọgbịjị ọọwa á tị họ ịPọlụ ịngịngịhyẹ myị́ kpong-kpong ka.

⁶Ịnyị, angịịwa a juwa godayị, juwa ya ẹhị rịrị gbe ụka ọlẹ kị ka yẹ jaabwọ ká ẹhwa nya ọgbịjị ọọwa ka họ ká ịPọlụ ka mịrị dumm lee kọ ka hịda keji kpịlagada, gbu taaa lẹlẹ. Ma, ụka kị godayị lụka ọtata kị yẹ ká ịngịngịhyẹ onyobyi kọ họ ẹ-ẹga nya ịPọlụ ịnyị kaka lẹ, ị nwụ irya nyaa me u-uhye nya ịPọlụ lẹ, ị juwa yẹkẹẹ, ịPọlụ nyị ri ohe ojiga ọhẹ pyii lẹlẹ.

⁷Ẹga ọọwa ọlẹ kahị hụhụ juwa wu ila lẹ, ọ ju ọpyị nya ọlẹng ọhẹ ọlẹ kị wụrụ ịPọbịlọsị chwẹẹ. ỊPọbịlọsị ọọwa a ri Adịrahụ nya alọpyị ọọwa lẹ. ỊPọbịlọsị ọwẹ yehi kpa kele kaka ju ụga ẹ-ẹpwa nyamwụ. Ọ họhị ụga pẹtẹ-pẹtẹ ụ-ụwa lala ụtụrụ ịta lẹpwụ-lẹpwụ.

⁸Ụka ọọwa tị lẹ, ẹdụrụ nya ila ọchịchị bala ohyachii ọtụka-ọtụka juwa jụ adịda nya ịPọbịlọsị ọọwa. Ịnyị, ịPọlụ a kele ka ẹga nya ọlẹdụrụ ọọwa kaka ya abwọ nyamwụ imimiiye nịrọọ, juwa raabwọ ha Ohe Oluhye chajị nyamwụ lẹ, ọ họọ uda nya ẹdụrụ nyamwụ ọọwa lẹlẹ.

⁹Ụka ká alụwa yẹ ụkụrwọ ẹbyẹbyị nya uda ọhọhọ ọọwa lẹ, angịkịla ịlẹ wuu ká ẹdụrụ juwa jụ ụ-ụwa ọ-ọpyị ọkịlọlọ nyaa ọlẹ ká enyi dagaga ju wuu, a kele ka ẹga nya ịPọlụ lẹ, ọ haa uda wuu ịnyịnyị lẹlẹ.

¹⁰Alọpyị ọọwa gahị ahị lụmẹ kaka kpoye. Ụka ọlẹ kahị juwa ka ju ụgbọ nya enyi rụ bwu ụwa lẹ, ị go iru nya ang ịlẹ wuu kị baba hahị ẹ-ẹpwụ nya ẹdịyẹ ohihi nyahị kpa warị kaka ju ẹpwụ nya ụgbọ nya enyi nyahị hahị ịnyịnyị.

¹¹Ụka kahị hụ ọ-ọpyị nya ịMọlụta ọọwa lala ịya ịta kpá lẹ, ahị yegiri kaka ju ụgbọ nya enyi ọlẹ kọ bwu Alẹkịsandịrịya kele kaka mwụ ịnyọ ụ-ụwa lụka nya ogo ọtụka nya iwinta lẹlẹ. Ẹnyị ọlẹ kị da ba ịlahị nya ụgbọ nya enyi ọọwa ri iKasitọ bala iBulọkịsị ọlẹ ká etu nyamwụ ri ihye ijiga anyewa.

¹²Ụka kahị jẹ gbee pwụ epweji ọlẹ kị wụrụ iSirakọsị, ahị godayị, hyehe ụ-ụwa lala ẹnụtụrụ ịta.

¹³Ụka kahị rụ bwu epweji nya iSirakọsị ọọwa, ahị pwụ epweji ọkịla ọlẹ kị wụrụ iRejiyọm. Ụka ká ahị ọọnamwụ pyẹ, igbachịwụ ọhẹ juwa da bwu oye nya edii. Ịnyị lẹ, ahị jẹ gbee kahị pwụ epweji nya iPutiyoli la ẹnụtụrụ oheeye nyamwụ lẹlẹ.

¹⁴E-epweji nya iPutiyoli ọọwa, ahị yẹ angịhyẹ ịlẹ kị ri anyadahị ẹ-ẹpwụ nya ịKịrayịsị. Ịnyị, angịịwa a wụrụụhị ẹpwa kaka hụ ta ịlaa lala ụtụrụ irwiye ene kahị bwu ụwa rụ kele ka ọpyị nya iRom lẹlẹ.

¹⁵Ụka ká anyadahị ẹ-ẹpwụ nya ịKịrayịsị ilepweji nya iRom wo oja yẹkẹẹ, ahị nyị juwa jẹ warị wẹ ịnyịwa lẹ, ị jẹ kaka kụ ọlọyị gbehi ẹ-ẹga nya ojiya nya ihi nya epweji nya Apiyọsị bala ẹga nya ube nya angga ọlẹ kị wụrụ “Ebe Ịta” lẹlẹ. Ụka ọlẹ ká ịPọlụ chẹhị kaka yẹ angịịwa, ọ ji Ohe Oluhye obe ụ-ụwa lẹ, ịPọlụ a la ẹjẹ ọkpụ́kpụ ẹ-ẹpwụ ọkịlẹtụ nyamwụ lụmẹ lẹlẹ.

¹⁶Ịnyị, ụka kahị pwụ epweji nya iRom lẹ, alegbeju ịlụwa a ya ẹga da ha ịPọlụ yẹkẹẹ, nyị hụ ụbwọọmwụ datị mẹ lẹ, ị chụ ịsọja ọlẹ kọ ka juwa gbe ịPọlụ ẹ-ẹga ọọwa lẹlẹ.

¹⁷Ụka ká ẹnụtụrụ ịta chịpwụrụ kam kpá, ịPọlụ wụrụ alegbeju nya ala iJuu ịlẹ kị juwa e-epweji nya iRom kaka jịra ẹ-ẹga nyamwụ. Ịnyị, ụka kị pwụ eji wẹ ẹga nyamwụ lẹ, ịPọlụ a byaa yẹkẹẹ, “Anụ anyadam, anụ wo mẹ! Ọ ri nya ịlẹhị, ịnọ, ḿ họ ẹlẹlẹhẹ onyobyi ba alịnyahị ka lee ọ-la egbeju-ọngịrị ẹ-ẹga nya abwẹla ọhọhọ nya adahị igogo anyị kpong-kpong ka. Ma, ala iJuu nyahị tị wum kpa kaka ju agba ododu e-epweji nya iJerusalẹm gbee kị tụụbwọ him ju alegbeju nya ala iRom anyị ụ-ụbwọ timajẹ.

¹⁸Ịnọ, ụka ká alegbeju nya ala iRom ịịwa wụla eje nyam yẹ lẹ, ị juwa tịtọ kị ka chịm da rụ ododu la okpunyi, chajị, ị́ yẹ ịngịngịhyẹ onyobyi ọlẹ kam họ kpụ, eje nya igu ka wum kpong-kpong ka.

¹⁹Ma, ụka ọlẹ ká ala iJuu nyahị pwa yẹkẹẹ, nyị́ ka chịm da kaka lẹ, ọhọhọ nyaa ọọwa a tụm tutu gbee kam họ apile nya eje nyam warị wẹ ẹga nya iSisa adịrahụ ọgbahị nya ala iRom wuu lẹlẹ. Ọ ri nya ịlẹhị, ḿ la ịngịngịhyẹ onyobyi ọ-ka chị ba alẹpwụma nyam ị-ịlahị nya adịrahụ iSisa kpong-kpong ka.

²⁰Chajị nyọlẹ a du kam tịtọ nyọka yẹnụ anụ anyadam, chajị kam ka jẹ́-ẹ ya jenu lẹlẹ. Chajị, ang odudu kị jum agba ọlẹ ri yẹkẹẹ, am jam la ẹhị ọrịrịị-rịrị u-uhye nya ọngọlẹ ká ala Isirẹlụ wuu jam ya ẹhị rịrị gbe ịnyịnyịịnyị!”

²¹Ịnyị, angịịwa a wẹ byi ịPọlụ yẹkẹẹ, “Áhị́ yé ileta ọhẹ-lọhẹ bwu iJudiya chajị nyang kpong-kpong ka. Ọngọngọhẹ nya anyadahị ịlụwa á tị kpa eje nya ẹla nyang wahị lee ọdọmwụ ya ẹla onyobyi rụ́ng ẹ-ẹga nyahị kpong-kpong ka ịnyịnyị.

²²Ma, ang ọlẹ kahị tịtọ bwu ẹga nyang ri yẹkẹẹ, ahị tịtọ kahị ka wo ang ọlẹ kọ ri irya nyang u-uhye nya alogu ị-gbịgba ha Ohe Oluhye la ọgụ onyeewe ọwẹ ká ya ẹla rụ́. Chajị, ang ọlẹ kahị jẹ́ u-uhye nyamwụ ri yẹkẹẹ, ị kaa ya ẹla onyobyi rụ́ alogu ọwẹ ẹ-ẹga myị́ ẹga wuu lụmẹ.”

²³Ịnyị, ụka kị hu ẹnụtụrụ ọhẹ nọ ha ịPọlụ lẹ, iru nya angịnyị lụmẹ-lụmẹ nyaa a ba ịPọlụ kele ka ẹga ọlẹ kọ ju ụga nyọka wo ẹla ọọwa lẹlẹ. Ịnyị, ịPọlụ a juwa gbe ana nya ẹla ọọwa kpori-kpori ya jaa bwu ụka nya ụtụrụ gbee ju ka alobyi lẹlẹ. Ịnyị, ịPọlụ a juwa ri ibeenu nya ang chajị nya ịpyị Adịrahụ nya Ohe Oluhye jaa, juwa ya ẹla la ụgbẹyị ọlẹ kọ ka waa ẹpwụ chajị nya iJisọsị bwu ẹpwụ nya ụpwụ nya ehile nya iMosisi bala apwụ nya alọmwụ inyogo nya Ohe Oluhye ịnyịnyị lẹlẹ.

²⁴Ụka ọọwa, iru nya angịhyẹ lẹpwụ nya ala iJuu ịịwa myị la Ọngọlahị iJisọsị bwula ẹla nya Ohe Oluhye oyaya nya ịPọlụ ọọwa. Ma, angịkịla nyaa ihihi á tị myị la ẹla ọọwa kpong-kpong ka.

²⁵Ịnyị lẹ, o-wo lawụlẹ-ka a kpụ eji ẹ-ẹpwarịrị nyaa ịwa ala iJuu lẹ, ị yegiri rụ bwu ẹga nya ịPọlụ lụka ọlẹ ká ịPọlụ ya omyi ẹla ookpokpo ọlẹ dodehe byaa yẹkẹẹ, “Anụ wo mẹ! Ẹla ọlẹ ká Olegu Ịgọgọ ya rụ adanụ igogo anyị bwu ọnụ nya Ayịsaya ọlọmwụ onyogo nya Ohe Oluhye lẹ, ẹla nya ịlẹhị ịnyị! Chajị, Ọ yẹkẹẹ,

²⁶‘Kele kaka byi angịwẹ yẹkẹẹ, ọ ri nya ịlẹhị, owowo lẹ, anụ ka kpa ụrụ nyanụ wo lẹ! Ma, ánụ tị ka la ọ-jẹ́ myịmyị u-uhye nya ẹla ọọwa kaka. Ọyẹyẹ lẹ, anụ tị ka kpẹhị nyanụ yẹ myị́ lẹ, ma, ánụ tị ka jẹ́-ẹ jẹ́ egbeju nya ang ọọwa ọlẹ kanụ wẹẹ yẹ kaka ịnyịnyị.

²⁷Chajị angịwẹ lẹ, ị ngịrị ọkịlẹtụ nyaa ọngịrị lụmẹ kaka kpoye. Ị tị mwụ ang ku arụ nyaa kpọng-kpọng lẹ. Ị tị myịmyị tụ egbahị nya ịlaa ku gbanggbang ịnyịnyị lẹ. Ị họ ịnyị, chajị kị ka jẹ́-ẹ kpa ọkịlẹtụ nyaa la ọ-jẹ́ myịmyị chajị nyam Am Ohe Oluhye kaka. Lee, ọ-ka jẹ́-ẹ kpa ụrụ nyaa wo etu nya ẹla nyam kaka. Lee, ọ-ka jẹ́-ẹ kpa egbahị nyaa yẹ ang myịmyị chajị nyam kaka ịnyịnyị. Ị họ ịnyị wuu, chajị kị ka jẹ́-ẹ jahị nyaa kpata dam Am Ọngọlaa la kpụ, M ka haa uda nya ịhọbịrị ịhọhọ nyaa kaka.’ ”

²⁸Ịnyị, ịPọlụ a byaa yẹkẹẹ, “Lẹ, anụ wo mẹ! Ọchịda nya Ohe Oluhye ọọwa lẹ, ahị jam kpa kele kaka ya je ala iJentayịlị lẹ! Chajị, ịwa lẹ, ị nwụlanọ kị ka wo ẹla ọọwa, juwa kpa họ ụkụrwọ lẹ.” [

²⁹Ụka ká ẹla oyaya nya ịPọlụ ọọwa chị eju kpá, ká ala iJuu ịịwa juwa jẹ rụ lẹ, ị juwa rwarụ ta awụlẹ nya ịlẹhị-ịlẹhị lẹlẹ.]

³⁰Ịnyị lẹ, ịPọlụ a haya nya ube ọhẹ ọlẹ kọ hụ e-epweji nya iRom ọọwa lala ẹka imiiye lẹpwụ-lẹpwụ lẹlẹ. ỊPọlụ juwa kaa ye ọng myị́ ọng hiigu-hiigu ụka myị́ ụka ọlẹ kị kele ka ẹpwa nyamwụ ọọwa kaka wụlọọ yẹ ịnyịnyịịnyị.

³¹Ịnyị, ịPọlụ a juwa kaa ya ẹla nya Ohe Oluhye chajị nya ịpyị Adịrahụ nya Ohe Oluhye bala o-juwa ẹ ang jẹ angịnyị chajị nya Ọngọlahị iJisọsị ịKịrayịsị ẹ-ẹpwụ nya uhi ojuju kpong-kpong kaka lẹlẹ. Chajị, ọngọngọhẹ á ku ịPọlụ iwe kpong-kpong ka.