Read idege ỤKỤRWỌ nya ALẸRỤ 3 Bible Online

ỤKỤRWỌ nya ALẸRỤ 3 - idege bible

ỤKỤRWỌ nya ALẸRỤ 3

¹Ịnyị, la ẹnụtụrụ ọhẹ lẹ, iPita bala ịJọn a juwa bajẹ kele kaka raabwọ ha Ohe Oluhye u-ube ịgọgọ ọtụka nya Ohe Oluhye nyaa ịwa ala iJuu lụka nya oje ịta nya obyi, ọlẹ kị hunọ nya ụka nya abwọ ọrịrị nyaa ẹnẹnẹẹnụ lẹlẹ.

²Ọlẹng ọhẹ juwa ụ-ụwa kọ chị okuku bwu ẹpwụ-ẹpwụ nya ịnamwụ. Ị kaa kpọọ kele kaka hụhụ ọ-ọnang nya ube ịgọgọ ọtụka nya Ohe Oluhye ọọwa ọlẹ kị wụrụ “Ọnang Ọnyịịla.” Ụ-ụwa okuku ọọwa a kaa hụ ẹnẹnẹẹnụ, juwa bịlẹ ang bwu ụbwọ nya ọng myị́ ọng ọlẹ wuu kọ ka chịpwụrụ bwu ọnụ nya ọnang ọọwa kele ka ube ịgọgọ ọwẹ lẹlẹ.

³Ịnyị, ụka ká okuku ọọwa yẹ iPita bala ịJọn kị juwa chịpwụrụ kele ka ube ịgọgọ ọtụka ọọwa lẹ, ọ juwa bịlaa ang ịnyịnyị lẹlẹ.

⁴Ịnyị, ụka ká iPita bala ịJọn juwa mwụụrụ yẹ okuku ọọwa chịng lẹ, iPita a byi okuku ọọwa yẹkẹẹ, “Chị ẹhị nyang yẹhị wẹẹ!”

⁵Ịnyị, okuku ọọwa a jahị nyamwụ kpata da iPita anyị, juwa ya ẹhị rịrị gbe ang ọlẹ kị ka ya ga họọ lẹlẹ.

⁶Ma, iPita wẹ byi okuku ọọwa yẹkẹẹ, “Wo mẹ! Okpoko onyoowuru lee okpoko ịgọm, aḿ la ka hu hang ka. Ma, ang ọlẹ kam la, m lẹẹ ka hu hang lẹlẹ. Bwula ẹnyị nya iJisọsị ịKịrayịsị ọla ịNasareti, wuleji ká jẹdịyẹ lẹẹlẹẹ mẹ!”

⁷Ịnyị, iPita a kele kaka yụbwọ chị okuku ọọwa u-upwuriri nyamwụ lẹ, ọ wuloo eji godayị kọkọ lẹ, apatẹ bala agọ nya okuku ọọwa a la gogo ahyaahị lẹlẹ.

⁸Ọọwa lẹ, okuku ọọwa a wuleji kịlata godayị kọkọ, juwa gbajị, juwa jẹdịyẹ lẹ, ọ ju kele ka ube ịgọgọ ọtụka ọọwa ta iPita anyị, juwa gbajị nya ọkẹkẹnị bala o-juwa gwogbo ha Ohe Oluhye ụ-ụwa lẹlẹ.

⁹Ịnyị lẹ, iru nya angịnyị ịlẹ kị juwa u-ube ịgọgọ ọọwa a chẹhị kaka yẹ jaabwọ ká okuku ọọwa jẹ́ juwa jẹdịyẹ bala jaabwọ kọ juwa gwogbo ha Ohe Oluhye ụ-ụwa ịnyịnyị lẹlẹ.

¹⁰Ụka ọọwa, iru nya angịnyị ịịwa jẹ́ ká ọlẹng ọwẹ a ri okuku ọlẹ kọ kaa hụhụ, juwa bịlẹ ang ọ-ọnang nya ube ịgọgọ ọtụka ọọwa ọlẹ kị wụrụ “Ọnang Ọnyịịla” ene-ene. Ọọwa lẹ, jaabwọ kị yẹ ká okuku ọwẹ la gogo hiigu-hiigu lẹ, ọ laa ahịbwuu bala ọ-laa ẹbyẹbyị lụmẹ lẹlẹ.

¹¹Ịnyị, ụka ká okuku ọọwa juwa yụbwọ dụrụ iPita bala ịJọn ịnyịnyịịnyị lẹ, ọ la iru nya angịnyị ịlẹ kị juwa ụ-ụwa ahịbwuu lụmẹ kaka kpoye lẹlẹ. Ọọwa lẹ, ịwa wuu a kele kaka dọgịlẹ ju iPita anyị ẹ-ẹga ọlẹ kị wụrụ ọnụụkpa nya iSolomọn olube ịgọgọ ọtụka nya Ohe Oluhye ọọwa lẹlẹ.

¹²Ịnyị, ụka ká iPita chẹhị kaka yẹ Iru nya angịnyị ịịwa lẹ, ọ byaa yẹkẹẹ, “Anụ ala Isirẹlụ ee, ịịyẹ a tị́ du ká ụkụrwọ ẹbyẹbyị ọlẹ lanụ ahịbwuu lụmẹ ịnyị? Lee, ịịyẹ a tị́ du kanụ mwọọgịlẹ juwa mwụụrụ yẹhị ahị ayịdang ịnyị dachichi? Lee, anụ tị́ me ká ọngịrị nya ịlọhị lee abwẹla ọnyịịla ọhọhọ nyahị ẹ-ẹga nya Ohe Oluhye a du ká okuku ọlẹ la gogo wẹ ịnyị?”

¹³IPita myịmyị byaa yẹkẹẹ, “Anụ wo mẹ! Ohe Oluhye nya Ebiraham bala Ohe Oluhye nya Ayịsiki bala Ohe Oluhye nya iJekọbụ ọlẹ kọ ri Ohe Oluhye nya adahị ịgọgọ anyị ịkịla wuu kpanggaa a ri Ọngọlẹ kọ wẹẹ chị ụmụmẹ nya iJisọsị Ọnchẹ nyamwụ ehe ị-ịlahị nyanụ lẹ. IJisọsị ọọwa a ri ọngọlẹ kanụ wu kpa kaka la eje, kanụ pwọọ rwarụ i-ijata nya ịPayịleti ụka ọlẹ, ịnọ, ká ịPayịleti juwa tịtọ nyọka chị iJisọsị ọọwa da hanụ lẹ.

¹⁴Ma, anụ ayịdang tị pwa iJisọsị ọọwa ọlẹ kọ ri Ọngọ Ịgọgọ bala Ọlabwẹla Ọnyịịla rwarụ lẹ, anụ mwọọgịlẹ byi ịPayịleti yẹkẹẹ, nyị chị ọngọ nwụ angịnyị da ha ịwa kịị nyị rụ la okpunyi ọkọnụ nya iJisọsị mẹ, dachichi lẹlẹ.

¹⁵Ịnyị lẹ, anụ mwọọgịlẹ wu iJisọsị ọngọlẹ kọọwa kpakpakpa a ri Olegbeju nya Ọhịhị wuu kpa kaka nwụ dachichi lẹlẹ. Ma, Ohe Oluhye tị wule iJisọsị ọwẹ eji bwula igu lẹ. Ahị angịlẹ kpangga a ri alibeenu nya owuleji bwula igu nyamwụ ọọwa lẹlẹ.

¹⁶Anụ wo mẹ! Ọngịrị nya ẹnyị nya iJisọsị bwula ọmyịmyị ọlala, a họ okuku ọlẹ uda jaabwọ kanụ wẹẹ yẹ bala ọjẹ́jẹ lẹlẹ. Ọmyịmyị ọlala bwula iJisọsị a tị họ du, ká okuku ọlẹ la gogo wẹ yẹẹyẹẹ i-ijata nyanụ anụ wuu lẹlẹ.”

¹⁷IPita myịmyị byaa yẹkẹẹ, “Anụ anyadam, m jẹ́ ká ajị nya ájẹ́jẹ-ka nya ịlọnụ bala ịnya alegbeju nyanụ a du kanụ kpa họ iJisọsị ang ịwẹ wuu lẹ.

¹⁸Ma, Ohe Oluhye la ịlọmwụ tị dọmwụ ya ẹla dodehe bwu ọnụ nya iru nya alọmwụ inyogo nyamwụ yẹkẹẹ, ịKịrayịsị ọlẹ ká Ohe Oluhye nyị juwa ka du ẹrụ warị lẹ, nyị ka yẹ akama. Lẹ, akama ọọwa kpangga a họ jịra wẹ u-uhye nya iJisọsị bwula ọhọhọ nyanụ ọọwa lẹlẹ.

¹⁹Lẹ, anụ yẹ irya da lẹẹlẹẹ bwu ẹpwụ nya ịhọbịrị ịhọhọ nyanụ, kanụ nya tịrẹkpẹ chị Ohe Oluhye ọgụ, ká Ohe Oluhye a yịlẹ ibyi nya ịhọbịrị ịhọhọ nyanụ ịịwa wuu hiinu mẹ. Chajị kanụ ka jẹ́-ẹ la ila ọchịchị o-bwu ijata nya Ọngọlahị Ohe Oluhye ẹ-ẹpwụ nya ọhịhị onyeewe nyanụ ọọwa ịnyịnyị mẹ.

²⁰Chajị ká Ohe Oluhye tịtị ka jẹ́-ẹ du iJisọsị ọngọlẹ kọ ri ịKịrayịsị ọọwa ọlẹ ká Ohe Oluhye la ịlọmwụ chụchụ hanụ ene-ene warị wẹ ẹga nyanụ ị-ịlahị mẹ.

²¹Ma, ịKịrayịsị ọọwa tị ka hụhụ e-epwoohe gbee pwụ ụka ọlẹ ká Ohe Oluhye ka ma ang myị́ ang wuu họ onyeewe, jaabwọ ká Ohe Oluhye la ịlọmwụ ya bwu ọnụ nya alọmwụ ịgọgọ inyogo nyamwụ wuu nalọ ene-ene.

²²Chajị, iMosisi byi adahị igogo anyị yẹkẹẹ, ‘Ọngọlahị Ohe Oluhye nyanụ juwa ka du ọlọmwụ ọkịla ọhẹ bwu ẹpwarịrị nya anyadanụ lala am-am iMosisi ị-ịlahị. Ọlọmwụ ọọwa a ri ọngọlẹ kanụ ka ke ụrụ la ẹla myị́ ẹla, ọlẹ kọ ka ya jenu ụka ọọwa lẹlẹ.

²³Ma, ọng myị́ ọng ọlẹ kọ ka myị-ị ke ụrụ la ẹla ọlọnụ nya ọlọmwụ ọọwa kaka lẹ aalẹ, ị́ ka dayị la ọ-chị ọngọọwa ebwo hi angịnyị nya Ohe Oluhye ịkịla bala ọ-ka ta ọngọọwa ayịreji pyịyọọ kaka!’

²⁴Ọ́ ba ị-iMosisi ụbwọọmwụ ka. Ma, alọmwụ nya Ohe Oluhye ịkịla wuu bwu ụka nya iSamwẹlụ kele kịlahị wuu lẹ, ịwa wuu yẹ ọmwụ dodehe rụ́ ụma nya ang ịlẹ kị ka họ jịra lụka ohyẹẹkpẹ ọlẹ ịnyịnyị!”

²⁵IPita myịmyị byaa yẹkẹẹ, “Anụ anyị kpangga, a ri anyị nya alọmwụ inyogo nya Ohe Oluhye ịịwa lẹlẹ. Anụ anyị kpangga, a tị ri angịlẹ ká Ohe Oluhye nwa iro ha adanụ igogo anyị chajị nyanụ ịnyịnyị lẹ. Ohe Oluhye nwa iro ọọwa ha Ebiraham yẹkẹẹ, ‘Ebiraham, bwu ẹga nya anyị ịtụma nyang, Am Ohe Oluhye a ka bwu wahị kụrụ alọdọdẹpwa ọnyị myị ọnyị wuu nya alodehe ọlẹ ị-ịlahị lẹlẹ.’

²⁶Ịnyị a du ká Ohe Oluhye chụ iJisọsị Ọnchẹ nyamwụ lẹ, kọ jene-jene doo ẹrụ warị wẹ ẹga nyanụ anụ ala Isirẹlụ, chajị kọ ka wahị kụrụụnụ bwula ọ-họ ká ọng myị́ ọng lẹpwụ nyanụ ka yẹ irya da bwu ẹpwụ nya ịhọbịrị ịhọhọ nyamwụ wuu wẹ lẹlẹ.”