Read idege ỤKỤRWỌ nya ALẸRỤ 6 Bible Online

ỤKỤRWỌ nya ALẸRỤ 6 - idege bible

ỤKỤRWỌ nya ALẸRỤ 6

¹Ụka kọ nụwa ịnyịnyịịnyị, ká angịjụgbẹyị nya iJisọsị juwa ju iru lụmẹ kịlahị-ịlahị lẹ, ẹla ọ-mwọ ya bawụlẹ a juwa ẹ-ẹpwarịrị nya alebwo nya iJuu ọhẹ jahị da alebwo ọkịla lẹlẹ. Chajị, ala iJuu ịlẹ kị kaa ya oja nya iGiriki juwa kaa ya ẹla tụ ala iJuu ịlam-ịlam pyịpyị yẹkẹẹ, ang ọgaga ọlẹ kịị nyị kaa hu ha anyang ịhụ-egu nya ala iJuu ịlam-ịlam ẹnẹnẹẹnụ lẹ, nyị kaa lụmẹ gụ, jaabwọ kịị nyị kaa hu ha anyang ịhụ-egu nyaa ịwa ala iJuu i-ya oja nya iGiriki.

²Ịnyị lẹ, alẹrụ ọnyịịla angị iwo kụrụ imiiye a wụrụ angịjụgbẹyị nya iJisọsị ịkịla wuu kaka jịra lẹ, ị byaa yẹkẹẹ, “Anụ wo mẹ. Ọ hiigu kahị ka juwa tụụbwọ hi ụkụrwọ nya ẹla nya Ohe Oluhye oyaya pyẹ ọlẹ deeji, ka mwọọgịlẹ juwa jahị da ụkụrwọ nya ẹla nya ang oriri ọlam-ọlam ọlẹ kem ka!

³Chajị nya ọọwa lẹ, anụ anyadahị ẹ-ẹpwụ nya ịKịrayịsị anụ kụ ẹhị yẹ angịnyị bwu ẹpwarịrị nyanụ, kanụ me angị irwiye ịhyẹ ụchụ ịlẹ kị ka ri angịnyị ya ẹla nya ịlẹhị bala angị myị la ọngịrị nya Olegu Ịgọgọ bala angị la ẹla ọjẹ́jẹ yẹẹyẹẹ ịnyịnyị, kanụ hu ụkụrwọ ọọwa jwaa ụ-ụbwọ hahị mẹ.

⁴Ma, ahị ayịdang lẹ, ahị ka hu ịlọhị wuu lẹpwụ-lẹpwụ, juwa kpa họ ụkụrwọ nya abwọ ọrịrị ha Ohe Oluhye bala ọ-ka juwa kpa ẹrụ ọnyịịla nyamwụ kaka ya pyẹ je angịnyị ehe lẹ.”

⁵Ẹla oyaya nyaa ọọwa kpụ iru nya angịjụgbẹyị nya iJisọsị ịịwa wuu ịpyọ lụmẹ lẹ, ị chụ angịhyẹ ịnyịlẹhị lẹlẹ. Angịịwa a lẹẹ lẹ: iSitivin ọlẹ kọ ri ọngịnyị nya ọmyịmyị ọlala lụmẹ bala ọ-myị la ọngịrị nya Olegu Ịgọgọ nya ịlẹhị-ịlẹhị. Angị ịwụlẹ ri, iFilipu, ịPịrọkịrọsị, iNikanọọ, iTimọn, ịPaamẹnasị bala iNikolọsị ọlẹ kọ ri ala iJentayịlị ene kọ myị la Ohe Oluhye lala ala iJuu. Ọ bwu epweji nya Antiyọkọ.

⁶Ụka ká aluche nya angịjụgbẹyị nya iJisọsị ịịwa kpa alẹng ịwẹ kele kịlahị nya alẹrụ ọnyịịla lẹ, alẹrụ ọnyịịla a yụbwọ nịra alẹng ịịwa e-egbeju lẹ, ị raabwọ jwaa ụ-ụwa lẹlẹ.

⁷Ịnyị lẹ, ẹrụ ọnyịịla nya Ohe Oluhye a juwa pyebile kịlahị-ịlahị gbee, ká angịjụgbẹyị nya iJisọsị juwa ju iru lụmẹ kịlahị-ịlahị e-epweji nya iJerusalẹm gụ olene-ene lẹlẹ. Aliru nya angịkiliya nya Ohe Oluhye lụmẹ-lụmẹ juwa kpa ọmyịmyị ọlala ju ihi nya ẹla nya Ohe Oluhye ụ-ụwa ịnyịnyị.

⁸ISitivin ọlẹ kọ ri ọngịnyị nya ahị ọwawa bwula ọgahị ọnahị nya Ohe Oluhye bala ọngọ la ọngịrị nya Ohe Oluhye lụmẹ, juwa kpa ọngịrị nya Ohe Oluhye ọọwa họ ụkụrwọ ẹbyẹbyị bala ang i-ju ẹjẹẹ ịlẹbyẹbyị la datị-datị ẹ-ẹpwarịrị nya iru nya angịnyị lụka ọọwa ịnyịnyị.

⁹Ịnyị lẹ, angịhyẹ ịlẹ kị ri alebwo nya alube ọ-mẹ ẹla nya Ohe Oluhye jẹ nya ala iJuu ọhẹ ọlẹ kị wụrụ ẹnyị nyaa yẹkẹẹ, “Angị la ịlaa la,” a kele juwa da ịwẹẹ ta iSitivin lẹlẹ. Angị ịkịla ịlẹpwụ nya ẹla ọọwa ri ala iJuu ịhyẹ ịlẹ kị bwu ọpyị nya ịSayịrin bala angị ịkịla nyaa ịlẹ kị bwu epweji nya Alẹkịsandịrịya bala angịlẹ kị bwu ọpyị nya iSilisiya bala angịlẹ kị bwu ọpyị nya Echiya anyị wuu juwa ẹ-ẹpwụ nya ala ịwẹẹ ọdada ta iSitivin ọọwa ịnyịnyị.

¹⁰Ma, jaabwọ ká ẹla ọjẹ́jẹ bala ọngịrị nya Olegu Ịgọgọ ọlẹpwụ nya iSitivin lụmẹ kaka kpoye lẹ, angịịwa á ya ẹla kụrụ iSitivin myị́ kpong-kpong ka.

¹¹Ịnyị, ụka ká angịịwa ya okpoko chị angịhyẹ ikiri ju lẹ, ị kele kaka me ọnọọkịla ba iSitivin yẹkẹẹ, “Ahị wo, ká iSitivin ọwẹ juwa ya ala inyibyi tụ iMosisi bala Ohe Oluhye pyịpyị.”

¹²Ịnyị, angịịwa a họ ká agbama nya alụwa wuu juwa wuru jahị da iSitivin, bwu ẹga nya iru nya angịnyị wuu bala ịgabwọ nya ala iJuu wuu bala ịtịcha ị-mẹ ehile nya iMosisi jẹ lẹ, ị kele kaka wu iSitivin kpa kịlahị nya ịkọtụ ọgbahị nyaa ịwa ala iJuu wuu lẹlẹ.

¹³Ịnyị lẹ, ị kpa alibeenu ọnọọkịla ịhyẹ kele kaka ri ibeenu tụ iSitivin pyịpyị yẹkẹẹ, “Ahị kaa wo, ká ọlẹng ọlẹ kaa juwa ya ala inyibyi tụ ube ịgọgọ ọtụka nya Ohe Oluhye nya ala iJuu nyahị pyịpyị ụka myị́ ụka wuu bala ọ-tụ ehile nya iMosisi pyịpyị ịnyịnyị!

¹⁴Ahị myịmyị wo ká iSitivin ọwẹ juwa kaa ya dodehe yẹkẹẹ, iJisọsị ọla ịNasareti nyị juwa ka warị kaka ta ube ịgọgọ ọtụka ọlẹ ayịreji gbanggbang bala iJisọsị ọ-ka kpa ang ọkịla warị kaka nyẹ abwẹla nya ịpyị nyahị, ịlẹ ká iMosisi ya dahị eji bwu ụbwọ nya adahị igogo anyị ene-ene ịnyịnyị.”

¹⁵Ụka ọọwa, iru nya angịnyị ịlẹ wuu kị juwa ẹ-ẹpwụ nya ọjịra-jịra nya ịkọtụ ọgbahị nyaa ọọwa juwa yẹ jaabwọ ká ahị nya iSitivin juwa yẹ da lala ahị nya olegu-ẹrụ nya Ohe Oluhye.