Read idege ỤKỤRWỌ nya ALẸRỤ 7 Bible Online

ỤKỤRWỌ nya ALẸRỤ 7 - idege bible

ỤKỤRWỌ nya ALẸRỤ 7

¹Ọọwa lẹ, olegbeju ọgbahị nya angịkiliya nya Ohe Oluhye wuu a tọ iSitivin wo yẹkẹẹ, “ISitivin, ẹla nya ịlẹhị a wẹ ká angịwẹ ya lẹ?”

²Ịnyị, iSitivin a wẹ byaa yẹkẹẹ, “Anụ anyadam bala adam anyị, anụ wo mẹ! Ụka ọọwa, Ohe Oluhye ọlẹbyẹbyị chị ịlọmwụ ehe mẹjẹ Ebiraham adahị ogogo lụka ọlẹ kọ juwa ọ-ọpyị nya iMesopotemiya, ene-ene kọọ mwụ rụ kaka kụ ọpyị nya ịHaran.

³Chajị, Ohe Oluhye ya ẹla tọọ yẹkẹẹ, ‘Ebiraham, wuleji ká gba kpehe hi alẹpwa nyanụ wuu, ká rụ hi ọpyị nya alẹpwụma nyang, ká kịnyaa kele ka ọpyị ọkịla ọlẹ kaam Ohe Oluhye juwa ka mẹjẹng mẹ.’

⁴Ọọwa lẹ, Ebiraham a wuleji gba kpehe hi ọpyị nya ala iKalidiya nyaa ịnyịlẹhị kele kaka kụ ọpyị nya ala ịHaran lẹlẹ. Ịnyị, ụka ká adịda nya Ebiraham gbu ụ-ụwa kpá lẹ, Ohe Oluhye a myịmyị kpa Ebiraham rụ bwu ịHaran kaka kụ ọpyị nya ala iKenan ọlẹ kaanụ wuu kụ lẹẹ alẹ lẹlẹ.

⁵Ma, ụka nya ọgbanyẹ-ọgbanyẹ ọọwa tị lẹ, Ohe Oluhye á hu ẹgẹgẹhẹ nya ọpyị ọlẹ ha Ebiraham nya ang ugu nya ụbwọ nya ịlọmwụ kpong-kpong ka, dọmwụ tụ ọpyị ochiche ọkịlẹlẹ lala ẹpẹtẹ ọ-ba ọpyị ookpokpo. Ma, Ohe Oluhye tị myị ọnụ kọ ka hu ọpyị nya iKenan ọlẹ wuu ha Ebiraham bala anyị ịtụma nyamwụ ịlịlahị wuu, ọ ri nya ịlẹhị, ụka ọọwa lẹ, Ebiraham á ma ọnyị ọhẹ-lọhẹ juwa lẹka.

⁶Ohe Oluhye myịmyị byi Ebiraham yẹkẹẹ, anyị ịtụma nyamwụ nyị ka mwụ rụ kaka kụ epwoja ọkịla lala angga ụ-ụwa. Angị la ọpyị ọọwa nyị ka juwa kpa anyị ịtụma nyang ịịwa yẹ akama lala anyịhị jịra ẹka ụnọ chiriri.

⁷Ohe Oluhye myịmyị byi Ebiraham yẹkẹẹ, ‘Ma, Am Ohe Oluhye tị ka yẹ alepwoja ọọwa akama kwiwa ha anyị ịtụma nyang ụka ọọwa. Ọọwa lẹ, anyị nya alẹpwụma nyang ịịwa a ka rụ bwu epwoja ọọwa kaka kụ ọpyị nya iKenan ọlẹ kị ka juwa gbịgba ham Am Ohe Oluhye ẹ-ẹgẹlẹ lẹlẹ.’

⁸Ịnyị, Ohe Oluhye a hu ụwụwụ ọdada ha Ebiraham nya ang o-ju ẹjẹẹ nya iro ọlẹ ká Ohe Oluhye nwa họọ la ọnụ ọmyịmyị ụ-ụwa lẹlẹ. Ọọwa lẹ, ụka ká Ebiraham ma Ayịsiki, ká Ayịsiki gu ụtụrụ ineku lẹ, Ebiraham a dọọ ụwụwụ lẹlẹ. Ọọwa lẹ, Ayịsiki a tịtị ma iJekọbụ lẹ, iJekọbụ a tịtị ma anyị alẹng angị iwo kụrụ imiiye ịlẹ kị ri adịda igogo nya ụpwọma nyahị ahị ala Isirẹlụ lẹlẹ.”

⁹“Ịnyị, ụka ká anyị nya iJekọbụ ihihi ịkịla yẹ ijiiji onyobyi jahị da iJosẹfụ lẹ, ị woo ra kele ka ọpyị nya ala Ijipiti lẹlẹ. Ma, Ohe Oluhye tị juwa ta iJosẹfụ ụka ọọwa.

¹⁰Ịnyị, Ohe Oluhye a gba iJosẹfụ kpehe bwu ẹpwụ nya ọ-tụ pyịpyị nya akama ọyẹyẹ nyamwụ wuu lẹlẹ. Ọọwa lẹ, Ohe Oluhye a họ ká ẹla nya iJosẹfụ kpụ iFero ịpyọ lụmẹ bala ọ-họ ká iJosẹfụ la ẹla ọjẹ́jẹ ọtụka ị-ịlahị nya iFero Adịrahụ nya ọpyị nya ala Ijipiti wuu lẹlẹ. Ịnyị, iFero a hu iJosẹfụ agaba nya ọpyị nya ala Ijipiti wuu bala o-ri olegbeju nya ọdọdẹpwa nya iFero ayịdang wuu ịnyịnyị lẹlẹ.

¹¹Ịnyị, imyi nya uhi ọtụka-ọtụka ọhẹ a nwụ angịnyị ị-ịpyị nya ala Ijipiti lalala kele ka ọpyị nya iKenan nya adahị igogo anyị lẹlẹ. Ọọwa lẹ, akama nya uhi ọọwa a lụmẹ kpoye, gbee ká adahị ịgọgọ anyị á ye ang oriri ọhẹ-lọhẹ ka ri kaka lẹlẹ.

¹²Ụka ká iJekọbụ wo oja yẹkẹẹ, ajẹ nya ambakpa nyị juwa lụmẹ ọ-ọpyị nya Ijipiti lẹ, ọ du anyị nyamwụ ịlẹ kị ri adahị igogo anyị ẹrụ kele lụka nya ọgbanyẹ-ọgbanyẹ kaka ra ang oriri bwu Ijipiti lẹlẹ.

¹³Ịnyị, ụka ká anyị nya iJekọbụ mwẹẹkpẹ kele ka Ijipiti lụka oheeye lẹ, iJosẹfụ a bwuru ịlọmwụ dodehe ya je anyadamwụ ụ-ụwa lẹlẹ. Ọọwa lẹ, iJosẹfụ a da alọdọdẹpwa nyamwụ ịịwa wụlẹ ya je iFero Adịrahụ ịnyịnyị lẹlẹ.

¹⁴Ọọwa lẹ, iJosẹfụ a du ẹrụ kele kaka kpa iJekọbụ adamwụ bala alọdọdẹpwa nyaa ihihi ịkịla wuu ba ịlọmwụ kele ka Ijipiti lẹlẹ. Iru ojuju nya alọdọdẹpwa nya iJekọbụ ịịwa la angịnyị angị ohu ịta kụrụ iwo, iwo kụrụ ịrụ kị kele.

¹⁵Ịnyị, iJekọbụ a mwụ rụ kele kaka kụ ọpyị nya Ijipiti, gbee kọọwa ayịdang bala anyị nyamwụ ịlẹ kị ri adahị igogo anyị gbu wuu ụ-ụwa lẹlẹ.

¹⁶Ịnyị lẹ, anyadahị igogo anyị ịịwa a go egu nyaa kpa rụ kaka ju eji ụ-ụwa ọ-ọpyị o-ju ogu eji ọlẹ ká Ebiraham ra dụwa i-iChekem lokpoko onyoowuru bwu ẹpwụtụbwọ nya anyị nya ịHamọ ugbeene lẹlẹ.”

¹⁷ISitivin myịmyị byaa yẹkẹẹ, “Ma, ụka ọlẹ ká ụka nya ọ-họ jịra nya ọnụ ọmyịmyị ọlẹ ká Ohe Oluhye myị ha Ebiraham juwa ka họ jịra lẹ, anyị ịtụma nyamwụ ịịwa a pyẹ lụmẹ-lụmẹ nya ịlẹhị-ịlẹhị ọ-ọpyị nya Ijipiti lẹlẹ.

¹⁸Ịnyị, ụka kọ nụwa gbee lẹ, ị hu iFero onyeewe nya Adịrahụ nya ala Ijipiti wuu lẹlẹ. Ma, ọlẹng ọọwa á tị jẹ́ iJosẹfụ kpong-kpong ka.

¹⁹Ịnyị lẹ, iFero Adịrahụ ọọwa a juwa kpa ijẹẹhị tụ alẹpwụma nyahị pyịpyị bala o-juwa họ adahị igogo anyị ọkwọ ọtụka-ọtụka, juwa taa tutu kị ka go anyị ịlabwọ nyaa chụwa odehe, chajị ká anyị ịịwa ka gbu hi adahị igogo anyị lẹlẹ.

²⁰Ụka ọọwa kpangga a ri ụka ọlẹ kị kpa ma ọngọlẹ kị wụrụ iMosisi, kọ ri ọnyị ọ-há ụhị lụmẹ kaka kpoye ị-ịlahị nya Ohe Oluhye lẹ! Ị kpa iMosisi ẹ-ẹpwa nya adamwụ lala ịya ịta gbẹgbịlẹ.

²¹Ịnyị, ụka kị gba iMosisi kpehe hi ẹpwa nya adamwụ lẹ, ọnyị ọnyang nya iFero adịrahụ, a hu iMosisi kaka kpa lala ọnyị nya ụbwọ nya ịlọmwụ lẹlẹ.

²²Ịnyị, ị mẹ ẹla ọjẹ́jẹ okpori-kpori nya ala Ijipiti jẹ iMosisi, gbee kọ nwa kaka ri ọngọ ọtụka-ọtụka ẹ-ẹpwụ nya abwẹla ọnyịịla ọhọhọ bala ẹla oyaya bwu ọnụ myị́ lẹlẹ.”

²³“Ịnyị, ụka ká iMosisi gu ẹka ohu-iye lẹ, ọ chị eje ẹ-ẹpwụ nya ọkịlẹtụ nyamwụ yẹkẹẹ, ọwa nyị ka tụ aha kaka wụla anyadịdọwa ala Isirẹlụ yẹ wẹẹ lẹlẹ.

²⁴Ụka ká iMosisi pwụ ụwa, ọ yẹ jaabwọ ká ọlẹng nya ala Ijipiti ọhẹ juwa tụ ọlẹng nya ala Isirẹlụ pyịpyị nya ịlẹhị-ịlẹhị. Ọọwa lẹ, iMosisi a kele kaka nwụ ọlẹng nya ala Ijipiti ọọwa kwiwa ha ọlẹng nya ala Isirẹlụ ọọwa lẹlẹ.

²⁵Ụka ọọwa lẹ, ịnọ, iMosisi ayịdang me irya yẹkẹẹ, ala Isirẹlụ nyị ka jẹ́ yẹkẹẹ, ọwa iMosisi kpangga, Ohe Oluhye nyaa chụ, nyọka gba ịwa ala Isirẹlụ kpehe bwu ẹpwụ nya akama ọyẹyẹ nyaa lẹlẹ. Ma, ala Isirẹlụ á tị jẹ́ iMosisi nya ọọwa datị ụka ọọwa kpong-kpong ka.

²⁶Ịnyị, ụka ká iMosisi myịmyị kele la ahị ọpyẹpyẹ nyamwụ lẹ, ọ yẹ ala Isirẹlụ angị imiiye ịhyẹ kị juwa bẹ ẹnẹẹla nya awụlẹ lẹlẹ. Ịnyị, iMosisi a byaa yẹkẹẹ, ‘Anụ ba! Anụ mwẹla ta awụlẹ ka. Lee, ánụ tị́ jẹ́ yẹkẹẹ, ịwa nyị ri anyadịda nya awụlẹ ka?’

²⁷Ma, ọngọlẹ ká ẹla nyamwụ tịpyọ gụ, juwa kpa arụ ọrụrụ ku iMosisi rụ hi ịlọmwụ lẹ, ọ byi iMosisi yẹkẹẹ, ‘Oowo a tị́ hung adịrahụ nyahị bala agaba, du ká juwa lahị eje kpong-kpong ene?

²⁸iMosisi lee a tị́ juwa tịtọ ká ka myịmyị nwụm am alẹ jaabwọ ká nwụ ọlẹng nya ala Ijipiti ịnịyẹ lẹ?’

²⁹Ụka ká iMosisi wo ẹla oyaya nya ọlẹng ọọwa kọ lọọ uhi-uhi lẹ, iMosisi a rụnyẹ nya ọhịhị nyamwụ kaka kụ ọpyị nya ala iMidiyan gbee kọ ye ahụ, ma anyị alẹng imiiye ụ-ụwa lẹlẹ.”

³⁰ISitivin myịmyị byaa yẹkẹẹ, “Ụka ká iMosisi kụ ọ-ọpyị nya iMidiyan lala ẹka ohu-iye lẹ, olegu-ẹrụ nya Ohe Oluhye ọhẹ, a chị ịlọmwụ ehe mẹjẹ iMosisi u-ugbileji ẹ-ẹpwụ nya ẹlẹlẹ nya ila ọlẹ kọ juwa wuru kawu kawu u-uhye nya okoji ju ọgbọdọ ọtụka ọlẹ kị wụrụ ịSayịnayị chwẹẹ lẹlẹ.

³¹Ụka ká iMosisi chẹhị kaka yẹ ẹlẹlẹ nya ila ọọwa, ọ lọọ ahịbwuu lụmẹ kaka kpoye. Ịnyị, ụka kọ tụ ju ila ọọwa chwẹẹ kọ ka jẹ́-ẹ yọyị yẹẹyẹẹ lẹ, omyi nya Ọngọlahị Ohe Oluhye a juwa ya ẹla ta iMosisi ụ-ụwa lẹlẹ.

³²Omyi ọọwa yẹkẹẹ, ‘Am kpakpakpa a ri Ohe Oluhye nya adang igogo anyị lẹ. Am a ri Ohe Oluhye nya Ebiraham lẹ. Am a ri Ohe Oluhye nya Ayịsiki bala Ohe Oluhye nya iJekọbụ lẹ.’ Ọọwa lẹ, iMosisi a juwa juhi, juwa hụ́ kpákpakpa, juwa yahị nyamwụ cheji ụ-ụwa lẹlẹ.

³³Ịnyị, Ọngọlahị Ohe Oluhye a byi iMosisi yẹkẹẹ, ‘iMosisi, pwọ egbatẹ nyang cheeji ẹ-ẹgẹlẹ lẹẹlẹẹ mẹ. Chajị, ẹga ọlẹ ká godayị rịrị wẹ lẹ, ọ ri ẹga ọlịgọgọ!

³⁴IMosisi, wo mẹ! Am Ohe Oluhye chẹhị kaka yẹ akama nya ọ-kpa họ nya angịnyị nyam ịlẹ kị juwa yẹ ọ-ọpyị nya Ijipiti wuu lẹ. M tị wo eru ọchịchị nya angịnyị nyam ịịwa ọlẹ kị juwa chị ụ-ụwa ịnyịnyị lẹ. Chajị nya ọọwa lẹ, Am Ohe Oluhye hireji warị kam ka kele kaka gba angịnyị nyam ịịwa kpehe bwu ụwa lẹ. Lẹ iMosisi, kẹwẹ, kaam Ohe Oluhye a dung ẹrụ kele ka Ijipiti mẹ.’ ”

³⁵“Ịnyị lẹ, iMosisi ọlẹ ká ala Isirẹlụ nyahị pwa, juwa byoo yẹkẹẹ, ‘Oowo a tị́ hung adịrahụ nyahị bala agaba kpong-kpong ene?’ Lẹ, ọwa kpangga, Ohe Oluhye a chụ kọ ka ri olegbeju nya ala Isirẹlụ wuu bala ọngọ ka gbaa kpehe bwu Ijipiti ọọwa pyii lẹlẹ. Chajị ịnyị, olegu-ẹrụ ọlẹ kọ chị ịlọmwụ ehe mẹjẹ iMosisi bwula ẹlẹlẹ nya ila u-uhye nya okoji a kpa kaka ya joo ugbeene lẹ!

³⁶Ịnyị lẹ, iMosisi a gba ala Isirẹlụ nyahị ịịwa kpehe bwu ọpyị nya ala Ijipiti ịnyịlẹhị lẹlẹ. IMosisi họ ụma nya ụkụrwọ ẹbyẹbyị la datị-datị bala ang i-ju ẹjẹẹ ịlẹbyẹbyị ụ-ụwa ọ-ọpyị nya Ijipiti bala Ihu ọtụka ọlẹ kị wụrụ Ihu Oletungkohyo bala ịlẹ kọ họ u-ugbileji ịnyịnyịịnyị ẹ-ẹpwụ nya ẹka ohu-iye gbẹgbịlẹgbẹ.

³⁷IMosisi ọọwa ayịdang kpangga a ya ẹla ta ala Isirẹlụ nyahị ụka ọọwa lẹ. Ọ yẹkẹẹ, ‘Anụ wo mẹ! Ohe Oluhye juwa ka chụ ọlọmwụ nyamwụ ọkịla hanụ, bwu ẹpwarịrị nya anyị nyanụ pyii, jaabwọ kọ chụm am iMosisi lẹẹ hanụ ịnyịnyị!’

³⁸IMosisi ọọwa a ri ọngọlẹ, kọ juwa ẹ-ẹpwụ nya ọjịra-jịra ta adahị igogo anyị ụ-ụwa u-ugbileji lẹ. Ọwa tị myịmyị ri ọngọlẹ ká Ohe Oluhye du olegu-ẹrụ nyamwụ ẹrụ kaka ya ẹla joo ọ-ọgbọdọ nya ịSayịnayị bala adahị igogo anyị ịnyịnyị lẹ. IMosisi ọọwa kpangga a tị ri ọngọ ye ẹrụ ọnyịịla nya ọhịhị ọlẹ bwu ẹga nya Ohe Oluhye kpa kaka ya je ala Isirẹlụ nyahị wuu lụka ọọwa ịnyịnyị lẹ.”

³⁹ISitivin myịmyị byaa yẹkẹẹ, “Ma, ọ lịnyị la kpá lẹ, adahị igogo anyị pwa o-ju ihi nya ẹla ọlọnụ nya iMosisi. Ọọwa lẹ, ị pwa iMosisi, ji ẹkpẹ dọọ lẹ, ị mwọọgịlẹ juwa charịnya nyọka rụ tịrẹkpẹ kele ka ọpyị nya ala Ijipiti dachichi lẹlẹ.

⁴⁰Ọọwa lẹ, ị byi Erọn yẹkẹẹ, ‘Erọn, kẹwẹ ká họ ihye ijiga hahị mẹ. Chajị, iMosisi, ọlẹ kọ kpahị kpehe bwu ọpyị nya ala Ijipiti lẹ, áhị́ jẹ́ ang ọlẹ kọ họ ẹ-ẹga nyamwụ datị kaka.’

⁴¹Ịnyị lẹ, adahị igogo anyị ịịwa a họ ukpeku nya ojiga ọlẹ kọ me ọnyị nya ẹnụ lẹ, ị juwa kịla iya họọ bala o-juwa chị ọkẹkẹnị nya ịlẹhị-ịlẹhị ju ukpeku ọlẹ kị kpa ụbwọ nya ịlaa họhọ ụ-ụwa lẹlẹ.

⁴²Ịnyị, Ohe Oluhye ayịdang a pwa adahị ịgọgọ anyị, ji ẹkpẹ nyamwụ daa lẹ, ị mwọọgịlẹ juwa gbịgba ha ịdịchụ iluhye-ọgba dachichi, jaabwọ kị da kpehe ẹ-ẹpwụ nya ụpwụ nya alọmwụ inyogo nya Ohe Oluhye lẹlẹ. Ohe Oluhye byaa ụ-ụwa yẹkẹẹ, ‘Oo! Anụ ala Isirẹlụ, angịnyị nyam, ụka ọlẹ kanụ juwa jẹdịyẹ u-ugbileji ẹ-ẹpwụ nya ẹka ohu-iye lẹ, anụ myị kpa ọhaha nya iyo ịlẹpwa nyanụ bala iya ọkịlaakịla ọhẹ-lọhẹ wam Am Ohe Oluhye kpong-kpong lẹ?

⁴³Ehe! Ánụ́ họ ịnyị ka. Chajị, ube nya ọdụ nya ojiga ịMọlọkụ nyanụ, a ri ang ọlẹ kanụ juwa kpa dịrẹ ịlọnụ u-ugbileji lẹ. Ukpeku nya ọdọchụ nya ojiga nya iRefan nyanụ, anụ tị kpa dịrẹ ịlọnụ ịnyịnyị lẹ. Ihye ekpeku ịịwa ịlẹ kanụ họ la ịlọnụ, a ri ang ịlẹ kanụ juwa gbịgba ha lụka ọọwa ịnyịnyị lẹ. Lẹ, akama nyanụ ri, Am Ohe Oluhye ka kunu rụ pyiipyii kpoye nya ịpyị nya ala ịBabilọn pyii lẹ.’ ”

⁴⁴ISitivin myịmyị byaa yẹkẹẹ, “Adahị igogo anyị kpa ube nya ọdụ nya ijata ojiji nya Ọngọlahị Ohe Oluhye dịrẹ ịlaa u-ugbileji lụka ọọwa. IMosisi họ ube nya ọdụ ọọwa kpẹẹkpẹẹ jaabwọ ká Ohe Oluhye mẹjọọ ya, nyị họ lala ụrụrụ nya ube nya ọdụ ọọwa ọlẹ ká Ohe Oluhye mẹjẹ iMosisi a-arụrụ kpangga.

⁴⁵Ịnyị lẹ, adahị igogo anyị, a tụụbwọ hi ube nya ọdụ nya Ohe Oluhye ọọwa ju anyị nyaa ịlẹ ká iJosuwa kpa pwụ ọpyị nya iKenan ụ-ụbwọ. Ohe Oluhye a ku alẹpwụma ịkịla rụ hi ọpyị ọọwa ha ala Isirẹlụ nyahị lẹ. Ube nya ọdụ ọọwa juwa ta adahị igogo anyị gbee pwụ ụka nya iDevidi.

⁴⁶Ịnyị, ụka ká iDevidi yẹ jaabwọ ká Ohe Oluhye la ẹhị okpunyi ẹ-ẹga nyamwụ lẹ, ọ bịlẹ Ohe Oluhye kọ ka ya ẹga da họọ, chajị kọ ka nwụ́ ube ịgọgọ ọlẹ kọ ka juwa pyịyọọ ha Ohe Oluhye nya iJekọbụ lẹlẹ.

⁴⁷Ma, iSolomọn a tị ri ọngọlẹ ká Ohe Oluhye ya ẹga da ha, du kọ nwụ́ ube ịgọgọ ọọwa ha Ohe Oluhye lẹ.

⁴⁸Ma, Ohe Oluhye Agụgụ, á tị kaa kụ ẹpwang ọlẹ ká angịnyị ehe kpa ụbwọ nya ịlaa nwụ́ kpong-kpong ka, jaabwọ ká ọlọmwụ nya Ohe Oluhye ọhẹ ya lẹẹ ẹ-ẹgẹlẹ yẹkẹẹ,

⁴⁹‘Epwoohe a ri ẹchị adịrahụ ọhụhụ nyam Am Ọngọlahị Ohe Oluhye lẹ. Odehe ọlẹ a tị ri ẹga ọ-ya ẹta rịrị nyam Am Ohe Oluhye ịnyịnyị lẹ. Ụma nya ube ọlanyị, anụ angịnyị ehe a tị́ ka jẹ́-ẹ nwụ́ ham Am Ohe Oluhye myị́ wẹ kpong-kpong ene? Ịnyị, Ọngọlahị Ohe Oluhye a ya lẹ. Lee, ale, a tị́ ka jẹ́-ẹ ri ẹ-ẹga ọmwịịnyọ nyam Am Ohe Oluhye odehe ọlẹ myị́ wẹ kpong-kpong?

⁵⁰Lee, ánụ tị́ jẹ́ yẹkẹẹ, Am Ohe Oluhye kpakpakpa, a ri Ọngọ họ ang myị́ ang wuu lẹ ka?’ ”

⁵¹Ọọwa lẹ, iSitivin a myịmyị byaa yẹkẹẹ, “Anụ wo mẹ! Anụ ri angị la egbeju-ọngịrị lụmẹ. Anụ myịmyị la ọkịlẹtụ ọdịyọ dịyọ bala o-ju ụrụ akpọlọ ẹ-ẹga nya ẹla nya Ohe Oluhye lụmẹ ịnyịnyị. Ịnyị a du kanụ kaa pwa ihi nya ẹla nya Olegu Ịgọgọ nya Ohe Oluhye ojuju ụka myị́ ụka ịnyị lẹ. Jaabwọ ká adanụ igogo anyị ri angị la egbeju-ọngịrị lụmẹ, ọọwa, anụ tịtị wẹẹ họ ụkụrwọ nyaa ịnyịnyị lẹ.

⁵²Chajị, ọlọmwụ nya Ohe Oluhye oyina, a tị́ hi juwa ọlẹ ká adanụ igogo anyị á tụ pyịpyị ka ene? M me adanụ igogo anyị ịịwa, a tị́ ri angị kaa nwụ angịlẹ wuu ká Ohe Oluhye du ẹrụ lụka onyogo kaka ya je angịnyị ehe, chajị nya ọwẹwẹ nya ọnchẹ ọlabwẹla ọnyịịla nya Ohe Oluhye ọlẹ kọ juwa ka du ẹrụ warị ị-ịlahị! Ịnyị, ụka ká Ohe Oluhye du ọlabwẹla ọnyịịla ọọwa warị lẹ, anụ a tị́ ri angị pịrọọ-pịrị ha bala angị woo kpa kaka nwụ wẹ lẹlẹ.

⁵³M me anụ ayịdang kpangga a tị́ ri, angị ye ehile nya Ohe Oluhye bwu ụbwọ nya alegu-ẹrụ nya Ohe Oluhye! Ee lẹ, ịịyẹ a tị́ du kanụ tị myị ju ihi nya ehile ọọwa kpong-kpong kaka wẹ mẹ?”

⁵⁴Ụka ká alọjịra-jịra nya ịkọtụ ọgbahị nya ala iJuu wuu ịịwa wo ẹla oyaya nya iSitivin ọọwa lẹ, agbama nyaa a juwa wuru jahị da iSitivin lẹ, ị juwa wọ angịrị nyaa jwoo lẹlẹ.

⁵⁵Ma, ụka ọọwa lẹ, iSitivin ayịdang myị la ọngịrị nya Olegu Ịgọgọ nya ịlẹhị-ịlẹhị lẹ, ọ hu ẹhị nyamwụ rịrị kele ka epwoohe lẹ, ọ chẹhị kaka yẹ ahịgboo nya owuru wuru nya ogbo ọlẹbyẹbyị nya Ohe Oluhye e-epwoohe bala ọ-yẹ iJisọsị kọ godayị rịrị u-upwuriri nya Ohe Oluhye ịnyịnyị lẹlẹ.

⁵⁶Ọọwa lẹ, iSitivin a byaa yẹkẹẹ, “Anụ wo mẹ! Epwoohe wụrụ da dodo wẹ ham lẹ, m wẹẹ chẹhị kaka yẹ Ọnyị nya ọngịnyị ehe, kọ godayị rịrị u-upwuriri nya Ohe Oluhye lalẹ e-epwoohe lẹ!”

⁵⁷Ịnyị lẹ, iru nya angịịwa wuu a juwa chị́ arụ la omyi o-gboo, juwa yụbwọ nyaa kụ arụ lẹ, ị juwa rụnyẹ nya agbama jahị da iSitivin lawụlẹ wuu lẹlẹ.

⁵⁸Ịnyị, ị kele kaka gbile iSitivin kpehe hi epweji ọọwa kele ka ugumẹ ẹpwa nyaa lẹ, ị juwa da ajwọ mịlọọ ụ-ụwa lẹlẹ. Ọọwa lẹ, angịlẹ kị ri alibeenu nya ẹla ọọwa tụ iSitivin pyịpyị, a pwọ ịwụrụ nyaa hi okolobya ọhẹ ọlẹ kị wụrụ ịSọlụ ụbwọ, kọ ka kpẹhị rịraa gbaa lẹlẹ.

⁵⁹Ụka kị juwa kpa ajwọ ịịwa da mịla iSitivin ịnyịnyịịnyị, iSitivin juwa raabwọ ha Ohe Oluhye yẹkẹẹ, “Ọngọlahị iJisọsị, chuchuu, ye olegu nyam chẹẹ mẹ!”

⁶⁰Ịnyị, ụka ká iSitivin ya arụụ nyamwụ kụ eji lẹ, ọ juwa raabwọ lomyi o-gboo yẹkẹẹ, “Ọngọlahị ee, chuchuu, a nwụ angịlẹ uri kwiwa nya ọhọbịrị nyaa ọlẹ kpong-kpong koo!” Ụka ká iSitivin ya ịnyị kpá bwaaa lẹ, ọ chị ẹjẹ ụ-ụwa lẹlẹ.