Read idege ỤKỤRWỌ nya ALẸRỤ 8 Bible Online

ỤKỤRWỌ nya ALẸRỤ 8 - idege bible

ỤKỤRWỌ nya ALẸRỤ 8

¹Ọlẹng ọlẹ kị wụrụ ịSọlụ lẹ, ọ myị ju angịlẹ kị da ajwọ nwụ iSitivin ọọwa ịnyịnyị. Ịnyị lẹ, bwu ẹnụtụrụ ọlẹ kị da ajwọ nwụ iSitivin kpá lẹ, ọ-tụ pyịpyị ọtụka-ọtụka a kpeji jahị da ala ịchọọchị nya Ohe Oluhye i-iJerusalẹm lẹlẹ. Ọọwa lẹ, angịnyị nya Ohe Oluhye, a nyi epepe hi awụlẹ wuu, bwu iJerusalẹm rụ kele ka ịkịka nya ọpyị nya ala iJudiya wuu bala ọpyị nya ala ịSameriya, kẹnẹ-kẹnẹ kaka hi alẹrụ ọnyịịla angị iwo kụrụ imiiye ụbwaa kem i-iJerusalẹm lẹlẹ.

²Angịnyị nya Ohe Oluhye ịhyẹ ịlẹ kị juwa kpa ọkịlẹtụ nyaa lẹpwụ-lẹpwụ myị la Ohe Oluhye, a ri angịlẹ kị hu ogu nya iSitivin kpa kaka ju eji, juwa bida nyamwụ bala o-jida lomyi o-gboo nya ịlẹhị-ịlẹhị ụka ọọwa lẹ.

³Ma, ịSọlụ tị lẹ, ọ juwa maga kọ ka ta ịchọọchị nya Ohe Oluhye ayịreji gbanggbang. Ịnyị, ịSọlụ a juwa ga tụ ẹpwa-ẹpwa da, juwa gbile anyang bala alẹng ịlẹ kị ri angịnyị nya Ohe Oluhye, juwa waa kpa kaka ju agba lẹlẹ.

⁴Ụka ọọwa, angịnyị nya Ohe Oluhye ịlẹ kị nyi epepe, juwa kpa ẹla nya Ohe Oluhye ya dodehe je angịnyị tụ ẹga myị́ ẹga da ịnyịnyịịnyị.

⁵Ịnyị, iFilipu, a rụ kele ka epweji nya ala ịSameriya ọhẹ, juwa ya ẹla nya Ohe Oluhye dodehe jaa u-uhye nya ọngọlẹ ká ịKịrayịsị ri kpangga lẹlẹ.

⁶Ụka ọọwa, iru nya angịnyị lụmẹ-lụmẹ ịlụwa juwa kpa irya ookpokpo, tụchawụlẹ ke ụrụ la ẹla Ohe oyaya nya iFilipu ọọwa. Ụka kị wo ẹla ọọwa bala ọ-yẹ iru nya ang i-ju ẹjẹẹ ịlẹbyẹbyị ịlẹ ká iFilipu họ lẹ, ị ye ẹla Ohe oyaya ọọwa.

⁷Chajị, ị yẹ jaabwọ ká iFilipu juwa kpa ọngịrị nya Ohe Oluhye ku alegu inyibyi ịlẹ kị juwa gba kpehe leko-leko bwu ẹpwụ nya angịnyị ịlẹ ká alegu inyibyi ịịwa wu ụ-ụwa. IFilipu myịmyị họ angịlẹ ká une nya ịnyịrọ nyaa gbu ba, uda bala ọ-họ ikuku uda ịnyịnyị.

⁸Ọọwa lẹ, ọkẹkẹnị ọchịchị ọtụka-ọtụka a kpeji e-epweji nya ala ịSameriya ọọwa lẹlẹ.

⁹Ọlẹng ọhẹ juwa e-epweji nya ịSameriya ọọwa ká ẹnyị nyamwụ ri ịSayịmọn. ỊSayịmọn ọọwa ri ọngọ kaa mwụ ịnwa. Ịnwa ọmwụmwụ nyamwụ ọọwa ri ang ọ-la ala ịSameriya wuu ahịbwuu lụmẹ kaka kpoye lụka ọtata lẹ. ỊSayịmọn ọọwa ayịdang kaa wa ịlọmwụ nya ọngịnyị ọtụka lụmẹ kaka kpoye.

¹⁰Chajị nya ọọwa lẹ, ọng myị́ ọng nya alepweji nya ịSameriya wuu kaa ke ụrụ la ẹla oyaya nya ịSayịmọn ọọwa lụmẹ bwu angị ichiche nyaa wuu ju kele ká angị ịtụka-ịtụka nyaa wuu ịnyịnyị. Chajị, alụwa yẹkẹẹ, “ỊSayịmọn ọlẹ kpakpakpa a ri ọngịrị ọtụka-ọtụka nya Ohe Oluhye ọọwa lẹlẹ.”

¹¹Ala ịSameriya juwa kaa ke ụrụ la ẹla oyaya nya ịSayịmọn ọọwa lụmẹ. Chajị, ịnwa ọmwụmwụ nya ịSayịmọn pyaa ọnụ lụmẹ lụka ọtata lẹ.

¹²Ma, ụka ká iFilipu juwa ya ẹla nya Ohe Oluhye dodehe je angịnyị chajị nya ịpyị Adịrahụ nya Ohe Oluhye bala ang ọlẹ ká ẹnyị nya iJisọsị ịKịrayịsị ri lẹ, iru nya anyang bala alẹng lụmẹ-lụmẹ ị-ịSameriya myị la Ohe Oluhye bwula ọọwa. Ọọwa lẹ, ị hụ angịịwa enyi Ohe ụ-ụwa lẹlẹ.

¹³Ịnyị, ịSayịmọn ọọwa a myị la Ohe Oluhye ịnyịnyị lẹ, ị hwọọ enyi Ohe kpịlọ lẹlẹ. Ọọwa lẹ, ịSayịmọn ọwẹ a juwa yẹba iFilipu nya ịlẹhị-ịlẹhị lẹlẹ. Ụka ká ịSayịmọn juwa yẹ uda ọhọhọ bala ang i-ju ẹjẹẹ ịlẹbyẹbyị datị-datị ịlẹ ká iFilipu juwa họ lẹ, ọ lọọ ahịbwuu lụmẹ kaka kpoye.

¹⁴Ụka ká alẹrụ ọnyịịla nya ịKịrayịsị wo oja pwụ iJerusalẹm yẹkẹẹ, ala ịSameriya nyị ye ẹla nya Ohe Oluhye lẹ, ị du iPita bala ịJọn ẹrụ kele ka ụwa lẹlẹ.

¹⁵Ụka ká iPita bala ịJọn pwụ ụwa, ị raabwọ ju angịnyị nya Ohe Oluhye ịla ịSameriya ịịwa, chajị kị ka ye ọngịrị nya Olegu Ịgọgọ nya Ohe Oluhye.

¹⁶Chajị, ụka ọọwa lẹ, ọngịrị nya Olegu Ịgọgọ, á chị kụrụ ọngọngọhẹ nyaa lẹka. Ma, enyi Ohe ọhụhụ kẹnẹ-kẹnẹ, ị hwaa la ẹnyị nya Ọngọlahị iJisọsị kem wẹẹ lẹ.

¹⁷Ịnyị, ụka ká iPita bala ịJọn yụbwọ nyaa nịraa, kị raabwọ chajị nyaa lẹ, ala ịSameriya ịịwa a ye Olegu Ịgọgọ nya Ohe Oluhye lẹlẹ.

¹⁸Ụka ká ịSayịmọn ọọwa yẹ jaabwọ ká Olegu Ịgọgọ chị kụrụ ala ịSameriya ịịwa bwula ụbwọ ọlẹ ká alẹrụ ọnyịịla nya ịKịrayịsị ya nịraa, raabwọ jwaa lẹ, ịSayịmọn a hu okpoko ha iPita bala ịJọn lẹlẹ.

¹⁹Ịnyị, ọ byaa yẹkẹẹ, “Anụ ya ọngịrị ọwẹ ham mẹ. Chajị ká ọng myị́ ọng ọlẹ kam tịtị yụbwọ nịrọ, raabwọ jwoo lẹ, ká ọngọọwa tịtị ka ye ọhaha nya Olegu Ịgọgọ ịnyịnyị mẹ.”

²⁰Ma, iPita wẹ byoo yẹkẹẹ, “ịSayịmọn, wo mẹ! Ahụ bala okpoko nyang ọwẹ ka ta ayịreji, chajị nyọlẹ ká wẹẹ me irya yẹkẹẹ, ọwa nyị ka jẹ́-ẹ ra ang ọlẹ ká Ohe Oluhye kaa ya ga ha angịnyị ehe lokpoko myị́.

²¹Chajị nya ọọwa lẹ, ịSayịmọn, á bá ịngịngịhyẹ bá la tahị lee ọ-la ẹlẹlẹhẹ ka ya ẹ-ẹpwụ nya ụkụrwọ nya Ohe Oluhye nyahị ọlẹ kpong-kpong ka. Chajị, ọkịlẹtụ nyang á la kpakpa ị-ịlahị nya Ohe Oluhye ka.

²²Lẹ, yẹ irya da bwu ẹpwụ nya ọhọbịrị ọhọhọ nyang ọwẹ lẹẹlẹẹ mẹ. Ká raabwọ bịlẹ Ọngọlahị Ohe Oluhye kọ hịnyọhi irya omeme onyobyi ọlẹpwụ ọkịlẹtụ nyang ọwẹ hang mẹ, ịSayịmọn.

²³Chajị, m jẹ́ ká la ujujwo nya ijiiji onyobyi lụmẹ juwa ẹ-ẹpwụ nyang lẹẹlẹẹ. Ọnyọhị nya ọhọbịrị ọhọhọ kpangga a tị ri ịnyịnyị lẹ.”

²⁴Ịnyị, ịSayịmọn a wẹ byoo yẹkẹẹ, “IPita, anụ chuchuu, kanụ raabwọ ha Ohe Oluhye chajị nyam mẹ. Chajị ká ịngịngịhyẹ lẹpwụ nya ịlẹ ká ya wẹ wuu, ka họ ẹ-ẹga nyam kaka mẹ.”

²⁵Ụka ká iPita bala ịJọn anyị ri ibeenu nya ọhịhị onyeewe ọlẹpwụ nyaa kpá, kị ya ẹrụ ọnyịịla nya Ọngọlahị dodehe ụ-ụwa ịnyịnyị lẹ, ị rụ tịrẹkpẹ kele iJerusalẹm lẹlẹ. IPita anyị juwa kpa ẹrụ ọnyịịla nya Ohe Oluhye ya pyẹ tụ epweji epweji nya ala ịSameriya da ịnyịnyịịnyị lụka kị juwa jẹ rụ ka iJerusalẹm.

²⁶Olegu-ẹrụ nya Ohe Oluhye ọhẹ byi iFilipu ụka ọọwa yẹkẹẹ, “IFilipu, wuleji ká kịnyaa kele koye nya edii, ká jẹ tụ ụgbẹyị o-bwu iJerusalẹm kele ka ịGasa ọlaanyị da mẹ.” Ụgbẹyị nya ịGasa ọọwa da bwu ugbileji nya ọpyị ọchọrụ ọhẹ.

²⁷Ịnyị, iFilipu, a wuleji rụ kele ka ụgbẹyị ọọwa lẹ, ọ tọ ọlẹng nya ala Itiyopyiya ọhẹ ọlẹ kọ ri ọlẹng kaka lẹlẹ. Ọla Itiyopyiya ọọwa a ri olegbeju ọlẹ kọ kaa kpẹhị rịrị okpoko nya adịrahụ ọnyang nya ala Itiyopyiya ọlẹ kị wụrụ ịKandisi lẹ. Ọlẹng nya ala Itiyopyiya ọọwa kele ka iJerusalẹm kaka gbịgba ha Ohe Oluhye ụ-ụwa.

²⁸Ịnyị, iFilipu a chẹhị kaka yẹ ọlẹng ọọwa kọ juwa jẹ nya bwu iJerusalẹm, kọ hụhụ ẹ-ẹpwụ nya ang ọrụnyẹ ọlẹ ká anyịrẹ kaa gbile lẹlẹ. Ọlẹng ọọwa juwa kpa ụpwụ nya ọlọmwụ Ayịsaya wa lụka ọọwa.

²⁹Ịnyị lẹ, Olegu Ịgọgọ a byi iFilipu yẹkẹẹ, “IFilipu, kele kaka hụhụ ẹ-ẹpwụ nya ang ọrụnyẹ nya ọlẹng ọlaanyị tọọ mẹ.”

³⁰Ịnyị, iFilipu a rụnyẹ kele ka ẹga nya ọlẹng ọọwa lẹ, ọ wo jaabwọ ká ọlẹng ọọwa juwa wa ụpwụ nya ọlọmwụ Ayịsaya lẹ, iFilipu a tọọ wo yẹkẹẹ, “Ẹnwa, a jẹ́ etu nya ang ọlẹ ká wẹẹ wa kpong-kpong?”

³¹Ọlẹng ọọwa wẹ byi iFilipu yẹkẹẹ, “Anyanyị, m tị́ ka họ kam ka jẹ́-ẹ jẹ́ etu nyamwụ myị́, kọ ri ká ọngọngọhẹ á mọọ jẹm ene ka?” Ịnyị, ọlẹng ọọwa a byi iFilipu yẹkẹẹ, ahụ nyị kẹwẹ kaka hụhụ ẹ-ẹpwụ nya ang ọrụnyẹ nya ọọwa tọwa mẹ lẹlẹ.

³²Ẹga ọlẹ ká ọlẹng ọọwa juwa wa bwu, ẹ-ẹpwụ ụpwụ nya Ayịsaya lụka ọọwa yẹkẹẹ, “Jaabwọ ká ọkpịlọ ọlẹ kị wu juwa kpa kaka chị imyi kaa kele la ọnụ ujiji kem, bala jaabwọ ká ọkpịlọ ọlẹ kị juwa pwọ egbii ịlẹ kị kaa kpa họ ịpwụ tịtị kaa hu ujiji kem wẹẹ, ịnyị, ị wu ọlẹng ọọwa lẹ, ọ juwa dịraa la ọnụ ujiji lẹ, ọ ya ẹlẹlẹhẹ bwu nyamwụ kaka lẹlẹ.

³³Ị kpa ọlẹng ọọwa weji bwula oyoyi ọ-chị jwoo lụmẹ. Ị tị họọ họ ri kịrọrọ ịnyịnyị ẹ-ẹpwụ nya eje ọlala nyamwụ. Ọngọngọhẹ á juwa odehe ọlẹ ka wo ẹnyị ehe nyamwụ kpong-kpong ka, chajị, ị chị ọhịhị nyamwụ olodehe ọlẹ eku nwẹẹrịị bwula ọ-nwọọ nwụ.”

³⁴Ịnyị, ọngọ ri ọlẹng-ka ọọwa a byi iFilipu yẹkẹẹ, “Chuchuu, ya jem wẹẹ, ẹnwa. Oowo, ọlọmwụ ọwẹ a tị́ wẹẹ ya ẹla rụ́? Ọwa la ịlọmwụ ịnyị? Lee, ọngọ ọkịla ọhẹ tị́?”

³⁵Ịnyị, iFilipu a pyẹ ọnụ nyamwụ maa lẹ, ọ juwa dọmwụ nya ọ-kpa ẹla nya Ụpwụ Ịgọgọ ọọwa da ẹrụ ọnyịịla oyaya nyamwụ rụ́ iJisọsị wụlẹ ya je ọlẹng ọọwa lẹlẹ.

³⁶Ụka ká iFilipu bala ọlẹng ọọwa juwa jẹdịyẹ ụ-ụgbẹyị ọọwa ịnyịnyịịnyị lẹ, ị jẹ pwụ ẹgẹhẹ ká ẹmwụ nya enyi ji lẹ, ọlẹng ọwẹ a byi iFilipu yẹkẹẹ, “M me, ahị tị́ jẹ pwụ ẹga nya enyi lẹẹ lẹ? Ee lẹ, ịịyẹ a tị́ tụtụm ka ku iwe, du ká ka hụm enyi Ohe kaka mẹ?” [

³⁷Ọọwa lẹ, iFilipu a wẹ byoo yẹkẹẹ, “O hiigu. Ọ ri ká kpa ọkịlẹtụ nyang wuu myị la Ohe Oluhye lẹ aalẹ, ọ ka chịkpẹẹ, m ka hụng enyi Ohe myị́ lẹ.” Ọlẹng ọọwa wẹ byi iFilipu yẹkẹẹ, “Ee, m myị lẹ. M myị yẹkẹẹ, iJisọsị ịKịrayịsị kpakpakpa a ri Ọnyẹwẹ nya Ohe Oluhye ọọwa lẹlẹ.”]

³⁸Ịnyị, ọlẹng ọọwa a wu ang ọrụnyẹ nyamwụ ọwa godayị ụ-ụwa lẹ, iFilipu bala ọlẹng ọọwa a hireji, pwọ ju kele ka ẹpwụ nya enyi ọọwa lẹ, iFilipu a hụ ọlẹng ọla Itiyopyiya ọọwa enyi Ohe ụ-ụwa ịnyịlẹhị lẹlẹ.

³⁹Ụka kị gba kpehe bwu ẹpwụ nya enyi ọọwa kpá lẹ, Olegu Ịgọgọ nya Ohe Oluhye a kpa iFilipu rụ bwu ụwa lẹ, ọngọ ri ọlẹng-ka ọọwa, a yẹ iFilipu gụ ọọwa kpong-kpong kaka lẹlẹ. Ịnyị lẹ, ọlẹng ọọwa a juwa chị ọkẹkẹnị ọtụka-ọtụka, juwa jẹ rụ kele ka Itiyopyiya nyaa lẹlẹ.

⁴⁰Ọọwa lẹ, iFilipu a chẹhị kaka yẹ ịlọmwụ ị-ịpyị nya ala Asotọsị lẹlẹ. Ịnyị, iFilipu a chịpwụrụ bwu ụwa, juwa tụ epweji-epweji da ịnyịnyịịnyị, juwa ya ẹrụ ọnyịịla nya Ohe Oluhye je angịnyị, gbee, kọ jẹ kaka hi ehe ị-ịpyị nya ala iSisarịya lẹlẹ.