Read idege ALA IROM 10 Bible Online

ALA IROM 10 - idege bible

ALA IROM 10

¹Anụ anyadam ẹ-ẹpwụ nya ịKịrayịsị, ang ọlẹ kọ kaa hám ẹ-ẹpwụ ọkịlẹtụ nyam bala abwọ ọlẹ kam kaa rị ha Ohe Oluhye, chajị nya ala iJuu anyadam anyị ri, kị ka jẹ́-ẹ wu ọchịda nya Ohe Oluhye ọyị myị́.

²Chajị, am ayịdang ri ibeenu nyaa yẹkẹẹ, ị la ila ọchịchị ẹ-ẹga nya ịgba ọgbagba ha Ohe Oluhye lụmẹ. Ma, ị́ tị jẹ́ gbịgba ọọwa ba ang ọjẹ́jẹ chajị nya Ohe Oluhye ọlẹ kọ ri ịnya ịlẹhị-ịlẹhị jẹ myị́ kpong-kpong ka.

³Chajị, bwula ọlẹ kị jẹ́ jaabwọ kị ka bwu wu abwẹla ọnyịịla nya Ohe Oluhye ayịdang ọyị kaka lẹlẹ, ị mwọọgịlẹ da ụgbẹyị nya abwẹla ọnyịịla nya ịlaa datị hi ịnya Ohe Oluhye. Ọọwa lẹ, ị myị kpa ịlaa ka ekpeleji nya ụgbẹyị ọ-ka kpa wu abwẹla ọnyịịla nya Ohe Oluhye ọọwa ọyị kaka, lẹlẹ.

⁴Chajị, ịKịrayịsị warị kaka mwụ ọngịrị nya ehile nya iMosisi angịrị, chajị ká Ohe Oluhye ka jẹ́-ẹ wa angịlẹ wuu kị myị la ịKịrayịsị ọọwa nya alabwẹla ọnyịịla ị-ịlahị nya ịlọmwụ lẹ.

⁵Chajị, iMosisi chabwọ nya abwẹla ọnyịịla ọhọhọ ị-ịlahị nya ehile nya Ohe Oluhye ịịlẹ: Ọng myị́ ọng ọlẹ kọ họ ehile nya Ohe Oluhye jịra kpẹẹkpẹẹ lẹ aalẹ, ọngọọwa ka hịhị bwula ọọwa lẹ!

⁶Ma, ị tị ya ẹla rụ́ abwẹla ọnyịịla nya Ohe Oluhye ọlala bwula ọmyịmyị ịịlẹ, “Anụ juwa ya ẹ-ẹpwụ nya ọkịlẹtụ nyanụ yẹkẹẹ, ‘Oowo a tị́ ka kele ka epwoohe hahị, kaka kpa ịKịrayịsị hireji bwu ụwa wahị?’ ka.

⁷Lee, o-juwa yẹkẹẹ, ‘Oowo a tị́ ka hireji ka ejegu kaka gba ịKịrayịsị kpehe bwu ẹpwụ nya angị gbugbu wahị mẹ?’ ka ịnyịnyị!”

⁸Chajị, ẹla ọlẹ kị ya u-uhye nya ọọwa ri yẹkẹẹ, “Ẹla nya Ohe Oluhye ọọwa jung chwẹẹ wẹ. Ọ dọmwụ wẹ ẹ-ẹpwụ nya ọnụ nyang bala ọkịlẹtụ nyang.” Ẹla ọọwa kpangga a ri ẹrụ ọnyịịla chajị nya ọmyịmyị ọlala ẹ-ẹga nya Ohe Oluhye ọlẹ kahị jam kpa ya pyẹ lẹ.

⁹Chajị, ó-ri ká ka myị-ị kpa ọnụ nyang ya iJisọsị Ọngọlahị dodehe lala Ọngọlang la, ká ka myị kpa ọkịlẹtụ nyang wuu myị yẹkẹẹ, Ohe Oluhye nyị wule ịKịrayịsị ọọwa eji bwula igu ịnyịlẹhị lẹ aalẹ, a ka la ọchịda nya ugbodu okpukpuru nyang lẹ.

¹⁰Chajị, ọmyịmyị ọlala ẹ-ẹpwụ nya ọkịlẹtụ nyahị a du ká Ohe Oluhye kaa kpa wa angị myịmyị ịlịnyị nya alabwẹla ọnyịịla ị-ịlahị nya ịlọmwụ lẹ. Ọnụ nyahị, ọ tị kpa ya ịKịrayịsị ọọwa dodehe lala Ọngọchịda nyahị, a tị kaa kpahị kaka ye ọchịda nyamwụ ọọwa ịnyịnyị lẹlẹ.

¹¹Chajị, Ụpwụ Ịgọgọ yẹkẹẹ, “Ọng myị́ ọng ọlẹ wuu kọ myị la Ọngọlahị lẹ aalẹ, oyoyi, á ka ju ọngọọwa kpá ẹnẹnẹhẹ kaka.”

¹²Chajị, ịngịngịhyẹ á ri ang ọdatị ẹ-ẹpwarịrị nya ala iJuu bala ala iJentayịlị ị-ịlahị nya Ohe Oluhye kpong-kpong ka. Chajị, Ọngọlahị ayịdang ookpokpo ọọwa a ri Ayịbaba nyahị ahị angị myịmyị wuu lẹ. Ọwa-à tị kaa chụ ụdụ nya ahị ọwawa nyamwụ wa kụrụụhị ahị angịlẹ wuu kahị kaa be ẹkọ wụrụ ẹnyị nyamwụ bwula ọmyịmyị ọlala nyahị lẹ.

¹³Chajị, ị da kpehe ụ-Ụpwụ Ịgọgọ yẹkẹẹ, “Ọng myị́ ọng ọlẹ wuu kọ juwa kpa ọmyịmyị ọlala be ẹkọ wụrụ ẹnyị nya Ọngọlahị lẹ aalẹ, ọngọọwa ka la ọchịda lẹ.”

¹⁴Ma, anyanyị, angịnyị ehe a tị́ ka jẹ́-ẹ be ẹkọ wụrụ ẹnyị nya Ọngọlahị ọọwa myị́, kọ ri kị myị lọọ ene ka? Lee, anyanyị, ị tị́ ka jẹ́-ẹ myị la Ọngọlahị ọọwa myị́, kọ ri kị wo ẹlẹlẹhẹ chajị nyamwụ ene ka ịnyịnyị? Lee, anyanyị, angịnyị ehe a tị́ ka jẹ́-ẹ wo ẹla u-uhye nya Ọngọlahị ọọwa myị́, kọ ri ká angị ya ẹla nya Ohe Oluhye pyẹ, á ya jaa ene ka?

¹⁵Lee, anyanyị, angịnyị a tị́ ka juwa ya ẹla nya Ohe Oluhye pyẹ rụ́ Ọngọlahị ọọwa myị́, kọ ri ká Ohe Oluhye á daa ẹrụ kpehe ene ka? Chajị, ị da kpehe ụ-Ụpwụ Ịgọgọ yẹkẹẹ, “Anụ chẹhị kaka yẹ jaabwọ ká ẹpẹtẹ ọ-ba ọpyị nya angị ya ẹrụ ọnyịịla nya Ohe Oluhye pyẹ há ụhị lụmẹ kaka ba alẹ wẹẹ!”

¹⁶Ma, angịnyị wuu á tị myị juwa ju ihi nya ẹrụ ọnyịịla ọọwa ka! Chajị, Ayịsaya ya dodehe yẹkẹẹ, “Ọngọlahị ee, o-owo a tị́ myị la ẹla ọlẹ kahị ya jaa chajị nyang ene?”

¹⁷Lẹ, ẹla nya Ohe Oluhye owowo a kaa kpa ọmyịmyị ọlala jụ ka ẹpwụ nya ọngịnyị ehe lẹ. Ẹla nya Ohe Oluhye oyaya pyẹ rụ́ ịKịrayịsị a tị kaa kpa ẹla owowo ọọwa ka ẹpwụ nya ọngịnyị ehe ịnyịnyị lẹlẹ.

¹⁸Ma, ịtọ ọtọtọ nyam ri yẹkẹẹ, ee lẹ, anụ ya ká angịnyị ehe á wo ẹrụ ọnyịịla ọọwa lẹka? Nya ịlẹhị ịnyị, ị wo ẹrụ ọnyịịla ọọwa lẹ. Chajị Ụpwụ Ịgọgọ ya ẹ-ẹgẹlẹ yẹkẹẹ, “Omyi o-ya ẹla nya angị ya ẹrụ ọnyịịla pyẹ kpehe nerii kele chị odehe wuu ọnụ lẹ. Ẹla nya Ohe Oluhye oyaya pyẹ nyaa tị pwụ ọbaba nya odehe ọlẹ wuu ịnyịnyị lẹ.”

¹⁹Ịtọ ọkịla ri yẹkẹẹ, anụ ya ká ala Isirẹlụ ayịdang á jẹ́ ang chajị nya obyi omeme nya Ohe Oluhye ọlẹ kpong-kpong ka? Chajị, Ohe Oluhye ayịdang kpa iMosisi ya ẹla dodehe je ala Isirẹlụ yẹkẹẹ, “Am Ohe Oluhye ka họ kaanụ ala Isirẹlụ ka la ijiiji ẹ-ẹga nya angịlẹ ká, ịnọ, kị ri alụpwọma nyam Am Ohe Oluhye lala anụ ene-ene ka. M ka họ ịnyị kam ka du agbama junu bwula alepwoja ịkịla ịịwa ịnyịnyị.”

²⁰Ayịsaya myịmyị dọmwụ kpa ẹjẹ ọbyịbyị ya ẹla rụ́ Ohe Oluhye lẹẹ ẹ-ẹgẹlẹ yẹkẹẹ, “Angịlẹ kị juwa tịtọ nyam Am Ohe Oluhye ene-ene ka, a mwọọgịlẹ dachichi yẹm lẹẹ lẹlẹ. M tị mwọọgịlẹ chị ịlọm ehe mẹjẹ angịlẹ kịịwa ayịdang á dọmwụ bịlẹm bịlẹ nya ọọwa ene kaka ịnyịnyị.”

²¹Ma, Ohe Oluhye tị ya ẹla rụ́ ala Isirẹlụ lẹẹ ẹgẹlẹ yẹkẹẹ, “Am Ohe Oluhye nịra ụbwọ ọnahị nyam kpaa, bwu ụtụrụ-ụtụrụ gbee ká obyi hi, ha angịlẹ kịịwa ayịdang pwa ihi o-jum ju bala o-ri angị ya ẹla tụm pyịpyị bwula egbeju ọnyọọngịrị ọlala lụmẹ nyaa lẹ.”