Read idege ALA IROM 11 Bible Online

ALA IROM 11 - idege bible

ALA IROM 11

¹Ịtọ ọtọtọ nyam ri yẹkẹẹ, ee lẹ, ọọwa ri yẹkẹẹ, Ohe Oluhye pwa ala Isirẹlụ angịnyị nyamwụ wuu ji ẹkpẹ daa gbanggbang tịtị lẹ? Ịgọgọ ẹnẹnẹhẹ! Chajị, am ayịdang kpangga ká Ohe Oluhye chụchụ ha ịlọmwụ lẹẹ lẹ, ala Isirẹlụ, m ri lẹ. M ri ọnyị nya Ebiraham adahị ogogo ịnyịnyị! M bwu imwawụ nya iBenjamịn.

²Ala Isirẹlụ, angịnyị nya Ohe Oluhye, ịlẹ kọ jéjé gbalẹ-gbalẹ ene kọọ chwaa ha ịlọmwụ lẹ, ọ́ pwaa ji ẹkpẹ nyamwụ daa kpong-kpong ka! Lee, anụ ayịdang á tị́ jẹ́ ang ọlẹ kị da ụ-Ụpwụ Ịgọgọ rụ́ Ịlayịja, jaabwọ kọọwa ayịdang raabwọ bịlẹ Ohe Oluhye chajị nya ala Isirẹlụ ịlụka nyamwụ ka? Chajị, ọ byi Ohe Oluhye yẹkẹẹ,

³“Ọngọlahị Ohe Oluhye, ị nwụ alọmwụ nyang wuu lẹ! Ị tị bịrị ẹga ọkịla iya ịgọgọ nyang hụrụ ịnyịnyị wuu lẹ! Am ụbwọm kẹnẹ-kẹnẹ a ri ọlọmwụ nyang ọlẹ kọ hi lẹlẹ. Ị tị myịmyị jam tịtọ nya ọhịhị nyam ịnyịnyị lẹ!”

⁴Ma, ụka kọ ya ịnyị lẹ, ịịyẹ a tị́ ri ọwẹwẹ nya Ohe Oluhye? Ohe Oluhye wẹ byi Ịlayịja yẹkẹẹ, “Wo mẹ! M chụ ala Isirẹlụ ịhyẹ ha ịlọm juwa lala angị ụnọ iwo kụrụ irwiye da angịnyị angị ohu iwo chiriri juwa ịlẹ kị myị hiri ụrụụ nyaa kpẹẹ kụ e-eji gbịgba ha ohe ojiga ọlẹ kị wụrụ ịBaalụ kpong-kpong ka.”

⁵Ịnyịnyị, ọ la lụka ọlẹẹlẹẹ ẹ-ẹga nya ala Isirẹlụ lẹ. Chajị, Ohe Oluhye kpa ahyẹẹrwẹrwa nyamwụ chụ angịhyẹ nyaa bwula ọnahị ha ịlọmwụ juwa lẹẹlẹẹ ịnyịnyị.

⁶Ma, ang odudu ká Ohe Oluhye kpa chwaa ha ịlọmwụ ịnyị, ri ahyẹẹrwẹrwa bwu la ọnahị nyamwụ kem. Aajị nya ịngịngịhyẹ ọlẹ kịịwa ayịdang họ ene kpong-kpong ka. Chajị, ịnọ, ó-ri ká ọchụchụ nya Ohe Oluhye ọlẹ kọ kaa chụ, á kaa bwula ụkụrwọ ọhọhọ nya angịnyị ehe lẹ, ịnọ, ọchụchụ ọọwa á ka ri, ang nya ọgahị ọnahị o-bwula ahyẹẹrwẹrwa nyamwụ nya ịnyịlẹhị kpong-kpong kaka.

⁷Ee lẹ, anyị, ahị tị́ ka ya wẹ mẹ? Ọọwa ri yẹkẹẹ, alụpwọma nya ala Isirẹlụ lẹpwụ-lẹpwụ lẹ, ị́ ye ahị ọwawa nya Ohe Oluhye ọlẹ kị juwa tịtọ myị́ kaka. Ma, angị ịmanyị ịmanyị lẹpwụ nyaa ịlẹ ká Ohe Oluhye chụchụ ha ịlọmwụ tị ye lẹ. Ọọwa lẹ, angị hịhị nyaa, a ngịrị ọkịlẹtụ nyaa ọngịrị jahị da ahị ọwawa ọọwa mwọọgịlẹ lẹlẹ.

⁸Ọ tị họ ịnyị pwoku ẹla ọlẹ kị da kpehe lẹẹ ụ-Ụpwụ Ịgọgọ yẹkẹẹ, “Ohe Oluhye hu olegu nya une ọnọnọ haa, bala ọ-ya ẹhị ọlẹ kị ka jẹ́-ẹ kpa yọyị kaka haa, bala ọ-ya ụrụ ọlẹ kị ka jẹ́-ẹ kpa wo ẹla kaka haa pyịyọọ gbee daalẹ ọlẹ lẹ.”

⁹IDevidi ya ẹla rụ́ ala Isirẹlụ ẹ-ẹgẹlẹ ịnyịnyị yẹkẹẹ, “Ká ọjịra-jịra nya ang iriri ịtụka nyaa ịwẹ a yẹ ri ori owuwu haa bala o-ri ọnya owuwu haa, bala o-ri ang ọkịlata mileji nyaa, bala o-ri ang akama okwiwa nya ọ-jẹ́ họhọ-ka nyaa wuu ịnyịnyị mẹ.

¹⁰Ká ugbẹhị ọ-kpa yọyị nyaa a chị owu kpịlẹ, chajị kị ka jẹ́-ẹ kpa yọyị yẹẹyẹẹ kaka, mẹ. Ká abẹkpẹ nyaa a kpụ igu kị juwa hiri kpẹẹ pyịyọọ e-ekpeleji nya olo nya akama ọtụka ọyẹyẹ nyaa mẹ.”

¹¹Ịtọ ọtọtọ nyam ri yẹkẹẹ, ee lẹ, ọlẹ ká ala Isirẹlụ chị ụchụụ mileji ịnyị lẹlẹ, ọọwa ri ayịreji ọtata haa pyịyọọ lẹ? Ohe Oluhye a pwa ang onyobyi ọlịnyị! Ma, bwula ọhọbịrị nya ala Isirẹlụ, ọ họ ká ọchịda nya Ohe Oluhye hi pwụ ala iJentayịlị lẹ, chajị ká ọọwa ka jẹ́-ẹ du ala Isirẹlụ ju bwula ijiiji nya ala iJentayịlị ịịwa ọyẹyẹ.

¹²Ee lẹ, ó-ri ká ọhọbịrị ọhọhọ nya ala Isirẹlụ á kpa ụdụ nya ahị ọwawa nya Ohe Oluhye kịla alodehe wuu, ká eji ọmịla-mịla nyaa ẹ-ẹpwụ nya ọmyịmyị ọlala á kpa ụdụ nya ahị ọwawa nya Ohe Oluhye kịla ala iJentayịlị ịnyịnyị lẹ aalẹ, anyanyị, ahị ọwawa ọtụka a tị́ ka ji kaka ba ha alodehe ọlẹ wuu lụka ọlẹ ká ala Isirẹlụ wuu lẹpwụ-lẹpwụ tịtị ka juwa ẹ-ẹpwụ nya ụdụ nya ahị ọwawa nya Ohe Oluhye ọọwa ịnyịnyị?

¹³M jam ya ẹla ọlẹ tanụ anụ ala iJentayịlị lẹẹlẹẹ lẹ. Chajị jaabwọ kaam ayịdang ri ọlẹrụ ọnyịịla ọlẹ hanụ anụ ala iJentayịlị lẹ, m jam hu iwe-ahụrụ nya ụkụrwọ nyamwụ ọọwa hwaa kele ka uhye lẹẹlẹẹ lẹ.

¹⁴Chajị, ọhẹka, ọọwa ka du ala iJuu nyahị ịhyẹ ju, du kị ka bwula ijiiji nyanụ anụ ala iJentayịlị ọyẹyẹ kaka wu ọchịda nya Ohe Oluhye ọyị myị́ ịnyịnyị.

¹⁵Chajị, ó ri ká o-ji ẹkpẹ da ala iJuu nya Ohe Oluhye, á ri ang ọ-kpa alodehe ịkịla wuu kaka họ okpunyi bala Ohe Oluhye myị́ lẹ aalẹ, ịịyẹ oyeye nya ala iJuu tịrẹkpẹ ka ẹga nya Ohe Oluhye, a tị́ ka ri tịtị ịnyịnyị? Ọ ka ri ọhịhị oyeye ha angị gbugbu ị-ịlahị nya Ohe Oluhye tị tị lẹ!

¹⁶Chajị, ó-ri ká ang-abwọ ịlẹ kị ya yi ju lawụlẹ nyọka kpa họ ịkaa, á ri ang ọlịgọgọ ene lẹ aalẹ, abẹ nya ịkaa ịlẹ wuu kị ka họ bwulaa tịtị ka la ịgọgọ ịnyịnyị lẹ. Ọ́ tị ri ká ụtẹ nya okoji á tị la ịgọgọ ene lẹ aalẹ, abwọ nyamwụ ịlẹ kị ka bwu kpehe wuu tịtị ka la ịgọgọ ịnyịnyị lẹ!

¹⁷Ala iJuu ịwẹ lala ọmwụ nya okoji ọlẹ kị wụrụ olivu kị wu ẹ-ẹrụ. Anụ ala iJentayịlị tị lala okoji nya olivu ọháha-ka ọlẹpwamẹ. Lẹ, jaabwọ ká Ohe Oluhye hụla abwọ nya olivu ọlẹrụ nyamwụ ịhyẹ cheeji, du kọ kpanụ anụ ala iJentayịlị kaka hịla ọmwụ nya okoji olivu ọlẹrụ nyamwụ wẹ, du kanụ jẹ́ wẹẹ gbile enyi nya ọhịhị bwu ụwa lẹlẹ,

¹⁸anụ juwa chị ogu ju abwọ nya olivu ọlam-ọlam ọọwa tị tị kaka. Chajị, ó-ri kanụ juwa chị ogu ịnyị aalẹ, anụ kpịtịya mẹ. Aanụ ayịdang a wu ụtẹ nya okoji ọọwa kpa wẹ ka. Ma, ụtẹ nya okoji ọọwa a wẹẹ wunu kpa lẹ.

¹⁹Ọhẹka, anụ ka wẹ byim yẹkẹẹ, “Ee lẹ, m me, ị tị́ hụla abwọ nya okoji olivu ọọwa, chajị kị ka jẹ́-ẹ yahị ahị hịla ịnịna nya okoji ọọwa?”

²⁰Ee, ọọwa ri ịnyịlẹhị. Ma, ang odudu ká Ohe Oluhye hụlaa ịwa cheeji ịnyị tị ri ọmyịmyị ọlala ka nyaa. Ma, anụ ala iJentayịlị tị lẹ, ọmyịmyị ọlala nyanụ anụ kem, a ri ang o-wunu godayị kpakpakpa wẹ lẹ! Chajị nya ọọwa lẹ, anụ hi ọbọọchẹ kpong-kpong kaka. Ọkọkọ nya ọọwa lẹ, anụ juwa godayị ẹ-ẹpwụ nya uhi nya Ohe Oluhye ojuju kpẹẹkpẹẹ mẹ.

²¹Chajị, ó-ri ká Ohe Oluhye á byẹjẹ hụla abwọ nya olivu ọlam-ọlam ọlẹrụ nyamwụ cheeji o-oluhye nya ọ-jẹ́ họ-ka nyaa ịwa ala iJuu myị́, tụbwọ aalẹ, Ohe Oluhye á ka kọ ẹhị junu kpong-kpong ka ịnyịnyị, kọ ri kaanụ ala iJentayịlị á jẹ́ họ ka, lala ịwa-ịwa.

²²Lẹ, anụ yẹhị ba, jaabwọ ká ọnahị nya Ohe Oluhye bala ụbwọ ọnyọọngịrị nyamwụ kaa bwu họ ụkụrwọ lawụlẹ wẹ mẹ. Ụbwọ ọnyọọngịrị nya Ohe Oluhye chị ehe jahị da ala iJuu ịlẹ kị mileji bwula ọmyịmyị ọlala ka nyaa ẹ-ẹga nyamwụ lẹ. Ma, ọ tị mẹ ọnahị nyamwụ jẹ ẹ-ẹga nyanụ anụ lẹ, kọ ri kanụ ka myị-ị juwa kele kịlahị hiigu-hiigu ẹ-ẹpwụ nya ọnahị nyamwụ ọọwa bwula ọmyịmyị ọlala tị ịnyị! Ma, ọ́ tị ri kanụ ka myị-ị họ ịnyị kaka lẹ aalẹ, Ohe Oluhye a tịtị ka hụlaanụ anụ deeji hi ịlọmwụ ịnyịnyị lẹlẹ.

²³Chajị, ó ri ká ala iJuu ịịwa á dọmwụ myị tịrẹkpẹ hi ụgbẹyị nya ọmyịmyị ọlala ka nyaa ọọwa, kị myị la Ohe Oluhye wẹẹ aalẹ, Ohe Oluhye ka myịmyị-ị̀ ye aa tịrẹkpẹ kele ka iwe-ahụrụ onyogo nyaa ọọwa myị́ wẹẹ! Chajị, Ohe Oluhye la ọngịrị nyọka jẹ́-ẹ ye aa lụka oheeye ịnyị myị́!

²⁴Chajị, ó-ri kọ chịkpẹẹ ha Ohe Oluhye nyọka hụlaanụ anụ ala iJentayịlị ịlẹ kanụ ku ọmwakpa nya olivu ọháha-ka ọlẹpwamẹ kpa kaka hịla okoji olivu ọlam-ọlam ọlẹrụ nyamwụ myị́, ọlẹ ịnọ kọ ri ang okpolo la ọhọhọ, tụbwọ aalẹ, anyanyị, anụ tị́ me irya kọ ka jẹ́-ẹ chịkpẹẹ ha Ohe Oluhye kaka ba ẹ-ẹga nyọka tịrị ala Isirẹlụ ịlẹ kị ri abwọ nya olivu ọọwa ene-ene ẹkpẹ, kaka hịla ịnịna nya okoji olivu ọọwa?

²⁵Anụ anyadam ẹ-ẹpwụ nya ịKịrayịsị, m tịtọ kanụ ka jẹ́ ẹla nya ịlẹhị okpori-kpori nya Ohe Oluhye ọlẹ yẹẹyẹẹ, chajị kanụ tụtụm ka juwa la irya nya ọ-kpa ịlọnụ ka uhye gidogbo ohideeji kaka. Ẹla ọọwa ri yẹkẹẹ, ọkịlẹtụ ọnyọọngịrị a kpa ala Isirẹlụ ịwẹ wẹ ẹkpẹ ị-ịlahị nya ahị ọwawa nya Ohe Oluhye wẹ lụka o-kpii, gbee pwụ ụka ọlẹ ká iru nya ala iJentayịlị ịlẹ ká Ohe Oluhye tịtọ kọ ka be ẹkọ wụrụ ha ịlọmwụ ka warị jịra kpá ene lẹ!

²⁶Ụka ká ọọwa á họ jịra kpá lẹ, Ohe Oluhye a ka chị ala Isirẹlụ wuu da ịnyịnyị lẹlẹ. Chajị, ị da kpehe ụ-Ụpwụ Ịgọgọ ẹ-ẹgẹlẹ yẹkẹẹ, “Ọngọchịda ọọwa juwa ka bwu epweji nya ịSayọn kpehe. Ọngọọwa a ka tụ ibyi nya ọngịnyị nya Ohe Oluhye oriri-ka wuu nya alụpwọma nya iJekọbụ kịnyaa haa ịnyịnyị lẹlẹ.

²⁷Ọọwa lẹ, m ka họ ọnụ ọmyịmyị ọlẹ kaam Ohe Oluhye myị haa la iro ọnwanwa jịra haa lụka ọlẹ kam ka yịlẹ ịhọbịrị ịhọhọ nyaa wuu haa kpá ị-ịlahị lẹlẹ.”

²⁸Ẹ-ẹga ká ẹrụ ọnyịịla ọlẹ ji lẹ, ala Isirẹlụ ri aluji nya Ohe Oluhye bwula ọmyịmyị ọlala ka nyaa. Ma, ọọwa tị ri apyobwuna hanụ anụ ala iJentayịlị lẹ! Ma, ẹ-ẹga nya ọchụchụ nya Ohe Oluhye tị lẹ, ịwa ayịdang ri angị há Ohe Oluhye há nya ịlẹhị-ịlẹhị, chajị nya ọnụ ọmyịmyị ọlẹ ká Ohe Oluhye myị ha adaa ịgọgọ anyị ene-ene.

²⁹Chajị, irya ọlẹ ká Ohe Oluhye kaa kpa hu ọhaha ọnahị nyamwụ ga ha angịnyị ehe bala ọ-kaa kpa chụ angịnyị ehe ha ịlọmwụ lẹ, irya ọọwa á jẹ́ kaa yẹda kpong-kpong kaka.

³⁰Chajị, jaabwọ kaanụ ayịdang á ri angị ju ihi nya Ohe Oluhye kpong-kpong ka ẹnẹhẹ lẹ, kanụ tị ye ahyẹẹrwẹrwa nya Ohe Oluhye lẹẹlẹẹ, bwula ihi ojuju-ka nya ala iJuu lẹ wẹẹ,

³¹ịnyịnyị-ịnyịnyị, Ohe Oluhye a tịtị ka yẹ ala iJuu ịlẹ kị myị wẹẹ jwoo ihi lẹẹlẹẹ ka, ahyẹẹrwẹrwa ịnyịnyị ị-ịlahị jaabwọ ká Ohe Oluhye bwu yẹnụ anụ ahyẹẹrwẹrwa lẹẹlẹẹ wẹ lẹlẹ.

³²Chajị, Ohe Oluhye ya eje nya ihi ojuju-ka, ẹ-ẹga nyamwụ wu alodehe wuu lẹpwụ-lẹpwụ, chajị kọ ka jẹ́-ẹ yẹ alodehe ịịwa wuu ahyẹẹrwẹrwa ịnyịnyị lẹ.

³³Oo! Anụ yẹ jaabwọ ká ụdụ bala ẹla ọjẹ́jẹ bala ang ọjẹ́jẹ nya Ohe Oluhye nyahị la kpori-kpori kaka ba wẹẹ! Oowo a tị́ ka jẹ́-ẹ jẹ́ ang chajị nya eje ọchịchị nya Ohe Oluhye wuu myị́? Oowo, a tị́ ka jẹ́-ẹ jẹ́ ang chajị nya ụgbẹyị ọlẹ ká Ohe Oluhye kaa bwu kpa họ ụkụrwọ nyamwụ kpeji kpá myị́ ịnyịnyị?

³⁴Chajị, ọ la jaabwọ ká Ụpwụ Ịgọgọ ya lẹẹ ẹ-ẹgẹlẹ yẹkẹẹ, “Oowo, a tị́ ri ọngọ jẹ́ irya ọlẹpwụ nya Ọngọlahị Ohe Oluhye? Lee, o-ri ọngọ kaa chị Ohe Oluhye eje-obyi myị́?

³⁵Lee, o-owo a tị́ ri ọngọ ya ịngịngịhyẹ kpịla Ohe Oluhye kpụ ká ọngọọwa ka jẹ́-ẹ myịmyị-ị̀ ye tịrẹkpẹ bwu ẹga nya Ohe Oluhye wẹẹ?”

³⁶Chajị, Ohe Oluhye ayịdang a ri Ọngọ họ ang myị́ ang wuu lẹ. Ang myị́ ang wuu ji bwu lọọ. Ọ tị họ ang myị́ ang wuu ha ịlọmwụ ịnyịnyị. Ogbo a juwa ha Ohe Oluhye ọọwa pyịyọọ pwụ ụka myị́ ụka mẹ. Amẹn.