Read idege ALA IROM 12 Bible Online

ALA IROM 12 - idege bible

ALA IROM 12

¹Chajị nya ọọwa lẹ, anụ anyadam ẹ-ẹpwụ nya ịKịrayịsị, m jam bịlẹnụ bwula ahyẹẹrwẹrwa ọtụka nya Ohe Oluhye, kanụ ka hu ugbinyịrọ nyanụ wuu ya kịla iya ọlahị-lahị ha Ohe Oluhye bwula ịgọgọ ọlala la ụgbẹyị ọlẹ ká Ohe Oluhye ka jẹ́-ẹ yenu mẹ. Chajị, ọlịnyị kpangga a ri ịgba ọgbagba ha Ohe Oluhye ọkpẹẹkpẹẹ bwu ẹpwụ nya olegu opwoku lẹlẹ.

²Anụ juwa ba abwụma nya ọhịhị onyobyi nya alodehe ọlẹ jẹ, juwa kpa họ abwẹla nyanụ anụ kpong-kpong ka. Ma, ọkọkọ nya ọọwa lẹ, anụ́-ụ juwa la ọ-nwụ ma nya ọkịlẹtụ bwula irya nya ọhịhị onyeewe ọlala o-bwu ẹga nya Ohe Oluhye kem mẹ. Chajị, kanụ ka jẹ́-ẹ jẹ́ ang ọlẹ kọ ri ang ọnyịịla datị bala ang ọlẹ kọ chịla-chịla bala ang ọlẹ kọ la kpẹẹkpẹẹ datị ẹ-ẹpwụ nya irya nya Ohe Oluhye ayịdang hiigu-hiigu mẹ!

³Bwula ọhaha ọnahị nya Ohe Oluhye ọlẹ kọ ya ham, m jam bịlẹ ọng myị́ ọng lẹpwarịrị nyanụ wuu yẹkẹẹ, anụ juwa me irya oluhye gidogbo ju ịlọnụ kpoye nya iwe-ahụrụ nya ịlọnụ kpong-kpong ka. Ma, ọkọkọ nya ọọwa lẹ, ká ọng myị́ ọng nyanụ a tụtụ juwa kpa ẹla ọjẹ́jẹ me irya ju ịlọmwụ meme labwọ ba ẹ-ẹga ọlẹ ká Ohe Oluhye ya ọmyịmyị ọlala họọ kaka ba kem mẹ!

⁴Chajị jaabwọ kaahị angịnyị ehe la ugbinyịrọ ookpokpo, ká ugbinyịrọ ọọwa tị la iru nya ẹga nya ịnyịrọ, ká ẹga nya ịnyịrọ ịịwa wuu tị la ụkụrwọ nya ịlaa la datị-datị wuu jịra wẹẹ,

⁵ịnyịnyị, ọ la hahị ahị angịnyị nya Ohe Oluhye lẹlẹ. Chajị, ọ ri nya ịlẹhị, ahị ju iru lụmẹ odu ịnyị, ahị wuu lala ugbinyịrọ ookpokpo ẹ-ẹpwụ nya ịKịrayịsị. Lẹ, ahị wuu ri aanịna nya awụlẹ ẹ-ẹpwụ nya ịKịrayịsị, jaabwọ ká ẹga nya ugbinyịrọ nyahị ri aanịna nya awụlẹ ịnyịnyị.

⁶Lẹ, jaabwọ ká ọngọngọọng nyahị la ọhaha nya ịlọmwụ datị hi ịnya ọngọkịla, jaabwọ ká ọnahị nya Ohe Oluhye bwula lẹ, anụ cheri kahị juwa kpa ịhaha ịịwa họ ụkụrwọ mẹ. Ó-ri ọhaha nya ọmwụ ọyẹyẹ ọ-kpa ya ẹla nya Ohe Oluhye dodehe ká angịhyẹ nyahị á la lẹ, kahị juwa ya dodehe meme la ẹga ọlẹ ká ọmyịmyị ọlala nyahị ba kem mẹ!

⁷Ọ́ tị ri ọhaha nya ẹrụ ọmyịmyị kahị la lẹ aalẹ, ahị juwa myị ẹrụ ha angịkịla kpẹẹkpẹẹ tị tị mẹ. Ọngọlẹ kọ tị la ọhaha nya ang ọmẹjẹ lẹ aalẹ, ọngọọwa a juwa mẹ ang jẹ angịkịla ịnyịnyịịnyị mẹ.

⁸Ọngọlẹ kọ tị la ọhaha nya ọhụ o-ju angịkịla ju lẹ aalẹ, ọngọọwa a juwa họ ụkụrwọ nya ọhụ o-ju angịkịla ju ịnyịnyị mẹ. Ọngọlẹ kọ tị la ọhaha nya ọnahị ọhọhọ lẹ aalẹ, ọngọọwa a juwa pyẹ ụbwọ nyamwụ maa ẹ-ẹpwụ nya ang o-hu ga ha angịkịla mẹ. Ọngọlẹ kọ tị la ọhaha nya ụbwọ ọdada ẹ-ẹga nya angị ịkịla lẹ aalẹ, ọngọọwa, a kpa ọkpịra-kpịra ọlala họ ụkụrwọ ọọwa mẹ. Ọngọlẹ kọ la ọhaha nya ahyẹẹrwẹrwa ọlala lẹ aalẹ, ọngọọwa a juwa kpa ọkẹkẹnị yẹ angị ịkịla ahyẹẹrwẹrwa lẹhụ-lẹhụ ịnyịnyị mẹ.

⁹Anụ myị ká ọháha ọlala nyanụ a ri ọháha nya ịlẹhị-ịlẹhị o-bwu ẹpwụ ọkịlẹtụ nyanụ. Anụ́-ụ myị ká ang onyobyi ọhọhọ a wụụnụ ẹjẹ. Kanụ juwa yụbwọ chị ang ọnyịịla ọhọhọ kpa ụ-ụwa gogo mẹ.

¹⁰Anụ juwa kpa ọgẹnẹ-gẹnẹ nya aanịna la ọháha ẹ-ẹga nya anyadanụ ẹ-ẹpwụ nya ịKịrayịsị ịnyịnyị mẹ. Anụ́-ụ juwa kpa ọkịlẹtụ nyanụ wuu hu angịkịla nyanụ hwaa kele ka uhye gụ ịlọnụ ẹ-ẹpwụ nya ihi ọlala nyaa mẹ.

¹¹Anụ ri angị ta ụbwọ ẹ-ẹpwụ nya ụkụrwọ ọhọhọ kpong-kpong ka. Anụ la ila ọchịchị ẹ-ẹpwụ nya olegu nyanụ, kanụ juwa myị ẹrụ ha Ọngọlahị hiigu-hiigu mẹ.

¹²Anụ́-ụ juwa chị ọkẹkẹnị ẹ-ẹpwụ nya ẹhị ọrịrịị-rịrị ọlala nyanụ, kanụ juwa la ugbodu ojuju ẹ-ẹpwụ nya akama, kanụ juwa raabwọ ha Ohe Oluhye ụka myị́ ụka ịnyịnyị mẹ.

¹³Anụ́-ụ juwa chị ang-abwọ ịlẹ kanụ la ebwo, kanụ juwa kpa da angịnyị nya Ohe Oluhye ịlẹ kị ri ikpehika ụbwọ mẹ. Kanụ ri angị juwa kpẹhị rịrị angga ịlẹpwarịrị nyanụ hiigu-hiigu ịnyịnyị mẹ.

¹⁴Anụ́-ụ juwa wahị kụrụ angịlẹ kị juwa tụụnụ pyịpyị. nya ịlẹhị ịnyị, ahị ọwawa kem, anụ ka juwa wa kụrụ angịnyị lẹ. Anụ gọlọ ju ọngọngọhẹ kpong-kpong ka.

¹⁵Anụ́-ụ ri angị juwa chị ọkẹkẹnị ta angịlẹ ká ẹla nya ọkẹkẹnị ọchịchị á họ ẹ-ẹga nyaa mẹ. Kanụ juwa jida ta angịlẹ ká ẹla nya ida ojeje họ ẹ-ẹga nyaa ịnyịnyị mẹ.

¹⁶Anụ́-ụ myị kanụ la ọtụchawụlẹ ẹ-ẹpwụ nya okpunyi ọlala ẹ-ẹga nya awụlẹ mẹ. Anụ la irya nya ọ-kpa ịlọnụ ka uhye gụ angịkịla kpong-kpong ka. Ma, anụ́-ụ juwa la ọ-yẹ ju lawụlẹ bala angịlẹ kị ji iwe-ahụrụ ọbẹdẹẹ gụụnụ mẹ. Anụ la irya ogidogbo ẹ-ẹga nya ịlọnụ, juwa wa ịlọnụ nya angị jẹ́ ẹla lụmẹ lẹ ka.

¹⁷Anụ họ ang onyobyi kwiwa nya ang onyobyi ọlẹ kị họnụ ka. Anụ́-ụ juwa kpa ẹla nya ịlẹhị họ abwẹla ị-ịlahị nya angịnyị ehe wuu mẹ.

¹⁸Anụ́-ụ juwa kpa ọngịrị nyanụ wuu họ ang myị́ ang wuu jaabwọ kọ ka chịkpẹẹ hanụ nyọka họ chajị kaanụ bala angịnyị ehe wuu ka hụ la okpunyi mẹ.

¹⁹Anụ angị hám há, anụ họ ọngọngọhẹ kwiwa nya ang onyobyi ọlẹ kọ họnụ kpong-kpong ka. Ma, ọkọkọ nya ọọwa lẹ, anụ́-ụ tụụbwọ hi ẹga da ha agbama nya Ohe Oluhye mẹ. Chajị, ị da kpehe ụ-Ụpwụ Ịgọgọ lẹẹ yẹkẹẹ, “Ẹ-ẹpwụtụbwọ nyam Am Ohe Oluhye, ọ-họ kwiwa a ji lẹlẹ. Am la ịlọm a ka nwụ ọng myị́ ọng uri nya ang onyobyi nyamwụ lẹlẹ. Ịnyị, Ọngọlahị Ohe Oluhye a ya lẹ.

²⁰Ma, ọkọkọ kanụ ka họ kwiwa lẹ, ó ri ká imyi á juwa nwụ oluji nyanụ aalẹ, anụ́-ụ ya ang oriri họọ ri mẹ. Ọ́ tị ri imyi-enyi kọ juwa nwọọ lẹ, anụ́-ụ chị́ enyi ọnwanwa họọ nwa ịnyịnyị mẹ. Chajị, ó ri kanụ juwa họ ịnyị lẹ aalẹ, ọọwa ri yẹkẹẹ, awụla nya ila a wẹ kanụ wẹẹ go kụrụ oluji nyanụ ọọwa e-egbeju lẹlẹ.”

²¹Anụ myị ká ang onyobyi ọhọhọ a kụrụụnụ ka. Ma anụ́-ụ tụtụ juwa kpa ang ọnyịịla ọhọhọ nyanụ kụrụ ang onyobyi mẹ.