Read idege ALA IROM 13 Bible Online

ALA IROM 13 - idege bible

ALA IROM 13

¹Ọng myị́ ọng lẹpwarịrị nya angịnyị nya Ohe Oluhye wuu a juwa kpa ịlọmwụ keji ha alegbeju nya ịgọmenti ịkpẹhị rịrị ọpyị mẹ. Chajị, ọngịrị nya eji ogbegbe ọlịnyị á ka jẹ́-ẹ ji kpong-kpong ka. Kẹnẹ-kẹnẹ, ó ri ká Ohe Oluhye ayịdang á ya ẹga da nya ọọwa ene lẹ, mẹ ịnyị! Ohe Oluhye la ịlọmwụ kpangga a tị me obyi nọ ịnyị, ene, du ká angịlẹ kị ri alegbeju ịkpẹhị rịrị ọpyị anyị wẹẹ họ ụkụrwọ nyaa ọọwa myị́ lẹ.

²Chajị nya ọọwa lẹ, ọng myị́ ọng ọlẹ kọ juwa la egbeju ọnyọọngịrị tụ alegbeju ịkpẹhị rịrị ọpyị ịlịnyị pyịpyị lẹ aalẹ, obyi omeme nya Ohe Oluhye Ọngọlẹ kọ ya ẹga da haa a wẹ ká ọngọọwa wẹẹ tụ pyịpyị lẹlẹ. Aalẹ, ọngọọwa juwa wụrụ akama nya eje owuwu nya Ohe Oluhye chị ịlọmwụ ọgụ bwula ọọwa ịnyịnyị lẹ.

³Chajị, alegbeju ịkpẹhị rịrị ọpyị á ri ododo ha angịlẹ kị kaa họ ang ọnyịịla kpong-kpong ka. Kẹnẹ-kẹnẹ, angịlẹ kị kaa họ ang onyobyi ụbwaa mẹ ịnyị! Lẹ, ahụ ọngịnyị nya Ohe Oluhye ee, ọ háng ká ka la ugbodu o-gu ene kpong-kpong ka pyịyọọ ị-ịlahị nya alegbeju ịlịnyị? Ó-ri ịnyị lẹ aalẹ, aa cheri ká juwa họ ang ọnyịịla ụbwọọmwụ kem tị tị mẹ. Chajị, ó-ri kọ họ ịnyị lẹ aalẹ, ogbo kem, alegbeju ịlịnyị a ka gwo hang u-uhye nya ọọwa lẹlẹ.

⁴Chajị, anchẹ ị-myị ẹrụ nya Ohe Oluhye, alegbeju ịlịnyị a ri lẹ. Ma, chajị nyọka hiigu há hang, ahụ ayịdang tị ịnyị! Ma, ọ́ tị ri ká ri ọngọ họ ang onyobyi lẹ aalẹ, ugbodu, a gung ene tị tị mẹ! Chajị, ọngịrị ọlẹ ká alegbeju ịwẹ la nyọka kpa yẹ angịnyị akama lẹ, ó ri ang ododu ka. Chajị, ịwa a ri anchẹ i-ku ọmwakpa nya Ohe Oluhye kị ka yẹ angị họ ang onyobyi akama opwoku agbama nya Ohe Oluhye ám ẹ-ẹpwụ nya odehe ọlẹ lẹlẹ.

⁵Chajị nya ọọwa lẹ, ọ chịla ká ọng myị́ ọng nyahị wuu ka juwa ju ihi nya alegbeju ịlịnyị pyii lẹ. Aajị nyori yẹkẹẹ, ahị ka bwula ọọwa be hi agbama nya Ohe Oluhye lẹ, kem ka. Ma, chajị ká irya ọ-la ọngịnyị eje ọlẹpwụ nyahị ahị ka jẹ́-ẹ ya eje rụhị lala angị ju ihi yẹẹyẹẹ ịnyịnyị kpịlọ ịnyị!

⁶Chajị nya ọọwa a du kọ chịla kaanụ wuu ka juwa nyẹ ẹpwa ha alegbeju ịkpẹhị rịrị ọpyị ịnyịnyị lẹlẹ. Chajị alegbeju ịịwa ri anchẹ ị-myị ẹrụ ha Ohe Oluhye, kọ ri kị juwa họ ụkụrwọ nyaa ọọwa kpẹẹkpẹẹ, jaabwọ kọ chịla-chịla.

⁷Chajị nya ọọwa lẹ, anụ́-ụ cheri kanụ juwa nyẹ ẹpwa u-uhye nya egbeju nyanụ ha angịlẹ kọ chịla-chịla mẹ. Kanụ juwa nyẹ ẹpwa u-uhye nya ang ọrara nyanụ ha angịlẹ kị pwoku ịnyịnyị mẹ. Ọngọlẹ kọ chịla kanụ ka juhi-uhi nyamwụ lẹ aalẹ, anụ́-ụ juwa juhi nya ọngọọwa mẹ. Ọngọlẹ kọ tị chịla kanụ ka ju ihi nyamwụ lẹ aalẹ, anụ́-ụ ju ihi nya ọngọọwa ịnyịnyị mẹ.

⁸Anụ myị kanụ kpa ọngọngọhẹ uri nya ịngịngịhyẹ kpong-kpong ka. Kẹnẹ-kẹnẹ, ọháha ọlala ẹ-ẹga nyamwụ kem ụbwọọmwụ mẹ ịnyị. Chajị, ọngọlẹ kọ juwa la ọháha nya ịlẹhị-ịlẹhị ẹ-ẹga nya ọngịnyị ehe ọọnamwụ lẹ aalẹ, ọngọọwa a ri ọngọ họ ehile nya Ohe Oluhye jịra lẹlẹ.

⁹Chajị, ehile ịlẹ kị da kpehe ri yẹkẹẹ, “A da ẹla-ahụ nya ọngịnyị ọọnang ka. A nwụ ọngịnyị ka. A yi oyi ka. A la imajẹ ẹ-ẹga nya ang nya ọngịnyị ọọnang ka.” Lẹ, ehile ọkịla ọnyị myị ọnyị wuu ọlẹ kị da kpehe lẹ, ugbe nya ẹla ookpokpo ọlẹ, a ri ọtachị o-waa ịwa wuu kpa lẹlẹ. Ẹla ọọwa yẹkẹẹ, “Ọngịnyị ọọnang ka háng nya ịlẹhị-ịlẹhị lala ịlọng.”

¹⁰Ẹga ká ọháha ọlala nya ịlẹhị-ịlẹhị á ji lẹ, awụlẹ ọ-họ ang onyobyi á kaa juwa ẹ-ẹga ọọwa kpong-kpong kaka. Chajị nya ọọwa lẹ, ọháha ọlala nya ịlẹhị-ịlẹhị a tọchị ri ehile ọ-họ jịra kpẹẹkpẹẹ wuu lẹlẹ.

¹¹Ọgụgụ wuu ri yẹkẹẹ, jaabwọ kaanụ ayịdang jẹ́ ụka nya awa ọlẹ kahị lẹẹ ẹ-ẹpwụ nyamwụ lẹẹlẹẹ lẹlẹ, ụka ọlẹ kanụ ka juwa kpa chị ahị-une bwu ẹpwụ nya ọdẹwụ-dẹwụ ọlala nyanụ a lẹẹ lẹlẹ. Chajị, ụka ọlẹ kị ka kpa chị ọchịda nyahị ọlẹ ehe jịra, juwa ju chwẹẹ lụmẹ lẹẹlẹẹ gụ ụka ọlẹ kahị kpa myị la Ohe Oluhye nya ọgbanyẹ-ọgbanyẹ lẹ!

¹²Odu hi tata lụmẹ lẹ! Ahị ọpyẹpyẹ ju chwẹẹ lẹ. Chajị nya ọọwa lẹ, anụ kẹwẹ kahị pwọ ang-abwọ nya ukpowu ịlẹ kị ri ọhọbịrị ọhọhọ cheeji mẹ. Kahị go ang-abwọ nya ẹwụ nya ahịgboo nya Ohe Oluhye ọlẹ kọ ri abwẹla ọnyịịla nyamwụ kụrụ ịlọhị mẹ.

¹³Anụ cheri kahị juwa họ abwẹla ọnyịịla ọkpẹẹkpẹẹ opwoku lala angịlẹ kị juwa ẹ-ẹpwụ nya ahịgboo nya ahị ọpyẹpyẹ nya ọhịhị nya Ohe Oluhye mẹ. Lẹ, anụ tụtụm myị kahị juwa la ọjịra-jịra nya ụya ọyaya onyobyi ọlẹ kị kaa juwa ri ang oriri okomba ụ-ụwa kaka lee ọ-ka juwa nwa ere ya kaka. Lee, o-juwa la ọhịhị nya uhila nya ụya ọhọhọ ka lee o-juwa la uhila nya ang inyibyi ịkịla ọhọhọ kaka ịnyịnyị. Lee, o-juwa mwẹla ta angịkịla ka lee o-juwa la ijiiji onyobyi kaka ịnyịnyị.

¹⁴Ma, ọkọkọ nya ọọwa lẹ, anụ́-ụ tụtụ juwa da abwẹla ọnyịịla ọhọhọ nya Ọngọlahị iJisọsị ịKịrayịsị kụrụ ịlọnụ wurum kem mẹ. Anụ myị kanụ ya ẹga da ha imyi nya ugbinyịrọ nyanụ, juwa họ ang ọlẹ ká imyi nya ịnyịrọ ọọwa ka byinu ya, nyị họ mẹ, kpong-kpong kaka.