Read idege ALA IROM 14 Bible Online

ALA IROM 14 - idege bible

ALA IROM 14

¹Ó-ri ká ọngọngọhẹ á juwa kọ la dẹwụ-dẹwụ ẹ-ẹpwụ nya ọmyịmyị ọlala nyamwụ aalẹ, anụ́-ụ ye ọngọọwa hiigu-hiigu! Ma, ị-ịnyọka juwa da ịwẹẹ ju abwẹla ọhọhọ nyamwụ chịtaa tị koo!

²Chajị, ọngọlẹ kọ ri adam ọlẹng ẹ-ẹpwụ nya ọmyịmyị ọlala nyamwụ ka juwa ri ụma nya ang oriri ọnyị myị ọnyị wuu myị́. Ma, ọngọlẹ kọ tị la dẹwụ-dẹwụ ẹ-ẹpwụ nya ọmyịmyị ọlala nyamwụ ọwa tị ka juwa gọ iyo oriri myị́.

³Lẹ, ahụ ọngọlẹ ká kaa gọ iyo oriri ka lẹ, a juwa yẹhị da ọngọlẹ kọọwa juwa gọ iyo oriri bwee ka. Ahụ ọngọlẹ ká tị wẹẹ ri iyo ka lẹ, a juwa ya eje wu ọngọkịla ọlẹ kọ juwa ri iyo tị kokoo! Chajị, Ohe Oluhye ye ọngọọwa ị-ịlahị nya ịlọmwụ lẹ!

⁴Oowo, ahụ ayịdang a tị́ ri kpong-kpong ene kọ du ká juwa ya eje wu ọnchẹ nya ọngọkịla ịnyị dọmwụ? Chajị Ohe Oluhye Ọngọ ri Ayịbaba nya ọnchẹ ọọwa kem, a jẹ́ kaa chị eje nya ọ-họ hiigu lee ọ-họ tịpyọ nya ọnchẹ nyamwụ ụbwọọmwụ lẹ. Ọnchẹ nya Ohe Oluhye tị dọmwụ ka godayị kpakpakpa myị́ pyii, chajị Ohe Oluhye Ayịbamwụ la ọngịrị ka woo kpa ha ịlọmwụ myị́.

⁵Angịhyẹ juwa ká ahị ọpyẹpyẹ nya epwihi ọhẹ kaa háa la ọ-chị ịgọgọ ju gụ ẹnụtụrụ ihihi ịkịla nya epwihi myị́. Ma, angịkịla tị juwa ká ẹnụtụrụ myị́ ẹnụtụrụ nya epwihi wuu kaa háa la ọ-chị ịgọgọ ju mememe! Lẹ, anụ́-ụ ba hi ọng myị́ ọng kọ kpa irya nya ụbwọ nya ịlọmwụ kem chụ ọlẹ kọ họ́ọ ẹ-ẹpwụ nya ọọwa mẹ.

⁶Chajị, ọng myị́ ọng ọlẹ kọ juwa chị ịgọgọ ju ahị ọpyẹpyẹ aalẹ, ọ juwa họ ọọwa nyọka ya ogbo ha Ọngọlahị la. Ọngọlẹ kọ tị juwa ri iyo tị tịtị juwa ri iyo ọọwa nyọka ya ogbo ha Ọngọlahị la ịnyịnyị. Chajị, ọwa ayịdang kaa ji Ohe Oluhye obe u-uhye nya ang oriri ọọwa! Ọngọlẹ kọ tị hu abwọ la iyo oriri tị juwa hu abwọ la iyo ọọwa oriri nyọka ya ogbo ha Ọngọlahị la bala ọ-kaa ji Ohe Oluhye obe u-uhye nya ọọwa ịnyịnyị!

⁷Chajị, ọngọngọhẹ nyahị ahị angịnyị nya Ohe Oluhye á kaa hịhị ha ịlọmwụ kaka. Ọngọngọhẹ nyahị á tị kaa gbu ha ịlọmwụ ụbwọọmwụ kaka ịnyịnyị.

⁸Bwula ọọwa lẹ, ó-ri kahị juwa hịhị aalẹ, ahị juwa la ọhịhị ọọwa ha Ọngọlahị. Ọ́ tị ri kahị gbu tụbwọ aalẹ, ahị gbu igu ọọwa ha Ọngọlahị ịnyịnyị. Lẹ, ó ri ọhịhị ri lee igu kahị juwa ẹ-ẹpwụ nyamwụ jiji aalẹ, ahị juwa ha Ọngọlahị la!

⁹Chajị, ịKịrayịsị warị kaka gbu bala owuleji bwula igu myịmyị juwa hịhị, chajị kọ ka jẹ́-ẹ bwula ọọwa ri Ayịbaba nya angị gbugbu wuu bala angị juwa hịhị wuu ịnyịnyị!

¹⁰Ee lẹ, ahụ ọngọlẹ ká wẹẹ ya eje wu ọnyadang ọkịla ẹ-ẹpwụ nya ịKịrayịsị lẹ, ịịyẹ a tị́ du ká juwa họ ịnyị? Ahụ ọngọlẹ ká tị wẹẹ ya ẹhị da ọnyadang ọkịla ẹ-ẹpwụ nya ịKịrayịsị bwee lẹ, ịịyẹ a tị́ ká juwa họ ịnyị ịnyịnyị? Chajị, ahị angị myịmyị wuu juwa ka kele kaka godayị rịrị ị-ịlahị nya ẹchị adịrahụ oleje nya Ohe Oluhye pyii.

¹¹Chajị, ị da kpehe ụ-Ụpwụ Ịgọgọ ẹ-ẹgẹlẹ yẹkẹẹ, “Bwula ọhịhị nyam Am ayịdang, ịnyị, Ọngọlahị a ya lẹ. Ụrụụ nya angịnyị ehe wuu ka hiri kpẹẹ juwa gbịgba ham pyii lẹ. Angịnyị ehe wuu tị ka kpa ẹlẹlẹ nyaa, gwogbo ham Am Ohe Oluhye pyii ịnyịnyị lẹ.”

¹²Chajị nya ọọwa lẹ, ọng myị́ ọng lẹpwarịrị nyahị á ka dayi la ọ-ka kele kaka ya ịlọmwụ dodehe ị-ịlahị nya Ohe Oluhye pyii kaka.

¹³Chajị nya ọọwa lẹ, anụ cheri, kahị myịmyị juwa ri angị juwa ya eje wu awụlẹ kpong-kpong kaka mẹ! Ma, ọkọkọ nya ọọwa lẹ, kahị chị eje yẹkẹẹ, ahị́ ka ri angị ka họ ká angịkịla ka chị ụchụụ mileji bwula ọhọbịrị ọhọhọ ka lee ọ-ka ri ang oku iwe ụ-ụgbẹyị ha anyadahị ịkịla ẹ-ẹpwụ nya ịKịrayịsị kpong-kpong kaka, ịnyịnyị mẹ.

¹⁴Ọngịnyị nya ịKịrayịsị oriri nyam ọlẹ, họ kam jẹ́ nya ịlẹhị-ịlẹhị bwula ịKịrayịsị yẹkẹẹ, ịngịngịhyẹ á ri ang ọ-kaa chị ịgọgọ ọlala nya ọngịnyị ehe ịrị ị-ịlahị nya Ohe Oluhye kpangga ka. Kẹnẹ-kẹnẹ, ụka ká ọngịnyị ehe ayịdang á hu ang ọọwa lala ang ọ-chị ịrị ị-ịlahị nya ịlọmwụ lẹ, ang ọọwa a kaa ri ịnyị họọ lẹlẹ.

¹⁵Ma, ọ́ tị ri ang oriri bwu ọnụ nyang ahụ, á mwọọgịlẹ ri ang ọlẹ kọ juwa ka chị ọngịnyị ehe ọọnang ẹbẹ ẹ-ẹpwụ nya irya nyamwụ lẹ aalẹ, ọ-ọháha ọlala a wẹ ká wẹẹ kpa họ ang ọọwa kaka! Chajị nya ọọwa lẹ, a myị ká ang oriri ka ọnụ nyang, a ri ang ọ-ka kpa ayịreji ọtata kịla ọnyadang ọkịla ọlẹ ká ịKịrayịsị gbu chajị nyamwụ ịnyịnyị kaka.

¹⁶Anụ myị ká ang ọnyịịla ọhọhọ nyanụ a mwọọgịlẹ ri ang ọ-ka kpa ẹla onyobyi oyaya rụ́ụnụ kpehe, bwula ọ-jẹ́ họhọ-ka nyanụ anụ ayịdang ka!

¹⁷Chajị, a-ang oriri ọlam-ọlam ọwẹ lee ang ọnwanwa ka ẹpwụ ọlẹ, a ri ang o-ju ẹjẹẹ nya ịpyị Adịrahụ nya Ohe Oluhye ka. Ma, abwẹla ọnyịịla nya Ohe Oluhye ọhọhọ bala okpunyi ọlala bala ọkẹkẹnị o-juwa chịchị ẹ-ẹpwụ nya Olegu Ịgọgọ, a ri ẹjẹẹ nya ịpyị Adịrahụ nya Ohe Oluhye ọọwa lẹ!

¹⁸Lẹ, ọngọlẹ kọ juwa gbịgba ha ịKịrayịsị bwula o-juwa họ ẹchẹ nya ang ịwẹ lẹ aalẹ, ọngọọwa a ka ri ọngọ họ ẹla kpụ Ohe Oluhye ịpyọ bala ọngọlẹ ká angịnyị ehe tị ka ryọọ ibeenu nya ọ-họ hiigu ẹ-ẹpwụ nya ẹla nya Ohe Oluhye ịnyịnyị lẹlẹ.

¹⁹Lẹ, anụ cheri kahị juwa rụnyẹ ba ụgbẹyị nya okpunyi ọhọhọ ẹ-ẹpwarịrị nya awụlẹ bala ọ-ka juwa họ kahị ka juwa kpa ọmyịmyị ọlala nya awụlẹ wule kịlahị-ịlahị kem mẹ.

²⁰Lẹ, anụ myị kanụ ta ụkụrwọ nya Ohe Oluhye ayịreji, chajị nya ang oriri ọlam-ọlam ọlẹ kokoo. Chajị, ọ ri nya ịlẹhị, ang oriri ọnyị myị ọnyị wuu ri ang ọchịla-chịla ị-ịlahị nya Ohe Oluhye kahị ka ri! Ma, ọ tị ka ri ang ọtịpyọ hahị kọ ri ká ọngọngọhẹ nyahị á ka họ ká ọngọkịla á ka mileji bwula ang oriri ọlẹ ká ọngọọwa ka juwa ri tị!

²¹Chajị nya ọọwa lẹ, ụma nya ang oriri ọnyị myị ọnyị lee ere ọnwanwa lee ịngịngịhyẹ ọkịla ọlẹ kọ ri kahị họọ lẹ, ká ang ọọwa a ka họ ká ọnyadahị ọkịla ẹ-ẹpwụ nya ịKịrayịsị a ka chị ụchụụ mileji ẹ-ẹpwụ nya ọmyịmyị ọlala nyamwụ lẹ aalẹ, ọ ka ri ang ọchịla-chịla hahị kahị ka cheji ba ẹchẹ nya ang ịịwa wuu la ọhọhọ pyii lẹ.

²²Ó ri ká ri ọngọ la ọmyịmyị ọnyọọngịrị u-uhye nya ịngịngịhyẹ lẹ aalẹ, ọọwa a meme lang ahụ bala Ohe Oluhye kem mẹ! Chajị, ọkẹkẹnị ọtụka ka ri nya ọngọlẹ kọ chị ijẹma bwula irya ọ-la ọngịnyị eje ọlẹpwụ nyamwụ, ọ kaa ya eje woo u-uhye nya ịngịngịhyẹ ọlẹ kọọwa ayịdang chị eje nyamwụ họọ kpong-kpong ka.

²³Ma, ọng myị́ ọng ọlẹ kọ juwa ri ang oriri ẹ-ẹpwụ nya ịwẹẹ ọdada nya ọkịlẹtụ nyamwụ tụbwọ aalẹ, eje woo ị-ịlahị nya Ohe Oluhye lẹ. Chajị, ọngọọwa á kpa ọmyịmyị ọlala ri ang ọọwa kaka. Chajị, ang myị́ ang ọlẹ kaahị angịnyị nya Ohe Oluhye á họ bwula ọmyịmyị ọlala nyahị kaka lẹ aalẹ, ọhọbịrị, a tị tị wẹ kahị họ ị-ịlahị nya Ohe Oluhye lẹlẹ.