Read idege ALA IROM 15 Bible Online

ALA IROM 15 - idege bible

ALA IROM 15

¹Chajị nya ọọwa lẹ, ahị angịlẹ kahị la gogo ẹ-ẹpwụ nya ọmyịmyị ọlala nyahị lẹ, ọ chịla kahị ka juwa da angị dẹwụ-dẹwụ ẹ-ẹpwụ nya ọmyịmyị ọlala nyaa ịwa ụbwọ, bwula o-juwa kpa olo nyaa taa. Chajị, ọ́ chịla kahị ka juwa họ ang-ang ọ-kpụ ịlọhị ịpyọ kem ka.

²Ma, ọkọkọ nya ọọwa lẹ, ká ọng myị́ ọng lẹpwarịrị nyahị a juwa họ ang ọlẹ kọ ka kpụ ọọnamwụ ịpyọ, chajị nyọka hiigu há nya ọọnamwụ ọọwa mẹ! Chajị ká ọọwa ka kpa ọmyịmyị ọlala nyamwụ wule kịlahị-ịlahị ịnyịnyị mẹ.

³Chajị, ịnyịlẹhị ịnyị, ịKịrayịsị ayịdang kpangga lẹ, ọ́ warị kaka họ ang ọlẹ kọ kpụ ịlọmwụ ịpyọ kem odehe ọlẹ kpong-kpong ka. Ma, ọkọkọ nya ọọwa lẹ, ị da kpehe rụ́ ọhọhọ nyamwụ ụ-Ụpwụ Ịgọgọ yẹkẹẹ, “Am ayịdang a mwọọgịlẹ lẹẹ ye olo nya abyị ọlala nya angịlẹ kị ri angị họ ang onyobyi tụng Ahụ Ohe Oluhye pyịpyị dachichi lẹlẹ.”

⁴Chajị, ang myị́ ang ọlẹ kị da kpehe ẹ-ẹpwụ nya Ụpwụ Ịgọgọ lụka onyogo wuu lẹ, ị daa kpehe chajị kị ka ri ẹla ọmẹjẹ hahị, chajị ká ugbodu ojuju bala ẹjẹ ọkpụ́kpụ ọlẹ kahị kaa ye bwu ẹpwụ nya Ụpwụ Ịgọgọ ọọwa wuu, ka jẹ́-ẹ hu ẹhị ọrịrịị-rịrị ọnyịịla hahị.

⁵Ká Ohe Oluhye Adịda nya ugbodu ojuju onyudiyo bala ẹjẹ ọkpụ́kpụ wuu a danụ ụbwọ, kanụ juwa kpa ọkịlẹtụ ookpokpo ẹ-ẹpwụ nya irya ọlịnyị da awụlẹ ụbwọ ịnyịnyịịnyị, jaabwọ ká ịKịrayịsị iJisọsị ayịdang ya ọgụ-ẹpẹtẹ ọọwa deeji hahị ahị angị myịmyị mẹ.

⁶Chajị kaanụ wuu lawụlẹ ka jẹ́-ẹ juwa kpa irya ookpokpo bala omyi ookpokpo gwogbo ha Ohe Oluhye ọlẹ kọ ri Adịda nya Ọngọlahị iJisọsị ịKịrayịsị ịnyịnyị mẹ!

⁷Chajị nya ọọwa lẹ, anụ́-ụ juwa kpa ọkẹkẹnị ye angị ịkịla wẹ ẹpwụ nya ogu nyanụ, jaabwọ ká ịKịrayịsị ayịdang yenu anụ ha ịlọmwụ, chajị nyọka ya ogbo ha Ohe Oluhye mẹ.

⁸Chajị, m jam ya jenu yẹkẹẹ, ịKịrayịsị ayịdang warị kaka myị ẹrụ ha ala iJuu ịlẹ kị ri angị kaa da ụwụwụ. Chajị ká ọọwa ka jẹ́-ẹ chị Ohe Oluhye ayịdang ehe lala Adịda nya ẹla nya ịlẹhị bwula ọ-họ jịra nya ọnụ ọmyịmyị nyamwụ ọlẹ kọ myị ha Adịda igogo nyahị ahị ala iJuu ene-ene u-uhye nya ọọwa.

⁹Chajị ká ọọwa tịtị ka jẹ́-ẹ họ ká ala iJentayịlị ka juwa gwogbo ha Ohe Oluhye chajị nya ahyẹẹrwẹrwa nyamwụ bwula ọọwa ịnyịnyị. Chajị ị da kpehe ụ-Ụpwụ Ịgọgọ lẹẹ ẹ-ẹgẹlẹ yẹkẹẹ, “Chajị nya ọọwa lẹ, am ayịdang ka gwogbo ha ẹnyị nyang Ahụ Ohe Oluhye ẹ-ẹpwarịrị nya ala iJentayịlị wuu, bala ọ-ka juwa mwu eje rụ́ ẹnyị nyang ịnyịnyị.”

¹⁰Ị myịmyị ya ẹ-ẹga ọkịla yẹkẹẹ, “Oo! Anụ ala iJentayịlị wuu, anụ juwa chị ọkẹkẹnị ta angịnyị nya Ohe Oluhye mẹ!”

¹¹Ị myịmyị ya ẹ-ẹga ọkịla yẹkẹẹ, “Anụ gwogbo ha Ọngọlahị, anụ ala iJentayịlị wuu, ká angịnyị ehe wuu a gwogbo ha Ohe Oluhye mẹ.”

¹²Ayịsaya myịmyị ya ẹla ọkịla ẹ-ẹgẹlẹ ịnyịnyị yẹkẹẹ, “Ọngọhẹ juwa ka bwu ụtẹ nya iJesi kpehe. Ọngọọwa a ka wuleji kaka ri olegbeju ogbeji ọkpẹhị rịrị ala iJentayịlị wuu lẹ. Ẹ-ẹga nya ọngọọwa, ẹhị ọrịrịị-rịrị nya ala iJentayịlị wuu a ka ji ịnyịnyị lẹlẹ.”

¹³Ká Ohe Oluhye Adịda nya ẹhị ọrịrịị-rịrị ọnyịịla a ya ọkẹkẹnị ọtụka bala okpunyi nyamwụ myị ẹpwụ ọkịlẹtụ nyanụ, ẹ-ẹpwụ nya ọmyịmyị ọlala nyanụ, chajị kanụ ka jẹ́-ẹ bwula ọngịrị nya Olegu Ịgọgọ la ẹhị ọrịrịị-rịrị nyamwụ ọọwa chịba-chịba mẹ.

¹⁴Anụ anyadam ẹ-ẹpwụ nya ịKịrayịsị, m jẹ́ hiigu-hiigu yẹkẹẹ, anụ ayịdang ri angị myị la ụkụrwọ ọnyịịla ọhọhọ. Anụ la ẹla ọjẹ́jẹ chajị nya Ohe Oluhye nya ịlẹhị-ịlẹhị ẹ-ẹpwụ nyanụ ọlẹ kọ du kanụ jẹ́-ẹ wẹẹ bwula ọọwa gbile awụlẹ ụbwọ ụ-ụrụ myị́ yẹẹyẹẹ ịnyịnyị lẹ.

¹⁵Ma, m tị jam ya ẹla la ọngịrị ọngịrị e-ebwo nya ala ịhyẹ ịlẹpwụ nya ileta nyam ọlẹ kam lẹẹ da du wanụ, chajị nyọka kpụnụ ịtịya nya ala ịịwa. M ya ịnyị bwula ọngịrị ọ-kpa họ ụkụrwọ ọlẹ ká Ohe Oluhye hu ham bwula ọnahị nyamwụ.

¹⁶Ọhọhọ ịnyị, chajị kam ka jẹ́-ẹ ri ọlẹrụ ọnyịịla nya ịKịrayịsị iJisọsị ha ala iJentayịlị. M jam họ ụkụrwọ nya ẹrụ ọnyịịla oyaya pyẹ ọọwa lala ọngọkiliya ha Ohe Oluhye. Chajị ká ala iJentayịlị ịịwa ayịdang ka jẹ́-ẹ lala iya ọkịlaakịla ọlẹ kọ chịla-chịla ị-ịlahị nya Ohe Oluhye bala o-ri angị la ịgọgọ myị́ bwula ọngịrị nya Olegu Ịgọgọ.

¹⁷Bwula ọọwa lẹ, am ayịdang la ang ọlẹ kam ka kpa hi ọbọọchẹ ju ẹ-ẹpwụ nya ụkụrwọ ọlẹ kam lẹẹ họ ha Ohe Oluhye bwula ịKịrayịsị iJisọsị myị́ lẹ!

¹⁸Chajị, ḿ ka jẹ́-ẹ byẹjẹ, juwa kpa ịngịngịhyẹ ọkịla chị ogu kpong-kpong kaka. Kẹnẹ-kẹnẹ, ó-ri ogu ọchịchị u-uhye nya ang ịlẹ ká ịKịrayịsị ayịdang á họ bwulam ẹ-ẹga nya ọ-họ ká ala iJentayịlị ri angị ju ihi nya Ohe Oluhye myị́ lẹ kem, mẹ ịnyị! M họ ọọwa bwula ẹla ọlọnụ oyaya nyam bala abwẹla ọhọhọ nyam wuu,

¹⁹bala ọ-họ ụkụrwọ i-ju ẹjẹẹ la datị-datị bala ụkụrwọ ẹbyẹbyị bwula ọngịrị nya Olegu Ịgọgọ ịnyịnyị. Chajị, o-bwu epweji nya iJerusalẹm wuu lalala ju ka ịkịka nya ọpyị nya ala Ilirikọm wuu lẹ, m ya ẹrụ ọnyịịla nya ịKịrayịsị ọlẹ pyẹ wuu gbanggbang ju angịnyị iloye ọọwa wuu lẹ!

²⁰Chajị, eje ọchịchị nyam wuu ri yẹkẹẹ, m ka juwa ya ẹrụ ọnyịịla ọlẹ pyẹ ju angịnyị ehe wuu ịnyịnyịịnyị. Ma, ḿ tị tịtọ kam ka juwa kpa ya pyẹ ẹ-ẹga ọlẹ ká angịnyị wo ẹnyị nya ịKịrayịsị ene-ene wuu lẹ, kpong-kpong ka. Chajị, ḿ tịtọ kam ka juwa nwụ́ ẹrụ ọnyịịla nyam am hụrụ itiwe nya ẹla nya Ohe Oluhye ọlẹ ká angịkịla kpa kaka yeji ụ-ụwa ene lẹ, kpong-kpong ka.

²¹Ma, ọ la jaabwọ kị da kpehe ụ-Ụpwụ Ịgọgọ yẹkẹẹ, “Ụka juwa warị ká angịnyị ehe ka jẹ́-ẹ yẹ ọngọọwa ọlẹ ká ọngọngọhẹ á ya ẹla chajị nyamwụ jaa ẹnẹnẹhẹ ene lẹka. Ị tị ka la ọ-jẹ́ myịmyị u-uhye nya ọngọọwa kị wo ẹlẹlẹhẹ chajị nyamwụ ẹnẹnẹhẹ ene lẹka ịnyịnyị.”

²²Ala ịwẹ kpangga a kaa ri ang okum iwe nya ọwarị wẹ ẹga nyanụ ụka myị́ ụka ọlẹ kam kaa me obyi nya ọọwa ịnyịnyịịnyị lẹ.

²³Ma, jaabwọ ká ẹgẹgẹhẹ ọkịla á hi ham o-oye nya ọpyị oloye ọlẹ lẹẹlẹẹ kpụ, m ka họ ụkụrwọ ụ-ụwa kaka bala ọlẹ ká iwoo nyanụ wum la iru nya ẹka lụmẹ-lụmẹ ịnyịnyị lẹlẹ,

²⁴ẹhị ọrịrịị-rịrị nyam ri yẹkẹẹ, ḿ ka dayi la o-bwu ẹga nyanụ kaka yẹnụ ẹ-ẹhị la ogu ẹdịyẹ ọlẹ kam lẹẹ ka jẹ ka ọpyị nya iSipeen kaka. Ọọwa lẹ, anụ ka dam ụbwọ ẹ-ẹpwụ nya ẹdịyẹ ohihi nyam kele ka ụwa lụka ọlẹ kam hụ tanụ chẹẹ kpá lẹlẹ.

²⁵Lẹẹlẹẹ lẹ, m jam jẹ ka epweji nya iJerusalẹm nyọka kpa ẹrụ nya ụbwọ ọdada kele kịla angịnyị nya Ohe Oluhye ịlụwa wẹẹ.

²⁶Chajị, ala ịMẹsịdoniya bala ala Akaya anyị la ọkẹkẹnị ẹ-ẹpwụ nya o-hu ha chajị nyọka kpa kaka da ikpehika ịlẹpwụ nya angịnyị nya Ohe Oluhye ịla iJerusalẹm ụbwọ, lẹẹ ya dum ẹrụ kpa kele.

²⁷Ọ kpaa ịwa ayịdang ịpyọ ẹ-ẹpwụ nya ọhọhọ ọọwa lụmẹ. Ọ tị dọmwụ chịla kị ka họ ịnyị ịnyịlẹhị, chajị ó-ri kịịwa ala iJentayịlị á bába la ahị ọwawa nya ang nya olegu ta ala iJuu aalẹ, ọ tịtị chịla kị ka kpa ahị ọwawa nya ang-abwọ ilodehe ọlẹ kị la da ala iJuu ịlẹ kị ji ẹpwụ nya ọbaba ụbwọ ịnyịnyị.

²⁸Chajị nya ọọwa lẹ, ụka kam myị ẹrụ nya ọ-kpa okpoko ọlẹ kịla ala iJerusalẹm kpá wuu lẹ aalẹ, m ka bwu ẹga nyanụ kele ka ọpyị nya iSipeen lẹlẹ.

²⁹M jẹ́ yẹkẹẹ, ụka ọlẹ kam ka warị lẹ, m ka kpa iru nya ahị ọwawa nya ịKịrayịsị warị wẹ ẹga nyanụ.

³⁰M jam bịlẹnụ anụ anyadam ẹ-ẹpwụ nya ịKịrayịsị nya ịlẹhị-ịlẹhị la ẹnyị nya Ọngọlahị iJisọsị ịKịrayịsị bala ọháha ọlala nya ịlẹhị-ịlẹhị o-bwu ẹga nya Olegu Ịgọgọ, kanụ ka juwa raabwọ la ọngịrị-ọngịrị lawụlẹ ha Ohe Oluhye chajị nyam.

³¹Anụ́-ụ raabwọ ọọwa bịlẹ Ohe Oluhye chajị kọ ka gbam kpehe bwu ẹpwụtụbwọ nya angị myịmyị-ka ịlẹ kị juwa i-iJudiya mẹ. Ká Ohe Oluhye ka họ ká angị ịgọgọ ịla iJerusalẹm ka jẹ́-ẹ ye ẹrụ ọmyịmyị ọlẹ kam lẹẹ ka myị jwaa ụ-ụwa ịnyịnyị mẹ.

³²Anụ́-ụ bịlẹ Ohe Oluhye ịnyịnyị, kọ họ kam ka kpa ọkẹkẹnị warị wẹ ẹga nyanụ ẹ-ẹpwụ nya irya nyamwụ Ọwa Ohe Oluhye, chajị ká ọ-yẹ ju lawụlẹ nyahị bala anụ ka ri ang o-hu ẹjẹ ọkpụ́kpụ hahị lụka kam warị mẹ.

³³Ká Ohe Oluhye Adịda nya okpunyi a hụ tanụ wuu mẹ. Amẹn.