Read idege ALA IROM 16 Bible Online

ALA IROM 16 - idege bible

ALA IROM 16

¹Lẹẹlẹẹ, m tịtọ kam ka ya ọnyadahị ọnyang ẹ-ẹpwụ nya ịKịrayịsị ọlẹ kị wụrụ iFibi ọngọlẹ kọ juwa myị ẹrụ ụ-ụwa ị-ịchọọchị ọla ịSẹnchiriya dodehe jenu lẹ.

²Lẹ, anụ́-ụ kpa ọkẹkẹnị dọọ ọwụraba wẹ ẹpwụ nyanụ la ẹnyị nya Ọngọlahị jaabwọ kọ chịla ká angịnyị nya Ohe Oluhye ka họ mẹ. Kanụ dọọ ụbwọ ẹ-ẹpwụ nya ang myị́ ang ọlẹ kọ baba họọ bwu ẹga nyanụ ịnyịnyị mẹ. Chajị, iFibi ọwẹ ayịdang ri ọngọ kaa da angịnyị nya Ohe Oluhye ụbwọ lụmẹ. Ọ dam am ayịdang ụbwọ ịnyịnyị yẹẹyẹẹ lụka ọhẹ lẹ.

³Anụ da ọnụ chị iPirisila bala Akwila angịlẹ kị ri alụkụrwọ ọlẹ tam ẹ-ẹpwụ nya ịKịrayịsị iJisọsị ham mẹ.

⁴Ịwa anyị a ri angịlẹ kị ya egbeju jwoodo chajị nya ọhịhị nyam lẹ. Ẹla ọọwa myịm lẹhị lụmẹ, ma, ám ụbwọm dọmwụ kem ka. Chajị, ọ ri ẹla ọ-myị ala ịchọọchị nya ala iJentayịlị wuu lẹhị lụmẹ, ịnyị a du kị juwa jaa obe tam ịnyịnyị lẹ.

⁵Anụ́-ụ da ọnụ chị ala ịchọọchị ịlẹ kị kaa jịra ẹ-ẹpwa nya iPirisila anyị ham ịnyịnyị mẹ. Anụ da ọnụ chị Ẹpanẹtọsị oligu nyam ọlẹ kọ hám lụmẹ ịnyịnyị mẹ. Ọwa ayịdang a ri ọngịnyị nya ọgbanyẹ ọlẹ kọ ri ọngịnyị nya ịKịrayịsị ụ-ụwa o-oye nya Echiya wuu lẹ.

⁶Anụ da ọnụ chị iMeri ọngọlẹ kọ ri ọngọ họ ụkụrwọ lụmẹ ẹ-ẹpwarịrị nyanụ ham mẹ.

⁷Anụ da ọnụ chị Andironikọsị bala iJuniyasị ịlẹ kị ri aanam bala ịwa angị ri alagba nya ẹrụ ọnyịịla ọlẹ tam ịnyịnyị mẹ. Angịwẹ a ri alẹng ịhyẹ ịlẹ kị ri angị ịtụka-ịtụka ẹ-ẹpwụ nya alẹrụ ọnyịịla ọlẹ lẹ. Angịwẹ dọmwụ ri angịnyị nya ịKịrayịsị jene nyam am ayịdang.

⁸Anụ da ọnụ chị Ampiliyatọsị oligu nyam ọlẹ kọ hám lụmẹ ẹ-ẹpwụ nya Ọngọlahị ham.

⁹Anụ da ọnụ chị Ụbanọsị ọlẹ kọ ri ọlụkụrwọ ọlẹ tahị ẹ-ẹpwụ nya ịKịrayịsị ham. Anụ da ọnụ chị iSitakisi ọngọ ham há ịnyịnyị mẹ.

¹⁰Anụ da ọnụ chị Apẹlẹsị ọngọlẹ ká ọ-jẹ́ họhọ yẹẹyẹẹ lụmẹ nyamwụ ẹ-ẹpwụ nya ịKịrayịsị chị ehe a-ahịgboo lẹ, ham mẹ. Anụ da ọnụ chị alọdọdẹpwa nya Arisitobulọsị ham.

¹¹Anụ da ọnụ chị ọọnam iHerodiyọn ham. Anụ da ọnụ chị angịlẹ wuu kị juwa ẹ-ẹpwụ nya Ọngọlahị ụ-ụwa ọdọdẹpwa nya ịNaakisọsị ham ịnyịnyị mẹ.

¹²Anụ da ọnụ chị iTirifana bala iTirifosa angịlẹ kị ri alụkụrwọ nya ẹrụ ọnyịịla ọmyịmyị nya Ọngọlahị ọlẹ ịnyịnyị ham mẹ. Anụ da ọnụ chị ịPẹẹsisi oligu nyam ọlẹ kọ hám lụmẹ, ọngọlẹ kọ kaa họ ụkụrwọ nya Ọngọlahị lụmẹ ịnyịnyị ham mẹ.

¹³Anụ da ọnụ chị iRufọsị ọngọlẹ kọ ri ọngọ ọtụka ẹ-ẹpwụ nya ụkụrwọ ọhọhọ ha Ọngọlahị ham bala ịnamwụ ọlẹ kọ kaa kpẹhị rịrịm lala ọnyị nya ịlọmwụ ịnyịnyị mẹ.

¹⁴Anụ da ọnụ chị Asinkiritọsị bala ịFụlẹgọn bala ịHẹẹmẹsị bala ịPatirobasị bala ịHẹẹmasị bala anyadahị ịkịla ẹ-ẹpwụ nya ịKịrayịsị ịlẹ kị juwa taa wuu ham mẹ.

¹⁵Anụ da ọnụ chị iFilologọsị bala iJuliya bala iNerusi bala ọnyịnamwụ ọnyang bala Olimpasị bala angị ịgọgọ ịlẹ wuu kị juwa taa ịnyịnyị ham mẹ.

¹⁶Anụ́-ụ juwa da ọnụ chị awụlẹ, kanụ juwa ju awụlẹ ọnụ nya angị ịgọgọ ham mẹ. Ala ịchọọchị nya ịKịrayịsị ịlẹgẹlẹ wuu ya, nyị da ọnụ chịnụ ha ịwa mẹ.

¹⁷Anụ anyadam ẹ-ẹpwụ nya ịKịrayịsị, m jam bịlẹnụ nya ịlẹhị-ịlẹhị yẹkẹẹ, angịlẹ wuu kị juwa kpa ebwo ọchịchị warị wẹ ẹpwarịrị nyanụ bala o-juwa hụ angị ịkịla ahị bwula o-juwa tụ ẹla nya ịlẹhị nya Ohe Oluhye ọlẹ kahị mẹjẹẹnụ pyịpyị wẹ wuu lẹ, anụ́-ụ juwa ju angịịwa ẹjẹẹ datị, kanụ juwa chị ịlọnụ ebwo hyaa ịnyịnyị mẹ.

¹⁸Chajị, ụma nya ang ịlịnyị wuu lẹ, í juwa myị ẹrụ ha Ọngọlahị iJisọsị ịKịrayịsị la ọkịlẹtụ ọgbagbịla kpong-kpong ka. Ma, ị juwa myị ẹrụ ha ugbẹpwụ nya ịlaa kem. I juwa hụ angịlẹ kị jẹ́ ịngịngịhyẹ onyobyi datị lẹka, ahị bwula ẹla ọgẹnẹ-gẹnẹ oyaya bala ẹlẹlẹ nyaa ọ-kpa mwụ angịịwa ju.

¹⁹Chajị, jaabwọ ká ihi ojuju nyanụ ọlẹga nya ẹrụ ọnyịịla nya Ohe Oluhye ru ohi pwụ ẹga nya iru nya angịnyị wuu, du kaam ayịdang lẹẹ chị ọkẹkẹnị junu o-oluhye nya ọọwa lẹlẹ, anụ cheri kanụ ri angị jẹ́ ẹla yẹẹyẹẹ ẹ-ẹpwụ nya ang ọnyịịla ọhọhọ kem mẹ. Kanụ ri angị jẹ́ ịngịngịhyẹ onyobyi ọhọhọ kaka, gbanggbang mẹ.

²⁰Ó-ri kanụ myị họ ịnyị lẹ aalẹ, Ohe Oluhye Adịda nya okpunyi ayịdang ka kụrụ Ohe Onyobyi chẹẹchẹẹ hanụ, du kanụ ka jẹ́-ẹ juwa kpa ẹta rịrọọ u-uhye myị́ lẹ. Ká ọnahị nya Ọngọlahị iJisọsị ịKịrayịsị a juwa tanụ mẹ.

²¹ITimoti ọlẹ kọ ri ọngọ họ ụkụrwọ nya Ohe Oluhye tam ya, nyị da ọnụ chịnụ ha ọwa mẹ. ILusiyọsị bala ịJẹsịn bala iSosipata anyị ịlẹ kị ri aanam ya, nyị da ọnụ chịnụ ha ịwa ịnyịnyị.

²²Am ịTẹẹtịyọsị ọngọ lẹẹ kpa ụbwọ nyam da ileta ọlẹ ha ịPọlụ ya, nyị da ọnụ chịnụ ha ọwa ẹ-ẹpwụ nya Ọngọlahị la.

²³ỊGayọsị ọlẹ kaam ịPọlụ ju ụga ẹ-ẹpwa nyamwụ ọwa ọngọlẹ ká ala ịchọọchị ịlẹgẹlẹ wuu kaa jịra ẹ-ẹpwa nyamwụ ya, nyị da ọnụ chịnụ ha ọwa. Ẹrasịtọsị ọlẹ kọ ri ọngọ kpa okpoko nya alepweji ọlẹ bala ịKwaatọsị ọnyadahị ẹ-ẹpwụ nya ịKịrayịsị anyị ya, nyị da ọnụ chịnụ ịnyịnyị ha ịwa mẹ. [

²⁴Ká ọnahị nya Ọngọlahị iJisọsị ịKịrayịsị a juwa tanụ wuu mẹ. Amẹn.]

²⁵Ká Ohe Oluhye Ọngọlẹ kọ la ọngịrị ka wunu kpa ha ịlọmwụ myị́, jaabwọ kam kaa ya dodehe ẹ-ẹpwụ nya ẹrụ ọnyịịla ọlẹ kam kaa ya pyẹ rụ́ Ọngọlahị iJisọsị ịKịrayịsị bala jaabwọ ká ẹla nya ịlẹhị ọkpịbaa ọgbalẹ-gbalẹ nya Ohe Oluhye ọlẹ kọ ya chị ehe ka la oyi ịkẹkpẹ,

²⁶ma, ká Ohe Oluhye tị chị ẹla ọọwa ehe bwula ụpwụ ọlẹ kọ kpa angị ri alọmwụ nyamwụ ọwa Ohe Oluhye da, du kọ jẹ́ chị ehe lẹẹ mẹjẹ alepwoja myị́ epwoja wuu bwula ẹrụ ọnyịịla nya ihi nya Ohe Oluhye ojuju bala ọmyịmyị ọlala ọlẹ lẹ.

²⁷Ọwa Ohe Oluhye ọọwa ọlẹ kọọwa ụbwọọmwụ a ri Adịda nya ẹla ọjẹ́jẹ, ogbo wuu a ka juwa ha pwụ ụka myị́ ụka bwula iJisọsị ịKịrayịsị lẹlẹ. Amẹn. [Ị da ileta ọlẹ bwu ịKọrịntị du ịFẹbẹ ọnchẹ nya ịKịrayịsị ọlẹ kọ myị ẹrụ ụ-ụwa ị-ịchọọchị ọla ịSẹnchiriya kpa kele kịla ala iRom.]