Read idege ALA IROM 2 Bible Online

ALA IROM 2 - idege bible

ALA IROM 2

¹Ẹnwa oligu nyam ọlẹng, ahụ ọngọlẹ ká wẹẹ la angị ịkịla eje, juwa ya eje waa u-uhye nya ang onyobyi ọhọhọ nyaa wẹẹ! Aa ri ọng myị́ ọng riri aalẹ, ahụ ayịdang á be hi ẹpwụ nya eje owuwu nya Ohe Oluhye kpong-kpong ka. Chajị, ahụ ayịdang wẹẹ họ ụma nya ịhọbịrị ịịwa ịlẹ ká wẹẹ ya eje wu angị ịkịla u-uhye nyaa ịnyịnyị.

²Ahị wuu jẹ́ yẹkẹẹ, eje nya abwẹla ọnyịịla ọlala nya Ohe Oluhye ka wu, angịlẹ wuu kị juwa họ ụma nya ịhọbịrị ịlịnyị wuu pyii lẹ.

³Ee lẹ, ẹnwa oligu nyam ọlẹng, ọlẹ ká wẹẹ ya eje wu angị ịkịla u-uhye nya ang inyibyi ịhọhọ ịlẹ kaahụ ayịdang tịtị wẹẹ họ ịnyịnyị wẹ lẹ, a ya kaahụ ayịdang ka jẹ́-ẹ be hi ẹpwụ nya eje owuwu nya Ohe Oluhye myị́ kpong-kpong?

⁴Lee, ụdụ nya ahyẹẹrwẹrwa nya Ohe Oluhye bala ujiji nya ọhịnyọhi nyamwụ bala ugbodu ojuju onyudiyo nyamwụ ọlẹga nya angịnyị ehe, a tị́ mwọọgịlẹ wẹẹ yẹhị da bwee? Lee, á tị́ jẹ́ yẹkẹẹ, ang odudu ká Ohe Oluhye nyị kaa yẹ angịnyị ahyẹẹrwẹrwa tata ịnyị, nyị ri chajị kaahị angịnyị ehe nyị ka yẹ irya da bwu ẹpwụ nya ịhọbịrị ịhọhọ nyahị ka?

⁵Ma, lẹẹlẹẹ lẹ, bwula ọlẹ ká wẹẹ ba irya nya egbeju ọnyọọngịrị nyang bala ihi ojuju ka, ẹ-ẹga nya Ohe Oluhye jẹ kem lẹ, a juwa tụ ila nya akama ọyẹyẹ ọtụka ju gbe ịlọng, lụka ọlẹ ká Ohe Oluhye ka chị agbama nyamwụ ehe jahị da alọhọbịrị, bwula eje ọlala nya abwẹla ọnyịịla nyamwụ la ẹnụtụrụ ohyẹẹkpẹ pyii lẹ.

⁶Chajị, ẹnụtụrụ ọọwa kpangga, Ohe Oluhye a ka nwụ angịnyị ehe wuu uri kwiwa nya ang myị́ ang ọlẹ wuu ká ọng myị́ ọng lẹẹ họ ẹ-ẹpwụ nya odehe ọlẹ pyii lẹ.

⁷Ẹ-ẹga nya angịlẹ wuu kị juwa tịtọ nya ogbo nya ẹbyẹbyị nya Ohe Oluhye bala ihi ọlala bala igu ọ-ka jẹ́-ẹ gbugbu-kaka nya Ohe Oluhye ka ẹpwụtụbwọ nyamwụ, du kị juwa kpa ugbodu ojuju họ ụkụrwọ ọnyịịla kịlahị-ịlahị lẹ, angịịwa, Ohe Oluhye a ka hu ọhịhị ọmyịmyị-ka ha ẹnụ ọọwa lẹlẹ.

⁸Ma, ẹ-ẹga nya angịlẹ ká irya nya ụbwọ nya ịlaa ọhọhọ kem, a kaa háa lụmẹ, du kị myị ju ihi nya ẹla nya ịlẹhị nya Ohe Oluhye kpong-kpong kaka. Ma, ọkọkọ nya ọọwa lẹ, ká ihi nya abwẹla onyobyi ọhọhọ kem, ị kaa ju lẹ, agbama bala ikẹjẹ-awụrụ nya Ohe Oluhye oluhye nya ọhọbịrị nya angịnyị, a ka ri uri nya angịịwa ụka ọọwa ịnyịnyị lẹlẹ.

⁹Chajị, ochipwuu nya akama ọtụka bala ang ọjụjụ ọlẹnụtụrụ ọọwa ka juwa ha ọng myị́ ọng ọlẹ wuu kọ ri ọngọ họ ang onyobyi pyii lẹ. Akama ọtụka ọọwa ka chị wu ala iJuu họhẹ-họhẹ. Ọ tị ka chị wu ala iJentayịlị wuu ịlẹpwụ nya ẹla ọọwa ịnyịnyị.

¹⁰Ma, ụka ọọwa, Ohe Oluhye ka hu ogbo bala ihi bala okpunyi nyamwụ ha ọng myị́ ọng ọlẹ wuu kọ họ abwẹla ọnyịịla ịnyịnyị. Ang ịwẹ ka juwa ha ala iJuu họhẹ-họhẹ. Ị tị ka juwa ha ala iJentayịlị, ịlẹ kị họ abwẹla ọnyịịla ịnyịnyị.

¹¹Chajị, Ohe Oluhye ayịdang á ri Ọngọlẹ kọ kaa chị oku nya ẹla ha ọngọhẹ hiigu gụ ọngọkịla datị ẹ-ẹpwụ nya eje ọlala nyamwụ kpong-kpong ka.

¹²Jaabwọ ká ala iJentayịlị á la ehile nya iMosisi ọlẹ kị ka bajẹ ka lẹ, ụka myị́ ụka kịịwa á họbịrị, eje nya ayịreji ọtata nyaa ịwa o-bwu ẹga nya Ohe Oluhye á kaa bwu ẹpwụ nya ehile nya iMosisi ọọwa ka. Ma, ụka myị́ ụka ká ala iJuu angị la ehile nya iMosisi á tị họ ang onyobyi lẹ aalẹ, ehile nya iMosisi ọọwa, Ohe Oluhye a tịtị kaa kpa laa ịwa eje nya ọhọbịrị ọọwa lẹlẹ.

¹³Chajị, angịlẹ kị juwa kpa ụrụ nya ịlaa kem wo ehile ọọwa, Ohe Oluhye á kaa waa nya alabwẹla ọnyịịla ị-ịlahị nya ịlọmwụ ka. Ma, angịlẹ wuu kị kaa họ ehile ọọwa jịra, Ohe Oluhye a kaa wa nya alabwẹla ọnyịịla ị-ịlahị nya ịlọmwụ wẹẹ lẹ.

¹⁴Chajị, ọ ri nya ịlẹhị yẹkẹẹ, ala iJentayịlị lẹ, ị́ la ehile nya iMosisi, juwa bajẹ kokoo. Ma, ọ́ tị ri kịịwa ayịdang á juwa họ abwẹla ọnyịịla ọlẹ kọ pwoku ehile nya iMosisi ọọwa, bwula ihi ojuju nya irya ọ-la ọngịnyị eje ọlẹpwụ nyaa myị́ lẹ aalẹ, irya ọ-la ọngịnyị eje ọlẹpwụ nyaa ọọwa, a ku ọmwakpa nya ehile nya iMosisi haa ịwa wẹ ịnyịnyị lẹlẹ.

¹⁵Bwula ọhọhọ nyaa ọọwa, ị mẹjẹ yẹkẹẹ, Ohe Oluhye ayịdang nyị da ehile nyamwụ ba ọkịlẹtụ nyaa ịwa, juwa ene-ene lẹ. Ịnyị a du ká irya ọ-la angịnyị eje ọlẹpwụ nya ọkịlẹtụ nyaa, jẹ́ kaa ya eje waa lee ọ-ya eje rwaa u-uhye nya ang myị́ ang ọlẹ kị juwa họ ịnyịnyịịnyị lẹlẹ.

¹⁶Lẹ, irya ọ-la ọngịnyị eje ọlẹpwụ ọkịlẹtụ nya angịnyị ehe ọwẹ kpangga, a ka ri ibeenu nya ang myị́ ang ọlẹ ká ọng myị́ ọng jam họ ịbaa-ịbaa odehe ọlẹ ụ-ụwa ị-ịlahị nya Ohe Oluhye la ẹnụtụrụ nya eje nyamwụ ọlẹ kọ ka la bwula ịKịrayịsị iJisọsị ịnyịnyị, jaabwọ kam kaa ya dodehe ẹ-ẹpwụ nya ẹrụ ọnyịịla o-ya pyẹ nyam ọlẹ ịnyịnyị lẹlẹ.

¹⁷Ahụ ọngọlẹ ká wẹẹ wụrụ ịlọng yẹkẹẹ, ọwa nyị tị́ ri ala iJuu lẹ, ká wẹẹ kpụ nịrọ o-ri yẹkẹẹ, ị tị́ ya ehile nya iMosisi hanụ juwa lẹ, ká wẹẹ chị ogu ịnyịnyị yẹkẹẹ, ịwa angịlẹ nyaa tị́ ri angịnyị nya Ohe Oluhye ayịdang ri lẹ!

¹⁸Ká myịmyị wẹẹ yẹkẹẹ, ọwa nyaa tị́ jẹ́ irya nya Ohe Oluhye yẹẹyẹẹ lụmẹ lẹ bala ọ-la irya ọ-kpa jẹ́ ang ọnyịịla datị hi ang ọtịpyọ, chajị nyọlẹ kanụ jẹ́ ehile nya Ohe Oluhye hiigu-hiigu lụmẹ lẹlẹ.

¹⁹Anụ juwa dahịhile yẹkẹẹ, ịwa ayịdang nyaa ri angị kaa kpa angị ri alidu nya ehile ọọwa ụgbẹyị lẹlẹ. Ịwa nyaa ri ahịgboo ha angịlẹ kịị nyị juwa ẹ-ẹpwụ nya ukpowu ịnyịnyị lẹlẹ.

²⁰Ịwa nyaa ri angị jẹ́ ẹla kaa mẹ ang jẹ aluchi bala o-ri angịmẹjẹ ha anyị anjwo ichiche ẹ-ẹpwụ nya ẹla nya Ohe Oluhye ịnyịnyị lẹlẹ. Chajị, anụ myị yẹkẹẹ, ẹ-ẹpwụ nya ehile nya iMosisi ọlẹ kịịwa nyị la, ẹla ọjẹ́jẹ bala ẹla nya ịlẹhị nya Ohe Oluhye wuu nyaa ji lẹlẹ.

²¹Ee lẹ, jaabwọ kaanụ ayịdang ri ịtịcha, wẹẹ mẹ ang jẹ angịkịla lẹlẹ, ịịyẹ a tị́ du kanụ kaa mẹ ang ịịwa jẹ ịlọnụ ka? Jaabwọ kanụ wẹẹ ya ẹla nya Ohe Oluhye tụ oyi oyiyi pyịpyị lẹ, anụ ayịdang kaa cheji ba oyi oyiyi ọọwa wẹẹ ene?

²²Jaabwọ kanụ wẹẹ ya dodehe yẹkẹẹ, ọngọngọhẹ nyị họ ụya kpong-kpong ka lẹ, anụ ayịdang juwa cheji ba ụya ọhọhọ ọọwa wẹẹ ene? Anụ kanụ kaa ya ẹla tụ ojiga ọkpụ́kpụ pyịpyị lẹ, ánụ kaa họ ang ọ-chị ube ịgọgọ nya Ohe Oluhye ịrị wẹẹ kpong-kpong ka?

²³Anụ kanụ kaa kpa ehile nya Ohe Oluhye ọlala chị ogu ịnyịnyịịnyị lẹ, anụ ya kanụ kaa chị oyoyi ju ẹnyị ịgọgọ nya Ohe Oluhye bwula o-juwa bịrị ehile nyamwụ ọọwa ka?

²⁴Chajị, ị da kpehe ụ-Ụpwụ Ịgọgọ lẹẹ yẹkẹẹ, “Chajị nya ọ-jẹ́ họ-ka, nyanụ anụ ala iJuu, a du ká ala iJentayịlị kaa ye ẹla onyobyi ya rụ́ ẹnyị ịgọgọ nya Ohe Oluhye lẹ!”

²⁵Anụ wo mẹ! Ó-ri kanụ juwa ju ihi nya ehile nya Ohe Oluhye lẹ aalẹ, ụwụwụ ọdada nyanụ ọwẹ ka ju apyobwuna hanụ myị́. Ma, ọ́ tị ri kanụ juwa bịrị ehile nya Ohe Oluhye tụbwọ aalẹ, ịngịngịhyẹ á ri ang ọdatị ẹ-ẹga nyanụ bala angị da ụwụwụ ka lẹ ka.

²⁶Lee, ánụ tị́ jẹ́ yẹkẹẹ, ó-ri ká ala iJentayịlị ịlẹ kị ri angị da ụwụwụ da ka wẹ lẹ, ó-ri kị juwa ju ihi nya ehile nya Ohe Oluhye jịra, ká Ohe Oluhye ayịdang á ka hwaa lala angị da ụwụwụ lẹ, ị-ịlahị nya ịlọmwụ bwula ọọwa ka?

²⁷Ịnọ, ọ ri nya ịlẹhị, ala iJentayịlị ịwẹ lẹ, ị́ da ụwụwụ ọlam-ọlam lala anụ ala iJuu kokoo. Lee, ọ-la ehile ọ-da ju ụ-ụpwụ lala anụ kaka ịnyịnyị! Ma, bwula ọ-họ hiigu nyaa ọọwa gụụnụ, ị tị ka ya eje wunu, anụ ala iJuu angị da ụwụwụ, kanụ tị mwọọgịlẹ juwa bịrị ehile nya Ohe Oluhye ọlẹ kọ da ju ụ-ụpwụ hanụ pyii lẹ.

²⁸Chajị ụ-ụwụwụ ọdada nya ugbinyịrọ olodehe ọlẹ ká ọngịnyị ehe wẹẹ yẹ ẹ-ẹhị kem kpangga, a ri ẹjẹẹ nya o-ri ala iJuu ọlam-ọlam lee o-ri ẹjẹẹ nya ọngọ da ụwụwụ nya ịlẹhị-ịlẹhị ị-ịlahị nya Ohe Oluhye ayịdang kpong-kpong lẹka!

²⁹Ma, ọngọlẹ kọ ka ri ala iJuu ọlam-ọlam ị-ịlahị nya Ohe Oluhye ri ọngọlẹ kọ la cheri-cheri ẹ-ẹpwụ nya irya nyamwụ bala ọ-la abwẹla ọnyịịla nya Ohe Oluhye ẹ-ẹpwụ ọkịlẹtụ nyamwụ. Ọọwa a ku ọmwakpa nya ụwụwụ ọdada nya ịlẹhị-ịlẹhị ọlẹ kọ kaa bwula ọngịrị nya Olegu nya Ohe Oluhye lẹ. Ó ri ịnya ụwụwụ ọdada nya ugbinyịrọ ọlẹ ka. O-ya dodehe nya ọ-họ hiigu nya ọngọ ọlịnyị á kaa bwu ọnụ nya ọngịnyị ehe kpehe ka. Kẹnẹ-kẹnẹ, ẹ-ẹga nya Ohe Oluhye ayịdang ụbwọọmwụ mẹ ịnyị.