Read idege ALA IROM 4 Bible Online

ALA IROM 4 - idege bible

ALA IROM 4

¹Anyị, ahị tị́ ka ya rụ́ ọhọhọ nya Ebiraham ọlẹ kọ ri adịda ogogo nyahị ahị ala iJuu lẹẹ kpong-kpong?

²Chajị, ó ri ụkụrwọ ọhọhọ nya Ebiraham kọ du ká Ohe Oluhye wọọ nya ọlabwẹla ọnyịịla ị-ịlahị nya ịlọmwụ ugbeene ịnọ, Ebiraham ka kpa ọọwa chị ogu myị́. Ma, ọ́ tị ye ịngịngịhyẹ ọlịnyị ka kpa chị ogu ị-ịlahị nya Ohe Oluhye kpong-kpong ka.

³Chajị, ị da kpehe ụ-Ụpwụ Ịgọgọ yẹkẹẹ, “Ebiraham kpa ọkịlẹtụ nyamwụ wuu myị la Ohe Oluhye lẹ, Ohe Oluhye tịtị wọọ nya ọlabwẹla ọnyịịla ị-ịlahị nya ịlọmwụ ọ-ọlọọwa.”

⁴Anụ tị jẹ́, ó-ri ká ọngịnyị á họ ụkụrwọ ene kịị nwọọ uri nyamwụ lẹ aalẹ, ị́ ka jẹ́-ẹ wa ọọwa lala ang ọgahị kaka. Ma, uri oyeye kem mẹ ịnyị!

⁵Ma, ọ́ tị ri ká ọngịnyị ehe, á họ ụkụrwọ ọhẹ-lọhẹ họ ka, kọ tị kpa ọkịlẹtụ nyamwụ wuu myị la Ohe Oluhye Ọngọ kaa ya eje rụ alabwẹla onyobyi lẹ aalẹ, ọmyịmyị ọlala nya ọngọọwa, Ohe Oluhye a ka kpa wa ọngọọwa nya ọlabwẹla ọnyịịla ị-ịlahị nya ịlọmwụ lẹlẹ.

⁶Ọlịnyị a du ká iDevidi ya ẹla rụ́ ahị ọwawa ọlẹ kọ ka ri ịnya ọng myị́ ọng ọlẹ ká Ohe Oluhye á wa nya ọlabwẹla ọnyịịla ị-ịlahị nya ịlọmwụ ụka ọlẹ ká ọngọọwa á họ ụkụrwọ ọhẹ-lọhẹ ene ka lẹ. Ẹla ọọwa a lẹẹ lẹ:

⁷“Ahị ọwawa juwa ha angịlẹ wuu ká Ohe Oluhye hịnyọhi ang inyibyi ịhọhọ nyaa wuu haa lẹ, bala angịlẹ ká Ohe Oluhye á kpa ahyẹẹrwẹrwa nyamwụ chị ang ke ibyi nya ịhọbịrị ịlẹ kị họ wuu ịnyịnyị lẹ.

⁸Ahị ọwawa ka juwa ha ọng myị́ ọng ọlẹ ká Ọngọlahị á juwa da ọhọbịrị ọhọhọ nya ọngọọwa ju nọ gbe ẹnụtụrụ nya eje ohyẹẹkpẹ kaka, ịnyịnyị.”

⁹Ahị ọwawa ọlẹ ká iDevidi ya ẹla rụ́ wẹẹ ẹgẹwẹ lẹ, ọ ri nya angịlẹ kị da ụwụwụ kem? Lee, ọ tị́ juwa ha angịlẹ kị da ụwụwụ-ka, kpịlọ? Ee, ọ juwa haa ịnyịnyị. Chajị, ahị ya dodehe wẹ ene-ene yẹkẹẹ, ọmyịmyị ọlala nya Ebiraham a du ká Ohe Oluhye kpa wa Ebiraham nya ọlabwẹla ọnyịịla ị-ịlahị nya ịlọmwụ lẹ.

¹⁰Ee lẹ, ụka oyina kpangga, Ohe Oluhye a tị́ kpa wa Ebiraham nya ọlabwẹla ọnyịịla ịnyị ene? Ụka ká Ebiraham da ụwụwụ lee ene kọ da ụwụwụ ọọwa tị́? Ehe! Ọlịnyị ene ká Ebiraham da ụwụwụ ugbeene.

¹¹Ebiraham da ụwụwụ ẹ-ẹkpẹ nya ọọwa, chajị ụwụwụ ọdada nya Ebiraham ọwẹ a ri ang o-ju ẹjẹẹ nya ọlabwẹla ọnyịịla oriri nya Ebiraham ị-ịlahị nya Ohe Oluhye bwula ọmyịmyị ọlala nyamwụ, lụka ọlẹ ká Ebiraham á dọmwụ da ụwụwụ dada kpong-kpong ene lẹ ka lẹ. Ọlịnyị, chajị ká Ebiraham ayịdang ka jẹ́-ẹ ri adịda nya angịlẹ kị da ụwụwụ ka, kị tị kpa ọkịlẹtụ nyaa wuu myị la Ohe Oluhye lẹ, ká Ohe Oluhye tịtị ka bwula ọọwa waa lala alabwẹla ọnyịịla ị-ịlahị nya ịlọmwụ ịnyịnyị.

¹²Ịnyịnyị, ọ la lẹ. Ebiraham ri adịda nya ala iJuu ịlẹ kị ri angị da ụwụwụ. Ma, aajị nya ụwụwụ ọdada ọlam-ọlam ọwẹ tị kem ka. Chajị, angịịwa wuu ka ri angị juwa dịrẹ ọgụ-ẹpẹtẹ nya ọmyịmyị ọlala nya Ebiraham adahị ogogo ọlẹ kọọwa la ene-ene kọọ da ụwụwụ ugbeene pyii ịnyịnyị!

¹³Ụka ọlẹ ká Ohe Oluhye myị ọnụ ha Ebiraham bala anyị ịtụma nyamwụ wuu ugbeene yẹkẹẹ, nyị ka ri ugu nya odehe ọlẹ wuu lẹpwụ-lẹpwụ lẹ, ọnụ ọmyịmyị ọọwa á bwula ihi ojuju nya ehile nya Ohe Oluhye ka! Ma, chajị nya ọmyịmyị ọlala nya Ebiraham ọlẹ kọ du ká Ohe Oluhye kpa wọọ lala ọlabwẹla ọnyịịla ị-ịlahị nya ịlọmwụ ịnyị!

¹⁴Chajị, ó-ri ká ọ-họ jịra nya ọnụ ọmyịmyị nya Ohe Oluhye oyeye, á juwa ha angịlẹ kị kaa ju ihi nya ehile nyamwụ kem lẹ, ịnọ, ọmyịmyị ọlala nyahị ahị angịnyị ehe ka ri ang ododu lẹ. Ịnọ, ọnụ ọmyịmyị nya Ohe Oluhye ayịdang ọ-họ jịra ọọwa tịtị ka ri uhwo ịnyịnyị lẹ.

¹⁵Chajị, ụkụrwọ ọlẹ ká ehile kaa họ ri o-me agbama nya Ohe Oluhye o-oluhye nya ọhọbịrị ịlẹ kahị họ tụ ehile ọọwa pyịpyị, ụchụ hahị kem. Chajị, ẹga ọlẹ ká ehile á ji kaka lẹ, eje nya ehile ọbịrị bịrị á jẹ́-ẹ wu ọngịnyị ẹ-ẹga ọọwa kaka ịnyịnyị.

¹⁶Ịnyị a du ká ọ-họ jịra nya ọnụ ọmyịmyị nya Ohe Oluhye ọọwa oyeye, do pịlẹ u-uhye nya ọmyịmyị ọlala kem lẹlẹ. Ọlịnyị, chajị kọ ka la gbadaa yẹkẹẹ, ọnụ ọmyịmyị ọọwa nyị ri ang ọgahị ododu ọlẹ ká Ohe Oluhye nyị hunọ ha anyị nya Ebiraham wuu. Ọlịnyị, chajị ká ọ-họ jịra nya ọnụ ọmyịmyị nya Ohe Oluhye ọọwa á ka ri ang omeme la angị juwa ju ihi nya ehile nya Ohe Oluhye kem kaka. Ma, chajị ká angịlẹ wuu kị juwa kpa ọkịlẹtụ nyaa wuu myị la Ohe Oluhye lala Ebiraham ka jẹ́-ẹ ye ọ-họ jịra nya ọnụ ọmyịmyị ọọwa lẹ. Chajị, Ebiraham a ri adịda nyahị ahị, angị myị la Ohe Oluhye wuu tụchawụlẹ lẹ!

¹⁷Chajị, Ohe Oluhye ya ẹla rụ́ Ebiraham ụ-Ụpwụ Ịgọgọ ẹgẹlẹ yẹkẹẹ, “Am Ohe Oluhye hung adịda nya epwoja lụmẹ-lụmẹ lẹ.” Ọnụ ọmyịmyị ọwẹ ká Ohe Oluhye myị ha Ebiraham ịnyị lẹ, ọ juwa pyịyọọ ịnyịlẹhị, chajị Ọwa-à ri Ohe Oluhye ọlẹ ká Ebiraham myị la lẹ. Ohe Oluhye ọọwa a tị ri Ọngọlẹ kọ kaa wule angị gbugbu eji bwula igu, kaka la ọhịhị myịmyị lẹ. Ọwa tị myịmyị ri Ohe Oluhye Ọngọ kaa họ ká ang ịlẹ kị jiji ene ka, kaa ji myị́ ịnyịnyị lẹlẹ.

¹⁸Chajị, ụka ọlẹ ká Ohe Oluhye byi Ebiraham yẹkẹẹ, “A ka ri adịda nya epwoja lụmẹ-lụmẹ.” Ma, Ebiraham á tị kpa ugbẹhị nyamwụ yẹ ịngịngịhyẹ ọlẹ kọ ka kpa dahịhile kpangga, ene kọọ kpa ọmyịmyị ọlala nyamwụ la ẹhị ọrịrịị-rịrị gbe ọ-họ jịra nya ọnụ ọmyịmyị ọọwa ugbeene kpong-kpong ka.

¹⁹Chajị, ọ ri nya ịlẹhị, ụka ọọwa lẹ, Ebiraham gu ẹka lala ohu ịrụ chiriri lẹ. Ma, ụka kọ tị me irya ju ọdẹwụ dẹwụ nya ugbinyịrọ nya ịlọmwụ ọwa ayịdang bala jaabwọ ká ori-ụma nya iSera ahụ nyamwụ tụ ku bwula okwirichi ọchịchị nyamwụ ịnyịnyị lẹ, Ebiraham á myị ọọwa hu ọdẹwụ-dẹwụ ha ọmyịmyị ọlala nyamwụ kpong-kpong ka.

²⁰Ẹhị ọrịrịị-rịrị nya Ebiraham á pyị giri hi ọ-họ jịra nya ọnụ ọmyịmyị nya Ohe Oluhye ọọwa bwula ọmyịmyị ọlala ka lẹ ka. Ma, ọkọkọ nya ọọwa lẹ, ọmyịmyị ọlala nya Ebiraham la ọngịrị kịlahị-ịlahị, jaabwọ kọ juwa gwogbo ha Ohe Oluhye u-uhye nya ọọwa ịnyịnyịịnyị.

²¹Chajị, Ebiraham ayịdang dahịhile Ohe Oluhye wuu lẹpwụ-lẹpwụ yẹkẹẹ, jaabwọ ká Ohe Oluhye nyị myị ọnụ myị ha ọwa lẹ, Ohe Oluhye nyị la ọngịrị ka họ ọnụ ọmyịmyị ọọwa jịra ha ọwa ịnyị myị́ pyii lẹ.

²²Ọlịnyị a du ká ọmyịmyị ọlala nya Ebiraham ọọwa họ ká Ohe Oluhye kpa wọọ nya ọlabwẹla ọnyịịla ị-ịlahị nya ịlọmwụ lẹlẹ.

²³Ma, egbe nya ala ịlẹ kị ya wẹ yẹkẹẹ, “Ohe Oluhye wọọ lala ọlabwẹla ọnyịịla ị-ịlahị nya ịlọmwụ wẹ lẹ,” ị́ dọọ kpehe, chajị nya Ebiraham ụbwọọmwụ kem ka.

²⁴Ma, ẹla ọọwa juwa hahị ahị aloyi ọlẹ ịnyịnyị! Chajị, ahị angịlẹ wuu kahị myị la Ohe Oluhye Ọngọ wule iJisọsị ịKịrayịsị Ọngọlahị eji bwula igu, lẹẹ wuu lẹ, Ohe Oluhye ka wahị lala alabwẹla ọnyịịla ị-ịlahị nya ịlọmwụ ịnyịnyị!

²⁵Chajị, Ohe Oluhye hu iJisọsị du warị kaka gbu wọnụ nya ịhọbịrị ịhọhọ nyahị wuu ju bala owule ịKịrayịsị eji bwula igu, chajị kọ ka bwula ịKịrayịsị ọọwa wahị lala alabwẹla ọnyịịla ị-ịlahị nya ịlọmwụ.