Read idege ALA IROM 6 Bible Online

ALA IROM 6 - idege bible

ALA IROM 6

¹Ee lẹ, anyị, ahị tị́ ka ya tịtị mẹ! Ahị tị́ ka juwa họ ang onyobyi kịlahị-ịlahị chajị nyori yẹkẹẹ, Ohe Oluhye ri Ọlọnahị lụmẹ ẹ-ẹga nyahị lẹ, lee?

²Ohe Oluhye a pwa ang onyobyi ọlịnyị! Chajị, ahị angịlẹ kahị gbugbu wuu ẹ-ẹga ká ọhọbịrị ọhọhọ ji kpá ene-ene lẹ, anyanyị, ahị tị́ ka myịmyị jẹ́-ẹ juwa hịhị ẹ-ẹpwụ nya ọhọbịrị ọhọhọ myịmyị wẹẹ?

³Lee, ánụ tị́ jẹ́ yẹkẹẹ, ahị angịlẹ wuu kahị la ọhịhị onyeewe nya ịKịrayịsị, du kị hụhị enyi Ohe la ẹnyị nya ịKịrayịsị iJisọsị wuu lẹẹ lẹ, ahị nyị hụ enyi Ohe ọọwa nya ang o-ju ẹjẹẹ yẹkẹẹ, ahị nyị tịtị gbu igu nya ịKịrayịsị ọlẹ kịị nyị gbu tọọ ịnyịnyị lẹ, kpong-kpong ka?

⁴Bwula enyi Ohe ọhụhụ nyahị ọọwa, ọ ri ang o-ju ẹjẹẹ yẹkẹẹ, jaabwọ kahị bá igu nya ịKịrayịsị bá gbu tọọ lẹ, ị tịtị juhi eji bala ịKịrayịsị ịnyịnyị lẹ. Ọlịnyị, chajị, jaabwọ ká ịKịrayịsị wuleji bwula igu, juwa hịhị myịmyị bwula ọngịrị ẹbyẹbyị nya Ohe Oluhye Adịda lẹlẹ, ká ọọwa ka họ kọ ka jẹ́-ẹ chịkpẹẹ hahị kahị tịtị ka juwa jẹdịyẹ ẹ-ẹpwụ nya ọhịhị onyeewe nya ịKịrayịsị myị́.

⁵Chajị, jaabwọ kahị bá igu nya ịKịrayịsị bá gbu tọọ lẹ, ịnyịnyị-ịnyịnyị, ahị tịtị ka bá ọhịhị nya owuleji bwula igu nyamwụ bá la tọọ ịnyịnyị pyii lẹlẹ.

⁶Ahị jẹ́ yẹkẹẹ, ọhọbịrị ọhọhọ nya ọngịnyị onyogo ọlẹpwụ nyahị a wẹ kahị hu kpa kaka gu iloo ba okoji ta ịKịrayịsị, chajị ká ọngịrị nya ọhọbịrị ọhọhọ nya ugbinyịrọ nyahị ọọwa ka jẹ́-ẹ ta ayịreji ụ-ụwa lẹlẹ. Chajị, ká ọọwa ka họ kahị ka myịmyị-ị̀ ri anyịhị nya ọhọbịrị ọhọhọ kaka gbanggbang.

⁷Chajị, ụka ká ọngịnyị ehe á gbu lẹ aalẹ, ọwa ayịdang gbocho bwu ẹpwụ nya ọhọbịrị ọhọhọ gbanggbang lẹ.

⁸Ma, jaabwọ kaahị ayịdang gbu ta ịKịrayịsị lẹlẹ, ahị myị yẹkẹẹ, ahị tịtị ka jam hịhị ta ịKịrayịsị ayịdang lẹẹlẹẹ ịnyịnyị lẹ.

⁹Chajị, ahị jẹ́ yẹkẹẹ, ịKịrayịsị wuleji bwula igu, juwa hịhị lẹlẹ, ọ́ ka myịmyị-ị̀ gbu kpá ẹnẹnẹhẹ kaka. Chajị, igu ogbugbu á la ọngịrị ọhẹ-lọhẹ ka kụrụ ịKịrayịsị myị́ ugbẹnyị kaka.

¹⁰Igu ọlẹ ká ịKịrayịsị gbu lẹ, ọ gbu igu ọọwa lụka ookpokpo ọlẹ kọ nwa ụga pyịyọọ wọnụ nya ọhọbịrị ọhọhọ nya angịnyị ehe wuu ju lẹ. Ọhịhị nya ịKịrayịsị ọlẹ kọ tị wẹẹ hịhị lẹẹlẹẹ lẹ, ọ juwa hịhị ha Ohe Oluhye lẹ.

¹¹Ịnyịnyị-ịnyịnyị, anụ ayịdang a tịtị la lẹlẹ! Anụ gbugbu ẹ-ẹga ká ọhọbịrị ọhọhọ ji lẹ. Ma, anụ tị jam hịhị lẹẹlẹẹ ha Ohe Oluhye bwula ọngịrị nya ịKịrayịsị iJisọsị lẹ.

¹²Chajị nya ọọwa lẹ, anụ myị ká ọhọbịrị ọhọhọ a juwa kụrụ ugbinyịrọ nyanụ ọlẹ kọ ka gbugbu myị́, tụtụm, du kanụ ka juwa ju ihi nya imyi nya ịnyịrọ nyanụ myịmyị kokoo!

¹³Anụ myị ká ẹga nya ịnyịrọ nyanụ ọhẹ-lọhẹ a ji oye nya abwẹla onyobyi ọhọhọ, bwula o-juwa kpa ẹga nya ịnyịrọ ọọwa họ ang onyobyi kaka. Ma, ọkọkọ nya ọọwa lẹ, anụ hu ịlọnụ lẹpwụ-lẹpwụ ji oye nya Ohe Oluhye lala angịlẹ kị gbugbu ẹ-ẹga nya ọhọbịrị ọhọhọ, ene kị wuleji bwula igu juwa hịhị ha Ohe Oluhye lẹẹlẹẹ lẹ mẹ. Kanụ tụụbwọ hi ẹga myị́ ẹga nya ịnyịrọ nyanụ wuu ju Ohe Oluhye ụ-ụbwọ, chajị kọ ka jẹ́-ẹ juwa kpa ẹga nya ịnyịrọ nyanụ họ ụkụrwọ nya abwẹla ọnyịịla nyamwụ kem ịnyịnyịịnyị mẹ.

¹⁴Chajị, irya nya Ohe Oluhye ẹ-ẹga nyanụ ri yẹkẹẹ, ọhọbịrị á ka kụrụụnụ ugbẹnyị kaka. Chajị, ánụ juwa e-ekpeleji nya ehile kaka, ma, e-ekpeleji nya ọnahị nya Ohe Oluhye kem mẹ ịnyị.

¹⁵Ee lẹ, anyị, ahị tị́ ya mẹ! Jaabwọ kahị ji ekpeleji nya ehile kaka lẹlẹ, ahị tị ka juwa họ ang onyobyi kịlahị-ịlahị tọ ri yẹkẹẹ, ahị ji ekpeleji nya ọnahị nya Ohe Oluhye lẹ, lee? Ohe Oluhye a pwa ang onyobyi ọlịnyị!

¹⁶Lee, ánụ tị́ jẹ́ ẹla ọlẹ lẹka? Ọng myị́ ọng ọlẹ kaahụ ayịdang á juwa ju ihi nya ang myị́ ang ọlẹ kọ bying ya, ahụ nyị họ mẹ lẹ aalẹ, ọnyọhị nya ọngọọwa, a ri lẹlẹ. Ịnyịnyị, ọ ka la hanụ lẹlẹ. Ó ri ihi nya ọhọbịrị ọhọhọ ọlẹ kọ kaa kpa igu ogbugbu kịla ọngịnyị ehe, kanụ juwa ju lẹ aalẹ, ọnyọhị nya ọhọbịrị ọhọhọ, anụ ri lẹlẹ. Lee, ọ́ tị ri ihi nya Ohe Oluhye ojuju ọlẹ kọ kaa kpa abwẹla ọnyịịla nya Ohe Oluhye kịla ọngịnyị ehe kanụ juwa ju lẹ aalẹ, ọnyọhị nya abwẹla ọnyịịla, anụ ri ịnyịnyị lẹlẹ.

¹⁷Ma, obe ojiji a juwa ha Ohe Oluhye mẹ! Chajị, ụka ọhẹ kẹkpẹ lẹ, anụ ayịdang ri anyịhị nya ọhọbịrị ọhọhọ. Ma, lẹẹlẹẹ lẹ, anụ ri angị ju ihi nya Ohe Oluhye, bwula ọlẹ kanụ kpa ọkịlẹtụ nyanụ wuu myị la ọmẹjẹ ọnyịịla nya Ohe Oluhye ọlẹ kị kpa warị kaka ya jenu nya ịlẹhị-ịlẹhị lẹ.

¹⁸Ọọwa lẹ, Ohe Oluhye a chịnụ da bwu ẹpwụ nya ọhọbịrị ọhọhọ nyanụ lẹ, anụ yẹ ri anyịhị nya abwẹla ọnyịịla ọhọhọ nyamwụ wẹ ugbẹnyị lẹlẹ.

¹⁹M chụ ọhọhọ nya angịnyị ehe kpịta ẹ-ẹpwụ nya ẹla oyaya nyam ọwẹ, chajị nya ọdẹwụ-dẹwụ nyanụ lala angịnyị ehe. Chajị, jaabwọ kaanụ ayịdang tụụbwọ hi ẹga nya ịnyịrọ nyanụ ji oye nya ang inyibyi ị-chịrị ị-ịlahị nya Ohe Oluhye ịhọhọ bala ọhọbịrị ịlẹ kanụ juwa họ tịpyọ kwọọyị-ọyị ịnyịnyịịnyị lụka onyogo nyanụ lẹ. Ịnyịnyị-ịnyịnyị, anụ tịtị ka kpa ugbinyịrọ nyanụ ji oye nya abwẹla ọnyịịla ọhọhọ nya Ohe Oluhye gbee, kanụ ka ri angị la charị-charị ị-ịlahị nya Ohe Oluhye ugbẹnyị lẹlẹ.

²⁰Ụka ọlẹ kaanụ ayịdang ri anyịhị nya ọhọbịrị ọhọhọ wẹẹ lẹ, anụ gbocho bwu ẹpwụtụbwọ nya abwẹla ọnyịịla ọhọhọ.

²¹Ụma nya ang inyibyi ịịwa ịlẹ kanụ họ ụka ọọwa, kị wẹẹ lanụ oyoyi lụka ọlẹ kanụ kpịtịya nyaa lẹẹlẹẹ wẹẹ, ịịyẹ a tị́ ri apyobwuna nyaa hanụ kpong-kpong ene? Chajị, ọbaba nya ang ịtịpyọ ịwẹ wuu lẹ, igu ogbugbu ụbwọọmwụ mẹ ịnyị!

²²Ma, lẹẹlẹẹ lẹ, anụ gbocho bwu ẹpwụ nya ọhọbịrị ọhọhọ wuu, yẹ kaka ri anchẹ ị-myị ẹrụ ha Ohe Oluhye lẹ. Ugbe nya ọọwa ọlẹ kanụ ka la, a rigọgọ ọlala ha Ohe Oluhye lẹlẹ. O-ya dodehe nyamwụ a tị ri ọhịhị ọmyịmyị-ka ọlẹ kanụ ka la ịnyịnyị lẹlẹ.

²³Chajị, uri nya ọhọbịrị ọhọhọ ri igu ogbugbu. Ma, ọgahị ọnahị nya Ohe Oluhye ri ọhịhị ọmyịmyị-ka bwula ịKịrayịsị iJisọsị Ọngọlahị.