Read idege ALA IROM 8 Bible Online

ALA IROM 8 - idege bible

ALA IROM 8

¹Chajị nya ọọwa lẹ, eje owuwu nya Ohe Oluhye ọhẹ-lọhẹ á juwa ha angịlẹ wuu kị juwa ẹ-ẹpwụ nya ịKịrayịsị iJisọsị lẹẹlẹẹ kaka. [Chajị, ịwa ayịdang á kaa ba imyi nya ịnyịrọ nyaa jẹ kaka. Kẹnẹ-kẹnẹ, irya nya Olegu Ịgọgọ ọlẹpwụ nyaa ụbwọọmwụ kem mẹ ịnyị!]

²Chajị, ehile nya ọngịrị nya Olegu Ịgọgọ Ọngọ hu ọhịhị onyeewe ham bwula ịKịrayịsị iJisọsị, gbam kpehe bwu ẹpwụ nya ehile nya ọhọbịrị ọhọhọ bala igu ogbugbu ugbẹnyị lẹ.

³Chajị, ang ọlẹ ká ehile á jụ họ ha ugbinyịrọ ọdẹwụ-dẹwụ nyahị ọlẹ ka lẹ, Ohe Oluhye họ ang ọọwa hahị lẹ. Chajị, Ohe Oluhye yẹ ọhọbịrị ọhọhọ nya angịnyị ehe wuu akama bwula ọlẹ kọ du Ọnyẹwẹ nyamwụ warị la ụma nya ugbinyịrọ nyahị ahị alọhọbịrị, kaka gbu wọnụ nya ịhọbịrị ịhọhọ nyahị ịịwa wuu ju lẹ.

⁴Chajị ká apyobwuna nya igu ọọwa ọlẹ ká ịKịrayịsị gbu, chajị nyọka họ ehile nya Ohe Oluhye jịra kpẹẹkpẹẹ, ka ri ịnyahị ahị angịlẹ kahị juwa ba imyi nya ugbinyịrọ ọlẹpwụ nyahị jẹ kaka. Ma, ká irya nya Olegu Ịgọgọ ọlẹpwụ nyahị kem, ahị jam bajẹ lẹẹlẹẹ lẹ.

⁵Chajị, angịlẹ wuu kị juwa hịhị ba irya nya imyi nya ugbinyịrọ ọlẹpwụ nyaa jẹ kem lẹ, imahị nya ang nya imyi nya ịnyịrọ ịịwa kem, ị kaa me lẹlẹ. Ma, angịlẹ kị tị juwa họ ang ọlẹ ká Olegu nya Ohe Oluhye ọlẹpwụ nyaa ya kem lẹ, imahị nya irya ọlẹ kọ pwoku ịnya Olegu Ịgọgọ kem, ị kaa me ịnyịnyị lẹlẹ.

⁶Irya nya ang nya imyi nya ugbinyịrọ ịlịnyị kem omeme kaa kpa igu ogbugbu kịla ọngịnyị ehe! Ma, apyobwuna nya ọ-ba irya nya Olegu Ịgọgọ jẹ kem, tị ri ọhịhị onyeewe bala okpunyi ọlala.

⁷Chajị, irya omeme u-uhye nya ang nya imyi nya ugbinyịrọ kem, a kaa họ ká ọngịnyị kaa ri oluji nya Ohe Oluhye lẹ! Chajị, ọngịnyị ọlịnyị á kaa myị-ị kpa ịlọmwụ keji ha ehile nya Ohe Oluhye ka. Nya ịlẹhị ịnyị, ọngọ ọlịnyị á ka jẹ́-ẹ ju ihi nya ehile nya Ohe Oluhye myị́ kpong-kpong kaka.

⁸Angịlẹ wuu kị tị juwa hịhị ba imyi nya ugbinyịrọ nyaa jẹ kem, á ka jẹ́-ẹ họ ang ọ-kpụ Ohe Oluhye ịpyọ myị́ kpong-kpong kaka, ịnyịnyị.

⁹Ma, jaabwọ ká Olegu Ịgọgọ nya Ohe Oluhye tị kụ ụ-ụwa ẹ-ẹpwụ nyanụ lẹlẹ, anụ tụtụm ri angị ka juwa ba imyi nya ugbinyịrọ nyanụ jẹ myịmyị ugbẹnyị kaka. Ma, irya nya Olegu Ịgọgọ ọlẹpwụ nyanụ ọọwa kem, anụ ka juwa họ lẹlẹ. Ọng myị́ ọng ọlẹ kọ la Olegu nya ịKịrayịsị ẹ-ẹpwụ nyamwụ ka aalẹ, ọngọọwa á ri ịnya ịKịrayịsị kpong-kpong lẹka.

¹⁰Jaabwọ ká ịKịrayịsị kụ ẹ-ẹpwụ nyanụ wẹ lẹlẹ, ọ ri nya ịlẹhị, ugbinyịrọ nyanụ ka juwa gbugbu, ẹ-ẹga ká ọhọbịrị ọhọhọ ji lẹẹ! Ma, Olegu nya Ohe Oluhye ọlẹpwụ nyanụ tị ka juwa ya ọhịhị onyeewe hanụ bwula abwẹla ọnyịịla ọhọhọ nya ịKịrayịsị Ọngọ kụ ẹpwụ nya ọkịlẹtụ nyanụ lẹ.

¹¹Ó-ri ká Olegu nya Ohe Oluhye Ọngọ wule iJisọsị eji bwula igu, á kụ ụwa ẹ-ẹpwụ nyanụ ịnyịlẹhị lẹ aalẹ, Ohe Oluhye Ọngọ wule ịKịrayịsị iJisọsị eji bwula igu, tịtị ka ya ọhịhị ha ugbinyịrọ ọ-kaa gbugbu myị́ nyanụ ọwẹ lụka ohyẹẹkpẹ bwula ọngịrị nya Olegu Ịgọgọ nyamwụ ọlẹ kọ ya kụ wẹ ẹ-ẹpwụ ọkịlẹtụ nyanụ ịnyịnyị pyii lẹ.

¹²Chajị nya ọọwa lẹ, anụ anyadam ẹ-ẹpwụ nya ịKịrayịsị, lẹẹlẹẹ lẹ, ahị ri angị kpa uri nya ihi ojuju lẹ! Ma, ụ-ugbinyịrọ nyahị ọlẹ, ahị tị kpa uri ọọwa nyọka juwa hịhị ba ang myị́ ang ọlẹ ká imyi nya ugbinyịrọ ọọwa ka byihi ya, ahị nyị họ mẹ, tụtụm ugbẹnyị kaka.

¹³Chajị, ó-ri kanụ juwa hịhị ba ang myị́ ang ọlẹ ká imyi nya ịnyịrọ ọlẹ á byinu lẹ aalẹ, anụ ka gbu bwula ọhọbịrị ọhọhọ lẹ. Ma, ọ́ tị ri kanụ juwa hịhị ba irya nya Olegu nya Ohe Oluhye jẹ, kanụ juwa gbugbu ẹ-ẹga ká ang onyobyi ọhọhọ ọlẹ ká imyi nya ịnyịrọ kaa tịtọ lẹ aalẹ, anụ ka la ọhịhị onyeewe nya Ohe Oluhye bwula ọọwa lẹ.

¹⁴Chajị, angịlẹ wuu kị myị juwa ba irya nya Olegu nya Ohe Oluhye ọlẹpwụ nyaa jẹ ẹ-ẹpwụ nya ọhịhị nyaa wuu kem, a ri anyị nya Ohe Oluhye ịlẹ kị ri angịgbahị ẹ-ẹpwụ nya ẹla nyamwụ wẹẹ lẹ.

¹⁵Chajị, Olegu nya Ohe Oluhye ọlẹ kọ ya hanụ lẹ, ó ri Olegu ọ-kpanụ ju ka ẹpwụ nya ọnyọhị oriri ọlẹ kanụ ka tịrẹkpẹ myịmyị ka ẹpwụ nya uhi ojuju kaka. Ma, Olegu ọọwa ọlẹ kanụ ye, ri Olegu ọlẹ kọ kaa hu iwe-ahụrụ nya anyị ịgbahị oriri ị-ịlahị nya Ohe Oluhye ha angị myịmyị. Ịnyị a du kaahị angị ịlịnyị wuu kaa la ọngịrị, juwa wụrụ Ohe Oluhye yẹkẹẹ, “Adada, Ohe Oluhye Adịda nyam” myị́ bwula ọngịrị nya Olegu Ịgọgọ ọọwa lẹlẹ.

¹⁶Chajị, Olegu nya Ohe Oluhye ayịdang a kaa ri ibeenu nya olegu ọlẹpwụ nyahị ahị angị myịmyị yẹkẹẹ, ahị nyị ri anyị nya Ohe Oluhye ịnyịlẹhị lẹ!

¹⁷Jaabwọ kahị ri anyị nya Ohe Oluhye lẹlẹ, ahị ri angị ka la ang ugu nya Ohe Oluhye lẹ. Ahị ri angị ka bá ang ugu nya Ohe Oluhye bá la ta ịKịrayịsị lẹ. Jaabwọ kaahị ayịdang jam bá akama nyamwụ bá yẹ tọọ lẹlẹ, ahị tịtị ka bá ẹbyẹbyị nya ịKịrayịsị ọọwa bá la tọọ lụka ohyẹẹkpẹ ịnyịnyị lẹ.

¹⁸M jẹ́ myịmyị yẹkẹẹ, akama ịlẹ kahị lẹẹ yẹ lẹẹlẹẹ lẹ, ị́ la gbuu kpụ, ị ka jẹ́-ẹ chwaa kaka pwoku ụma nya ẹbyẹbyị nya ịKịrayịsị ọlẹ kọ ka ya chị ehe hahị ị-ịlahị myị́ kpong-kpong ka.

¹⁹Chajị, ang myị́ ang ịlẹ wuu ká Ohe Oluhye họ ẹ-ẹpwụ nya odehe ọlẹ jam charịnya la ẹhị ọrịrịị-rịrị gbe ụka ọlẹ ká Ohe Oluhye ka chịhị, ahị angịlẹ kahị ri anyị nyamwụ ịlam-ịlam wuu ehe lụka ohyẹẹkpẹ.

²⁰Chajị, ọlẹẹlẹẹ lẹ, ang-abwọ ilodehe ọlẹ wuu lẹ, í ju apyobwuna nya ang ọlẹ ká Ohe Oluhye haa chajị nyamwụ bwu ọmwụ ọdada kaka. Ma, ọ́ tị ri irya nya ang-abwọ ịịwa la ịlaa kọ ka lịnyị ka. Ma, ẹlẹwẹ họ ịnyị bwula irya nya Ohe Oluhye ọlẹ kọ kpa gọlọ ju ang ịịwa. Ohe Oluhye tị họ ịnyị, chajị nya ụgbẹyị nya ẹhị ọrịrịị-rịrị ọlẹ kọ ya da gbaa ị-ịlahị.

²¹Chajị, ụka ọọwa, ang-abwọ ịlẹ ká Ohe Oluhye họ odehe ọlẹ tịtị ka la ịlaa bwu ẹpwụ nya iwe-ahụrụ nya ang ọmama ọlẹ kị juwa ẹ-ẹpwụ nyamwụ gbalẹ-gbalẹ lẹ. Ọọwa lẹ, ị tịtị ka bá ịlaa ọlala ọlẹbyẹbyị bá la ta anyị nya Ohe Oluhye ịnyịnyị lụka ọọwa lẹlẹ.

²²Chajị, ahị jẹ́ yẹkẹẹ, ang-abwọ ịlẹ wuu ká Ohe Oluhye họhọ odehe ọlẹ, ị jam ya ọnụ da awụlẹ ẹ-ẹpwụ nya eru ọchịchị nya ang ọjụjụ ọ-lala ịnya ang nya ọnyị ọmama ọlẹ kị juwa ẹ-ẹpwụ nyamwụ ịnyịnyịịnyị pyịyọọ daalẹ ọlẹ.

²³Ọ́ dọmwụ ba ẹ-ẹga nya ang-abwọ ịlẹ ká Ohe Oluhye họ odehe ọlẹ kem ka! Ma, ahị angị myịmyị ịlẹ kahị ri angị la ugbe nya ọgbanyẹ nya ahị ọwawa nya Olegu nya Ohe Oluhye wuu lẹ, ahị jam chị eru ọọwa ịnyịnyị, lụka ọlẹ kahị lẹẹ godayị gbe ụka nya iwe-ahụrụ ọlẹ ká Ohe Oluhye ka kpa chịhị ehe lala anyị nyamwụ ịnyịlẹhị, lụka ọlẹ ká ọchịda nya ugbinyịrọ nyahị ọlẹ ka chị eju gbanggbang ịnyịnyị!

²⁴Chajị, ọwẹ kpangga a ri ang ọlẹ kahị la ẹhị ọrịrịị-rịrị gbe lụka nya ọgbanyẹ nya ọchịda nyahị lẹ. Ẹhị ọrịrịị-rịrị ọlala u-uhye nya ang ọlẹ ká ọngịnyị á juwa kpẹhị nyamwụ yẹ, á ri ẹhị ọrịrịị-rịrị tụtụm kaka. Chajị, ịịyẹ a tị́ ka ri apyobwuna nya ẹhị ọrịrịị-rịrị gbe ang ọlẹ kaahụ ayịdang jẹ́ juwa kpẹhị nya ịlọng yẹ lẹ, myịmyị wẹẹ?

²⁵Ma, jaabwọ kaahị ayịdang jam godayị gbe ahị ọwawa nya Ohe Oluhye ọọwa ọlẹ kahị jẹ́ jam yẹ ẹ-ẹhị lẹẹlẹẹ lẹka lẹ, ahị cheri kahị juwa kụ ọlọyị gboo giri-giri ẹ-ẹpwụ nya ugbodu ojuju ịnyịnyịịnyị tịtị mẹ!

²⁶La ụgbẹyị ọọwa ọọwa, Olegu Ịgọgọ ayịdang a kaa dahị ụbwọ ẹ-ẹpwụ nya ọdẹwụ-dẹwụ nya ugbinyịrọ nyahị lẹ! Chajị, ahị ayịdang á jẹ́ jaabwọ kahị kaa bwu raabwọ ha Ohe Oluhye la ọgụ ọlẹ kọ chịla ka. Ma, Olegu Ịgọgọ la ịlọmwụ a kaa bịlẹ wọnụ nyahị ju ị-ịlahị nya Ohe Oluhye la eru ọchịchị ọlẹ kahị ka jẹ́-ẹ da wụlẹ bwu ọnụ nyahị la ẹla oyaya myị́ kpong-kpong kaka lẹlẹ.

²⁷Chajị, Ohe Oluhye ayịdang Ọngọlẹ kọ kaa jẹ́ irya ọlọkịlẹtụ nyahị ahị angịnyị ehe wuu hweng-hweng lẹ, ọ jẹ́ irya nya Olegu Ịgọgọ ịnyịnyị. Chajị Olegu Ịgọgọ a kaa juwa bịlẹ ang wọnụ nyahị ahị angị ịgọgọ ju jaabwọ kọ ka pwoku irya nya Ohe Oluhye kpangga lẹ!

²⁸Ahị jẹ́ yẹkẹẹ, ang myị́ ang wuu kaa họ ụkụrwọ tụchawụlẹ nya ohiigu ha bwula ọngịrị nya Ohe Oluhye ẹ-ẹga nya angịlẹ wuu ká Ohe Oluhye ayịdang há, kị ri angịlẹ ká Ohe Oluhye be ẹkọ wụrụ kị ka ri angịnyị nya ịlọmwụ, jaabwọ ká obyi omeme nyamwụ la.

²⁹Chajị, angịlẹ ká Ohe Oluhye jẹ́ ene-ene nya angịnyị nya ịlọmwụ, angịịwa, ọ me obyi lẹ, ọ chwaa kị ka ju abwụma nya Ọnyẹwẹ nyamwụ, chajị ká Ọnyẹwẹ nyamwụ ọọwa ka jẹ́-ẹ ri Ọnyị nya ọgbanyẹ ẹ-ẹpwarịrị nya anyadamwụ ịkịla wuu ị-ịlahị nya Ohe Oluhye lẹlẹ.

³⁰Angịịwa ịlẹ ká Ohe Oluhye tị me obyi ọọwa nọ gbe, Ohe Oluhye a tị be ẹkọ wụrụ kaka ri angịnyị nya ịlọmwụ lẹlẹ. Angịịwa ịlẹ kọ tị be ẹkọ wụrụ kaka ri angịnyị nya ịlọmwụ lẹ, angịịwa, ọ tị ya eje nya ọhọbịrị owuwu nyamwụ rụ ịnyịnyị lẹlẹ. Angịịwa ịlẹ kọ tị ya eje nyamwụ rụ, angịịwa, Ohe Oluhye a tịtị ya ẹbyẹbyị ọlala nya ịlọmwụ ha ịnyịnyị lẹ.

³¹Chajị nya ọọwa lẹ, anyị, ahị tị́ ka ya u-uhye nya ang ịlẹ wuu mẹ? Jaabwọ ká Ohe Oluhye ji oye nyahị ịnyị wẹ lẹlẹ, o-owo, a tị́ tụtụm ka kụrụụhị myị wẹẹ?

³²Ọwa Ohe Oluhye ọlẹ ká Ọnyẹwẹ nyamwụ lẹpwụ-lẹpwụ á kọọ ẹhị la o-hu ha ka, du kọ tụụbwọ hyoo warị kaka gbu wọnụ nyahị ahị angịnyị ehe wuu ju lẹ, anyanyị, ọ tị́ ka jẹ́-ẹ lọọ ujwo nyọka hu ang myị́ ang ịkịla wuu ba ọọwa u-uhye hahị myị́ tụtụm wẹẹ?

³³Ee lẹ, o-owo a tị́ tụtụm ka myịmyị jẹ́-ẹ kele kaka chị ẹla ba angịlẹ ká Ohe Oluhye chụchụ ha ịlọmwụ ị-ịlahị nya Ohe Oluhye ọọwa myị́ wẹẹ? Chajị, Ohe Oluhye ayịdang kpangga a ri Ọngọlẹ kọ ya eje nyamwụ rụhị ahị angịnyị nyamwụ wuu lẹlẹ.

³⁴Lee, o-owo a tị́ tụtụm ka jẹ́-ẹ ya eje wu angịịwa ị-ịlahị nya Ohe Oluhye wẹẹ? Ị-ịKịrayịsị iJisọsị ọlẹ kọ gbu wọnụ nyahị ịnyị? Ehe, ịnyị dọmwụ ka! ỊKịrayịsị ọlẹ kọọwa ayịdang wuleji bwula igu, kọ godayị rịrị u-upwuriri nya Ohe Oluhye lalẹẹ bịlẹ Ohe Oluhye wọnụ nyahị ju, a ka dachichi ya eje ọọwa wuhi lẹlẹ?

³⁵Ee lẹ, ó ri ịnyị lẹ, o-owo a tị́ tụtụm myịmyị ka jẹ́-ẹ chịhị ebwo hi ọháha nya Ohe Oluhye ọlẹ kahị la ẹ-ẹpwụ nya ịKịrayịsị myị́ wẹẹ? Akama, a ka chịhị ebwo ọọwa myị́ lẹ? Lee, ang ọjụjụ tị́? Lee, ọ-tụ pyịpyị tị́? Lee, imyi ọ-nwụhị nwụ tị́? Lee, o-ji lọhị-lọhị ye ang duru ka tị́? Lee, ang ọjụjụ ọ-tụụhị beji kpalị-kpalị tị́? Lee, ẹma nya ẹwụ tị́?

³⁶Chajị, ị da kpehe ụ-Ụpwụ Ịgọgọ lẹẹ ẹgẹlẹ yẹkẹẹ, “Chajị nyang Ahụ Ọngọlahị Ohe Oluhye a du ká igu ogbugbu lẹẹ mehi ụchụ onyobyi ẹnụ myị́ ẹnụ wuu lẹ. Chajị, aluji nyahị jam họhị ụhị lala ọkpịlọ ọlẹ kị juwa wu kpa kaka chị imyi lẹ.”

³⁷Ọ tị lịnyị kpá odu ịnyị! Ahị ri angị kụrụ kụrụ ma kụrụ ị-ịlahị nya ang ịwẹ wuu bwula ọngịrị nya ịKịrayịsị Ọngọlẹ kahị há lụmẹ.

³⁸Chajị, m jẹ́ myịmyị nya ịlẹhị-ịlẹhị yẹkẹẹ, ó-ri igu ogbugbu riri lee ọhịhị lee alegu-ẹrụ ilepwoohe lee ịngịrị ịtụka-ịtụka lee ang ilijata lee ang ịlịlahị ịlẹ kị juwa ka warị lee ọngịrị nya eji ogbegbe nya ịdịrịhụ wuu,

³⁹lee, ang iluhye-ọgba ipyiipyii lee ang ikpori-kpori ilekpeleji nya ịpyị lee ịngịngịhyẹ ọkịla ọlẹ wuu ká Ohe Oluhye họhọ, á ka jẹ́-ẹ la ọngịrị chịhị ebwo hi ọháha ọlẹ kahị la ẹ-ẹga nya Ohe Oluhye bwula ịKịrayịsị iJisọsị Ọngọlahị kpá myị́ ẹnẹnẹhẹ kaka.