Read idege ALA IROM 9 Bible Online

ALA IROM 9 - idege bible

ALA IROM 9

¹Ẹla nya ịlẹhị a lẹẹ kam lẹẹ ya ẹ-ẹpwụ nya ịKịrayịsị lẹ, ọ-ọnọọkịla, m lẹẹ me kpong-kpong ka. Irya ọ-la ọngịnyị eje ọlẹpwụ ọkịlẹtụ nyam rim ibeenu nya ẹla ịlẹhị ọọwa ịnyịnyị bwula ọngịrị nya Olegu Ịgọgọ.

²Ẹla ọọwa ri yẹkẹẹ, m la ujujwo ọtụka-ọtụka bala ọ-kaa juwa ẹ-ẹpwụ nya ang ọjụjụ ịnyịnyịịnyị ẹ-ẹpwụ ọkịlẹtụ nyam, chajị nya ala iJuu nyahị.

³Ịnọ, ọ́ dọmwụ ri ang ọchịkpẹẹ, ká ọlọ ọgaga nya Ohe Oluhye á ka jẹ́-ẹ wum am ịPọlụ ọlẹ, kị ka chịm ebwo hi ịKịrayịsị myị́, ká ọọwa á ka jẹ́-ẹ họ ká anyadam ala iJuu nyahị ịlẹ kaam bala ịwa ri alụpwọma ookpokpo á ka jẹ́-ẹ wu ọchịda nya Ohe Oluhye ọyị myị́, ịnọ, ọ ka hám lụmẹ.

⁴Ịwa anyị a ri ala Isirẹlụ ịlẹ ká Ohe Oluhye kpa kele ka iwe-ahụrụ nya ọnyị nya ịlọmwụ oriri lẹ. Ịwa, Ohe Oluhye a chị ẹbyẹbyị nyamwụ ehe mẹjẹ lẹ. Ịwa, Ohe Oluhye a nwa iro nyamwụ ha lẹ. Ịwa, Ohe Oluhye a hu ehile nyamwụ ha lẹ. Ịwa, Ohe Oluhye a hu kị ka ri angị mẹ ịgba ọgbagba ha Ohe Oluhye nya ịlẹhị-ịlẹhị jẹ angịkịla wuu lẹ. Ịwa, Ohe Oluhye a tị myị ọnụ nyamwụ ha ịnyịnyị lẹ.

⁵Ịwa a ri angịlẹ ká adịda igogo nyaa anyị ri angịnyị nya Ohe Oluhye ịtụka-ịtụka lẹ. Ẹ-ẹga nya ala Isirẹlụ pyii, ịKịrayịsị ọlẹ ká Ohe Oluhye du warị a tị bwu kpehe ịnyịnyị lẹ. Ahị ọwawa a juwa ha Ohe Oluhye ọlẹ kọ ri Olegbeju nya ang myị́ ang wuu gbee pwụ ụka myị́ ụka! Amẹn.

⁶Ma, ọọwa á tị ri yẹkẹẹ, ọnụ ọmyịmyị nya Ohe Oluhye ayịdang á họ jịra kaka lẹ ka. Chajị, ọ ri nya ịlẹhị, aangịlẹ wuu kị bwu ụpwọma nya ala Isirẹlụ a họ ẹla pwoku angịlẹ ká Ohe Oluhye jẹ́ nya ọ-ri ala Isirẹlụ ị-ịlahị nya ịlọmwụ kpong-kpong ka.

⁷Aanyị ịlẹ ká Ebiraham ma bwula ịwọ nyamwụ wuu a tị ri anyị ịlam-ịlam nya Ebiraham ị-ịlahị nya Ohe Oluhye ka! Chajị, Ohe Oluhye byi Ebiraham yẹkẹẹ, “Anyị nya alụma nya Ayịsiki, M ka wa nya anyị ịlam-ịlam nya alụma nyang ahụ Ebiraham lẹlẹ.”

⁸Ọọwa mẹjẹ yẹkẹẹ, aanyị ịlẹ kị ma bwula ọngịrị nya ugbinyịrọ ọlam-ọlam ọlẹ, a ri anyị ịlam-ịlam nya Ohe Oluhye ka! Ma, anyị ịlẹ kị ma bwula ọ-họ jịra nya ọnụ ọmyịmyị nya Ohe Oluhye kpangga, Ohe Oluhye a kaa wa nya anyị ịlam-ịlam ị-ịlahị nya ịlọmwụ lẹ!

⁹Chajị, ọnụ ọmyịmyị ọlẹ ká Ohe Oluhye myị lụka ọọwa ha Ebiraham a lẹẹ lẹ: “Ụka kọ ka pwụ ihwọngkịla amachanyị ịịlẹ kpá, m ka tịrẹkpẹ warị wẹ ẹga nyang. M ka họ ká iSera ahụ nyang ka ma ọnyị ọlẹng hang.”

¹⁰Ọ́ ba ọọwa kem ka. Ma, ụka ọlẹ ká Ayịsiki adahị ogogo ju iRebeka ahụ nyamwụ ẹnyị nya anyewa ụka ọọwa lẹ,

¹¹ụka ọlẹ kị dọmwụ maa ma kpehe wẹ odehe ọlẹ kpụ, ọngọngọhẹ nyaa ka jẹ́-ẹ họ ịngịngịhyẹ ọnyịịla lee ọtịpyọ datị lẹka lẹ, Ohe Oluhye ayịdang chụ ọngọhẹ lẹpwụ nya anyewa ịịwa ha ịlọmwụ hi ọngọkịla. Ang odudu ká Ohe Oluhye kpa chụ ọngọọwa á ri ịnya ụkụrwọ ọhọhọ kpong-kpong ka. Ma, Ohe Oluhye họ ịnyị ká obyi omeme nya ọchụchụ nya ịlọmwụ ọlẹ kọ me ene-ene ka jẹ́-ẹ juwa kịlahị-ịlahị kem a du lẹ.

¹²Chajị, ene ká iRebeka ka maa kpehe lẹ, Ohe Oluhye byoo yẹkẹẹ, “Ọnyị ọgbahị a ka ji ekpeleji nya onjwo nyamwụ ẹ-ẹpwụ nya anyewa ịwẹ ká wẹẹ ka ma lẹ.”

¹³Chajị, ị da kpehe ụ-Ụpwụ Ịgọgọ yẹkẹẹ, “IJekọbụ a ri ọngọlẹ ká ẹla nyamwụ hám lẹ. Ma, Ịsọ ri ọngọlẹ ká ẹla nyamwụ wụm ẹjẹ.”

¹⁴Ee lẹ, anyị, ahị tị́ ka ya wẹ mẹ? Ọọwa tị́ ri yẹkẹẹ, Ohe Oluhye ayịdang ri Ọngọ kaa chị oku oye-oye kịrọrọ lẹ, lee? Ịgọgọ ẹnẹnẹhẹ!

¹⁵Chajị, Ohe Oluhye la ịlọmwụ byi iMosisi yẹkẹẹ, “Ọngọlẹ kọ hám, Am Ohe Oluhye kam ka họ ọnahị, ọngọọwa, M kaa họ ọnahị lẹ! Ọngọlẹ kọ tị hám kam ka yẹ ahyẹẹrwẹrwa, ọngọọwa, M tị kaa yẹ ahyẹẹrwẹrwa ịnyịnyị lẹ!”

¹⁶Chajị nya ọọwa lẹ, ọchụchụ nya Ohe Oluhye á do pịlẹ i-irya nya ọngịnyị ehe ayịdang lee o-bwula jaabwọ ká ọngọọwa juwa nwụ ịlọmwụ la ụkụrwọ ọhọhọ lụmẹ ka. Ma, ọchụchụ ọọwa do pịlẹ ahyẹẹrwẹrwa nya Ohe Oluhye ụbwọọmwụ kem.

¹⁷Chajị, Ụpwụ Ịgọgọ ya ẹla byi iFero yẹkẹẹ, “Am hung kaka hụ iwe-ahụrụ nya adịrahụ oriri, chajị kam ka bwulang ahụ chị ọngịrị nyam ehe, chajị ká ẹnyị nyam ka jẹ́-ẹ ru ohi yịrị odehe ọlẹ yịrị wuu.”

¹⁸Chajị nya ọọwa lẹ, ọngọlẹ kọ há Ohe Oluhye kọ ka yẹ ahyẹẹrwẹrwa, ọngọọwa, Ohe Oluhye a kaa yẹ ahyẹẹrwẹrwa lẹ. Ọngọlẹ kọ tị há Ohe Oluhye kọ ka tụụbwọ hi iwe nya ọkịlẹtụ ọnyọọngịrị ọlala da ha, ọngọọwa, Ohe Oluhye a kaa tụụbwọ hi iwe nya ọkịlẹtụ ọnyọọngịrị ọlala ọọwa da ha ịnyịnyị lẹ.

¹⁹Ọhẹka, angịhyẹ nyanụ ka tọm ịtọ yẹkẹẹ, “Ee lẹ, ó-ri ịnyị lẹ, ịịyẹ a tị́ du ká Ohe Oluhye myịmyị juwa kpụ ọngịnyị ehe abyị u-uhye nya ọ-jẹ́ họhọ-ka nyamwụ, ká ọngịnyị ehe ọhẹ-lọhẹ á tị ka jẹ́-ẹ tụ irya nya obyi omeme nya Ohe Oluhye pyịpyị myị́ kpong-kpong kaka wẹẹ?”

²⁰Ma, ọwẹwẹ nyam ri yẹkẹẹ, o-owo, ahụ ọngịnyị ehe ọọwa a tị́ ri kpong-kpong ene du ká byẹjẹ, juwa tọ Ohe Oluhye ịtọ ịnyị? Anụ yẹ kpá ká ọta jẹ́ juwa byi ọngọ moo me yẹkẹẹ, “Ịịyẹ a tị́ du ká họm kam la ịịlẹ?” ẹnẹnẹhẹ lẹ?

²¹Lee, ánụ tị́ jẹ́ yẹkẹẹ, ọngọlẹ kọ kaa kpa ume me ọta lẹ, ọ la ọngịrị ka kpa ume ọọwa-ọọwa me ọta ọhẹ ọlẹ kọ la ihi-ihi bala ọ-ka me ẹja ọkịla ọ-kpa da abwọ agịla ịnyịnyị myị́ ka?

²²Ee lẹ, ịnọ, ó-ri ká Ohe Oluhye ayịdang á wu ịlọmwụ kpa ka bẹ? Chajị, Ọwa ayịdang ri Ọngọlẹ, ịnọ, kọ họ́ọ kọ ka chị agbama ojuju nyamwụ ehe myị́, ká ọọwa ka jẹ́-ẹ chị ọngịrị nyamwụ ehe. Ma, Ọ tị mwọọgịlẹ kpa ugbodu ojuju onyudiyo hu ujiji ẹ-ẹga nya angịlẹ wuu kị họ ang onyobyi ị-ịlahị nyamwụ Ọwa Ohe Oluhye du, ịnọ, kịịwa ayịdang pwoku ayịreji ọtata gbanggbang lẹ.

²³Ohe Oluhye họ ịnyị chajị kọ ka jẹ́-ẹ bwula ọọwa chị ụdụ nya ẹbyẹbyị nyamwụ ehe ẹ-ẹga nya angịlẹ wuu kọ yẹ ahyẹẹrwẹrwa, chajị nyọlẹ kọ nwụla iwe-ahụrụ nyọka bá ogbo nyamwụ bá la tọọ nọ gbe angịịwa wuu ene-ene lẹ.

²⁴Ahị angịlẹ wuu ká Ohe Oluhye be ẹkọ wụrụ kaka ri angịnyị nya ịlọmwụ, a ri angịịwa lẹlẹ. Aangịlẹ kị ri ala iJuu ụbwaa kem ka. Ma, angịlẹ kị ri ala iJentayịlị juwa ịnyịnyị.

²⁵Ohe Oluhye họ ịnyị pwoku jaabwọ kọọwa ayịdang ya dodehe ụ-ụpwụ nya iHoseya lẹẹ ẹ-ẹgẹlẹ yẹkẹẹ, “Ịnọ, angịlẹ kị ri angịnyị nyam Am Ohe Oluhye wẹwẹ ene ka lẹ, m ka wụrwaa yẹkẹẹ, ‘Anụ ri angịnyị nyam’ lẹ. Alụpwọma ịlẹ ká ẹla nyaa á hám Am Ohe Oluhye há ene ka lẹ, m ka wụrwaa, ‘Anyị ilikẹjẹ nyam’ ịnyịnyị lẹ.

²⁶Ala ẹga ọlẹ ká Ohe Oluhye kaa byaa ene-ene yẹkẹẹ, ‘Ánụ́ ri angịnyị nyam Am Ohe Oluhye ka’, ene-ene lẹ, Ohe Oluhye ka wụrwaa, ‘Anyị nyam Am Ohe Oluhye ọlẹ kọ juwa hịhị ugbẹnyị lẹ.’ ”

²⁷Ayịsaya tị ya lomyi o-gboo dodehe rụ́ ala Isirẹlụ ịnyịnyị yẹkẹẹ, “O ri nya ịlẹhị, iru ojuju nya anyị nya ala Isirẹlụ lẹ, ị lụmẹ lala ugburuja ọlẹpwụ nya ihu ọtụka lẹ! Ma, angị ịmanyị-ịmanyị lẹpwụ nyaa kem, a tị ka chịda lẹlẹ.

²⁸Chajị, Ọngọlahị Ohe Oluhye juwa ka kpa ẹla ọ-chị eju bwu ọnụ nyamwụ chị eje nya abwẹla ọnyịịla nyamwụ u-uhye nya ọhọhọ nya alodehe wuu ahyaahị, kọ ka go kireng lẹ.”

²⁹Chajị, ọ ka la jaabwọ ká Ayịsaya myịmyị ya lẹẹ ẹ-ẹgẹlẹ yẹkẹẹ, “Ó ri ká Ọngọlahị Ohe Oluhye nya Ụbwẹwụ á yẹhị ahyẹẹrwẹrwa kpụ ọ-chị angịhyẹ da pyịnyẹng bwu ẹpwụ nya anyị nya ala Isirẹlụ ka, ịnọ, ahị ka ta ayịreji gbanggbang wuu lala ala ịSọdọm lẹ. Ịnọ, ahị tị ka myị́ kụrwa-kụrwa lala ala iGomora ịnyịnyị lẹ.”

³⁰Ee lẹ, anyị, ahị tị́ ka ya wẹ mẹ? Ẹla ọọwa a lẹẹ lẹlẹ: Ala iJentayịlị ịlẹ kịịwa ayịdang á juwa rụnyẹ rụrụ ba abwẹla ọnyịịla nya Ohe Oluhye baba la ụgbẹyị ọhẹ-lọhẹ ka, a mwọọgịlẹ jẹ́ kaka ye abwẹla ọnyịịla nya Ohe Oluhye bwula ọmyịmyị ọlala nyaa wẹ lẹlẹ.

³¹Ma, ala Isirẹlụ ịlẹ kịịwa tị juwa rụnyẹ nya abwẹla ọnyịịla nya Ohe Oluhye ọhọhọ bwula ụgbẹyị nya ehile ọhọhọ lẹ, í wu abwẹla ọnyịịla ọọwa ọyị bwula ehile ọhọhọ ọọwa myị́ kaka.

³²Ịịyẹ a tị́ du? Ang odudu nya ọọwa ri yẹkẹẹ, ala Isirẹlụ á myị rụnyẹ nyaa ịwa bwu ụgbẹyị nya ọmyịmyị ọlala ka. Ma, ị tịtọ nyọka kpa ụkụrwọ ọhọhọ nya ịlaa wu abwẹla ọnyịịla ọọwa ọyị, ịnyị a du lẹ. Ọọwa lẹ, ala Isirẹlụ a chị ụchụụ u-uhye nya ẹjwọ ọkịlata lẹ, ị mileji gbedem wẹ lẹlẹ.

³³Chajị, ị da ẹ-ẹgẹlẹ yẹkẹẹ, “Anụ yẹ mẹ! M jam ya Ẹjwọ ọhẹ neeji ụ-ụwa ị-ịSayọn lẹ! Angịhyẹ tị ka kịla ata u-uhye nyamwụ. Ịnyị, Ẹjwọ ọtụka ọọwa a ka họ kị ka mileji gbedem lẹlẹ. Ma, ọng myị́ ọng ọlẹ kọ tị ka myị la Ẹjwọ ọọwa lẹ, aalẹ, oyoyi, á ka ju ọngọọwa kpong-kpong kaka.”