Read idege 1 ALA ỊKỌRỊNTỊ 1 Bible Online

1 ALA ỊKỌRỊNTỊ 1 - idege bible

1 ALA ỊKỌRỊNTỊ 1

¹Ụpwụ ọlẹ bwu ẹga nyahị ahị angị imiiye. Am ịPọlụ ọlẹ ká Ohe Oluhye wụrụm kaka ri ọlẹrụ ọnyịịla nya ịKịrayịsị iJisọsị bwula irya nyamwụ. Ọ myịmyị bwu ẹga nya iSositenesi ọnyadahị ẹ-ẹpwụ nya ịKịrayịsị.

²Ahị jam da ụpwụ ọlẹ du wanụ anụ ala ịchọọchị nya ịKọrịntị. Ahị dọọ du wanụ anụ angịlẹ ká Ohe Oluhye rụ́ cheri-cheri bwula ịKịrayịsị iJisọsị. Ọ wụrụụnụ kanụ ka ri angịnyị ịlịgọgọ nyamwụ lala angịnyị nya Ohe Oluhye ịkịla ịlẹ kị juwa ẹ-ẹga myị́ ẹga wuu, ịlẹ kị kaa be ẹkọ wụrụ ẹnyị nya iJisọsị ịKịrayịsị Ọngọlahị lala Ayịbaba nyaa jaabwọ kọ ri Ayịbaba nyahị ahị ịnyịnyị.

³Ká ọnahị bala okpunyi nya Ohe Oluhye Adahị bala ịnya Ọngọlahị iJisọsị ịKịrayịsị a juwa tanụ mẹ.

⁴M kaa ji Ohe Oluhye obe ụka wuu ẹ-ẹpwụ nya abwọ ọrịrị chajị nyanụ u-uhye nya ọhaha ọnahị ọlẹ ká Ohe Oluhye ya hanụ bwula ịKịrayịsị iJisọsị.

⁵Bwula ọlẹ ká Ohe Oluhye họ kanụ kpụ ụdụ nya ọngịrị ọnyị myị ọnyị ọ-kpa họ ụkụrwọ nya ẹla nyamwụ lẹ. Chajị anụ la ọngịrị ọ-kpa ya ẹla myị́ ẹla nya Ohe Oluhye dodehe bala ọngịrị nya ọ-kpa ye ang ọjẹ́jẹ ọnyị myị ọnyị bwu ẹga nya Ohe Oluhye ịnyịnyị lẹ.

⁶Ịnyị a du ká ibeenu oriri ha ịKịrayịsị chị ẹta-eji lụmẹ ẹ-ẹpwarịrị nyanụ lẹ.

⁷Chajị nya ọọwa a du ká ọhaha nya ọngịrị nya Olegu Ịgọgọ ọ-kpa họ ụkụrwọ ha Ohe Oluhye ọhẹ-lọhẹ á ganụ amwụ kpong-kpong kaka, lụka ọlẹ kanụ wẹẹ kụ ọlọyị gbe ụka ọlẹ ká Ọngọlahị iJisọsị ịKịrayịsị ka chị ịlọmwụ ehe lụka nya ọwẹwẹ nyamwụ lẹlẹ.

⁸Ọngọlahị ayịdang a wẹẹ wunu kpa du kanụ ka ri angị la abyị ọhẹ-lọhẹ ka, gbee pwụ ẹnụtụrụ nya ọwẹwẹ nya Ọngọlahị iJisọsị ịKịrayịsị ọọwa myị́ lẹlẹ.

⁹Chajị, Ohe Oluhye ọlẹ kọ be ẹkọ wụrụụnụ kaka tụụnụ chị awụlẹ bala Ọnyẹwẹ nyamwụ iJisọsị ịKịrayịsị Ọngọlahị lẹ, Ọngọ chịla o-hu ọkịlẹtụ ha ọtụka, ọ ri lẹ.

¹⁰Anụ anyadam ẹ-ẹpwụ nya ịKịrayịsị, m jam kpa ẹnyị nya Ọngọlahị iJisọsị ịKịrayịsị bịlẹnụ nya ịlẹhị-ịlẹhị yẹkẹẹ, anụ cheri kanụ juwa la o-wo lawụlẹ, chajị ká ebwo ọchịchị ọhẹ-lọhẹ a ji ẹpwarịrị nyanụ kaka mẹ. Ma, ọkọkọ nya ọọwa lẹ, kanụ juwa la ọtụchawụlẹ ẹ-ẹpwụ nya olegu nyanụ bala irya ọlẹpwụ nya obyi omeme nyanụ wuu mẹ.

¹¹M jam ya ẹla ọlẹ tanụ anụ anyadam ẹ-ẹpwụ nya ịKịrayịsị lẹẹlẹẹ, chajị angịhyẹ bwu ẹpwa nya iKilọyị warị kaka tịrọnụ ya jem yẹẹyẹẹ jaabwọ ká arụ ọrụrụ juwa ẹ-ẹpwarịrị nyanụ kaka ba bwula o-wo lawụlẹ ka nyanụ.

¹²Ang odudu kam ya ịnyị a lẹẹ lẹlẹ: Angịhyẹ nyanụ juwa ya dodehe yẹkẹẹ, “Am lẹ, m ji oye nya ịPọlụ.” Angị ịkịla juwa yẹkẹẹ, “Am lẹ, m ji oye nya Apolosi.” Angị wụlẹ myịmyị juwa yẹkẹẹ, “Oye nya ịSẹfasị ọlẹ ká ẹnyị ọkịla nyamwụ ri iPita, m ji lẹ.” Angị ịkịla myịmyị juwa yẹkẹẹ, “Am ji oye nya ịKịrayịsị!”

¹³Anụ ya jem wẹẹ. ỊKịrayịsị ayịdang chị ịlọmwụ ebwo lẹ? ỊPọlụ, ị gu iloo ba okoji chajị nyanụ lẹ? Lee, ẹnyị nya ịPọlụ, ị tị́ kpa hụnụ enyi Ohe?

¹⁴M ji Ohe Oluhye obe, chajị ḿ kpa ụbwọ nya ịlọm hụ ọngọngọhẹ nyanụ enyi Ohe dala iKirisipọsị bala ịGayọsị kaka.

¹⁵Lẹ, Ọngọngọhẹ nyanụ á tị́ ka kiji jẹ́-ẹ yẹkẹẹ, am nyị hụnụ enyi Ohe la ẹnyị nyam am ịPọlụ lala angịjụgbẹyị nya ịlọm kaka lẹ.

¹⁶Ee, m kpịtịya lẹ. M hụ iSitifanas bala alọdọdẹpwa nyamwụ enyi Ohe ịnyịnyị. Ḿ me irya yẹkẹẹ, m hụ ọngọkịla ọhẹ-lọhẹ enyi Ohe ẹ-ẹpwarịrị nyanụ dala angịwẹ kaka.

¹⁷Chajị, e-enyi Ohe ọ-hụ angịnyị hụ kem, ịKịrayịsị a dum ẹrụ kpehe chajị nyamwụ ka! Ma, ịKịrayịsị dum kpehe kaka ya ẹrụ ọnyịịla nyamwụ pyẹ je angịnyị ehe ịnyị! Ó dum kpehe kam ka kpa ọnụ ịmịla nya ẹla ọjẹ́jẹ nya ọngịnyị ehe ya ẹrụ ọnyịịla ọọwa pyẹ ka! Ang odudu nya ọọwa ri, chajị kam ka mwọọgịlẹ ri ọngọ ka ta ọngịrị nya igu ọlẹ ká ịKịrayịsị gbu u-uhye nya okoji wọnụ nya angịnyị wuu ju iri kpini-kpini kpong-kpong kaka.

¹⁸Chajị ẹrụ ọnyịịla o-ya pyẹ rụ́ igu ogbugbu nya ịKịrayịsị u-uhye nya okoji wọnụ nya angịnyị ehe wuu ju ọlẹ, ri ang uchi ị-ịlahị nya angịlẹ kị juwa ba ụgbẹyị nya ayịreji ọtata jẹ. Ma, ẹla ọọwa tị ri ọngịrị nya Ohe Oluhye ị-ịlahị nya angịlẹ kị juwa ba ụgbẹyị nya ọchịda nya Ohe Oluhye jẹ.

¹⁹Chajị Ohe Oluhye ya ẹla dodehe ụ-Ụpwụ Ịgọgọ ẹ-ẹgẹhẹ yẹkẹẹ, “M ka da ẹla ọjẹ́jẹ nya angị jẹ́ ẹla ilodehe ọlẹ ka obyibyi. M ka gba ọ-jẹ́ myịmyị nya angị jẹ́ ang lụmẹ nya odehe ọlẹ ugu dọọka ịnyịnyị.”

²⁰Ee lẹ, ó-ri ịnyị lẹ aalẹ, ale, angị jẹ́ ẹla lụmẹ ilodehe ọlẹ a tị́ ji? Ale, angị jẹ́ ehile nya iMosisi lụmẹ kpori-kpori a tị́ ji? Ale, angị la ọnụ ịmịla nya ịwẹẹ ọdada ilodehe ọlẹ wuu a tị́ ji ịnyịnyị mẹ? Ánụ́ yẹ jaabwọ ká ẹla ọjẹ́jẹ olodehe ọlẹ ri uchi ọchịchị ị-ịlahị nya Ohe Oluhye wẹ ịnyịlẹhị lẹka?

²¹Chajị bwula ẹla ọjẹ́jẹ nya Ohe Oluhye ọọwa a du ká ụka ọlẹ ká ẹla ọjẹ́jẹ nya angịnyị ehe kpaa hwahị hi ọ-jẹ́ Ohe Oluhye jẹ́ lẹ, ká Ohe Oluhye me obyi la ịlọmwụ yẹkẹẹ, ẹrụ ọnyịịla ọlẹ kịị nyị ri ang uchi ị-ịlahị nya angịnyị kpangga, Ọwa Ohe Oluhye nyaa ka kpa chị angị myịmyị da pyii lẹlẹ.

²²Ala iJuu juwa tịtọ ká Ohe Oluhye ka kpa ang o-ju ẹjẹẹ nya ụkụrwọ ẹbyẹbyị ọhọhọ nyamwụ da ẹrụ ọnyịịla ọọwa wụlẹ ene kị ka jẹ́-ẹ myị lọọ. Ala iGirisi tị juwa tịtọ ká ọdawụlẹ nya ẹrụ ọnyịịla ọọwa ka pwoku ụma nya ẹla ọjẹ́jẹ nya odehe ọlẹ pyii ene kị ka jẹ́-ẹ myị lọọ ịnyịnyị.

²³Ma, ahị lẹ, ahị jam ya ẹrụ ọnyịịla ọlẹ pyẹ rụ́ igu ọlẹ ká ịKịrayịsị gbu u-uhye nya okoji wọnụ nya angịnyị ehe wuu ju lẹ. Ma, ọọwa tị ri ang ọ-gba ala iJuu ịtịrọ ẹ-ẹpwụ nya ọmyịmyị ọlala nyaa lẹ. Ọ tị myịmyị ri ang uchi ị-ịlahị nya ala iJentayịlị wuu ịnyịnyị lẹ.

²⁴Ma, ị-ịlahị nya angịlẹ ká Ohe Oluhye tị be ẹkọ wụrụ kaka ri angịnyị nya ịlọmwụ bwu ẹpwụ nya ala iJuu bala ala iJentayịlị wuu lẹ, ẹrụ ọnyịịla ọọwa ri ang ọ-da ịKịrayịsị wụlẹ haa lala ọngịrị nya Ohe Oluhye bala ẹla ọjẹ́jẹ nya Ohe Oluhye ayịdang ịnyịnyị.

²⁵Chajị, o-ya dodehe nya uchi ọchị́chị nya Ohe Oluhye kaa họ ụkụrwọ ọnyịịla gụ o-ya dodehe nya ẹla ọjẹ́jẹ nya alodehe ọlẹ. O-ya dodehe nya ọdẹwụ-dẹwụ nya Ohe Oluhye tị kaa họ ụkụrwọ ọnyọọngịrị gụ ogogo ọlala nya alodehe ọlẹ ịnyịnyị.

²⁶Chajị anụ anyadam ẹ-ẹpwụ nya ịKịrayịsị, anụ kpịtịya nya ụma nya angịlẹ kanụ ri ene ká Ohe Oluhye be ẹkọ wụrụụnụ kaka ri angịnyị nya ịlọmwụ wẹẹ! Chajị iru nya angịnyị lẹpwarịrị nyanụ, á ri angị jẹ́ ẹla lụmẹ ị-ịlahị nya alodehe ọlẹ ka. Lee, iru nya angịnyị lẹpwụ nyanụ, o-ri angị ịtụka lụmẹ kpong-kpong ka. Lee, anụ o-ri anyị nya angị la ihi-ihi ịtụka lụmẹ ị-ịlahị nya angịnyị ehe kpong-kpong ene ka ịnyịnyị.

²⁷Ma, Ohe Oluhye gwooja gwo chụnụ anụ aluchi ilodehe ọlẹ kọ ka kpanụ họ ang ịnyịịla, chajị ká oyoyi ka jẹ́-ẹ ju angị jẹ́ ẹla lụmẹ ilodehe ọlẹ. Ọ tị gwooja gwo chụ angị dẹwụ-dẹwụ ilodehe ọlẹ, chajị kọ ka kpaa họ ang ọnyọọngịrị, ká oyoyi ka jẹ́-ẹ ju angị la gogo ilodehe ọlẹ ịnyịnyị.

²⁸Ohe Oluhye gwooja gwo chụ angịlẹ ká iwe-ahụrụ nyaa la bẹdẹẹ odehe ọlẹ bala angịlẹ kị ri ịngịngịhyẹ-ka ị-ịlahị nya alodehe ọlẹ, chajị kọ ka kpaa họ ang olihi-ihi ọtụka, chajị ká oyoyi ka jẹ́-ẹ ju angịlẹ kị juwa ẹ-ẹpwụ nya iwe-ahụrụ ilihi-ihi lụmẹ ilodehe ọlẹ.

²⁹Ohe Oluhye họ ịnyị, chajị ká ọngịnyị ehe ọhẹ-lọhẹ á ka jẹ́-ẹ kpa ịngịngịhyẹ chị ogu myị́ ị-ịlahị nya Ohe Oluhye kpong-kpong kaka.

³⁰Ohe Oluhye ọọwa kpangga a ri egbeju nya ẹmwụ-enyi nya ọhịhị ọlẹ kanụ la bwula ịKịrayịsị iJisọsị lẹ! Chajị ịKịrayịsị ọọwa kpangga, Ohe Oluhye a họ kọ ka ri ẹmwụ-enyi nya ẹla ọjẹ́jẹ nyahị lẹlẹ. Ọwa-à tị ri ẹmwụ-enyi nya abwẹla ọnyịịla nyahị bala ịnya ocheri-cheri ọlala ị-ịlahị nya Ohe Oluhye bala ọchịda ọlala nyahị ịnyịnyị lẹlẹ.

³¹Chajị nya ọọwa a du, kị da lẹẹ ụ-Ụpwụ Ịgọgọ rụ́ angịnyị nya Ohe Oluhye lẹ. Ẹga ọọwa yẹkẹẹ, “Ọng myị́ ọng ọlẹ kọ ka chị ogu lẹ aalẹ, ọngọọwa a kpa ụkụrwọ nya Ọngọlahị chị ogu kem mẹ.”