Read idege 1 ALA ỊKỌRỊNTỊ 10 Bible Online

1 ALA ỊKỌRỊNTỊ 10 - idege bible

1 ALA ỊKỌRỊNTỊ 10

¹Anụ anyadam ẹ-ẹpwụ nya ịKịrayịsị, ḿ tịtọ kanụ ka juwa ẹ-ẹpwụ nya ukpowu u-uhye nya ẹla ọlẹ kpong-kpong ka. Chajị, ụka ká iMosisi juwa kpa adahị igogo anyị jẹ ụ-ụgbẹyị ugbeene lẹ, ọ ri nya ịlẹhị, egbamwụ chị kụrwaa ụ-ụgbẹyị. Ị tị chịpwụrụ kpoye nya ihu ọtụka ọlẹ kọ la ọmịla lala ẹgbụ ịnyịnyị.

²Ịwa wuu ri angịlẹ kị kpa egbamwụ ọọwa bala ihu ọọwa hwaa enyi Ohe lala angịjụgbẹyị nya iMosisi lụka ọọwa ịnyịnyị!

³Ịwa wuu tị ri ang oriri nya olegu ọlẹ ká Ohe Oluhye hu haa ụ-ụwa.

⁴Ịwa wuu tị nwa ang ọnwanwa nya olegu ọlẹ ká Ohe Oluhye hu haa ụka ọọwa ịnyịnyị. Chajị, ị nwa ang ọnwanwa nyaa ọọwa bwu uhye nya Ẹjwọ ẹbyẹbyị ọlẹ kọ juwa baa jẹ. ỊKịrayịsị ayịdang kpangga a tị ri Ẹjwọ ọọwa lẹlẹ.

⁵Ọlịnyị kpá ẹ-ẹga nyaa odu ịnyị! Ụka ọlẹ ká iru nya angịnyị lụmẹ-lụmẹ lẹpwụ nyaa họ ẹla ọlẹ kọ kpụ Ohe Oluhye ịpyọ ka lẹ, Ohe Oluhye họ ká igu ogbugbu nyi angịịwa wuu epepe pata-pata u-ugbileji ọọwa ugbeene!

⁶Ụma nya akama ọlẹ ká adahị igogo anyị yẹ ugbeene lẹ, ọọwa chịla kọ ka ri ọna ọdada hahị, chajị kahị ka ri angị juwa gbịlaa-gbịla ẹ-ẹpwụ nya imyi nya ang onyobyi ọhọhọ nyaa kaka.

⁷Lee, kahị ka ri angị juwa kpụ́ ihye ijiga jaabwọ ká angịhyẹ nyaa la ihye ịkịla tụtụm kaka ịnyịnyị! Chajị, ọ la jaabwọ kị da ụ-Ụpwụ Ịgọgọ rụ́ angị ịlịnyị lẹẹ ẹ-ẹgẹlẹ yẹkẹẹ, “Ụka ká angịịwa hụhụ kị ri ang oriri bala ọ-nwa ang ọnwanwa wu ẹpwụ kpá lẹ, ị wuleji, juwa chewo ụ-ụwa lẹlẹ.”

⁸Anụ cheri kahị ri angị juwa họ ụya jaabwọ ká angịhyẹ nya adahị igogo anyị họ lụka nyaa kaka! Chajị, ụka kị họ ụya ọọwa lẹ, akama nyaa ri yẹkẹẹ, angịnyị lala angị ụnọ ohu-iye kụrụ iwo, iwo kụrụ irwiye da angịnyị angị ohu iwo lẹpwụ nyaa, a gbu la ẹnụtụrụ ookpokpo ọọwa lẹlẹ.

⁹Anụ myị kahị ri angị juwa ma Ọngọlahị ịKịrayịsị yẹ, jaabwọ ká adahị igogo anyị ma Ọngọlahị yẹ lụka nyaa kaka ịnyịnyị. Chajị ụka kị họ ịnyị lẹ, akama nyaa ri yẹkẹẹ, ilo chaa u-ugbileji du ká iru nya angịnyị lẹpwụ nyaa gbu ụ-ụwa pyịyọọ.

¹⁰Anụ cheri kahị ri angị juwa mwọ ala ya, jaabwọ ká angịhyẹ nya adahị igogo anyị họ lụka nyaa kaka. Chajị, ị họ ịnyị lẹ, akama nyaa ri yẹkẹẹ, Ohe Oluhye du olegu-ẹrụ ọ-ta angịnyị ehe ayịreji ọhẹ ẹrụ kaka ta angịịwa wuu ayịreji ugbeene ịnyịnyị!

¹¹Ụma nya akama ịwẹ ká adahị igogo anyị yẹ wuu lụka nyaa lẹ, ọ lịnyị ẹ-ẹga nyaa, chajị ká ọọwa ka jẹ́-ẹ ri ang o-ju ẹjẹẹ nya ụbwọ ogbile ụ-ụrụ ha angịkịla wuu. Ị tị da ala ịịwa ju ụ-ụpwụ hahị kọ ka ri ọna ọdada hahị ahị aloyi ọlẹ ịnyịnyị! Chajị, ahị aloyi ọlẹ lẹ, ahị ju ụka nya ọmyịmyị nya odehe ọlẹ chwẹẹ lụmẹ lẹ!

¹²Chajị nya ọọwa lẹ, ọng myị́ ọng ọlẹ kọ me irya yẹkẹẹ, ọwa nyị godayị kpakpakpa ẹ-ẹpwụ nya ẹla nya Ohe Oluhye lẹ aalẹ, ọngọọwa a juwa kpahị ju ịlọmwụ ọgwọgụ mẹ. Ó-ri ịnyị ka aalẹ, ọngọọwa ka mileji myị́ wẹẹ!

¹³Anụ wo mẹ! Ọmayẹ nya ang onyobyi ọhọhọ ọhẹ-lọhẹ á ka jẹ́-ẹ wẹ chịnụ ọgụ, ọlẹ kọ lala ịnya angịnyị nya Ohe Oluhye ịkịla ka lẹ ka. Chajị jaabwọ ká Ohe Oluhye ayịdang ri ọngọ chịla o-hu ọkịlẹtụ ha lụmẹ lẹ, ọ́ ka myị-ị ya ẹga da ha ụma nya ọmayẹ ọ-ka kịlaanụ kịla, ya, nyị wẹ chịnụ ọgụ mẹ, kpong-kpong ka. Ma, ụka nya ọmayẹ ọlịnyị wuu, Ohe Oluhye ka ya ọngịrị nyamwụ bala ugbodu ojuju hanụ bala ọ-ka mẹ ụgbẹyị ọlẹ kanụ ka jẹ́-ẹ bwu be hi ọmayẹ ọọwa jẹẹnụ ịnyịnyị.

¹⁴Chajị nya ọọwa lẹ, anụ angị hám há, anụ kpa ịlọnụ cheji ba ịgba ọgbagba ha ihye ijiga ọgwọgụ mẹ.

¹⁵M jam ya ẹla ọlẹ tanụ lala anụ angị jẹ́ ẹla. Lẹ, anụ́-ụ kpa ẹla ọjẹ́jẹ nyanụ ọọwa chị eje nya ẹla ọlẹ yẹẹyẹẹ ha ịlọnụ mẹ.

¹⁶Anụ ya jem wẹẹ! Ọlẹ kahị kaa kaka jịra nya ang oriri ịgọgọ lawụlẹ lẹ, ukoku nya ere ọlẹ kahị kaa wahị kụrụ la ẹnyị nya Ohe Oluhye ene kahị kaa nwọọ lawụlẹ lẹ, a-ang o-ju ẹjẹẹ nya ọ-yẹ ju lawụlẹ ẹ-ẹpwụ nya ịwọ nya ịKịrayịsị, ọ ri kaka? Lee, ịkaa ọlẹ kahị kaa gu ene la ẹnyị nya Ohe Oluhye ụ-ụwa ene kahị kaa ryọọ la awụlẹ lẹ, ọ́ tị́ ri ẹjẹẹ nya ọ-tụụhị chawụlẹ ẹ-ẹpwụ nya ugbinyịrọ nya ịKịrayịsị ịnyịnyị kaka?

¹⁷Chajị, jaabwọ kaahị iru nya angịnyị ịịwa wuu kaa bába ri ẹbẹ nya ịkaa ookpokpo lawụlẹ wẹẹ, ịnyịnyị-ịnyịnyị, ahị wuu a tịtị ri ugbinyịrọ ookpokpo ẹ-ẹpwụ nya ịKịrayịsị bwula ọtụchawụlẹ nyahị ọọwa lẹlẹ.

¹⁸Anụ kpịtịya nya ala iHiburu nyahị inyogo wẹẹ. Angịlẹ kị kaa ri ang ọlẹ kị ya kịla iya ha Ohe Oluhye lẹ, ánụ jẹ́ yẹkẹẹ, angịịwa nyị kaa la ọ-yẹ ju lawụlẹ ị-ịlahị nya Ohe Oluhye bwula ang oriri olepwedii nya ẹga ọkịla iya ha Ohe Oluhye ọọwa ka?

¹⁹Ịịyẹ a tị́ ri etu nya ẹlẹwẹ kam ya? Ọọwa tị́ ri yẹkẹẹ, ang ọlẹ kị ya kịla iya ha ihye ijiga bala ihye ijiga ịịwa ayịdang ri ịngịhyẹ ẹ-ẹga kaahị angịnyị nya Ohe Oluhye ji lẹ, lee?

²⁰Eheehe! Ịnyị, m ya ka! Ma, jaabwọ kam ya ri yẹkẹẹ, iyo ịlẹ ká angị jẹ́ Ohe Oluhye-ka, kaa kpa kaka kịla iya ha ihye ijiga lẹ, Ohe Onyobyi a wẹ ká angịịwa ya kịla iya ha lẹ, o-Ohe Oluhye nyahị ka! Chajị nya ọọwa lẹ, ḿ tịtọ kaanụ angịnyị nya Ohe Oluhye ka juwa la ọ-yẹ ju lawụlẹ bala Ohe Onyobyi bwula ang nya ihye ijiga o-juwa riri nyanụ kpong-kpong ka.

²¹Chajị, ó pwoku kaanụ angịnyị nya Ohe Oluhye ịlẹ kanụ juwa nwa ang ọnwanwa ịgọgọ lawụlẹ e-epwedii nya Ọngọlahị, tụtụm myịmyị ka jẹ́-ẹ juwa bá ọnụ ere ta Ohe Onyobyi ukoku ookpokpo kaka! Ọlẹ kanụ tị wẹẹ bába ri ang oriri ịgọgọ e-epwedii nya Ọngọlahị lẹlẹ, ọ́ chịla kanụ tụtụm myịmyị ka jẹ́-ẹ juwa bába ri ang oriri i-itebwuru ookpokpo bala Ohe Onyobyi e-epwedii nyamwụ kaka ịnyịnyị.

²²Lee, ahị tị́ juwa tịtọ kahị ka kpa ang onyobyi ọhọhọ wụ Ohe Oluhye nyahị ẹjẹ, ká ọọwa ka dụrụ Ohe Oluhye ugboji nya agbama, chajị ká ijiiji ọlẹpwụ nya Ohe Oluhye ka wuru jahị dahị lẹ? Lee, anụ tị́ ya, kaahị a la gogo gụ Ohe Oluhye, nyọka dọọ uya ịnyị lẹ, mẹ?

²³Ọ ri nya ịlẹhị, lala ọngịnyị nya Ohe Oluhye, m ka la ọngịrị yẹkẹẹ, am lẹ, m la ịlọm nyọka họ ang myị́ ang ọlẹ kọ bam myị́ lẹ, chajị, ḿ ji ekpeleji nya ehile nya ọngịnyị ehe kaka. Ma, ang myị́ ang wuu ọlẹ kaahị angịnyị ehe nya Ohe Oluhye ka họ myị́, á tị ri ang o-ju apyobwuna hahị kpong-kpong ka. Ee, ahị la ọngịrị ka họ ang myị́ ang ọlẹ kọ baahị myị́ ịnyịlẹhị. Ma, ang myị́ ang ọlẹ wuu kam ka họ myị́ á tị ri ang ọ-ka kpa angịkịla wule myị́ ẹ-ẹpwụ nya ọmyịmyị ọlala nyaa kpong-kpong tị ka.

²⁴Lẹ, ọngọngọhẹ nyanụ a juwa maga nya ịlahị ọkaka nya ang nya ụbwọ nya ịlọmwụ-ịlọmwụ kem kaka. Ma, ká ọng myị́ ọng nyanụ a juwa maga nya ịlahị ọkaka nya angịnyị angịkịla ịnyịnyị mẹ.

²⁵Anụ ka la ọngịrị kele kaka ra iyo bwu ihi kpa rụ kaka kpụ́ ri myị́. Ma, chajị nya irya ọ-la angịnyị eje ọlẹpwụ nyanụ tị lẹ, ọ́ baba kanụ ka juwa tọ ọngọngọhẹ ịtọ u-uhye nya ụma nya iyo ọọwa ene kanụ ka ra kaka.

²⁶Chajị, ị da ụ-Ụpwụ Ịgọgọ ẹ-ẹgẹhẹ yẹkẹẹ, “Odehe ọlẹ wuu ri nya Ọngọlahị bala ang myị́ ang ịlẹpwụ nyamwụ ịnyịnyị.”

²⁷Ó-ri ká angị myị la Ohe Oluhye-ka, á wụrụụnụ ẹpwa kaka ri ang oriri, kanụ tị chị eje nyọka kele ịnyịlẹhị lẹ aalẹ, chajị nya irya ọ-la angịnyị eje ọlẹpwụ nyanụ ọwẹ lẹ, anụ tụtụm tịtọ ọhẹ-lọhẹ u-uhye nya ang oriri ọlẹ kị ka kpa kpehe wanụ, ene kanụ ka ri ang oriri ọọwa kaka.

²⁸Ma, ọ́ tị ri ká ọngọhẹ á byinu yẹkẹẹ, “Ang oriri nya ohe ojiga a wẹ kam kpa kpehe wang lẹ.” Aalẹ, anụ ri ang oriri ọọwa kaka, chajị nya ọngọọwa bala ọ-chajị nya irya ọ-la angịnyị eje ọlọkịlẹtụ mẹ. [Chajị, odehe ọlẹ wuu ri ịnya Ọngọlahị bala ang myị́ ang ọlẹ wuu kọ juwa ẹ-ẹpwụ nyamwụ.]

²⁹Ọlẹ kam ya wẹ lẹ, i-irya ọ-la ọngịnyị eje ọlẹpwụ nyanụ anụ ayịdang, m rụ́ ka! Ma, irya ọlịnyị ọlẹpwụ nya ọngọọwa, a du kanụ ka ri ang oriri ọọwa kaka lẹlẹ. Chajị, ịịyẹ a tị́ ka ri apyobwuna nya ịlọm ọlala ẹ-ẹpwụ nya abwẹla ọhọhọ nyam tụtụm, lụka ọlẹ ká abwẹla nyam ọọwa á mwọọgịlẹ ri ang ọ-kpa eje owuwu ka ẹpwụ nya irya ọ-la ọngọkịla eje?

³⁰Chajị, ịịyẹ a tị́ ka ri apyobwuna ham, kọ ri kam ji Ohe Oluhye obe u-uhye nya ang oriri ene kam ri ang oriri ọọwa, lụka ọlẹ kam tị họ ẹla ọọwa la ụgbẹyị ọlẹ ká angịkịla tị ka mwọọgịlẹ juwa mwọ ala ya ba Ohe Oluhye u-uhye nya obe ojiji nyam ọọwa tịtị mẹ?

³¹Chajị nya ọọwa lẹ, ó ri ang oriri nyanụ lee ang ọnwanwa lee ịngịngịhyẹ ọkịla ọlẹ kanụ ka họ wuu lẹ aalẹ, anụ́-ụ juwa họọ la ụgbẹyị ọlẹ kọ ka kpa ogbo ogwogwo kịla Ohe Oluhye kem mẹ!

³²Lẹ, ó-ri ẹga nya ala iJuu riri lee ala iJentayịlị lee ala ịchọọchị nya Ohe Oluhye kanụ jiji aalẹ, anụ́-ụ juwa la ọhịhị ọlẹ kọ la kpakpa ị-ịlahị nya Ohe Oluhye, chajị ká ọhọhọ nyanụ ọhẹ-lọhẹ á ka jẹ́-ẹ ri ang ọkịlata ha angịkịla ẹ-ẹpwụ nya ẹla nya Ohe Oluhye ọlẹ ọhọhọ kpong-kpong kaka mẹ!

³³Jaabwọ kaam ayịdang kaa tụụbwọ hi ang o-ju apyobwuna ha ịlọm am deeji, kam kaa maga nyọka họ ang ọlẹ kọ kaa kpụ angịkịla wuu ịpyọ, chajị kam ka bwula ọọwa kpaa kaka wu ọchịda nya Ohe Oluhye ọyị lẹ, anụ́-ụ juwa họ ịnyịnyị lala am-am mẹ!