Read idege 1 ALA ỊKỌRỊNTỊ 11 Bible Online

1 ALA ỊKỌRỊNTỊ 11 - idege bible

1 ALA ỊKỌRỊNTỊ 11

¹Anụ́-ụ juwa gbịlam jaabwọ kaam ayịdang jam gbịla abwẹla ọnyịịla ọhọhọ nya ịKịrayịsị ụka wuu mẹ.

²M jam gwogbo hanụ lụmẹ, anụ anyadam ẹ-ẹpwụ nya ịKịrayịsị. Chajị nyọlẹ kanụ kaa kpịtịya nyam ẹ-ẹpwụ nya ang myị́ ang ọhọhọ nyanụ wuu bala ọlẹ kanụ kaa juwa ba ọhọhọ ịlẹpwụ nya ịchọọchị wuu jẹ jịra jaabwọ kam mẹjẹẹnụ ene-ene ịnyịnyị.

³Ma, m tị tịtọ kanụ ka la ọ-jẹ́ myịmyị u-uhye nya ẹla ọlẹ yẹẹyẹẹ. ỊKịrayịsị a ri olegbeju nyahị ahị alẹng ịlẹ kahị ri angịnyị nya Ohe Oluhye lẹ! Ọlẹng ọlẹ kọ ye ahụ a tị ri olegbeju nya ahụ nyamwụ ọọwa ịnyịnyị lẹ. Ohe Oluhye ayịdang a tị tịtị ri olegbeju nya ịKịrayịsị lẹ!

⁴Chajị nya ọọwa lẹ, ọlẹng ọnyị myị ọnyị ọlẹ kọ ya ang kụrụ egbeju nyamwụ, juwa kpa abwọ rị ha Ohe Oluhye lee o-juwa yẹ ọmwụ ya ẹla nya Ohe Oluhye dodehe lẹ aalẹ, oyoyi a wẹẹ ká ọlẹng ọọwa wẹẹ chị ju ịKịrayịsị ọngọ ri olegbeju nyamwụ lẹlẹ.

⁵Ma, ọnyang ọnyị myị ọnyị kọ tị ya egbeju nyamwụ da dodo, juwa kpa abwọ rị ha Ohe Oluhye lee o-juwa yẹ ọmwụ dodehe lẹ aalẹ, oyoyi a wẹ ká ọnyang ọọwa wẹẹ chị ju ọrụmwụ ọlẹ kọ ri olegbeju nyamwụ ịnyịnyị lẹlẹ. Chajị, jaabwọ ká inyi ọpwọpwọ wuu hi ẹtẹtẹ ri ang ọ-kaa la anyang oyoyi lụmẹ wẹẹ, ịnyịnyị-ịnyịnyị, ọ tịtị ri ang oloyoyi ị-ịlahị nya Ohe Oluhye ká ọnyang ka ya egbeju nyamwụ da dodo ị-ịchọọchị lẹlẹ.

⁶Ma, ọkọkọ nya ọlẹ, ọnyang ọlẹ kọ myị ya apwụ kụrụ egbeju nyamwụ ị-ịchọọchị kaka lẹ aalẹ, anụ byoo kọ pwọ inyi nyamwụ wuu hi ẹtẹtẹ tịtị mẹ. Ma, jaabwọ kọ tị ri ang ọ-kaa la anyang oyoyi lụmẹ nyọka chị inyi nyaa eku lee ọ-pwaa pwọ wuu hi ẹtẹtẹ lẹlẹ, anyang a cheri kị juwa ya apwụ kụrụ egbeju nyaa ụka ọlịnyị pyii mẹ.

⁷Ọ́ chịla ká ọlẹng ka ya ang kụrụ egbeju nyamwụ ọwa ị-ịchọọchị ka. Chajị ọlẹng a ri ọngọ kaa chị abwụma nya Ohe Oluhye bala ogbo nya Ohe Oluhye ehe lẹ. Ma, ọnyang a tị kaa chị ihi ọlala nya ọlẹng ehe ịnyịnyị lẹ.

⁸Chajị, u-ukpunogu ọlaka nya ọnyang, Ohe Oluhye a kpa họ ọlẹng ka. Ma, ukpunogu ọlaka nya ọlẹng, Ohe Oluhye a kpa họ ọnyang lụka nya ọgbanyẹ-ọgbanyẹ lẹ!

⁹Ọ-ọlẹng, Ohe Oluhye a tị họ ha ọnyang ka. Ma, ọnyang, Ohe Oluhye a họ ha ọlẹng lụka ọọwa ịnyịnyị lẹ.

¹⁰Chajị nya ọọwa a du kọ chịla ká ọnyang ka ya apwụ kụrụ egbeju nyamwụ lẹlẹ. Ọọwa a ri ang o-ju ẹjẹẹ yẹkẹẹ, ọnyang juwa e-ekpeleji nya ọrụmwụ ịnyịlẹhị, chajị nya ibeenu nya alegu nya Ohe Oluhye ịnyịnyị lẹlẹ.

¹¹Ma, jaabwọ kọ tị la ri yẹkẹẹ, ẹ-ẹpwụ nya ọhịhị nyahị ahị angị myị la Ohe Oluhye lẹ, ọlẹng ka la ụbwọ ọdada bwu ẹga nya ọnyang pyii lẹ. Ọnyang tị tịtị ka la ụbwọ ọdada bwu ẹga nya ọlẹng pyii ịnyịnyị lẹ.

¹²Chajị, jaabwọ ká Ohe Oluhye kpa ukpunogu nya ọlẹng nya ọgbanyẹ họ ọnyang nya ọgbanyẹ lẹ, ịnyịnyị-ịnyịnyị, anyang a jam ma alẹng wẹ odehe ọlẹ lẹ. Ma, Ohe Oluhye a tị la ụkụrwọ ịwẹ wuu lẹ.

¹³Anụ anyadam ẹ-ẹpwụ nya ịKịrayịsị, anụ kụ ẹhị yẹ ẹlẹwẹ la ịlọnụ yẹẹyẹẹ wẹẹ. Ọ ri ang ọchịla ká ọnyang ka juwa raabwọ ha Ohe Oluhye ị-ịlahị nya aluche nya angịnyị lụka ọlẹ kọ ya ịngịngịhyẹ kụrụ egbeju nyamwụ ka?

¹⁴Dọmwụ bwula ụgbẹyị ọlẹ ká adoohe hunọ ha alẹng kị ka bwu kpẹhị ju inyi olegbeju nyaa lẹ, ọ kpụ ká ọọwa ka mẹjẹẹnụ yẹkẹẹ, ó ri ang oloyoyi ha ọlẹng kọ ka juwa kpa inyi nyamwụ la ediyo gbọng lụmẹ ka?

¹⁵Lee, ánụ tị́ jẹ́ yẹkẹẹ, inyi ilediyo ọlala nyaa ri ihi nya ọnyang lẹ ka? Chajị, Ohe Oluhye ya inyi ilediyo ịlịnyị ha ọnyang kọ ka ri ang ọkụrụ egbeju nyamwụ pyịyọọ ịnyị!

¹⁶Ó-ri ká angịhyẹ á juwa mwụ ala tụ ẹla ọlẹ pyịpyị wẹwẹ aalẹ, ahị ayịdang lee ala ịchọọchị nya Ohe Oluhye ọhẹ-lọhẹ á la ehile ọkịla ọhẹ ka nwụ họ ha anyang u-uhye nya abwọ ọrịrị ha Ohe Oluhye gụ ọlẹ kam ya wẹ kaka.

¹⁷Ala ịlẹ kam wẹẹ ka gbileenu ụbwọ ụ-ụrụ u-uhye nyaa lẹ, ḿ ye ịngịngịhyẹ ka gwogbo hanụ u-uhye nya ọhọhọ nyanụ ọọwa kpong-kpong ka. Chajị, m wo oja yẹkẹẹ, ọkọkọ nyọlẹ ká ọjịra-jịra nyanụ anụ ala ịchọọchị nya Ohe Oluhye nyị ka kpa ang kịlahị hanụ lẹ, nyị mwọọgịlẹ juwa bịrị ang lụmẹ lẹ!

¹⁸Ẹla nya ọgbanyẹ ọlẹ kam wo rụ́ụnụ ri yẹkẹẹ, ụka myị́ ụka kaanụ ala ịchọọchị nyanụ á kaka jịra, anụ kaa la ebwo ọchịchị. Am ayịdang tị myị ju ẹla ọọwa une-une.

¹⁹Chajị, m jẹ́ yẹkẹẹ, ebwo ọchịchị bwula o-wo lawụlẹ-ka, ka juwa ẹ-ẹpwarịrị nyanụ myị́ pyii ịnyịlẹhị. Chajị ká angịlẹ wuu kị ji oye nya ẹla nya ịlẹhị ọhọhọ ka jẹ́-ẹ chị ehe gede-gede a-ahịgboo datị.

²⁰Ọlẹ kanụ wẹẹ kele kaka jịra, juwa yẹkẹẹ, ịwa nyị juwa ri ang oriri ịgọgọ nya Ọngọlahị la lẹlẹ, a-ang oriri ịgọgọ ọọwa a wẹ kanụ wẹẹ ri ka!

²¹Chajị, ụka kanụ kele, ọngọngọọng lẹpwụ nyanụ juwa kaa ri ang oriri nya ịlọmwụ. Angịhyẹ nyanụ ịlẹ kị la ang oriri gbuu ka, juwa hụwa lẹpwụ peli peli. Ma, angịlẹ kị la ang oriri lụmẹ tị juwa ri wu ẹpwụ, juwa nwa ang ọnwanwa, juwa ya ịnyịnyị.

²²Ọọhọ! Ọ ri ánụ la ẹpwa nya ịlọnụ juwa ka ri ang oriri ụ-ụwa bala ọ-kaa nwa ang ọnwanwa ụ-ụwa kaka? Lee, ẹpẹpẹ, anụ tị́ byẹjẹ wẹẹ hu ju ịchọọchị nya Ohe Oluhye ịnyị myị́? Ọọwa lẹ, anụ juwa chị oyoyi ju angịlẹ kị la ang oriri gbuu kaka ẹ-ẹpwụ nyanụ wẹ lẹ ka? Ọọwa lẹ, anụ tị́ ya, am nyị byi ịwa anyị mẹ! Kam ka gwogbo hanụ u-uhye nya ọọwa? Eheehe! Ḿ ka jẹ́-ẹ gwogbo hanụ chajị nya ọhọhọ ọtịpyọ ọlịịwẹ myị́ ka!

²³Chajị, ang ọmẹjẹ ọlẹ kam ye bwu ẹga nya Ọngọlahị ayịdang kpangga a wẹ kam wẹẹ mẹjẹẹnụ tịtị kanụ ka kpa họ ụkụrwọ lẹ. Ọmẹjẹ ọọwa ri yẹkẹẹ, Ọngọlahị iJisọsị hu ịkaa lodu ọlẹ kị kpa pịrọọ ha.

²⁴Ọọwa lẹ, ụka kọ ji Ohe Oluhye obe u-uhye nyamwụ lẹ, ọ gu ọọ ene lẹ. Ọ yẹkẹẹ, “Ịkaa ọlẹ a ku ọmwakpa nya ugbinyịrọ nyam ọlẹ kam juwa ka hu kịla iya wọnụ nyanụ ju lẹlẹ. Anụ́-ụ ri ang oriri ịgọgọ ọlẹ ịnyịnyịịnyị, nya o-juwa kpa kpịtịya nyam mẹ.”

²⁵Ọọwa lẹ, ụka kị ri ịkaa ọọwa kpá lẹ, ọ hu ukoku nya ere kpa ụ-ụbwọ ịnyịnyị lẹ, ọ yẹkẹẹ, “Anụ ye nwa mẹ. Ere olukoku ọlẹ a ku ọmwakpa nya ịwọ nyam ọlẹ kam wẹẹ ka ya yẹ hụrụ wọnụ nyanụ anụ angịnyị ehe wuu ju u-uhye nya iro ọnwanwa onyeewe nya Ohe Oluhye lẹlẹ. Anụ́-ụ juwa kpa ang ọnwanwa ịgọgọ ọlẹ họ ịnyịnyịịnyị mẹ. Ụka myị́ ụka kanụ ka nwọọ lẹ, kanụ ka juwa kpa kpịtịya nyam ịnyịnyị mẹ.”

²⁶Chajị, ụka myị́ ụka kanụ juwa ri ịkaa ịgọgọ ọwẹ bala o-juwa nwa ere ịgọgọ ọwẹ ịnyịnyị lẹ, anụ́-ụ juwa kpa ẹrụ ọnyịịla chajị nya igu ogbugbu nya Ọngọlahị ọwẹ ya pyẹ je angịnyị ehe pyịyọọ gbee pwụ ụka ọlẹ kọ ka mwọọgịlẹ warị mẹ!

²⁷Chajị nya ọọwa lẹ, ọng myị́ ọng ọlẹ kọ ka juwa hu ịkaa ịgọgọ ọlẹ ri lee ọ-ka juwa ye ere ịgọgọ nya Ọngọlahị ọlẹ nwa ẹ-ẹpwụ nya ọchịla-chịla kaka lẹ aalẹ, eje nya ugbinyịrọ bala ịwọ nya Ọngọlahị ọlẹ kọ hu kaka kịla iya chajị nyahị wuu a ka wu ọngọọwa lẹlẹ.

²⁸Lẹ, ọng myị́ ọng nyanụ a cheri kọ juwa wụla ọhịhị nya ịlọmwụ yẹ yẹẹyẹẹ, ene kọ ka hu ịkaa ịgọgọ ọọwa ri bala ọ-ka ye ere ịgọgọ ọọwa nwa mẹ.

²⁹Chajị, ọng myị́ ọng ọlẹ kọ ka hu ịkaa ịgọgọ ọọwa ri lee o-ye ere ịgọgọ ọọwa nwa la ọ-jẹ́ etu nya Ang Oriri Ịgọgọ ọọwa jaabwọ kọ ku ọmwakpa nya igu ọlẹ ká Ọngọlahị gbu wọnụ nyahị wuu ju ka aalẹ, ọngọọwa juwa ri ịkaa ọọwa bala o-juwa nwa ere ọọwa ju ka ẹpwụ nya eje owuwu nya Ohe Oluhye ha ịlọmwụ lẹ!

³⁰Ọlịnyị a du ká iru nya angịnyị lẹpwụ nyanụ kaa la dẹwụ-dẹwụ bala o-juwa kaa jụ ẹdụrụ lụmẹ bala iru nya angịkịla nyanụ ọ-kaa gbugbu kẹhị pyịyọọ lẹ!

³¹Chajị, ó-ri kaahị ayịdang á myị juwa la ịlọhị eje yẹẹyẹẹ nya ịlẹhị lẹ aalẹ, ahị́ tụtụm ka ju ka ẹpwụ nya eje owuwu nya Ohe Oluhye ọhẹ-lọhẹ kaka.

³²Ma, ụka kahị tị myị juwa la ịlọhị eje kaka lẹ aalẹ, Ọngọlahị a kaa chịhị ugboji lẹlẹ. Chajị kahị ka ju ka ẹpwụ nya eje owuwu nya Ohe Oluhye lụka ohyẹẹkpẹ bala alodehe ihihi kaka lẹlẹ.

³³Chajị nya ọọwa lẹ, anụ anyadam ẹ-ẹpwụ nya ịKịrayịsị, ụka myị́ ụka kanụ kaka jịra nyọka juwa ri ang oriri ịgọgọ lẹ aalẹ, anụ́-ụ juwa godayị gbe awụlẹ mẹ.

³⁴Ó-ri ká imyi á juwa nwụ ọngọngọhẹ lẹpwụ nyanụ lẹ aalẹ, ọngọọwa a ri ang oriri bwu ẹpwa nya ịlọmwụ ene tịtị mẹ. Chajị ká ọjịra-jịra nya Ang Oriri Ịgọgọ nyanụ anụ ka ri ịngịngịhyẹ ọ-ka kpa eje owuwu nya Ohe Oluhye wẹ ịlọnụ kpong-kpong kaka mẹ! Ala ịkịla ihihi wuu lẹ, ụka kam warị kpá lẹ, m ka jẹ́-ẹ nwụ ala ịịwa rịrị hanụ la ịlọm lẹlẹ.