Read idege 1 ALA ỊKỌRỊNTỊ 12 Bible Online

1 ALA ỊKỌRỊNTỊ 12 - idege bible

1 ALA ỊKỌRỊNTỊ 12

¹Ang ọkịla ri ẹla chajị nya ọngịrị ọ-kpa họ ụkụrwọ ọlẹ ká Olegu Ịgọgọ nya Ohe Oluhye kaa hu hahị ahị angịnyị nya Ohe Oluhye. Ḿ tịtọ kanụ ka juwa ẹ-ẹpwụ nya ukpowu chajị nya ịhaha ịịwa kpong-kpong ka.

²Anụ tị jẹ́ yẹkẹẹ, ụka ọlẹ kanụ ri angịnyị nya Ohe Oluhye lẹka, kanụ kaa juwa kpụ́ ihye ijiga wẹẹ lẹ, ihye ijiga ịịwa ịlẹ kị jẹ́-ẹ ya ẹla yaya ka ịwẹ, a kaa kpanụ hwahị ka obyibyi jaabwọ kọ háa kaka ba lẹẹ.

³Chajị nya ọọwa lẹ, m tịtọ kanụ ka jẹ́ ẹla ọlẹ myịmyị yẹkẹẹ, ọngọngọhẹ á juwa ọlẹ ká Olegu Ịgọgọ nya Ohe Oluhye á juwa kpọọ ya ẹla dodehe lẹ, kọ ka tụtụm myịmyị-ị̀ jẹ́ juwa yẹkẹẹ, “Ọngọlẹ ká ọlọ ọgaga ju nya Ohe Oluhye wuwu lẹ, ịKịrayịsị a ri lẹ,” kaka. Ọngọngọhẹ á tị ka jẹ́-ẹ juwa ya dodehe yẹkẹẹ, “ỊKịrayịsị a ri Ọngọlahị la lẹ,” kaka, kẹnẹ-kẹnẹ, ó-ri ká Olegu Ịgọgọ nya Ohe Oluhye á kpa ọngọọwa ya ịnyị ene lẹ mẹ ịnyị!

⁴Ọ ri nya ịlẹhị, ọngịrị ọ-kpa họ ụma nya ụkụrwọ la datị-datị kaa juwa ha angịnyị nya Ohe Oluhye. Ma, Olegu Ịgọgọ nya Ohe Oluhye a tị ri Ọngọlẹ kọ kaa hu ịhaha ịịwa hahị ịnyị lẹ.

⁵Ọ ri nya ịlẹhị, iwe-ahụrụ la datị-datị juwa ha angị myị ẹrụ nya Ọngọlahị ịnyịnyị! Ma, Ọngọlahị ayịdang kpangga a tị ri ọngọlẹ ká alegbeju ị-họ ụkụrwọ ịịwa wuu juwa myị ẹrụ ọọwa ha lẹ.

⁶Ọngịrị ọ-kpa họ ụkụrwọ ụma la datị-datị juwa ha angịnyị nya Ohe Oluhye. Ma, Ohe Oluhye ayịdang a tị kaa ya ọngịrị ọ-kpa myị ẹrụ ọlịnyị ha ọng myị́ ọng ịnyị lẹ.

⁷Olegu Ịgọgọ kaa chị ọngịrị nyamwụ ehe u-uhye nya angị myịmyị la ụma la datị-datị, chajị ká ọọwa ka jẹ́-ẹ ri ang o-ju apyobwuna ha aluche nya angịnyị nya Ohe Oluhye wuu tị ịnyị!

⁸Olegu Ịgọgọ kaa chị ọngịrị nyamwụ ehe ẹ-ẹga nya ọngọhẹ bwula o-hu ẹla ọjẹ́jẹ nyamwụ ju ọngọọwa ọ-ọnụ, kọ ka ya dodehe. Olegu Ịgọgọ tị kaa chị ọngịrị nyamwụ ehe ẹ-ẹga nya ọngọkịla bwula o-hu ang ọjẹ́jẹ ịbaa-ịbaa nyamwụ ju ọngọọwa ọ-ọnụ kọ ka ya dodehe ịnyịnyị. Ma, Olegu Ịgọgọ ookpokpo ọọwa a tị wẹẹ họ ụkụrwọ ịịwẹ wuu lẹ.

⁹Ọ kaa hu ọmyịmyị ọlala ọ-kpa họ ụkụrwọ ẹbyẹbyị ha ọngọhẹ. Ọ tị kaa hu ọngịrị ọ-kpa họ alẹdụrụ uda ha ọngọkịla ịnyịnyị. Ma, Olegu Ịgọgọ ookpokpo ọọwa-ọọwa a tị wẹẹ họ ụkụrwọ ịwẹ wuu lẹ.

¹⁰Ọ kaa hu ọngịrị ọ-kpa họ ụkụrwọ ẹbyẹbyị la datị-datị ha ọngọhẹ. Ọ tị kaa hu ọngịrị ọ-kpa yẹ ọmwụ ya ẹla nya Ohe Oluhye dodehe ha ọngọkịla. Ọ kaa hu ọngịrị ọ-kpa jẹ́ Olegu nya Ohe Oluhye datị hi olegu nya Ohe Onyobyi ha ọngọkịla. Ọ kaa hu ọngịrị ọ-kpa ya ija la datị-datị ịkịla ha ọngọhẹ. Ọ kaa hu ọngịrị ọ-kpa yẹ ija ịkịla ịịwa dodehe myị́ je aluche ha ọngọkịla ịnyịnyị.

¹¹Ma, Olegu Ịgọgọ ookpokpo ọọwa-ọọwa, a wẹẹ họ ụkụrwọ ịwẹ wuu lẹ. Ọwa kaa hu ọhaha ha ọngọngọọng jaabwọ kọ họ́ọ kaka ba ẹ-ẹpwụ nya ịchọọchị lẹ!

¹²Jaabwọ ká ugbinyịrọ nya ọngịnyị ehe la ookpokpo, kọ tị la ẹga nya ịnyịrọ ọnyọnyọọnyị la datị-datị tụchawụlẹ ene kọọ ri ugbinyịrọ ookpokpo ọọwa wẹẹ, ịnyịnyị, ọ la hahị ahị angịnyị nya Ohe Oluhye ẹ-ẹpwụ nya ịKịrayịsị lẹlẹ. Chajị, ahị ju iru lụmẹ odu ịnyị, ahị wuu tụchawụlẹ tịtị ri ọngịnyị ọngọ ookpokpo ẹ-ẹpwụ nya ịKịrayịsị!

¹³Chajị, ahị angịlẹ kahị ri ala iJuu riri ene-ene lee ala iJentayịlị lee ahị angị la ịlọhị la lee angị ri anyịhị wuu lẹ, Olegu Ịgọgọ ookpokpo, Ohe Oluhye a kpa gbileehi wuu lẹẹ kaka ri ugbinyịrọ ookpokpo nya ịKịrayịsị bwula enyi Ohe ọhụhụ la ẹnyị nya ịlọmwụ lẹ. Olegu Ịgọgọ ookpokpo ọọwa, Ohe Oluhye a tị hu hahị ahị angịnyị nyamwụ ịịwa wuu nwa lẹẹ, lawụlẹ ịnyịnyị lẹ.

¹⁴Chajị, ugbinyịrọ nya ọngịnyị ehe lẹ, ẹ-ẹga nya ịnyịrọ ookpokpo kem, ọ ri ka. Ma, iru nya ẹga nya ịnyịrọ a tụchawụlẹ ri ugbinyịrọ ọọwa lẹ!

¹⁵Lẹ, anụ ya kọ ri ká ẹta nya ọngịnyị ehe á yẹkẹẹ, “Am lẹ, ḿ tị́ ri ụbwọ kaka lẹlẹ, ḿ ri ẹga nya ugbinyịrọ nya ọngịnyị ehe kokoo!” Ká ọọwa ka du ká ẹta á ka ri ẹga nya ịnyịrọ nyamwụ kaka, ịnyịlẹhị?

¹⁶Lee, ọ tị́ ri ká ụrụ nya ọngịnyị ehe á ka yẹkẹẹ, “Am lẹ, ḿ tị́ ri ugbẹhị kaka lẹlẹ, ḿ ri ẹga nya ịnyịrọ kokoo!” Ká ọọwa ka du ká ụrụ ọọwa á ka ri ẹga nya ịnyịrọ nyamwụ kaka, ịnyịlẹhị ịnyịnyị? Ehe! Ḿ myị ịnyị ka!

¹⁷Ó-ri ká ẹga nya ịnyịrọ nya ọngịnyị ehe wuu á ri ugbẹhị ụbwọọmwụ kem lẹ, ịịyẹ ọ tị́ ka jẹ́-ẹ kpa wo ẹla mẹ? Ọ́ tị ri ká ẹga nya ugbinyịrọ nya ọngịnyị ehe wuu á tị ri ụrụ ụbwọọmwụ kem lẹ, ịịyẹ ọngọọwa a tị́ ka kpa wo oru nyang tị tị mẹ?

¹⁸Ma, jaabwọ kọ la ri yẹkẹẹ, Ohe Oluhye ayịdang a hu ẹga nya ugbinyịrọ nyahị ọnyị myị ọnyị wuu juhi ahị angịnyị ehe jaabwọ kọ họ́ọ lẹ.

¹⁹Ịnọ, ó-ri ẹchẹ nya ẹga nya ugbinyịrọ ookpokpo mịlọ-mịlọ kem ká Ohe Oluhye á hu hahị lẹ, ịnọ, ịịyẹ a tị́, tị tị ka ri apyobwuna nya ugbinyịrọ ọọwa ha ọngịnyị ehe wẹẹ?

²⁰Ma, jaabwọ kọ la ri yẹkẹẹ, ẹga nya ugbinyịrọ ịwẹ ju iru lụmẹ odu ịnyị! Ugbinyịrọ ookpokpo kem, ọngịnyị ehe a tị la lẹ.

²¹Lẹ, ọ́ chịla ká ugbẹhị nya ọngịnyị ehe ka jẹ́-ẹ byi ụbwọ nyamwụ yẹkẹẹ, “Ahụ ụbwọ ọwẹ, á ju apyobwuna ham kpong-kpong ka,” lẹ ka. Lee, egbeju nya ọngịnyị ehe, ọ ka jẹ́-ẹ byi ẹta nyamwụ yẹkẹẹ, “Ahụ ẹta ọwẹ, á ju apyobwuna ọhẹ-lọhẹ ham kpong-kpong ka,” lẹ ka ịnyịnyị!

²²Chajị, ẹga nya ugbinyịrọ nya ọngịnyị ehe ọlẹ kọ la dẹwụ-dẹwụ gụ ịkịla wuu ẹ-ẹchị a mwọọgịlẹ kaa ri ẹga nya ugbinyịrọ ọlẹ kọ baba gụ ịkịla ịịwa wuu dachichi lẹ!

²³Ẹga nya ịnyịrọ ịlẹ kaahị angịnyị ehe á tị me irya yẹkẹẹ, “Ị la ẹpẹpẹ lụmẹ,” a tị ri ẹga nya ugbinyịrọ ịlẹ kahị kaa kpa ihi ju mwọọgịlẹ gụ ịkịla wuu tị lẹ. Ẹga nya ugbinyịrọ ịlẹ kahị tị kaa tụ kpịbaa hi ẹhị nya ọngịnyị ehe, a tị ri ẹga nya ugbinyịrọ ịlẹ kahị mwọọgịlẹ kaa ju agidi yẹẹyẹẹ dachichi,

²⁴gụ ẹga nya ugbinyịrọ ịkịla ịlẹ kahị kaa tụụbwọ hi da dodo la odurwaa ịpwụ duru kpong-kpong ka lẹ. Ohe Oluhye ayịdang go ẹga nya ugbinyịrọ nyahị ahị angịnyị ehe ku awụlẹ hiigu-hiigu la ọgụ ọlẹ kahị ka jẹ́-ẹ juwa kpa ihi ọtụka-ọtụka ju ẹga nya ịnyịrọ nyahị ịlẹ kị la ẹpẹpẹ lụmẹ ene-ene.

²⁵Ohe Oluhye họ ịnyị, chajị ká o-wo lawụlẹ-ka ọhẹ-lọhẹ á ka jẹ-ẹ̀ juwa ha ẹga nya ugbinyịrọ nyahị kpong-kpong kaka. Ma, ọkọkọ nya ọọwa lẹ, ká ẹga nya ugbinyịrọ ịịwa wuu ka jẹ́-ẹ juwa kpẹhị ju awụlẹ yẹẹyẹẹ.

²⁶Ịnyị a du ká ụka ká ẹga nya ugbinyịrọ nya ọngịnyị ehe ookpokpo á juwa yẹ akama lẹ, ká ẹga nya ugbinyịrọ nyamwụ ihihi wuu kaa yẹ akama ọọwa tọọ ịnyịnyị lẹ! Ụka kị tị juwa gwogbo ha ẹga nya ugbinyịrọ nyamwụ ookpokpo lẹ aalẹ, ẹga nya ugbinyịrọ nyamwụ ihihi ịkịla wuu, a kaa chị ọkẹkẹnị tọọ ịnyịnyị lẹlẹ.

²⁷Anụ ala ịchọọchị nya Ohe Oluhye ịwẹ wuu tụchawụlẹ, a ku ọmwakpa nya ugbinyịrọ nya ịKịrayịsị ịnyịnyị lẹlẹ. Ọngọngọọng lẹpwụ nyanụ a tị ku ọmwakpa nya ẹga nya ugbinyịrọ nyamwụ lẹlẹ.

²⁸Ọọwa lẹ, Ohe Oluhye a chụ angịhyẹ ẹ-ẹpwụ nya ịchọọchị nyamwụ kị ka la iwe-ahụrụ ịdatị-datị ị-lala ịlẹ lẹlẹ. Ịnya ọgbanyẹ-ọgbanyẹ ri angị ri alẹrụ ọnyịịla nya ịKịrayịsị. Alebwo oheeye ri alọmwụ nya Ohe Oluhye i-ya ẹla nyamwụ dodehe. Alebwo ọhata ri angịmẹjẹ nya ẹla nya Ohe Oluhye. Angị ịkịla ri angị la ọhaha nya ụkụrwọ ẹbyẹbyị la datị-datị ọhọhọ. Angị ịwụlẹ ri angị la ọhaha nya ọ-họ alẹdụrụ la datị-datị uda la ẹnyị nya Ohe Oluhye. Angị ịkịla ri angị la ọhaha ọ-kpa da angịnyị angịkịla ụbwọ myị́. Angị ịwụlẹ ri angị la ọhaha nya o-ri olegbeju ọ-kaa kpa ang kịlahị myị́. Angị ịkịla ri angị la ọhaha ọ-kpa ya ẹla la ija ịkịla la datị-datị myị́.

²⁹Anụ ya ká angịnyị wuu a ka ri alẹrụ ọnyịịla pyii-pyii ene? Lee, angịnyị wuu, a tị́ ka ri alọmwụ nya Ohe Oluhye i-juwa ya ẹla nyamwụ dodehe pyii ene? Angịnyị wuu a ka ri angịmẹjẹ nya ẹla nya Ohe Oluhye lẹ? Lee, angịnyị wuu a tị́ ka la ọhaha ọ-kpa họ ụkụrwọ ẹbyẹbyị la datị-datị ene?

³⁰Lee, angịnyị wuu a tị́ ka jẹ́-ẹ la ọhaha ọ-kpa họ alẹdụrụ la datị-datị uda la ẹnyị nya Ohe Oluhye? Lee, angịnyị wuu a tị́ kaa ya ẹla la ija ịkịla la datị-datị? Angịnyị wuu a la ọhaha ọ-jẹ́-ẹ kpa yẹ ija ịkịla ịlịnyị dodehe myị́ ịnyịnyị lẹ? Ḿ myị yẹkẹẹ, ọ ka jẹ́-ẹ lịnyị kaka!

³¹Ma, anụ́-ụ juwa maga kanụ kpa irya nyanụ wuu lẹpwụ-lẹpwụ, juwa tịtọ nya ụma nya ọhaha nya Ohe Oluhye ọlẹ kọ hiigu gụ ịkịla wuu mẹ. Ẹla ọlẹ kam lẹẹ ka ya jenu lẹẹlẹẹ, a ri ụgbẹyị ọlẹ kọ hiigu lụmẹ gụ ang ịkịla ịwẹ wuu kam mẹjẹẹnụ ene-ene lẹlẹ.