Read idege 1 ALA ỊKỌRỊNTỊ 13 Bible Online

1 ALA ỊKỌRỊNTỊ 13 - idege bible

1 ALA ỊKỌRỊNTỊ 13

¹Ụgbẹyị ọlẹ kọ hiigu gụ wuu ri yẹkẹẹ, ó-riri kam jẹ́ juwa ya ẹla la oja nya angịnyị ehe bala o-ya ẹla la oja nya alegu-ẹrụ wẹwẹ wẹẹ aalẹ, ó-ri ká ọháha ọlala nya ịlẹhị-ịlẹhị á juwa ẹ-ẹpwụ nyam ka aalẹ, ḿ tị tị ju apyobwuna nya ịngịngịhyẹ kaka. Chajị, ẹla oyaya nyam ọọwa lala ọmọnyọ ohideeji nya ugwooje bala atang ọnmọlọng-nmọlọng.

²Lee, ó-riri kam la ọhaha nya ọmwụ ọyẹyẹ, juwa ya ẹla nya Ohe Oluhye dodehe myị́ lee ó-riri kam la ọ-jẹ́ myịmyị nya ang okpori-kpori bala ang ọjẹ́jẹ ọtụka-ọtụka o-bwu ẹga nya Ohe Oluhye wẹwẹ lee ó-riri kam la ọmyịmyị ọtụka-ọtụka ọlẹ kam ka kpa mwụ ọgbọdọ ọtụka myị́ wẹwẹ ịnyịnyị aalẹ, ó-ri kam tị la ọháha nya ịlẹhị-ịlẹhị ẹ-ẹpwụ nyam ka aalẹ, ḿ ju apyobwuna nya ịngịngịhyẹ kpong-kpong lẹka.

³Lee, ó-riri kam byẹjẹ hu ang myị́ ang ọlẹ wuu kam la ga ha angịnyị ehe ịkịla lee ọ-bị ẹjẹ hu ịlọm kpa kaka kpụ ẹpwụ nya ila, ká ila ọọwa á ka rụm hụrụ wẹwẹ wẹẹ aalẹ, ó-ri kam tị la ọháha nya ịlẹhị-ịlẹhị ọhẹ-lọhẹ ẹ-ẹpwụ nyam ka aalẹ, ḿ ka jẹ́-ẹ la apyobwuna ọhẹ-lọhẹ bwula ọọwa kpong-kpong ka ịnyịnyị.

⁴Ma, ọháha ọlala nya ịlẹhị-ịlẹhị kaa la ugbodu ojuju onyudiyo. Ọháha ọlịnyị kaa kpa ọnahị họ ẹla ẹ-ẹga nya ọngọkịla. Ọháha ọlịnyị á kaa la ijiiji onyobyi ẹ-ẹga nya ọngọkịla ka. Ọháha ọlịnyị á kaa kpa ịlọmwụ chị ogu lee ọ-kpa ịlọmwụ ka uhye ngana-ngana kpong-kpong ka.

⁵Ọháha nya ịlẹhị-ịlẹhị á kaa nịra ịlọmwụ cheechee ka uhye kpoye nya iwe-ahụrụ nya ịlọmwụ ka lee ọ-kaa ya achala ta angịkịla ka. Ọháha ọlịnyị á kaa tịtọ nya ang nya ụbwọ nya ịlọmwụ-ịlọmwụ kem ka. Ọháha ọlịnyị á kaa wụ ẹjẹ nya ẹla gbegbe ka lee ọ-kaa kpa ang onyobyi ọlẹ ká angịkịla họọ ẹ-ẹpwụ kpong-kpong ka.

⁶Ọháha á kaa chị ọkẹkẹnị ju ang onyobyi ọhẹ-lọhẹ kpong-kpong ka. Kẹnẹ-kẹnẹ, ẹla nya ịlẹhị kem, ọ kaa chị ọkẹkẹnị ju lẹlẹ.

⁷Ọháha ọlịnyị kaa la ọhịnyọhi onyudiyo ẹ-ẹga nya angịkịla. Ọháha ọlịnyị kaa la ọmyịmyị nya ịlẹhị-ịlẹhị yẹkẹẹ, ang myị́ ang wuu nyị ka họ ụkụrwọ hiigu. Ọháha ọlịnyị kaa la ẹhị ọrịrịị-rịrị yẹkẹẹ, o-ya dodehe nya ang myị́ ang wuu nyị ka hiigu. Ọháha ọlịnyị kaa la ugbodu ojuju onyudiyo ẹ-ẹpwụ nya ang myị́ ang wuu pwụ ọbaba.

⁸Ọháha nya ịlẹhị-ịlẹhị ọwẹ, á kaa gbu enyi myị́ ẹnẹnẹhẹ kaka. Ọmwụ ọyẹyẹ ka chịpwụrụ myị́, ija ịkịla iyaya tị ka kpụ ba myị́, ọ́ tị ri ang ọjẹ́jẹ obwuru-bwuru dodehe, ọ tị ka chịpwụrụ myị́ ịnyịnyị.

⁹Chajị ang ọjẹ́jẹ nyahị ahị angịnyị ehe wuu á nwa ụga kpong-kpong ka. Ọmwụ ọyẹyẹ nyahị ahị angịnyị ehe wuu á tị nwa ụga ka ịnyịnyị.

¹⁰Ma, ụka ọlẹ ká Anwụga ọtụka ayịdang ọọwa á pwụ eji lẹ aalẹ, ị ka tụụbwọ hi ang ị-nwa ụga-ka nyahị ịlẹ wuu guru ọ-ọka lẹlẹ.

¹¹Chajị, ụka kam ri onjwo ochiche wẹẹ lẹ, m kaa ya ẹla lala anjwo ichiche, m kaa chị eje nya ẹla lala onjwo ochiche ịnyịnyị. M kaa kụ irya nya ẹla myị́ ẹla lala onjwo ochiche ịnyịnyị. Ma, lẹẹlẹẹ kam tị ri ọngọgbahị lẹlẹ, m tụụbwọ hi ụgbẹyị nya enjwo nyam ịịwa wuu deeji lẹ.

¹²Chajị lẹẹlẹẹ lẹ, ahị jam yẹ ang myị́ ang wuu bwuru-bwuru lala ịnyọ ọyọyị ọlẹ kọ jẹ́-ẹ yoyi yẹẹyẹẹ ka. Ma, ụka ọọwa, ká Anwụga ọwẹ ka pwụ eji lẹ, ahị ka jẹ́-ẹ yẹ ang myị́ ang wuu gede-gede myị́ lẹlẹ. Ang ọlẹ kam jẹ́ wuu lẹẹlẹẹ ri une-une wẹẹ. Ma, ụka ọọwa lẹ, m ka jẹ́-ẹ la ọ-jẹ́ myịmyị u-uhye nya ang myị́ ang wuu pwụ ọbaba myị́ dọmwụ jaabwọ ká Ohe Oluhye ayịdang jẹ́ jẹ́m am yẹẹyẹẹ lẹẹlẹẹ lẹ.

¹³Ma, ẹchẹ nya ang ịlẹ kị wụrụ ọmyịmyị ọlala bala ẹhị ọrịrịị-rịrị bala ọháha ọlala nya ịlẹhị-ịlẹhị, a ri ẹchẹ nya ang ịta ịlẹ kị ka jẹ́-ẹ juwa pyịyọọ lẹlẹ. Ma, ọlẹ kọ tị gwaa ịwa wuu a ri ọháha ọlala nya ịlẹhị-ịlẹhị ọwẹ lẹlẹ.