Read idege 1 ALA ỊKỌRỊNTỊ 14 Bible Online

1 ALA ỊKỌRỊNTỊ 14 - idege bible

1 ALA ỊKỌRỊNTỊ 14

¹Anụ́-ụ cheri kanụ juwa yụbwọ chị ọháha ọlala nya ịlẹhị-ịlẹhị ọwẹ kpa ụ-ụwa gogo pyịyọọ mẹ. Anụ́-ụ juwa kpa ọngịrị nyanụ wuu lẹpwụ-lẹpwụ tịtọ nya ọhaha o-bwu ẹga nya Olegu Ịgọgọ ịnyịnyị mẹ. Ọgụgụ wuu ri, kanụ ka juwa tịtọ nya ọhaha nya ọmwụ ọyẹyẹ, juwa ya ẹla nya Ohe Oluhye dodehe mẹ.

²Chajị, ọngọlẹ kọ kaa ya ẹla la oja ọkịla lẹ, Ohe Oluhye kem, ọngọ ọlịnyị a wẹẹ ya ẹla ta lẹ. Aangịnyị ehe, ọngọọwa a wẹẹ ya ẹla ta ka! Chajị, ọngịnyị ehe ọhẹ-lọhẹ á kaa jẹ́ etu nya ẹla ọọwa ka. Ma, ọngọọwa juwa ya ala ịkpịbaa nya Ohe Oluhye dodehe la ija ịkịla ịịwa jaabwọ ká Olegu Ịgọgọ juwa chụ ẹla ọọwa jwoo ọ-ọnụ.

³Ma, ọngọlẹ kọ juwa yẹ ọmwụ, juwa ya ẹla nya Ohe Oluhye dodehe kaa ya ẹla ta angịnyị ehe, ọlẹ ká ẹla ọọwa kaa hu ọmyịmyị ọlala nya angị wowo hwaa kele ka uhye. Ẹla ọọwa kaa hu ọhụ ojuju bala ẹjẹ ọkpụ́kpụ ha angịịwa ịnyịnyị.

⁴Ọngọlẹ kọ juwa ya ẹla la oja ọkịla kaa juwa hu ọmyịmyị ọlala nyamwụ hwaa ka uhye kem. Ma, ọngọlẹ kọ tị juwa yẹ ọmwụ, juwa ya ẹla nya Ohe Oluhye dodehe kaa hu ọmyịmyị ọlala nya ala ịchọọchị wuu hwaa ka uhye.

⁵Ọ ri nya ịlẹhị, ọ hám kpá kaanụ wuu ka ri angị juwa ya ẹla la ija ịkịla. Ma, ọhaha nya ọmwụ ọyẹyẹ, juwa ya ẹla nya Ohe Oluhye dodehe a tị hám kaanụ wuu ka la gụ lẹ! Chajị, ọngọlẹ kọ juwa yẹ ọmwụ dodehe ịnyị a la ọhaha ọlẹ kọ gụ ịnya ọngọlẹ kọ juwa ya ẹla la ija ịkịla kem lẹ. Kẹnẹ-kẹnẹ, ó-ri ká ọngọkịla ọhẹ á juwa bwuru etu nya ẹla ọọwa ọlẹ kị wẹẹ ya la ija ịkịla dodehe, chajị ká ẹla ọọwa ka jẹ́-ẹ hu ọmyịmyị ọlala nya ala ịchọọchị wuu hwaa kele ka uhye lẹ, ụbwọọmwụ mẹ ịnyị!

⁶Lẹ, anụ anyadam ẹ-ẹpwụ nya ịKịrayịsị, ó-ri kam warị wẹ ẹpwarịrị nyanụ, juwa ya ẹla tanụ la ija ịkịla kem, anụ ya kam ka jẹ́-ẹ ju apyobwuna ọhẹ-lọhẹ hanụ? Ḿ me irya ịnyị ka. Kẹnẹ-kẹnẹ aalẹ, ó-ri kam kpa ang ọlẹ ká Ohe Oluhye wụrụ ham kaka ya jenu lee ọ-kpa ang ọjẹ́jẹ o-bwu ẹga nya Ohe Oluhye kaka chị ehe hanụ lee ọ-kpa ọmwụ ọyẹyẹ ya ẹla nya Ohe Oluhye dodehe jenu lee ọ-kpa ang ọmẹjẹ nya ẹla nya Ohe Oluhye kaka ya jenu ụbwọọmwụ lẹ, mẹ ịnyị!

⁷Anụ me irya ju ang-abwọ nya ayịlọ ịlẹ kị la ọhịhị la ka ị-lala ọwẹ bala ogum wẹẹ! Anụ ya kọ ri ká ọngọlẹ kọ juwa kpa ang ịlịịwẹ mwu eje, á jẹ́ kpa akachụ nyamwụ họ ụna nya o-juwa kpa dịrẹ omyi nya eje ịlẹ kị pwoku awụlẹ yẹẹyẹẹ kpá ene ka, ká eje omwumwu nyamwụ ọọwa ka jẹ́-ẹ kpụ ịpyọ ụ-ụrụ myị́?

⁸Lee, anụ tị́ me irya, kọ ri ká ọngọ chị ẹkụrwẹ nya ẹwụ á jẹ́ chị opyike nya ẹwụ ọọwa lọọ rwala gede-gede ka, ká angị dẹwụ aanamwụ ka jẹ́-ẹ wo kpụ, ị ka jẹ́-ẹ nwụlanọ nya ẹwụ ọdada ọọwa myị́?

⁹Ịnyịnyị, ọ la ẹ-ẹga nyanụ anụ ayịdang lẹlẹ. Chajị, ó-ri kanụ juwa ya ẹla dodehe la oja ọkịla ọlẹ ká ọngọngọhẹ á wo etu nyamwụ ka, anyị, anụ tị́ me irya ká angịịwa ka jẹ́-ẹ jẹ́ egbeju nya ẹla ọlẹ kanụ juwa ya? Ó-ri kọ lịnyị lẹ aalẹ, anụ tị tị ka juwa ya ẹla ọọwa daarụ u-uhye ọhụ timajẹ lẹ.

¹⁰Ọ ri nya ịlẹhị, ija iyaya ị-la datị-datị ju iru lụmẹ ẹ-ẹpwụ nya odehe ọlẹ. Ma, ọhẹ-lọhẹ nyaa á tị juwa ọlẹ kọ kaa la etu kpong-kpong ka lẹ ka!

¹¹Ma, ọ́ tị ri ká ọngọngọhẹ á juwa ya ẹla tam la oja ọkịla ọlẹ kam jẹ́ etu nyamwụ ka aalẹ, ẹla oyaya nya ọngọọwa ka mem ọmọnyọ obolo-bolo nya ọlụla. Ẹla oyaya nyam am ayịdang tị tịtị ka me ọngọọwa lala ịnya ọlụla ịnyịnyị!

¹²Chajị nya ọọwa lẹ, jaabwọ kaanụ ayịdang wẹẹ charịnya nyọka la ịhaha i-bwu ẹga nya Olegu Ịgọgọ nya ịlẹhị-ịlẹhị lẹlẹ, anụ́-ụ cheri kanụ juwa maga ẹ-ẹpwụ nya ọ-kpa ịhaha ịịwa, hu ọmyịmyị ọlala nya ala ịchọọchị nyanụ wuu hwaa kele ka uhye gbee kanụ ka ri angị kpụ ụdụ nya ịlẹhị-ịlẹhị ẹ-ẹpwụ nya ọọwa pyịyọọ mẹ.

¹³Chajị nya ọọwa lẹ, ọng myị́ ọng ọlẹ kọ juwa ya ẹla la oja ọkịla ịnyị lẹ aalẹ, ọngọọwa a raabwọ bịlẹ Ohe Oluhye chajị kọ ka jẹ́-ẹ la ọhaha ọ-kpa bwuru etu nya ẹla ọọwa dodehe je angịkịla ịnyịnyị mẹ.

¹⁴Chajị, ụka kam juwa raabwọ la oja ọkịla aalẹ, olegu nyam kem, a wẹẹ raabwọ ọọwa ụbwọọmwụ lẹ, chajị, irya ọlẹpwụ nyam am ayịdang á juwa họ ụkụrwọ lụka ọlịnyị kaka.

¹⁵Ó-ri kọ lịnyị lẹ, anyị, m tị́ tịtị ka họ mẹ? Jaabwọ kam ka họ ri yẹkẹẹ, m ka kpa olegu nyam raabwọ ha Ohe Oluhye. M tị ka kpa irya nyam juwa raabwọ ha Ohe Oluhye ịnyịnyị. M ka kpa olegu nyam mwu eje ha Ohe Oluhye. M tị ka juwa kpa irya nyam mwu eje ọọwa ịnyịnyị!

¹⁶Chajị, ó-ri ịnyị kaka lẹ, ụka ọlẹ ká juwa kpa olegu nyang ụbwọọmwụ kem wahị ha Ohe Oluhye ẹ-ẹpwụ nya abwọ ọrịrị, anyanyị, angịkịla ịlẹ kị juwa ẹ-ẹpwụ nya ọjịra-jịra ọọwa tang a tị́ ka jẹ́-ẹ juwa họ “Amẹn” ju abwọ ọrịrị nyang ọọwa lụka ọlẹ kịịwa ayịdang á wo etu nya ẹla ọlẹ ká wẹẹ ya la oja ọkịla ọọwa kaka mẹ?

¹⁷Chajị, óo-riri ká juwa wahị ọnyịịla wawa ẹ-ẹpwụ nya abwọ ọrịrị nyang ọọwa a-abwọ myị́ abwọ wẹẹ aalẹ, ọ ka jẹ́-ẹ hu ọmyịmyị ọlala nya ọngọngọhẹ hwaa kele ka uhye ẹ-ẹpwụ nya ọjịra-jịra ọọwa myị́ lụka ọlịnyị kaka.

¹⁸M ji Ohe Oluhye obe, chajị am ayịdang kaa raabwọ la ija ịkịla lụmẹ gụụnụ anụ angịwẹ wuu.

¹⁹Ma, ụka myị́ ụka kam tị juwa ẹ-ẹpwụ nya ọjịra-jịra nya ala ịchọọchị lẹ aalẹ, ọkọkọ nyọlẹ kam ka juwa kpa oja ọkịla ya iru nya egbe nya ala lala ụnọ ukuku ugbabwọ ohu iwo lẹ, ó-ri kam dọmwụ kpa irya nyam ya, egbe nya ala achẹ ịrụ kem, chajị nyọka kpa ala ịịwa mẹ ang jẹ angịkịla, ọ dọmwụ hám gụ.

²⁰Anụ anyadam ẹ-ẹpwụ nya ịKịrayịsị, anụ myị kanụ ri igbodiya ẹ-ẹpwụ nya ẹla ọ-jẹ́ myịmyị nyanụ lala anyị anjwo ichiche wẹẹ kokoo! Ọkọkọ nya ọọwa lẹ, anụ́-ụ tụtụ ri angị jẹ́ ẹlẹlẹhẹ-ka ẹ-ẹpwụ nya ang onyobyi ọhọhọ lala anyị anjwo ichiche mẹ. Ma, ẹ-ẹpwụ nya ẹla ọ-jẹ́ myịmyị ọlala nyanụ wuu lẹ, anụ́-ụ mẹ ọngọgbahị oriri jẹ ụ-ụwa yẹẹyẹẹ mẹ.

²¹Chajị, ị da ẹla ọlẹ ká Ohe Oluhye ya kpehe lẹẹ ụ-Ụpwụ Ịgọgọ yẹkẹẹ, “M juwa ka kpa angịhyẹ ya ẹla la ija ịkịla ta angịnyị nyam. M juwa ka kpa omyi o-ya ẹla nya alija ịkịla ịhyẹ ya ẹla ta angịnyị nyam. Ma, angịnyị nyam ịịwa á tị ka myị-ị ke ụrụ la ẹla nyam ọọwa kpong-kpong ka. Ịnyị, Ọngọlahị Ohe Oluhye a ya lẹ.”

²²Chajị nya ọọwa lẹ, ahị jẹ́ yẹkẹẹ, ọhaha nya ẹla oyaya dodehe la ija ịkịla lẹ, ang o-ju ẹjẹẹ o-bwu ẹga nya Ohe Oluhye ịnyị! Ma, ang o-ju ẹjẹẹ ọọwa á tị ri ịnyahị ahị, angị myị la Ohe Oluhye ka. Ma, angị la ọmyịmyị-ka kem ụbwaa, ọ juwa ha lẹ. Ma, ọhaha nya ọmwụ ọyẹyẹ ọ-kpa ya ẹla nya Ohe Oluhye dodehe tị lẹ, ang o-ju ẹjẹẹ nyahị ahị angị myị la Ohe Oluhye kem, ọ juwa ha lẹ. Ọ́ juwa ha angị la ọmyịmyị ka lẹ ka.

²³Chajị nya ọọwa lẹ, anụ ya kọ ri kaanụ ala ịchọọchị wuu á kaka jịra, ká ọng myị́ ọng lẹpwarịrị nyanụ á juwa ya ẹla la ija ịkịla ịnyị kem, kọ ri ká ogbodiya ịhyẹ lee angị la ọmyịmyị-ka ịhyẹ, á jụ warị wẹ ẹpwang ọọwa, kị ka me irya yẹkẹẹ, alụla, anụ wuu nyaa ri lẹ ka?

²⁴Ma, ọ́ tị ri kị warị kaka wo kaanụ wuu á juwa yẹ ọmwụ, juwa ya ẹla nya Ohe Oluhye dodehe kem tị bẹ? Ánụ́ jẹ́ ká angị myịmyị-ka ịịwa lee igbodiya ịịwa á ka la eje owuwu nya ọhọbịrị ọhọhọ nyaa bwula ẹla oyaya dodehe nyanụ ọọwa lụka ọlịnyị lẹka? Ánụ́ jẹ́ kị ka me irya ju eje owuwu nya Ohe Oluhye bwula ẹla oyaya dodehe nyanụ ọọwa wuu ịnyịnyị lẹka?

²⁵Chajị, ẹla oyaya nyanụ ọọwa ka bwuru ang myị́ ang ịkpịbaa ịlẹpwụ ọkịlẹtụ nya ọngọlẹ kọ juwa wuu apwụ dodehe lẹ. Ọọwa lẹ, ọngọ ọlịnyị a ka dahị nyamwụ kụrụ eji ị-ịlahị nya Ohe Oluhye, juwa gbịgba họọ bala o-juwa ya dodehe yẹkẹẹ, Ohe Oluhye nyị juwa ẹ-ẹpwarịrị nyanụ ịnyịlẹhị lẹlẹ.

²⁶Ee lẹ, anụ anyadam ẹ-ẹpwụ nya ịKịrayịsị, anyị, ọ́ tị́ chịla kanụ ka họ tịtị mẹ? Ọọwa lẹẹ lẹlẹ. Ụka kanụ la ọjịra-jịra nyanụ anụ ala ịchọọchị lẹ aalẹ, ọngọhẹ nyanụ a ri ọngọ mwu eje gwogbo ha Ohe Oluhye ụ-ụwa mẹ. Ká ọngọkịla a ri ọngọ mẹ ẹla nya Ohe Oluhye jẹ mẹ. Ká ọngọ ọwụlẹ a ri ọngọ juwa bwuru ẹla ọkpịbaa ọlẹ ká Ohe Oluhye ya joo dodehe jenu mẹ. Ká ọngọkịla a ri ọngọ juwa ya ẹla dodehe la oja ọkịla mẹ. Ká ọngọkịla a ri ọngọ juwa bwuru etu nya ija ịkịla ịịwa dodehe ya jenu anụ aluche wuu ịnyịnyị mẹ. Ma, anụ cheri kaanụ wuu a juwa họ ang myị́ ang nyanụ la ọgụ ọlẹ kọ ka jẹ́-ẹ hu ọmyịmyị ọlala nya aluche nya ala ịchọọchị wuu hwaa kele ka uhye hiigu-hiigu mẹ.

²⁷Ó-riri kanụ ka juwa ya ẹla ya dodehe la ija ịkịla ẹ-ẹpwụ nya ọjịra-jịra nyanụ ọlịnyị tụbwọ aalẹ, angịnyị angị imiiye lee angị ịta kem, a juwa ya ẹla ọọwa dodehe hi ụbwọ ha awụlẹ mẹ. Ká ọngọ ookpokpo lẹpwụ nyanụ a juwa bwuru etu nya ala ilija ịkịla ịịwa dodehe ya jenu anụ angị ihihi wuu ịnyịnyị mẹ.

²⁸Ma, ọ́ tị ri ká ọngọngọhẹ ọkịla á juwa, ka jẹ́-ẹ bwuru etu nya ala ilija ịkịla ịịwa dodehe je ala ịchọọchị wuu kaka lẹ aalẹ, ọngọngọọng lẹpwụ nya angị raabwọ ịlịnyị a ba chịng ẹ-ẹpwụ nya ịchọọchị, kị juwa ya ala tọ ịlaa bala Ohe Oluhye ụbwaa-ụbwaa kwiikwii kem mẹ.

²⁹Anụ́-ụ myị ká angị ka yẹ ọmwụ, juwa ya ẹla nya Ohe Oluhye dodehe lụka ọlịnyị, a ba aangị imiiye lee angị ịta kem mẹ. Kaanụ angịkịla ihihi a juwa kụ ẹhị yẹ ẹla ọọwa ọgwọgụ chajị nyọka jẹ́ ọ-la kpakpa bala ọ-la kpakpa-ka nya ẹla ọọwa mẹ.

³⁰Ụka ká ọngọlẹ kọ juwa yẹ ọmwụ, ya ẹla nya Ohe Oluhye dodehe á jẹ́ yẹkẹẹ, Ohe Oluhye nyị wụrụ ịngịhyẹ ọkịla jẹ ọngọkịla ọlẹ kọ hụhụ bọọ ba lẹ aalẹ, ọngọ yẹ ọmwụ nya ọgbanyẹ ọọwa, a kpụ ba kem ụka ọlịnyị mẹ.

³¹Anụ wuu ka juwa yẹ ọmwụ ọlịnyị hi ụbwọ hi awụlẹ ọngọhẹ ọngọhẹ myị́. Chajị kaanụ wuu ka jẹ́-ẹ juwa jẹ́ ang ọlẹ kọ chịla ọhọhọ myị́ bala ọ-ka jẹ́-ẹ juwa la ẹjẹ ọkpụ́kpụ myị́ ịnyịnyị bwula ọọwa.

³²Chajị, angịlẹ kị juwa yẹ ọmwụ ọlịnyị wuu lẹ, ị ka jẹ́-ẹ la ọngịrị juwa wu olegu ọlẹpwụ nyaa kpa myị́ ụka ọlịnyị.

³³Chajị, Ohe Oluhye ayịdang lẹ, ó-ri Adịda nya ajugu-jugu ka! Ma, Adịda nya okpunyi bala ang omemeeme, ọ ri lẹ. Ẹ-ẹpwụ nya ịchọọchị nya angị ịgọgọ nya Ohe Oluhye lẹ, jaabwọ kọ chịla kọ ka la ụ-ụwa ri yẹkẹẹ,

³⁴Ụka ká anyang á kele ka ẹpwụ nya ịchọọchị aalẹ, ọ chịla kị ka hụhụ ụ-ụwa kem. Chajị, ị́ ya ẹga da ha anyang, kịịwa a ka ri angị kụ ịlahị, juwa nu alẹng ẹla ya giriri kpong-kpong ka. Ma, ọ chịla kị ka ji ekpeleji nya alẹng jaabwọ ká ehile nya Ohe Oluhye ya!

³⁵Ọ́ tị ri ká ịngịngịhyẹ á juwa, ọlẹ ká anyang á juwa tịtọ kị ka jẹ́ myịmyị lẹ aalẹ, ị ba kị pwụ ẹpwa ene kị ka tọ ọrụ nyaa ịtọ ọọwa ẹ-ẹpwa mẹ. Chajị, ọ ri ang oloyoyi ká anyang ka juwa ya ẹla ẹ-ẹpwụ nya ọjịra-jịra nya ala ịchọọchị.

³⁶Ọọhọ! Ẹla nya Ohe Oluhye ọlẹ kanụ wo lẹ, ẹ-ẹga nya Ohe Oluhye ayịdang, ọ tị́ bwu chịnụ ọgụ lee ẹ-ẹpwụ nyanụ anụ ayịdang, ẹla ọọwa a tị́ bwu kpehe kem? Lee, anụ ayịdang, ẹla nya Ohe Oluhye ọwẹ ụbwọọmwụ, a tị́ ma ju chị ehe ha wẹẹ?

³⁷Anụ wo mẹ! Ó-ri ká ọngọngọhẹ nyanụ á juwa kọ jẹ́ yẹkẹẹ, ọwa nyị ri ọngọ kaa yẹ ọmwụ ya ẹla nya Ohe Oluhye dodehe myị́ lee o-ri ọngịnyị nya Olegu Ịgọgọ lụmẹ lẹ aalẹ, ọngọọwa a tị tị juwa mẹjẹ gede-gede yẹkẹẹ, ala ịlẹ kam lẹẹ da du wanụ wuu nyị pwoku ehile nya Ọngọlahị ayịdang ịnyịlẹhị tịtị mẹ!

³⁸Ma, ọ́ tị ri ká ọngọọwa á myị ke ụrụ la ala ịlẹ kam wẹẹ ya kaka lẹ aalẹ, anụ tịtị myị ke ụrụ la ẹla nya ọngọọwa kaka ịnyịnyị.

³⁹Chajị nya ọọwa lẹ, anụ anyadam ẹ-ẹpwụ nya ịKịrayịsị, anụ cheri kanụ juwa charịnya nya ọmwụ ọyẹyẹ juwa ya ẹla nya Ohe Oluhye dodehe ọgwọgụ mẹ. Ma, anụ tị ku ọngọngọhẹ iwe la o-juwa ya ẹla la oja ọkịla kpong-kpong koo!

⁴⁰Anụ́-ụ cheri kanụ juwa họ ang myị́ ang wuu ọlẹpwụ nya ịchọọchị nyanụ la ụgbẹyị ọlẹ kọ ka la ihi-ihi bala omememe ịnyịnyị mẹ.