Read idege 1 ALA ỊKỌRỊNTỊ 15 Bible Online

1 ALA ỊKỌRỊNTỊ 15 - idege bible

1 ALA ỊKỌRỊNTỊ 15

¹Lẹẹlẹẹ, anụ anyadam ẹ-ẹpwụ nya ịKịrayịsị, m tịtọ kam ka kpụnụ ịtịya nya egbeju nya ẹla nya Ohe Oluhye nya ẹrụ ọnyịịla ọlẹ kam kpa kaka ya jenu ene kanụ ye ẹla ọọwa yẹẹyẹẹ, du kanụ nwụ́ ọmyịmyị ọlala nyanụ hụrụ ẹla ọọwa wẹ pyịyọọ daalẹ.

²Ẹrụ ọnyịịla ọọwa la ọngịrị ka chịnụ da pyịyọọ myị́. Ko ri kanụ ka juwa kpịtịya nya ala ịịwa ịlẹ kam ya jenu, juwa kpa họ ụkụrwọ. Kẹnẹ-kẹnẹ, ó-ri ká ọmyịmyị ọlala nyanụ ọwẹ á ri ang ododu ụbwọọmwụ lẹ mẹ ịnyị!

³Chajị, ẹla ọlẹ kam wo bwu ẹga nya Ohe Oluhye kpangga, ọlẹ ká ẹla ọọwa tị ri ẹla ọbaba gụ ịkịla wuu a wẹẹ kam kpa warị kaka ya jenu lẹ. Ẹla ọọwa ri yẹkẹẹ, ịKịrayịsị gbu chajị nya ịhọbịrị nyahị wuu, jaabwọ ká Ụpwụ Ịgọgọ ya ene-ene ịnyịlẹhị.

⁴M myịmyị ya jenu yẹkẹẹ, ụka kị nwụ ịKịrayịsị kpá, kị jwoo eji lẹ, ọ wuleji bwula igu la ẹnụtụrụ ọhata, juwa hịhị myịmyị, jaabwọ kị da kpehe ẹ-ẹpwụ nya Ụpwụ Ịgọgọ ene-ene ịnyịnyị.

⁵M myịmyị ya jenu yẹkẹẹ, ụka kọ wuleji bwula igu kpá lẹ, ọ chị ịlọmwụ ehe mẹjẹ ịSẹfasị lahị-lahị. Ọ myịmyị chị ịlọmwụ ehe mẹjẹ angịjụgbẹyị nyamwụ angị iwo kụrụ imiiye.

⁶ỊKịrayịsị myịmyị chị ịlọmwụ ehe mẹjẹ iru nya angịnyị ịlẹ kị lụmẹ gụ angịnyị ụnọ ookpokpo da angịnyị angị ohu ịrụ chiriri, lụka ọlẹ kịịwa wuu juwa ẹ-ẹga ookpokpo. Iru nya angịhyẹ lẹpwụ nya angịịwa dọmwụ jam la ọhịhị da ụka ọlẹ kam lẹẹ da ụpwụ ọlẹ wẹẹ, ọ ri nya ịlẹhị, angịhyẹ nyaa gbu ene-ene lẹ.

⁷ỊKịrayịsị myịmyị chị ịlọmwụ ehe mẹjẹ iJemsi ene kọ myịmyị-ị̀ chị ịlọmwụ ehe mẹjẹ alẹrụ ọnyịịla ọlẹ ịnyịnyị.

⁸Ohyẹẹkpẹ-ẹkpẹ wuu ri yẹkẹẹ, ịKịrayịsị chị ịlọmwụ ehe mẹjẹm am ayịdang ịnyịnyị! Ịnọ, ọ ri nya ịlẹhị, am lẹ, m ri igbedede ẹ-ẹpwụ nya ẹkọ ọmyịmyị nya Ọngọlahị ọlẹ lala ọnyị ọlẹpwụ nya ọnyang ọlẹ kọ kaa pwụ ọnụ ene kị kaa mọọ kpehe wẹ odehe ọlẹ ka.

⁹Chajị, am ịPọlụ ọlẹ ayịdang kpangga a ri ọhịnyẹnyẹ kpá wuu ẹ-ẹpwụ nya alẹrụ ọnyịịla ọlẹ lẹlẹ. Ịnọ, ḿ dọmwụ chịla kpikpiri kpụ, ị ka wụrụm ọlẹrụ ọnyịịla ọlẹ kpong-kpong ka. Chajị, m kaa tụ ịchọọchị nya Ohe Oluhye pyịpyị lụmẹ ene-ene.

¹⁰Ma, bwula ọnahị nya Ohe Oluhye ayịdang, a du kam ri ụma nya ọngọlẹ kam ri lẹẹ ẹ-ẹpwụ nya ẹla nyamwụ alẹ lẹ. Chajị, ọnahị nya Ohe Oluhye ọlẹ kọ la ẹ-ẹga nyam lẹ, ó ri ang ododu kpong-kpong ka. Ọkọkọ nya ọọwa lẹ, am a mwọọgịlẹ họ ụkụrwọ ọnyọọngịrị gụ alẹrụ ọnyịịla ịkịla wuu lẹlẹ. Ma, ụkụrwọ ọọwa á tị bwula ọngịrị nya ịlọm ka. Chajị, m họ ụkụrwọ ọọwa bwula ọngịrị ọnahị nya Ohe Oluhye ọlẹ kọ ya kụ ẹ-ẹpwụ nyam.

¹¹Chajị nya ọọwa lẹ, ó ri ọnụ nyam am ayịdang kanụ wo ẹla nya Ohe Oluhye ọọwa bwubwu lee ọnụ nya alẹrụ ọnyịịla ịkịla wuu ene kanụ myị la ẹla ọọwa wẹwẹ aalẹ, ẹlẹwẹ kam ya rụ́ igu ogbugbu bala owuleji bwula igu nya ịKịrayịsị a ri egbeju nya ẹla nyahị ọọwa wuu lẹlẹ.

¹²Ee lẹ, ọ tị́ lanyị kahị ya ẹrụ ọnyịịla ọlẹ jenu rụ́ owuleji bwula igu nya ịKịrayịsị ọọwa kpá wuu, ká angịhyẹ nyanụ myịmyị jẹ́ juwa kpa ya dodehe yẹkẹẹ, owuleji bwula igu ọhẹ-lọhẹ nyị́ ji ha angị gbugbu kaka tị tị mẹ?

¹³Anụ ya jem wẹẹ! Ó-ri ká owuleji bwula igu á ji ha angị gbugbu kaka lẹ, ọọwa tị́ ri yẹkẹẹ, ịKịrayịsị á wuleji bwula igu ịnyịlẹhị tị tị kaka lẹ, lee?

¹⁴Ọ́ tị́ ri ịKịrayịsị á wuleji bwula igu kaka ịnyịlẹhị lẹ aalẹ, ọọwa ri yẹkẹẹ, ẹla nya Ohe Oluhye ọlẹ kahị kaa ya rụ́ owuleji bwula igu nyamwụ lẹ, ọ tị́ ri ang ododu lẹ, lee? Ọọwa ri yẹkẹẹ, ọmyịmyị ọlala nyanụ ọwẹ tị́ ri ang ododu ịnyịnyị lẹ, lee?

¹⁵Ọlẹ kọ tịpyọ ọgụgụ wuu ri yẹkẹẹ, ọlẹ kahị ya jenu wẹ yẹkẹẹ, Ohe Oluhye wule ịKịrayịsị eji bwula igu lẹ, anụ tị tị ka juwa yẹkẹẹ, ahị nyị me ọnọọkịla ba Ohe Oluhye lẹ. Chajị, ị-ịlahị nyanụ lẹ, Ohe Oluhye á tịtị wule ịKịrayịsị eji bwula igu ịnyịlẹhị kpong-kpong kaka.

¹⁶Chajị, ó-ri ká owuleji bwula igu ọhẹ á juwa ha angị gbugbu kaka ịnyịlẹhị lẹ aalẹ, anyanyị, ịKịrayịsị a tị́, tị tị ka jẹ́-ẹ wuleji bwula igu myị́ tụtụm wẹẹ?

¹⁷Ọ́ tị ri ká ịKịrayịsị á wuleji bwula igu kaka ịnyịlẹhị lẹ, ịnọ, ọmyịmyị ọlala nyanụ ọwẹ tị tị ka ri ang ododu lẹ! Aalẹ, ịnọ, anụ tị tị ka myịmyị-ị̀ juwa ẹ-ẹpwụ nya ịhọbịrị ịhọhọ nyanụ pyịyọọ daalẹ wẹẹ!

¹⁸Ịnọ, ọọwa ka ri yẹkẹẹ, angịlẹ wuu kị myị la ịKịrayịsị ene kịị gbu lẹ, ịnọ, ọọwa ka ri yẹkẹẹ, ịwa ayịdang tị tị ka ta ayịreji gbanggbang wuu ịnyịnyị lẹ.

¹⁹Ma, ọ́ tị ri ká ẹhị ọrịrịị-rịrị nyahị ahị angịnyị nya Ohe Oluhye ọlẹpwụ nya ịKịrayịsị á ba u-uhye nya ọhịhị olodehe ọlẹ kem lẹ, ịnọ, ahị ayịdang a tị tị ka ri alinyiribyi ikwookwee kpá gụ alodehe ọlẹ wuu ịnyịnyị lẹlẹ.

²⁰Ma, ẹla nya ịlẹhị ri yẹkẹẹ, ịKịrayịsị ayịdang wuleji bwula igu, juwa hịhị pyịyọọ ịnyịlẹhị lẹ! ỊKịrayịsị a ri ugbe nya ọgbanyẹ ha angị ka wuleji bwula igu lụka ohyẹẹkpẹ, juwa hịhị pyịyọọ ịnyịnyị lẹlẹ.

²¹Chajị, jaabwọ ká ọlẹng ookpokpo a ri ọngọ kpa igu ogbugbu warị wẹ alodehe ọlẹ wuu wẹẹ, ịnyịnyị, owuleji bwula igu a tịtị bwu ẹga nya ọlẹng ọkịla kpehe wahị ahị angịnyị ehe wuu lẹlẹ.

²²Chajị, jaabwọ kaahị angịnyị ehe wuu ye igu ogbugbu ọọwa bwu ẹpwụtụbwọ nya Adam, bwula ịwọ nya ọhọbịrị nyamwụ ọlẹ kị kpa mahị wẹẹ, ịnyịnyị-ịnyịnyị, ahị angịnyị ehe wuu a ka wuleji bwula igu, juwa hịhị pyịyọọ bwula ọmyịmyị ọlala ẹ-ẹga nya ịKịrayịsị ọọwa lẹlẹ.

²³Ma, ọng myị́ ọng lẹpwụ nyahị wuu ka wuleji bwula igu lụka ọlẹ kị hunọ ha alogu nyamwụ. ỊKịrayịsị ayịdang ọlẹ kọ ri ugbe nya ọgbanyẹ ha angị ka wuleji bwula igu wuu a jene-jene wuleji bwula igu lẹ. Ọọwa lẹ, angịlẹ wuu kị myị la ịKịrayịsị ene kịị gbu a ka wuleji bwula igu ụka ọlẹ ká ịKịrayịsị ka mwẹẹkpẹ warị lẹlẹ.

²⁴Ụka ọọwa, ọmyịmyị nya ang myị́ ang wuu a ka pwụ eji lẹlẹ. Chajị, ụka ká ịKịrayịsị á ta ọngịrị nya ịgọmenti ọnyị myị ọnyị wuu bala ịngịrị myị́ ịngịrị ịkịla ilodehe ọlẹ wuu ayịreji gbanggbang kpá lẹ, ọ ka tụụbwọ hi ịpyị adịrahụ nyamwụ ju Ohe Oluhye Adịda ụ-ụbwọ lẹlẹ.

²⁵Chajị, ịKịrayịsị ka juwa gbeji lala adịrahụ pyịyọọ gbee pwụ ụka ọlẹ kọ ka kụrụ aluji nyamwụ wuu chẹẹchẹẹ, juwa ya ẹta nyamwụ rịraa u-uhye.

²⁶Igu ọlẹ kọ kaa nwụ ọngịnyị ehe kpangga a ri oluji ohyẹẹkpẹ-ẹkpẹ ọlẹ kị ka ta ayịreji ụka ọọwa lẹlẹ.

²⁷Chajị, ọkụrụ-kụrụ nya ịKịrayịsị a lẹẹ kị ya ẹla rụ́ ụ-Ụpwụ Ịgọgọ ẹgẹlẹ lẹ. Ẹla ọọwa ri yẹkẹẹ, “Ohe Oluhye ayịdang juwa ka họ ká ọngọlẹ kọọ wẹẹ ka du ẹrụ warị, ka kụrụ ang myị́ ang wuu ilodehe ọlẹ chẹẹchẹẹ, gbee kọ ka juwa ya ẹta nyamwụ rịraa u-uhye pyii.” Ma, ọlẹ ká Ohe Oluhye tị ya wẹ yẹkẹẹ, “M ka hu ang myị́ ang wuu kaka ji ekpeleji nya ọngọọwa lẹ,” ọ la gbadaa yẹkẹẹ, Ohe Oluhye ayịdang be ịlọmwụ deeji ẹ-ẹpwụ nya ọọwa tị!

²⁸Chajị, ụka ọlẹ ká ang myị́ ang wuu ka ji ekpeleji nya ịKịrayịsị, kọọwa ka ri olegbeju nyaa wuu lẹ, ịKịrayịsị ayịdang ọlẹ kọ ri Ọnyẹwẹ nya Ohe Oluhye tịtị ka kpa ịlọmwụ ka ekpeleji nya Ohe Oluhye Ọngọ tụụbwọ hi ang ịịwa wuu jwoo ụ-ụbwọ ịnyịnyị! Ọọwa lẹ, Ohe Oluhye a ka ri Olegbeju Agụgụ Ọtọnyị lọnyị nya ang myị́ ang wuu lụka ọọwa lẹlẹ.

²⁹Anụ ya jem wẹẹ! Ịịyẹ a tị́ ri irya nya angịhyẹ ịlẹ kị kaa hụ enyi Ohe wọnụ nya angị gbugbu ju, kọ ri ká angịịwa á la ọdahịhile gbe owuleji bwula igu nya angị gbugbu ka? Chajị ịịyẹ a tị́, tị tị du kị juwa hụ ịlaa enyi Ohe hu wọnụ nya angị gbugbu ịlịnyị ju mẹ?

³⁰Ahị angị myị ẹrụ ọnyịịla ọlẹ tị bẹ? Ó-ri kahị la ẹhị ọrịrịị-rịrị gbe owuleji bwula igu ọọwa kaka lẹ, ịịyẹ a tị́, tị tị ka ri apyobwuna nyọlẹ kahị lẹẹ yahị ju igu ụka myị́ ụka chajị nya ẹrụ ọnyịịla ọlẹ mẹ?

³¹Anụ anyadam ẹ-ẹpwụ nya ịKịrayịsị, m jam ya ẹla ọlẹ dodehe, chajị nya ogu ọchịchị ọlẹ kam la u-uhye nyanụ, chajị nya ọkẹkẹnị ọlẹ kanụ la ẹ-ẹpwụ nya ịKịrayịsị iJisọsị Ọngọlahị. M kaa juwa ẹ-ẹpwụ ọnụ nya igu ogbugbu ẹnụ myị́ ẹnụ wuu ká ahị pyẹ.

³²Ọlẹ kaam ayịdang dọmwụ ma uya ta iyo ịlẹpwamẹ lala ọngịnyị ehe ụ-ụwa e-epweji nya Efesọsị lẹ, ó-ri ká owuleji bwula igu á ji ịnyịlẹhị kaka lẹ, ịịyẹ a tị́, tị tị ka ri apyobwuna ham ẹ-ẹpwụ nya ọọwa mẹ? Ó ri ká owuleji bwula igu ọhẹ á ji kaka ịnyịlẹhị lẹ, ịnọ, ahị tị tị ka juwa họ ẹla ọlẹ kị da kpehe lẹẹ ẹ-ẹgẹlẹ lẹ. Ẹla ọọwa yẹkẹẹ, “Anụ kẹwẹ kahị ri ang oriri bala ọ-nwa ang ọnwanwa wu ẹpwụ alẹ mẹ. Chajị, ahị juwa ka gbu myị́ ijuju.”

³³Anụ myị kị pịrịịnụ ju koo! Chajị, ogu nya angịnyị inyibyi ojuju a kaa bịrị abwẹla ọnyịịla ọhọhọ nya ọngịnyị ehe lẹ!

³⁴Lẹ, anụ cheri kanụ nwụ irya nyanụ rịrị kpakpakpa, kanụ juwa cheji ba ọhọbịrị ọhọhọ mẹ. Chajị, angịhyẹ lẹpwụ nyanụ á jẹ́ Ohe Oluhye yẹẹyẹẹ kpong-kpong ka. M jam ya ẹla ọlẹ, chajị kanụ ka jẹ́-ẹ jẹ́ oyoyi nya ịlọnụ ịnyị!

³⁵Ọhẹka, angịhyẹ nyanụ ka juwa tịtọ yẹkẹẹ, “Anyị, ị tị́ ka jẹ́-ẹ wule ọngọ gbugbu eji bwula igu myị́ wẹẹ? Ụma nya ugbinyịrọ ọlanyị, ọngọọwa a tị́ ka la kpong-kpong?”

³⁶Ahụ oluchi, ọngọ tịtọ ọlịnyị, wo mẹ! Ajẹ nya ang ịlẹrụ nyang ịlẹ ká kaa kpa kaka tọ ẹ-ẹrụ lẹ, ó-ri ká ajẹ ịịwa á gbu ị-ịpyị kpá ene ka, ị́ jẹ́-ẹ bwu kpehe kaka la ọhịhị kaka!

³⁷Kpịtịya mẹ. Aang ọlẹ kọ ri ugbile ọlẹpwụ-lẹpwụ nya okoji ọọwa kpangga, a tị kaa kpa kaka tọ ẹ-ẹrụ ka! Ma, ẹjẹ nyamwụ ọlam-ọlam ọ-lala ajẹ nya ịrayịsị lee ụma nya ẹchẹ nya ajẹ nya ang nya ẹrụ ọkịla kem a kaa kpa kaka tọ ịnọ tị lẹ.

³⁸Ma, Ohe Oluhye a ri Ọngọlẹ kọ kaa hu ẹchẹ nya ịnyịrọ ọlẹ kọ họ́ọ ju ẹjẹ nya okoji ọwẹ ene kọ kaa jẹ́-ẹ bwu kpehe lẹ. Ohe Oluhye a kaa hu ụma nya ugbinyịrọ la datị-datị ju ẹchẹ nya ẹjẹ nya okoji ọnyọnyọọnyị, du kị jẹ́ kaa datị hi awụlẹ wẹ ịnyịnyị tị lẹ!

³⁹Iyo ịlẹ ká Ohe Oluhye tị họhọ lẹẹ wuu lẹ, Ohe Oluhye ya ụma nya ugbinyịrọ la datị-datị ju ẹchẹ nya ọnyọnyọọnyị ịnyịnyị! Angịnyị ehe la ugbinyịrọ nya ịlaa datị. Iyo la ẹchẹ nya ugbinyịrọ nya ịlaa datị. Ịchịnụ la ẹchẹ nya ịlaa datị. Iyenyi tị la ugbinyịrọ nya ịlaa datị ịnyịnyị!

⁴⁰Ẹchẹ nya ugbinyịrọ ọlẹ ká angịlẹ kị ju epwoohe la lẹ, ọ datị hi ẹchẹ nya ugbinyịrọ ịlẹ ká angịlẹ kị jam odehe ọlẹ la ịnyịnyị. Ụhị ọháha nya ugbinyịrọ nya alepwoohe tị datị hi ẹchẹ nya ụhị ọháha nya ugbinyịrọ nya alodehe ọlẹ ịnyịnyị!

⁴¹Ẹchẹ nya ụhị ọháha nya ẹnụ oluhye-ọgba ọwẹ datị hi ẹchẹ nya ụhị ọháha nya ọya ọlẹ kọ kaa rụ́. Ẹchẹ nya ụhị ịháha nya ịdịchụ tị myịmyị jẹ́ datị hi awụlẹ ịnyịnyị! Chajị, ụma nya ụhị ọháha nya ọdọchụ ọnyọnyọọnyị datị hi ẹchẹ nya ụhị nya ọdọchụ ọkịla ọọnamwụ ịnyịnyị.

⁴²Ịnyịnyị-ịnyịnyị, ọ la ẹ-ẹga nya owuleji bwula igu nya angị gbugbu lẹlẹ. Ị kaa hu ụma nya ugbinyịrọ ọmama nya ọngịnyị ehe kpa kaka ju eji. Ma, ugbinyịrọ ọlẹ ká ọngịnyị tị ka la lụka nya owuleji bwula igu nyamwụ lẹ, ugbinyịrọ ọọwa á ka jẹ́-ẹ mama kpá myị́ ẹnẹnẹhẹ kaka.

⁴³Ugbinyịrọ nya ọngịnyị ehe ọlẹ kị kaa hu kpa kaka ju eji lẹ, ugbinyịrọ ọọwa la ẹpẹpẹ lụmẹ. Ma, ugbinyịrọ ọlẹ ká ọngịnyị tị ka la lụka nya owuleji bwula igu nyamwụ lẹ, ugbinyịrọ ọọwa tị ka la ihi-ihi lụmẹ. Ị kaa hu ugbinyịrọ nya ọngịnyị ehe ọlẹ kpa kaka ju eji ẹ-ẹpwụ nya ọdẹwụ-dẹwụ ọlala. Ma, ị tị ka wuloo eji kaka la ugbinyịrọ ọkịla ọnyọọngịrị.

⁴⁴Ụka kị kaa ju ọngịnyị ehe eji lẹ, ugbinyịrọ olodehe ọlẹ kị kpa ọpyị họhọ ọngịnyị a la lẹ. Ụka kị tị ka wuloo eji bwula igu lẹ, ugbinyịrọ nya olegu, ọngịnyị a ka la lụka ọọwa lẹlẹ. Chajị, jaabwọ ká ụma nya ugbinyịrọ ọlẹ kị kpa ọpyị olodehe ọlẹ họhọ juwa datị lẹ, ịnyịnyị ụma nya ugbinyịrọ ọlẹ kọ ri ịnya olegu kem, a tịtị juwa datị lẹlẹ.

⁴⁵Chajị, ị da kpehe ụ-Ụpwụ Ịgọgọ yẹkẹẹ, “Ọlẹng ọlẹ kọ ri Adam nya ọgbanyẹ-ọgbanyẹ lẹ, Ohe Oluhye họọ lọọ ri ugbodu okpukpuru ọlẹ kọ la ọhịhị.” Ma, ọlẹng ọkịla ọlẹ kọ ri Adam ohyẹẹkpẹ tị lẹ, ọwa ayịdang ri olegu ọlẹ kọ kaa hu ọhịhị ha.

⁴⁶Ma, ọ-ọngọọwa ọlẹ kọ ri ọhịhị nya olegu ọwẹ a tị warị jene ka. Ma, ọngọlẹ kọ kpa ọhịhị nya ugbinyịrọ ọlẹ kịla angịnyị ehe a warị jene lẹ.

⁴⁷Ọngọọwa ọlẹ kọ kpa ọhịhị nya ugbinyịrọ ọọwa warị lẹ, ọ bwu odehe ọlẹ, chajị ọpyị olodehe ọlẹ Ohe Oluhye a kpa họọ lẹ. Ma, ọngọ oheeye tị bwu epwoohe bwu hireji.

⁴⁸Chajị, jaabwọ ká angịnyị ehe wuu la ugbinyịrọ nya ọpyị nya Adam bwula ịwọ nyamwụ ọlẹ kị kpa maa warị wẹ odehe ọlẹ lẹ, ịnyịnyị, angịlẹ wuu kị ri angịnyị nya epwoohe a tịtị ka la ugbinyịrọ nya epwoohe ta ịKịrayịsị ọngọ bwu epwoohe hireji bwula ọlẹ kị myị la ịwọ nyamwụ ọlẹ kọ ya yẹ hụrụ wọnụ nyaa ịwa wuu ju lẹlẹ.

⁴⁹Chajị, jaabwọ kaahị angịnyị ehe wuu ju abwụma nya ugbinyịrọ nya ọpyị ọlẹ ta Adam nya ọgbanyẹ lẹ, ịnyịnyị-ịnyịnyị, ahị ka ju abwụma nya ugbinyịrọ nya epwoohe ta ịKịrayịsị Adam oheeye ịnyịnyị lẹlẹ.

⁵⁰M jam ya ẹla ọlẹ jenu anụ anyadam ẹ-ẹpwụ nya ịKịrayịsị yẹkẹẹ, ịnyịlẹhị ịnyị, ugbinyịrọ bala ịwọ nya ọngịnyị ehe olodehe ọlẹ, á ka jẹ́-ẹ ri ugu nya ịpyị Adịrahụ nya Ohe Oluhye myị́ kaka. Lee, ugbinyịrọ ọlẹ kọ ka jẹ́-ẹ mama myị́, ọ ka jẹ́-ẹ ri ugu nya ịpyị Adịrahụ nya Ohe Oluhye ẹ-ẹga ọlẹ ká igu ogbugbu á ji kaka lẹ ka, ịnyịnyị!

⁵¹Anụ ke ụrụ, kam ya ẹla ọkpịbaa ọlẹ jenu mẹ! Ahị angịnyị nya Ohe Oluhye ịlẹ wuu kahị jam la ọhịhị á ka gbu wuu ene nya ụka ọọwa ka. Ma, ị ka nyẹẹhị ugbinyịrọ ọlẹ deeji,

⁵²ahyaahị-ahyaahị lala ụka nya ẹhị ọ-mwụ biri lụka ọlẹ ká opyike ohyẹẹkpẹ nya Ọngọlahị ka chị. Chajị, ahyaahị ká opyike ọọwa á chị bwaaa lẹ, angị ịgọgọ ịlẹ kị gbugbu ene a ka wuleji bwula igu kaka la ugbinyịrọ ọlẹ kọ ka jẹ́-ẹ gbugbu ẹnẹnẹhẹ kaka lẹ, ị ka nyẹ ugbinyịrọ nyahị ahị angị ka jam lahị-lahị deeji lụka ọọwa lẹlẹ.

⁵³Chajị, ugbinyịrọ ọmama nyahị ọlẹ ka hu ụma nya ugbinyịrọ ọmama-ka kụrụ pyii lẹ. Ugbinyịrọ nyahị ọlẹ kọ tị ka gbugbu myị́ lẹ, ọ tị ka hu ugbinyịrọ ọlẹ kọ ka jẹ́-ẹ gbugbu myị́ ẹnẹnẹhẹ kaka, kụrụ pyii ene kahị ka ka epwoohe myị́ lẹ.

⁵⁴Ụka ọọwa ká ugbinyịrọ ọmama ọọwa ka nyẹ deeji kahị ka kụrụ ụma nya ugbinyịrọ ọmama-kaka bala ụka ọlẹ kahị ka pwọ ugbinyịrọ ogbugbu myị́ ọlẹ deeji, kahị ka hu ụma nya ugbinyịrọ ọ-ka jẹ́-ẹ gbugbu-kaka kụrụ ịnyịnyị lẹ aalẹ, ala ịlẹ kị da kpehe lẹẹ ẹ-ẹgẹlẹ, a ka họ jịra lẹlẹ. Ẹla ọọwa yẹkẹẹ, “Ọkụrụ-kụrụ, wu igu ogbugbu mile pyịyọọ ugbẹnyị lẹ.

⁵⁵Ee! Ahụ igu ọwẹ, ale, ọkụrụ-kụrụ nyang, a tị́ ji tụtụm wẹẹ? Ee! Ahụ igu ọwẹ, ale, ọngịrị nyang a tị́ ji tụtụm wẹẹ?”

⁵⁶Ọhọbịrị ọhọhọ nya angịnyị ehe a du ká igu ogbugbu kaa la ọngịrị kụrwaa myị́ lẹ. Ehile ọbịrịị-bịrị nya angịnyị ehe a tị kaa du ká ọhọbịrị ọhọhọ kaa la ọngịrị kụrwaa myị́ lẹ.

⁵⁷Ma, ogbo a ri nya Ohe Oluhye ọngọlẹ kọ kaa hu ọkụrụ-kụrụ nyamwụ hahị bwula Ọngọlahị iJisọsị ịKịrayịsị.

⁵⁸Chajị nya ọọwa lẹ, anụ anyadam ị-hám há ẹ-ẹpwụ nya ịKịrayịsị, anụ́-ụ juwa godayị kpakpakpa ẹ-ẹpwụ nya ọmyịmyị ọlala nyanụ mẹ. Anụ juwa pyị giri-giri kpong-kpong ka. Anụ́-ụ cheri kanụ juwa họ ụkụrwọ nya Ọngọlahị nya ịlẹhị-ịlẹhị ọgwọgụ ụka wuu mẹ. Chajị, anụ ayịdang jẹ́ yẹkẹẹ, ọlẹ kanụ wẹẹ nwụ ịlọnụ la ụkụrwọ nya Ọngọlahị ọhọhọ wuu lẹ, ọ́ ka ri ang ododu kpong-kpong ka.