Read idege 1 ALA ỊKỌRỊNTỊ 16 Bible Online

1 ALA ỊKỌRỊNTỊ 16 - idege bible

1 ALA ỊKỌRỊNTỊ 16

¹Ẹla chajị nya ọhaha nya okpoko ọ-ka ya da angịnyị nya Ohe Oluhye ịkịla ụbwọ ọlẹ kam ya lẹ, jaabwọ kam chabwọ nya ẹla ọọwa ya je ala ịchọọchị ịlẹ wuu kị juwa ọ-ọpyị nya ịGaletiya lẹ, ịnyịnyị-ịnyịnyị, m tịtọ kanụ ka bwu họ ọhaha ọọwa lẹlẹ.

²Ẹnụtụrụ nya ịchọọchị ọnyị myị ọnyị wuu, m tịtọ ká ọng myị́ ọng lẹpwụ nyanụ ka hu okpoko ọhẹ nụwa a-ang datị jaabwọ kọ me irya yẹkẹẹ, nyị pwoku u-uhye nya ọhaha ọọwa ọlẹ kam ya wẹ. Chajị ká ụka kam warị lẹ, kọ ka baba nyọka dọmwụ nya okpoko ọọwa ọdada kaka mẹ.

³Ụka kam pwụ eji warị lẹ aalẹ, m ka da ileta du angịlẹ kanụ ka chụ ham ẹrụ kele ka iJerusalẹm lokpoko ọọwa, ọlẹ kanụ ka da ju lawụlẹ wuu lẹlẹ.

⁴Ọ́ tị ri kọ chịla kam ka kele ịnyịnyị lẹ aalẹ, am bala angịịwa a tị tị ka bajẹ lawụlẹ lẹlẹ.

⁵M ka warị wẹ ịKọrịntị nyanụ lụka ọlẹ kam kaka wụla alọpyị nya ịMẹsịdoniya yẹ kpá. Chajị, irya nyam ri yẹkẹẹ, ḿ ka dayi la ọ-ka chịpwụrụ bwu ọpyị nya ịMẹsịdoniya ene kam ka warị wẹ ịnyanụ kaka.

⁶Ụka kam warị, m ka hụ tanụ chẹẹ. Ọhẹka, m dọmwụ ka hụ tanụ gbee pwụ ụka ọlẹ ká ụka nya alogo ọtụka-ọtụka ọlẹ kị wụrụ “iwinta” ka chịpwụrụ kpá wuu. Ọọwa lẹ, anụ ka dam ụbwọ ka ẹga myị́ ẹga ọlẹ kam ka rụ ka lụka ọọwa lẹlẹ.

⁷Chajị, ọ́ bam nyọka warị wẹ ịnyanụ, kam ka rụ la ọkwaakwaa ka. Ma, m tịtọ kam ka hụ tanụ chẹẹ, ó-ri ká Ọngọlahị á myị tụbwọ aalẹ.

⁸Ma, m tịtọ kam ka hụ e-epweji nya Efesọsị ọlẹ gbee pwụ ẹnụtụrụ nya iPentikọsị wẹẹ!

⁹Chajị, ụgbẹyị wụrụ da pwọọ ham kam ka juwa kpa ụkụrwọ nya Ọngọlahị kịlahị hiigu-hiigu ẹ-ẹgẹlẹ lẹẹlẹẹ, ọ ri nya ịlẹhị, ahị la angị tụụhị pyịpyị ju iru lụmẹ jam ịnyịnyị.

¹⁰Ụka ká iTimoti á warị wẹ ịnyanụ lẹ aalẹ, anụ́-ụ ye ọọ la okpunyi yẹẹyẹẹ mẹ. Chajị, ụkụrwọ nya Ọngọlahị, iTimoti a wẹẹ họ jaabwọ kaam ayịdang lẹẹ họ ịnyịnyị lẹ.

¹¹Anụ myị ká ọngọngọhẹ nyanụ a juwa yẹhị dọọ bwee kpong-kpong koo! Anụ́-ụ doo tịrẹkpẹ nya la okpunyi warị wẹ ẹga nyam mẹ. Chajị, m juwa ya ẹhị rịrị gboo kọ ka bajẹ bala anyadahị ịkịla ẹ-ẹpwụ nya ịKịrayịsị nya warị ịnyịnyị.

¹²Ẹla chajị nya Apolosi ọnyadahị ẹ-ẹpwụ nya ịKịrayịsị a lẹẹ lẹlẹ. Ịnọ, m byoo nya ịlẹhị-ịlẹhị yẹkẹẹ, ọ ba anyadahị ịkịla ịwẹ warị wẹ ẹga nyanụ ịnyịnyị mẹ. Ma, ọọwa, á tị ri irya nyamwụ nyọka warị lẹẹlẹẹ lẹka. Ụka ká ẹga á hi họọ lẹ aalẹ, ọ ka warị kaka wụlaanụ yẹ lụka ọkịla lẹlẹ.

¹³Anụ́-ụ cheri kanụ juwa gbeji giri-giri bala ogodayị rịrị kpakpakpa ẹ-ẹpwụ nya ọmyịmyị ọlala nyanụ mẹ. Kanụ ri angị la ẹla oyaya myị́ nya adam ọlẹng ẹ-ẹpwụ nya Ọngọlahị bala o-ri angị la gogo ẹ-ẹpwụ nya ẹla nyamwụ ịnyịnyị mẹ.

¹⁴Anụ́-ụ myị ká ọháha ọlala kem, anụ ka juwa kpa họ ang myị́ ang nyanụ wuu lẹ mẹ.

¹⁵Anụ anyadam ẹ-ẹpwụ nya ịKịrayịsị. Anụ tị́ jẹ́ yẹkẹẹ, iSitifanasị bala alọdọdẹpwa nyamwụ, a ri angịnyị nya Ohe Oluhye nya ọgbanyẹ-ọgbanyẹ ịlẹ kị yẹ irya da ọ-ọpyị nya Akaya wuu lẹ. Ị tị hu ịlaa wuu lẹpwụ-lẹpwụ ha ẹ-ẹpwụ nya ẹrụ ọmyịmyị ha angị ịgọgọ nya Ohe Oluhye lẹ.

¹⁶Lẹ, m jam junu ohu nya ịlẹhị-ịlẹhị, kanụ ka ri angị juwa kpa ịlọnụ ka ekpeleji nya ụma nya angịnyị ịlịnyị wuu bala angịkịla ịlẹ kị juwa myị ẹrụ bala o-juwa nwụ ịlaa la ụkụrwọ nya Ọngọlahị ịnyịnyị mẹ.

¹⁷M chị ọkẹkẹnị lụmẹ, chajị nya ọwẹwẹ nya iSitifanasị bala ịFọtunatọsị bala Akayịkọsị ịlẹ kị warị wẹ ẹga nyam lẹẹlẹẹ. Chajị, ịwa ayịdang a ri angị ka ku ọmwakpa nyanụ chajị nyọlẹ kam yẹnụ kaka lụka ọtata lẹ.

¹⁸Ọhọhọ ọnyịịla nya alẹng ịwẹ kaa hu ịnyọ ọmwụmwụ ha olegu nyam lụmẹ, jaabwọ kọ kaa hu ịnyọ ọmwụmwụ ha olegu nyanụ anụ ịnyịnyị. Chajị nya ọọwa lẹ, ọ chịla kanụ ka juwa hu angịnyị ịlịnyị wuu hwaa kele ka uhye, chajị nya ụkụrwọ ọnyịịla ọhọhọ lụmẹ nyaa ọọwa.

¹⁹Ala ịchọọchị ịlẹ kị jam ọ-ọpyị nya Echiya wuu ya, nyị da ọnụ chịnụ ha ịwa. Akwila bala iPirisila bala ala ịchọọchị ịlẹ kị kaa jịra ẹ-ẹpwa nyaa wuu ya, nyị da ọnụ-ọnyịịla chịnụ ha ịwa ịnyịnyị bwula Ọngọlahị mẹ.

²⁰Anyadahị ẹ-ẹpwụ nya ịKịrayịsị ịlẹgẹlẹ wuu ya, nyị da ọnụ chịnụ ha ịwa mẹ. Anụ́-ụ juwa da ọnụ ọgẹnẹ-gẹnẹ chị awụlẹ, kanụ juwa ju awụlẹ ọnụ nya angị ịgọgọ ham mẹ.

²¹Am ịPọlụ ọlẹ ayịdang a lẹẹ kpa ụbwọ nyam da ọnụ ọdachị ọlẹ du wanụ lẹ.

²²Ó-ri ká ọngọngọhẹ á juwa ọlẹ kọ la ọháha nya ịlẹhị-ịlẹhị ẹ-ẹga nya Ọngọlahị ka aalẹ, inyiribyi chajị nya eje owuwu nya Ohe Oluhye ka ri nya ọngọọwa. Ọngọlahị la, mwẹẹkpẹ warị mẹ.

²³Ọnahị nya Ọngọlahị iJisọsị a juwa tanụ wuu mẹ.

²⁴Ká ọháha nyam a juwa tanụ wuu bwula ịKịrayịsị iJisọsị ịnyịnyị mẹ. Amẹn.