Read idege 1 ALA ỊKỌRỊNTỊ 2 Bible Online

1 ALA ỊKỌRỊNTỊ 2 - idege bible

1 ALA ỊKỌRỊNTỊ 2

¹Ụka kam warị kaka ya ẹrụ ọnyịịla ọkpịbaa nya ibeenu oriri nya Ohe Oluhye ọlẹ dodehe jenu anụ anyadam ẹ-ẹpwụ nya ịKịrayịsị lẹ, ḿ kpa ẹlẹlẹ ịmịla nya ẹla oyaya myị́ nya alodehe ọlẹ ya ẹla ọọwa ka lee ọ-kpa irya nya angị jẹ́ ang lụmẹ nya alodehe ọlẹ da ẹla ọọwa wụlẹ ya jenu kpong-kpong ka.

²Chajị ụka ọlẹ kam juwa tanụ wẹẹ lẹ, eje ọchịchị nyam ri yẹkẹẹ, ḿ tịtọ kam ka jẹ́ ịngịngịhyẹ ọkịla ẹ-ẹpwarịrị nyanụ dala ẹla chajị nya iJisọsị ịKịrayịsị ayịdang bala igu ọlẹ kọ gbu u-uhye nya okoji wọnụ nya angịnyị ehe wuu ju kaka.

³Ụka kam juwa ẹ-ẹpwarịrị nyanụ lẹ, m jẹ́ ọdẹwụ-dẹwụ nya ịlọm yẹkẹẹ, ḿ ka jẹ́-ẹ jụ ụkụrwọ nya ẹrụ ọnyịịla ọlẹ ya pyẹ la ọngịrị nya ịlọm myị́ kpong-kpong ka. Ịnyị a du kam kaa juwa ẹ-ẹpwụ nya uhi ojuju ọtụka-ọtụka, juwa rụ́ kpákpakpa ị-ịlahị nya Ohe Oluhye ụka wuu lẹ.

⁴Ẹla o-ya dodehe nyam bala ẹrụ ọnyịịla oyaya pyẹ ọlẹ kam tị ya ẹ-ẹpwarịrị nyanụ lẹ, ó-ri ịnya ẹlẹlẹ ịmịla nya ẹla ọjẹ́jẹ myị́ nya alodehe ọlẹ kị kaa kpa ya ẹla ọ-kpụ angịnyị ịpyọ lụmẹ kpong-kpong ka. Ma, ọngịrị ọ-kpa chị ijata ojiji nya Olegu Ịgọgọ nya Ohe Oluhye ehe gede-gede kem, m kpa ya ẹla ọọwa dodehe jenu lẹ.

⁵M họ ịnyị, chajị ká ọmyịmyị ọlala nyanụ á ka kpụ nịrọ ẹla ọjẹ́jẹ nya angịnyị ehe kpong-kpong ka. Ma, kọ ka jẹ́-ẹ kpụ nịrọ ọngịrị nya Ohe Oluhye ayịdang ụbwọọmwụ kem.

⁶Ma, ẹ-ẹga nya angịlẹ kị ri angịgbahị ẹ-ẹpwụ nya ẹla nya Ohe Oluhye lẹ, ahị kaa ya ẹla ọjẹ́jẹ okpori-kpori nya Ohe Oluhye jaa. Ma, ẹla ọjẹ́jẹ ọọwa á tị ri ụma nya ẹla ọjẹ́jẹ nya alodehe ọlẹ kpong-kpong ka. Lee, ẹla ọọwa o-ri ụma nya ẹla ọjẹ́jẹ nya angị ji iwe-ahụrụ nya eji ogbegbe olodehe ọlẹ ká ayịreji ọtata nyaa juwa godayị gbaa ka ịnyịnyị.

⁷Ma, ẹla ọjẹ́jẹ ọlẹ kahị kaa ya dodehe ri ẹla ọjẹ́jẹ ọkpịbaa chajị nya ọchịda nya Ohe Oluhye ọlẹ ká Ohe Oluhye ayịdang me obyi nyamwụ nọ ene-ene nya ọmwụ ọdada nya odehe ọlẹ. Chajị ká ẹla ọọwa ka họ kahị ka jẹ́-ẹ bá ogbo ọlẹbyẹbyị nyamwụ bá la tọọ ịnyịnyị.

⁸Ọngọngọhẹ lẹpwụ nya alegbeju igbeji nya odehe ọlẹ á jẹ́ ẹlẹlẹhẹ chajị nya ẹla ọkpịbaa chajị nya ọchịda ọọwa kpong-kpong ka. Ó-ri kị jẹ́ ịnyị lẹ, ịnọ, ị́ ka myịmyị-ị̀ wu Ayịbaba nya ogbo ayịdang kpa kaka gu iloo ba okoji tụtụm kaka.

⁹Ma, ị tị da kpehe ụ-Ụpwụ Ịgọgọ ẹ-ẹgẹlẹ yẹkẹẹ, “Ụma nya ang ịnyịịla ịlẹ ká ẹhị nya ọngịnyị ehe á yẹ ẹnẹnẹhẹ lẹka, lee, ụrụ nyamwụ owowo lẹka, lee, irya nya ang ịịwa o-ju ka ẹpwụ ọkịlẹtụ nyamwụ ẹnẹnẹhẹ lẹka, a ri ụma nya ang ịnyịịla ịlẹ ká Ohe Oluhye nwụla nọ gbe angịlẹ kị la ọháha ẹ-ẹga nyamwụ lẹ.”

¹⁰Ma, Ohe Oluhye tị chị ang ịịwa ehe hahị bwula Olegu Ịgọgọ nyamwụ lẹ. Chajị Olegu Ịgọgọ a jẹ́ ang myị́ ang wuu kaa ya dodehe lẹ. Ee, Ọwa-à jẹ́ ang ikpori-kpori nya Ohe Oluhye wuu bala ọ-kaa bwurwaa ya dodehe myị́ jehi ịnyịnyị lẹ.

¹¹Chajị jaabwọ ká olegu ọlẹpwụ nya ọngịnyị ehe kem a kaa jẹ́ irya ọlẹpwụ nyamwụ wuu cheri-cheri wẹẹ, ịnyịnyị, Olegu Ịgọgọ nya Ohe Oluhye ụbwọọmwụ kem a tịtị kaa jẹ́ ẹla ọlẹpwụ nya Ohe Oluhye wuu cheri-cheri lẹlẹ.

¹²Olegu ọlẹ ká Ohe Oluhye tị ya hahị ahị angịnyị nyamwụ lẹ, ó-ri olegu nya odehe ọlẹ ka. Ma, Olegu nya Ohe Oluhye ịnyị! Ọ ya hahị ịnyị chajị kahị ka jẹ́-ẹ jẹ́ ang yẹẹyẹẹ chajị nya ịhaha ịlẹ wuu ká Ohe Oluhye hu hahị bwula ọnahị nyamwụ ododu.

¹³Ẹla ọọwa ọlẹ kanụ ye bwu ẹga nya Ohe Oluhye ene, ahị kaa kpa kaka ya je angịnyị ehe lẹ. Áhị́ tị ye ẹla ọọwa bwula ọmẹjẹ nya ẹla ọjẹ́jẹ nya ọngịnyị ehe kpong-kpong ka. Ma, ẹla ọọwa bwula ọmẹjẹ ọlẹ kọ bwu ẹga nya Olegu Ịgọgọ. Ịnyị a du kahị kaa chụ ang nya Olegu kaka pwoku ang nya olegu ha angị la Olegu Ịgọgọ nya Ohe Oluhye kem lẹlẹ.

¹⁴Ma, angịlẹ kị la Olegu Ịgọgọ nya Ohe Oluhye ka lẹ, angịịwa á kaa jẹ́-ẹ ye ọmẹjẹ nya Olegu Ịgọgọ juwa kpa họ ụkụrwọ myị́ ka! Chajị, ang ịịwa ri ang uchi ị-ịlahị nya angị ịlịnyị wuu. Ọngọ ọlịnyị á tị dọmwụ ka jẹ́-ẹ wo ala ịịwa myịmyị myị́ kpong-kpong ka. Chajị, Olegu nya Ohe Oluhye ụbwọọmwụ kem, a kaa mẹ apyobwuna ojuju nya ang myị́ ang wuu jẹ ọngịnyị ehe du kị kaa jẹ́-ẹ jẹ́ ang ọhagụ datị lẹ.

¹⁵Ọngọlẹ kọ la Olegu Ịgọgọ nya Ohe Oluhye lẹ aalẹ, ọngọọwa ka jẹ́-ẹ jẹ́ ang o-ju apyobwuna datị hi ọkịla pyii lẹ. Ma, ọngịnyị ehe ọkịla ọhẹ-lọhẹ á tị ka jẹ́-ẹ me irya ọlẹpwụ nya ọngọ ọlịnyị ẹpwụ jaabwọ kọ la datị myị́ kaka.

¹⁶Chajị, ị da kpehe ụ-Ụpwụ Ịgọgọ ẹ-ẹgẹhẹ yẹkẹẹ, “Oowo a tị́ ri ọngọ jẹ́ irya ọlẹpwụ nya Ọngọlahị Ohe Oluhye datị myị́, kpụ kọ ka jẹ́-ẹ ju Ọngọlahị irya myị́?” Ma, ahị lẹ, ahị la irya ọlẹpwụ nya ịKịrayịsị ayịdang jam ẹ-ẹpwụ nyahị lẹ.