Read idege 1 ALA ỊKỌRỊNTỊ 3 Bible Online

1 ALA ỊKỌRỊNTỊ 3 - idege bible

1 ALA ỊKỌRỊNTỊ 3

¹Anụ anyadam ẹ-ẹpwụ nya ịKịrayịsị, anụ wo mẹ! nya ẹla nya ịlẹhị ịnyị! Ḿ ka jẹ́-ẹ ya ẹla tanụ lala angị la Olegu Ịgọgọ nya Ohe Oluhye kpong-kpong ka. Ma, m jam ya ẹla tanụ lẹẹlẹẹ lala angị ri anyịhị nya imyi nya ugbinyịrọ nyanụ bala angị ri anyị anjwo ichiche ẹ-ẹpwụ nya ịKịrayịsị wẹẹ.

²Chajị ịnọ, m kpanụ la enyi nya ẹmẹ nya ẹla nya Ohe Oluhye lụka ọọwa, chajị, ḿ kpanụ la ang oriri ọnyọọngịrị kpong-kpong ka. Chajị ánụ nwụlanọ nyọka ri ang oriri ọnyọọngịrị nya ẹla nya Ohe Oluhye lụka ọọwa lẹka. Ma, lẹẹlẹẹ dọmwụ lẹ, ánụ tụtụm myịmyị nwa, ọ-ka ri ang oriri ọnyọọngịrị ọọwa myị́ lẹka pyịyọọ daalẹ ịnyịnyị.

³Chajị, anụ ri anyịhị nya imyi nya ugbinyịrọ nyanụ pyịyọọ daalẹ wẹẹ. M ya ịnyị, chajị, olegu nya ijiiji onyobyi juwa ẹ-ẹpwarịrị nyanụ. Arụ ọrụrụ bwula o-wo lawụlẹ-ka [bala ebwo ọchịchị] juwa ẹ-ẹpwarịrị nyanụ. Lẹ, ánụ jẹ́ wẹẹ yẹkẹẹ, anụ nyị ri anyịhị nya imyi nya ugbinyịrọ nyanụ ịnyịlẹhị bala o-juwa hịhị lala angị jẹ́ Ohe Oluhye jẹ́ ka lẹka?

⁴Ọlẹ ká angịhyẹ nyanụ wẹẹ yẹkẹẹ, “Am lẹ, m ri ịnya ịPọlụ.” Ká angịkịla juwa yẹkẹẹ, “Am lẹ, m ri ịnya Apolosi.” Lẹ, ọọwa á tụtụm mẹjẹẹnụ yẹkẹẹ, anụ nyị ri anyịhị nya imyi nya ugbinyịrọ nyanụ ịnyịlẹhị lẹka?

⁵Anụ ya jem wẹẹ. Oowo a tị́ ri Apolosi ọọwa? Oowo a tị́ ri ịPọlụ ọọwa ene kpong-kpong? Anchẹ i-ya ẹrụ ọnyịịla nya Ohe Oluhye ịlẹ kị kpanụ kaka myị la Ohe Oluhye kem, ị ri kaka? Ánụ́ jẹ́ ká ụkụrwọ ọlẹ ká Ọngọlahị ya ju ọngọngọọng nyahị ụ-ụbwọ, a wẹ kahị họ ẹ-ẹpwarịrị nyanụ ka?

⁶Ohe Oluhye dum ẹrụ warị kaka ya ugbe nya ẹrụ ọnyịịla nyamwụ tọ ẹpwarịrị nyanụ ene kọọ du Apolosi warị kaka da enyi jwoo. Ma, Ohe Oluhye ayịdang a tị ri ọngọ wẹẹ họ ká ẹla ọọwa juwa nwa kịlahị-ịlahị ẹ-ẹpwarịrị nyanụ lẹ.

⁷Chajị nya ọọwa lẹ, ọngọlẹ kị du ẹrụ warị kaka ya ugbe nya ẹla ọọwa tọ lẹ, ó ri ịngịngịhyẹ ka. Ọngọlẹ kọ tị warị ka da enyi ju ugbe ọọwa, á tị ri ịngịngịhyẹ ka ịnyịnyị. Kẹnẹ-kẹnẹ, Ohe Oluhye ayịdang ọlẹ kọ wẹẹ kpa ẹla ọọwa nwa ụbwọọmwụ a ri ọtọnyị lọnyị wuu lẹlẹ.

⁸Ịngịngịhyẹ á ri ang ọdatị ị-ịlahị nya Ohe Oluhye ẹ-ẹpwarịrị nya ọngọlẹ kọ ya ugbe ọọwa tọ bala ọngọ da enyi jwoo kpong-kpong ka. Chajị, Ohe Oluhye a juwa ka nwụ ọng myị́ ọng lẹpwarịrị nya angịịwa uri nya ụkụrwọ jaabwọ kị bwu họ ụkụrwọ ọọwa kaka ba lẹ.

⁹Chajị ahị angị họ ụkụrwọ ọọwa lẹ, ahị a ri alụkụrwọ ị-da Ohe Oluhye ụbwọ ẹ-ẹpwụ nya ụkụrwọ ọhọhọ nyamwụ lẹ. Anụ ayịdang a tị ri ẹrụ nya Ohe Oluhye ọlẹ kọ duuhi ẹrụ kaka tọ ugbe ụ-ụwa lẹlẹ. Anụ ayịdang a tị ri ube nya Ohe Oluhye ọlẹ kọ duuhi ẹrụ kaka nwụ́ họọ ịnyịnyị lẹ.

¹⁰Ọngịrị nya ọhaha ọnahị ọlẹ ká Ohe Oluhye hu ham lala ọngọ me ube ọ-jẹ́ ẹla, m kpa warị kaka da itiwe nya ube nyamwụ omeme ọlẹ kọ ri ẹla nya ịlẹhị wẹ ẹ-ẹpwarịrị nyanụ ene ká ọngọkịla warị kaka me ugulọ hụrwọọ lẹ! Ma, ọng myị́ ọng a juwa kpahị ju jaabwọ kọ juwa bwu me ugulọ hụrụ ube ọọwa tị mẹ.

¹¹Chajị itiwe onyeewe ọkịla ọhẹ-lọhẹ á ji ọlẹ ká ọngọngọhẹ ka da gụ ọlẹ ká Ohe Oluhye da wẹ ene kaka. IJisọsị ịKịrayịsị ayịdang kpangga a ri itiwe ọọwa ọlẹ ká Ohe Oluhye da lẹlẹ.

¹²Anụ wo mẹ! Ọng myị́ ọng a kpahị ju ụma nya ang ọlẹ kọ wẹẹ kpa me ugulọ hụrụ itiwe ọọwa mẹ. Ó-ri okpoko ịgọm ká ọngọọwa á juwa kpa me lee okpoko onyoowuru lee ẹjwọ ọ-há ụhị lụmẹ kọ kpa lee okoji lee amẹ lee awigbi kọ juwa kpa me hụrụ itiwe ọọwa aalẹ,

¹³ọngọọwa a jẹ́ mẹ! Ụka juwa warị kị ka ma ụkụrwọ nya ọng myị́ ọng wuu yẹ, chajị ẹnụtụrụ nya eje nya Ọngọlahị a ka chị ụma nya ang ọlẹ ká ụkụrwọ ọọwa ri kpangga ehe lẹlẹ. Ụka ọọwa, Ọngọlahị ka kpa ila nya eje ọlala nyamwụ ma, ụkụrwọ ọọwa yẹ, chajị kị ka jẹ́-ẹ jẹ́ jaabwọ ká ụkụrwọ nya ọngọngọọng hiigu kaka ba.

¹⁴Ó-ri ká ụma nya ang-abwọ nya ụkụrwọ ọlẹ ká ọngọọwa kpa me ugulọ hụrụ itiwe ọọwa, á be bwu ẹpwụ nya ila nya eje nya Ọngọlahị ọọwa myị́ aalẹ, ọngọọwa ka ye uri nya ụkụrwọ nyamwụ jịra.

¹⁵Ma, ọngọlẹ ká ila nya eje ọlala ọọwa á tị rụ ụma nya ang-abwọ nya ụkụrwọ nyamwụ ọọwa wuu hụrụ lẹ aalẹ, uri oyeye nya ọngọọwa ka gwọọ byi. Ma, ọwa ayịdang tị ka chịda. Ma, ọ tị ka chịpwụrụ bwu ẹpwụ nya ila nya eje ọlala ọọwa pyii lẹ.

¹⁶Ó ri ánụ jẹ́ yẹkẹẹ, anụ ayịdang nyaa ri ube ịgọgọ nya Ohe Oluhye lẹ ka? Lee, ọ-jẹ́ yẹkẹẹ, Ohe Oluhye nyị hu Olegu Ịgọgọ nyamwụ kụ ẹpwụ nyanụ ịnyịnyị lẹ ka?

¹⁷Chajị nya ọọwa lẹ, ọng myị́ ọng ọlẹ kọ bịrị ube ịgọgọ nya Ohe Oluhye ọọwa aalẹ, Ohe Oluhye tịtị ka ta ọngọọwa ayịreji ịnyịnyị! Chajị, ube ịgọgọ nya Ohe Oluhye kaa la ịgọgọ! Anụ ayịdang a tị ri ube ịgọgọ ọọwa lẹ.

¹⁸Ọngọngọhẹ nyanụ a pịrị ịlọmwụ ju koo! Ó-ri ká ọngọngọhẹ nyanụ á me irya yẹkẹẹ, ọwa nyị ri ọngọ jẹ́ ẹla ị-ịlahị nya odehe ọlẹ aalẹ, ọngọọwa a myị ọnụ nya o-ri oluchi ị-ịlahị nya alodehe ọlẹ, chajị kọ ka jẹ́-ẹ ri ọngọ jẹ́ ẹla ị-ịlahị nya Ohe Oluhye mẹ!

¹⁹Chajị ẹla ọjẹ́jẹ nya alodehe ọlẹ ri uchi ọchị́chị ẹ-ẹga ká Ohe Oluhye ji! Chajị, ị da ụ-Ụpwụ Ịgọgọ yẹkẹẹ, “Ohe Oluhye kaa wu angị jẹ́ ẹla nya alodehe ọlẹ dụyọ ẹ-ẹpwụ nya ijẹẹhị nyaa wuu myị́.”

²⁰Ị myịmyị da ẹ-ẹga ọkịla yẹkẹẹ, “Ọngọlahị Ohe Oluhye ayịdang jẹ́ yẹkẹẹ, irya ọlẹpwụ nya angị jẹ́ ẹla ilodehe ọlẹ nyị ri ang ododu.”

²¹Chajị nya ọọwa lẹ, anụ kpa ẹla ọjẹ́jẹ ọlẹpwụ nya ọngịnyị ehe ọhẹ-lọhẹ chị ogu kpong-kpong ka! Chajị ang myị́ ang wuu ri ịnyanụ.

²²Ó-ri ịPọlụ ri lee Apolosi lee ịSẹfasị ọlẹ kị wụrụ iPita ri lee odehe ọlẹ wuu lee ọhịhị lee igu lee ang ilijata wuu lee ang ịlịlahị wuu, ịwa wuu lẹ, ịnyanụ, ị ri lẹ!

²³Anụ ayịdang tị ri ịnya ịKịrayịsị. ỊKịrayịsị ayịdang tị ri ịnya Ohe Oluhye ịnyịnyị.