Read idege 1 ALA ỊKỌRỊNTỊ 4 Bible Online

1 ALA ỊKỌRỊNTỊ 4 - idege bible

1 ALA ỊKỌRỊNTỊ 4

¹Ọ chịla kanụ ka huuhi lala anchẹ nya ịKịrayịsị ẹ-ẹpwụ nya ẹrụ ọnyịịla oyaya pyẹ ọlẹ bala ọ-jẹ́ẹhị lala alegbeju ịgbahị ịlẹ ká Ohe Oluhye chụhị chụ kahị ka ri angị kpẹhị rịrị ẹrụ ọnyịịla ọkpịbaa nyamwụ ọlẹ o-ya pyẹ dodehe họọ ịnyịnyị.

²Ẹla ọkịla ri yẹkẹẹ, ang ọlẹ kị kaa tịtọ bwu ẹpwụtụbwọ nya ọngọ ri olegbeju ọgbahị ọlọdẹpwa ọlịnyị ri ká ọngọọwa ka ri ọngọ chị la o-hu ọkịlẹtụ ha pyii.

³Ma, am ayịdang lẹ, ẹla o-yem ye ya nya angịhyẹ nyanụ ịlẹ kị wẹẹ tịtọ nyọka ya eje wum wu wuu lee eje ọchịchị nya ọngịnyị ehe ọkịla u-uhye nya ọhọhọ nyam wuu, á rim ẹlẹlẹhẹ kpong-kpong ka. Am ayịdang á dọmwụ kaa la ịlọm eje kpong-kpong ka ịnyịnyị!

⁴Chajị am la ịlọm lẹ, ḿ dọmwụ jẹ́ ịngịngịhyẹ ọlẹ kam juwa họ tịpyọ datị kpong-kpong ka. Ọọwa á tị ri yẹkẹẹ, m juwa ya eje rụ ịlọm lẹ, tị koo! Chajị Ọngọlahị ayịdang a ri ọngọlẹ kọ juwa wụla ọhọhọ nyam yẹ bala ọ-ka chị eje nyamwụ la ịlọmwụ kem u-uhye nyam lẹ.

⁵Chajị nya ọọwa lẹ, anụ ri angị juwa ya eje wu ọngọngọhẹ ene nya ụka nya eje ọlala ohyẹẹkpẹ kpong-kpong ka, gbee pwụ ụka ọlẹ ká Ọngọlahị ayịdang ka mwọọgịlẹ warị mẹ. Ụka ọọwa lẹ, Ọngọlahị ayịdang a ka chị ọhọhọ ịbaa-ịbaa ịlẹpwụ nya ukpowu ehe a-ahịgboo bala ọ-ka họ ká irya ọkpịbaa ịlẹpwụ ọkịlẹtụ nya angịnyị ehe wuu ka chị ehe a-ahịgboo ịnyịnyị lẹlẹ. Ụka ọọwa kpangga, ọng myị́ ọng a ka jẹ́-ẹ la o-ya dodehe ọnyịịla u-uhye nya ọhọhọ nyamwụ wuu bwu ẹga nya Ohe Oluhye lẹlẹ.

⁶Anụ anyadam ẹ-ẹpwụ nya ịKịrayịsị, ajị nyanụ a du kam ja oja chajị nya ọhọhọ nya Apolosi bala ịnyam lala ẹla ọkpịta hanụ lẹ. Chajị kanụ ka jẹ́-ẹ jẹ́ ang bwula ọhịhị nyahị yẹkẹẹ, nyị́ chịla kaanụ nyị ka juwa me irya ogidogbo u-uhye nya ọngịnyị ehe ọhẹ-lọhẹ kpoye nya ang ọlẹ kị da ụ-Ụpwụ Ịgọgọ kpong-kpong kaka. Chajị ká ọngọngọhẹ lẹpwụ nyanụ á ka juwa ngịrị ịlọmwụ dii bwula o-juwa kpa olegbeju nyanụ ọhẹ ka uhye gụ ọngọkịla kpong-kpong kaka ịnyịnyị mẹ.

⁷Oowo a tị́ huunu ka uhye gidogbo gụ angịkịla ene? Ịngịngịhyẹ juwa ọlẹ kanụ la, kanụ ye ang ọọwa bwu ẹga nya Ohe Oluhye ene ka? Ee lẹ, ó-ri Ohe Oluhye kọ hu ang ọọwa hanụ lẹ, ịịyẹ a tị́ ri apyobwuna ẹ-ẹpwụ nya o-juwa kpa ang ọọwa chị ogu tịtị mẹ?

⁸Lẹẹlẹẹ lẹ, m jẹ́ kanụ la ang myị́ ang wuu ọlẹ kanụ tịtọ kpá lẹ! Anụ tị kpụ ụdụ chakụ-chakụ wuu ịnyịnyị lẹ! M dọmwụ jẹ́ kanụ ri ịdịrịhụ wuu hiihi ahị ayịdang kpá wuu ịnyịnyị lẹ! Ọ tị dọmwụ hám ká Ohe Oluhye họ kanụ-ụ ri ịdịrịhụ ịnyịlẹhị. Chajị kahị ka ri ịdịrịhụ juwa gbe eji tanụ ịnyịnyị!

⁹Chajị, irya omeme nyam ri yẹkẹẹ, Ohe Oluhye tụụhị ahị angịlẹ kọ chụ nya alẹrụ ọnyịịla nyamwụ ọlẹ kẹkpẹ nya angịkịla wuu i-iwe ahụrụ nya odehe ọlẹ lala angịlẹ kị kaa ya eje nya igu ọ-ka nwaa nwụ wu ị-ịlahị nya aluche wuu. Chajị, ahị ayịdang a ri ọkụmwụ ọ-kpụ ẹlẹhụ ị-ịlahị nya odehe lẹpwụ-lẹpwụ wuu, tụ ị-ịlahị nya alegu-ẹrụ nya Ohe Oluhye bala ị-ịlahị nya angịnyị ehe wuu ịnyịnyị lẹlẹ.

¹⁰Ahị lẹ, ahị ri aluchi chajị nya ẹnyị nya ịKịrayịsị lẹ. Ma, anụ tị ri angị jẹ́ ẹla ẹ-ẹpwụ nya ịKịrayịsị lẹ. Ahị ri angị dẹwụ-dẹwụ. Ma, anụ tị ri angị la gogo lụmẹ. Anụ ri angị la ihi lụmẹ ịnyịnyị. Ma, ahị tị ri angị la ẹpẹpẹ.

¹¹Chajị, pyịyọọ da warị wẹ ụka nya awa ọlẹẹlẹẹ ọlẹ lẹ, ahị ri angị jam limyi-limyi bala angị hụ limyi-enyi. Ahị ri angị ji lọhị-lọhị, ye ịwụrụ ịlahịchịng kụrụ ka. Ahị ri angị kpa nyi enyiri nya angịnyị. Ahị ri angị ju edawụ-ka ọọ-la agịlata ọgaga bwu ẹgẹhẹ ka ẹga ọkịla nyahị.

¹²Ahị kaa họ ụkụrwọ ọnyọọngịrị lụbwọ nya ịlọhị, ene kahị ka ye ang oriri ri. Ụka ká angịnyị á juwa ya ẹla onyobyi rụụhị lido-lido, ahị kaa juwa wahị kụrụ angịịwa. Ụka ká angịnyị á juwa tụụhị pyịpyị, ahị kaa juwa la ugbodu ojuju onyudiyo.

¹³Ụka ká angịnyị á juwa bịrị ẹnyị nyahị, ahị kaa juwa ya ẹla ọgẹnẹ-gẹnẹ ta angịịwa lala aligu. Dọmwụ pyịyọọ daalẹ ọlẹ, ahị angịlẹ, alodehe ọlẹ a jam hu lala ọtẹwụụ ọlịhịịhya nyaa bala o-ri ang ohideeji ọ-kpa ata ba nyaa ịnyịnyị lẹlẹ.

¹⁴Ḿ jam da ala ịlẹ du wanụ nyọka chị oyoyi junu ka! Ma, m jam daa kaka mẹ ẹla mẹ jẹ́ẹnụ lala anụ anyị nyam ịlẹ kanụ hám lụmẹ ẹ-ẹpwụ nya ịKịrayịsị ịnyị!

¹⁵Chajị, ó-riri kanụ la angịmẹjẹ ẹ-ẹpwụ nya ịKịrayịsị ju iru juju lụmẹ gbee kị ka jẹ́-ẹ jwaa jụ wawa kpá myị́ ka aalẹ, aangịịwa a ri adanụ ẹ-ẹpwụ nya ẹla nya Ohe Oluhye kaka. Chajị, am ịPọlụ ọlẹ a ri adanụ ẹ-ẹpwụ nya ịKịrayịsị iJisọsị bwula ẹrụ ọnyịịla ọlẹ kam ya junu jene lẹlẹ.

¹⁶Lẹ, m jam bịlẹnụ nya ịlẹhị-ịlẹhị yẹkẹẹ, anụ chuchuu kanụ juwa gbịlam ẹ-ẹpwụ nya abwẹla ọnyịịla ọhọhọ nyanụ ọnyị myị ọnyị wuu mẹ.

¹⁷Chajị nya ọlịnyị a du kam lẹẹ du iTimoti ẹrụ warị wẹ ẹga nyanụ lẹlẹ. ITimoti ri ọnyị nya ụbwọ nya ịlọm ọlẹ kọ hám lụmẹ ẹ-ẹpwụ nya Ọngọlahị. Ọ ri ọngọ chịla o-hu ọkịlẹtụ ha lụmẹ ẹ-ẹpwụ nya ụkụrwọ nya ịKịrayịsị ịnyịnyị! Ọwa ka warị kaka kpụnụ ịtịya jaabwọ kam kaa bwu dịrẹ ụgbẹyị nya ọhịhị nya ịKịrayịsị ẹ-ẹpwụ nya ọhịhị nyam wuu bala jaabwọ kam kaa bwu mẹ ala ịịwa jẹ ịchọọchị ọnyị myị ọnyị ọlẹ wuu kam ka, ẹ-ẹga myị́ ẹga lẹlẹ.

¹⁸Angịhyẹ nyanụ juwa hu ịlaa ka uhye gidogbo ẹ-ẹpwụ nya ọbọọchẹ ohihi, juwa me irya yẹkẹẹ, am nyị́ juwa ka warị wẹ ẹga nyanụ kaka.

¹⁹Ma, ọ́ tị ri ká Ọngọlahị á myị aalẹ, m juwa ka warị wẹ ẹga nyanụ ahyaahị! Ụka ọọwa lẹ, m ka kpẹhị nya ịlọm yẹ ụma nya ọngịrị ọlẹ ká alọbọọchẹ ịlẹpwụ nyanụ ịịwa ka kpa kpehe kpịlọ dala ẹlẹlẹ nyaa ọ-kpa ya ẹla cham-cham ọwẹ lẹlẹ.

²⁰Chajị, ịpyị Adịrahụ nya Ohe Oluhye á ri ịngịngịhyẹ nya ẹla oyaya bwu ọnụ cham cham ka. Ma, ang nya ọngịrị nya Ohe Oluhye ọ-chị ehe chị kem, ọ ri lẹ.

²¹Anụ ya jem mẹ! Anụ tị́ juwa tịtọ kam ka kpa ugboji nya alibyi oyaya lanụ ụ-ụbwọ warị wẹ ẹpwarịrị nyanụ lee ọháha ọlala bala olegu ọmịlẹ-mịlẹ nya okpunyi kem, m tị́ ka kpa warị?